༢༠༡༡ ཟླ་ ༣ ཚེས་ ༢༡ རེས་གཟའ་ཟླ་བ།
༅༅། །འདི་གར་ཉི་ཧོང་དོན་གཅོད་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༣ ཚེས་ ༡༩ ཉིན་ཉི་ཧོང་གི་རྒྱ་ས་ཊོག་ཁྱོའི་ནང་རྟེན་གཞི་བྱས་པའི་གོ་ཀོ་ཇི་(Gokoji) དགོན་པར་ཉི་ཧོང་ནང་ས་ཡོ་གྱི་གོད་ཆག་ཕོག་པ་རྣམས་ཀྱི་ཆེད་ཉི་ཧོང་གནས་སྡོད་བོད་རིགས་སྤྱི་མཐུན་ཚོགས་པས་གོ་སྒྲིག་ཐོག་སྨོན་ལམ་གསུང་འདོན་གནང་ཡོད། དེ་ཡང་མི་གྲངས་ ༦༠ ཙམ་གྱིས་གྲོང་ཁྱེར་ནང་རྡུལ་ཕྲན་གྱི་འོད་ཟེར་འཇིགས་སྣང་ལ་མ་ལྟོས་པར་སྨོན་ལམ་ནང་མཉམ་ཞུགས་གནང་ཡོད། སྐབས་དེར་ཉི་ཧོང་སྐུ་ཚབ་དོན་ཁང་གི་འབྲེལ་མཐུད་པ་ཚེ་དབང་རྒྱལ་པོ་ལགས་ཀྱིས་གསུང་དོན། སྨོན་ལམ་འདི་བཞིན་གསུང་འདོན་གནང་དགོས་དོན་ནི་ས་ཡོམ་གྱི་གོད་ཆག་འོག་ཚེ་སྲོག་ཤོར་བ་རྣམས་དང། རྨས་སྐྱོན་ཕོག་པ་རྣམས་མྱུར་དུ་དྲག་སྐྱེད་ཡོང་རྒྱུ་དང། དཀའ་སྡུག་མྱོང་བཞིན་པ་རྣམས་དཀའ་ངལ་དེ་ལས་གྲོལ་ཆེད་ཚོགས་པ་ཞིག་ཡིན། ང་ཚོ་བོད་པ་ཚོས་ངོས་ནས་ཉི་ཧོང་གི་མི་མང་རྣམས་ལ་དཀའ་ཚེགས་ཀྱི་དུས་ཚོད་འདིར་བློ་ཕམ་དང་གདུང་སེམས་མཉམ་སྐྱེ་ཡོད། ཉི་ཧོང་གི་རྒྱལ་ཁབ་འདིས་འཛམ་གླིང་ནང་འབྱུང་བའི་གནོད་ཚེ་ནམ་བྱུང་སྐབས་རོགས་སྐྱོར་བྱེད་མཁན་ཡག་ཤོས་གྲས་ཡིན་སྟབས། ད་ལྟ་འཛམ་གླིང་གིས་ཁོང་ཚོར་དྲིན་ལན་འཇལ་རྒྱུའི་དུས་ཚོད་བསླེབས་ཡོད་ཅེས་གསུངས་ཡོད། དེ་བཞིན་ཉི་ཧོང་བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ལགས་ཀྱིས་སྨོན་ལམ་ནང་མཉམ་ཞུགས་གནང་མཁན་ཚོར་ཐུགས་རྗེ་ཆེ་ཞུས་ཡོད། ཕྱོགས་མཚུངས་སྨོན་ལམ་ནང་མཉམ་ཞུགས་བྱེད་མཁན་ཉི་ཧོང་མི་མང་གིས་སྨོན་ལམ་གོ་སྒྲིག་བྱེད་མཁན་དང་བོད་རིགས་རྣམས་སྨོན་ལམ་ནང་མཉམ་ཞུགས་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། དེར་ཡོད་ཉི་ཧོང་གི་བུད་མེད་གཅིག་གིས་མིག་འཆི་མའི་ཁེངས་ཏེ་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་ནང་དེ་སྔོན་བྱུང་མྱོང་མེད་པའི་འབྱུང་བའི་གནོད་འཚེ་ཕོག་པ་རྣམས་ཀྱི་ཆེད་གསོལ་འདེབས་སྨོན་ལམ་མཛད་པར་བཀའ་དྲིན་རྗེས་དྲན་ཞུས་ཡོད། ཕྱི་ཟླ་ ༣ ཚེས་ ༡༡ ཉིན་ཉི་ཧོང་གི་བྱང་ཤར་ཕྱོགས་ལ་ས་ཡོམ་གྱིས་རྐྱེན་པས་ཆུ་ལོག་ཚབས་ཆེའི་འོག་མི་གྲངས་ཆིག་སྟོང་འདས་གྲོངས་སུ་ཕྱིན་པ་དང་། མང་ཚོགས་ཀྱི་རྒྱུ་དངོས་ཐོག་གྱོན་གུན་ཤུགས་ཆེ་བྱུང་ཡོད། ད་ལྟའི་ཆར་ཉི་ཧོང་གཞུང་ནས་ཕུ་ཀུ་ཤི་མའི་ནང་ཡོད་པའི་རྡུལ་ཕྲན་གྱི་ཉེན་ཁ་དེ་ལས་སྐྱོབ་ཐབས་བྱེད་བཞིན་ཡོད་པ་བཅས།།
