༢༠༡༡ ཟླ་ ༣ ཚེས་ ༨ རེས་གཟའ་མིག་དམར།
༄༅། །འདི་གར་བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན།  བོད་ལྕགས་ཡོས་ལོའི་གནམ་ལོ་གསར་ཚེས་ཉིན་བོད་གཞུང་ཐེ་ཝན་སྐུ་ཚབ་དོན་ཁང་གི་མཆོད་ཁང་དུ་བླ་སྤྲུལ་དགེ་བཤེས་དང་། ཐེ་ཝན་དུ་གནས་སྡོད་བོད་རིགས་ཚོགས་པ། ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས་བཅས་ཀྱི་ཚོགས་མི་དང་། དོན་གཅོད་ཁང་གི་ལས་བྱེད། ཐེ་ཝན་དུ་གནས་སྡོད་བོད་མི་བཅས་མཉམ་འཛོམས་ཀྱིས་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བརྟན་ཆེད་དང་། བོད་བསྟན་སྲིད་ཀྱི་ཞབས་རིམ་སྨིན་སྒྲུབ་གནང་ཡོད་ཅིང་། དགོང་དྲོ་བོད་མི་འདུས་སྡོད་མང་བའི་ས་གནས་ཐོ་ཡོན་དུ་ཐེ་ཝན་དུ་གནས་སྡོད་བོད་རིགས་ཚོགས་པས་གོ་སྒྲིག་ཐོག་སྤྱན་རས་གཟིགས་ཆོས་ཚོགས་ནང་བོད་མི་རྣམས་མཉམ་འཛོམས་ཀྱིས་བོད་ཀྱི་ལོ་གསར་དགའ་སྟོན་ལ་རོལ་ཡོད། བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་སྐབས་དེར་བོད་མི་རྣམས་བཙན་བྱོལ་དུ་མི་ལོ་ལྔ་བཅུ་འདས་པའི་བོད་མི་སྤྱི་ཡོངས་ཀྱི་གནས་སྟངས་སྐོར་ལ་ཆེད་དུ་བཟོ་སྐྲུན་གནང་བའི་དངོས་བྱུང་གློག་བརྙན་ལེགས་གྲུབ་ཟིན་པ་དེ་བྱང་རྩེ་མཁན་ཟུར་བློ་བཟང་ཚེ་འཕེལ་རིན་པོ་ཆེ་མཆོག་དང་། སྐུ་ཚབ་དོན་གཅོད་ཟླ་བ་ཚེ་རིང་རྣམས་གཉིས་ནས་དགེ་འདུན་པ་རྣམ་པས་བཀྲ་ཤིས་པའི་ཤིས་སྨོན་འདོན་མུར་དང་ལྷན་དབུ་འབྱེད་གནང་། དེ་ནས་རིན་པོ་ཆེ་མཆོག་གིས་བོད་མི་རྣམས་ལ་བླང་དོར་གྱི་གསུང་བཤད་གནང་དོན། ང་ཚོ་བོད་མི་རྣམས་དཀའ་སྡུག་འོག་ནས་བཙན་བྱོལ་དུ་གྱར་དགོས་བྱུང་བ་རེད། གཞིས་བཞུགས་བོད་མི་རྣམས་ད་དུང་ཡང་སྔར་བཞིན་སྡུག་བསྔལ་མྱངས་དང་མྱོང་བཞིན་ཡོད་པས། ཕྱི་ལ་ཡོད་པའི་བོད་མི་ཚོས་ཧུར་ཐག་བྱེད་དགོས། ཕྱོགས་མཚུངས་ང་ཚོས་ལྷ་སྲུང་བསྟེན་ཕྱོགས་སྐོར་ལ་གཟབ་གཟབ་བྱེད་དགོས་པ་ཞིག་ཡིན། བོད་གཞུང་གི་སྲུང་མ་ནི་དཔལ་ལྡན་ལྷ་མོ་ཡིན་པར་བརྟེན། བོད་མི་ཚོས་སྲུང་མ་དེ་རང་བསྟེན་ན་འགྲིག་པས་དེ་མིན་སྲུང་མ་གཞན་བསྟེན་དགོས་དོན་མེད། དེ་བཞིན་ཁོང་གིས་ཐེ་ཝན་དུ་བཞུགས་པའི་བོད་མི་རྣམས་ནས་བོད་གཞུང་སྐུ་ཚབ་དོན་གཅོད་ཀྱི་འོག་ཤར་བསྐྱོད་དགོས་པའི་ལམ་སྟོན་གནང་ཡང་ཡོད། དེ་རྗེས་སྐུ་ཚབ་དོན་གཅོད་ཀྱིས་བོད་ཕྱི་ནང་གི་བོད་མིའི་གནས་བབ་དང་། དེང་སྐབས་ཐེ་ཝན་ནང་རྒྱ་ནག་སྐམ་ས་ནས་ཉིན་ལྟར་རྒྱ་མི་རིགས་སུམ་སྟོང་ལྷག་ཡུལ་སྐོར་སྤྲོ་འཆམ་དུ་ཡོང་གི་ཡོད་སྟབས། ས་གནས་དེ་བོད་དོན་དྲིལ་བསྒྲགས་བྱ་ཡུལ་གལ་གནད་ཆེ་བ་ཡིན་སྐོར་དང་། ཐེ་ཝན་དུ་གནས་སྡོད་བོད་རིགས་ཚོགས་པ་སོགས་ཀྱི་ཚོགས་མི་རྣམས་ཀྱིས་ད་ཕན་བོད་དོན་ཐོག་ལས་དོན་ཧུར་ཐག་གནང་ཡོད་ལ་ད་དུང་མུ་མཐུད་གནང་སྐྱོང་ཡོང་བ་སོགས་ཀྱི་གསུང་བཤད་གྲུབ་རྗེས། དུས་ཡུན་སྐར་མ་ ༩༠ ཡོད་པའི་གློག་བརྙན་དེ་སྟོན་སྐབས་དེར་འདུས་བོད་མི་དང་ཐེ་ཝན་མི་རིགས་རྣམས་ལ་ལོ་གསར་གྱི་ཕྱག་རྟགས་ཆེད་གོང་གསལ་གློག་བརྙན་གྱི་འོད་སྡེར་རེ་གནང་ཡོད་པ་བཅས། །