༢༠༡༡ ཟླ་ ༢ ཚེས་ ༡༩ རེས་གཟའ་སྤེན་པ།
༅༅། །རྒྱ་གར་རྒྱལ་ས་ལྡི་ལིའི་ནང་རྟེན་གཞི་བྱས་པའི་(The Indira Gandhi National Open University (IGNOU) ཞེས་པའི་སློབ་གཉེར་ཁང་གིས་ཕྱི་ལོ་ ༢༠༡༡ ཟླ་ ༢ ཚེས་ ༡ ཉིན་སློབ་གཉེར་ཁང་དེའི་སྤྱི་ཚོགས་ཞབས་ཞུའི་སློབ་གྲྭའི་ནང་བོད་སྐོར་སློབ་གཉེར་གྱི་བསྟི་གནས་ཁང་ཞིག་ཟུར་འཛུགས་གནང་རྒྱུའི་གསལ་བསྒྲགས་ཤིག་སྤེལ་འདུག བསྟི་གནས་ཁང་དེ་ནི་རྒྱ་གར་དང་བལ་ཡུལ་ནང་བོད་ཀྱི་རིག་གཞུང་ཆགས་འཇིག་གི་མཚམས་ལ་བསླེབས་ཡོད་པ་དེ་སྲུང་སྐྱོབ་བྱེད་ཆེད་ཟུར་འཛུགས་གནང་བ་ཞིག་ཡིན་འདུག བསྟི་གནས་ཁང་དེའི་ནང་སློབ་ཚན་ཉེ་བའི་གཙུག་ལག་རབ་འབྱམས་པ་དང། གཙུག་ལག་རབ་འབྱམས་པ། M.Phil/Ph.D. ནང་པའི་ལྟ་གྲུབ། ཆོས་ལུགས་ཀྱི་རྣམ་གཞག་བཅས་སློབ་གཉེར་བྱེད་རྒྱུའི་ཁོངས་སུ་འཇོག་རྒྱུ་ཡིན་པ་དང། སློབ་གཉེར་བ་གང་ཞིག་བསྟི་གནས་ཁང་དེ་ནས་བསླབ་པ་ཐར་སོན་རྗེས་ལག་འཁྱེར་དེ་(IGNOU) དང་ཝར་ཎཱ་བོད་ཀྱི་གཙུག་ལག་སློབ་ཁང་གཉིས་ཟུང་འབྲེལ་ཐོག་གནང་རྒྱུ་ཡིན་འདུག དེ་སྔ་(IGNOU) སློབ་གཉེར་ཁང་དེའི་ཉེ་བའི་རིགས་བདག་(Prof. V.N. Rajasekharan Pillai) ལགས་ཀྱིས་ཡེ་ཤུའི་ཨ་མ་ཊི་རེ་སའི་དྲན་རྟེན་མཛད་སྒོའི་ཐོག་ཐག་གཅོད་གནང་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མ་དང་བྱམས་བརྩེ་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། དེ་བཞིན་སྐུ་སགེར་ཡིག་ཚང་ནས་བསྟི་གནས་ཁང་དེ་འཛུགས་སྐྲུན་གྱི་ཆེད་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་བརྒྱུད་ཧིན་སྒོར་འབུམ་ལྔ་སློབ་གཉེར་ཁང་དེའི་ཉེ་བའི་རིགས་བདག་(Prof. V.N. Rajasekharan Pillai)ལགས་ལ་ཕུལ་ཡོད་པ་བཅས།།