༢༠༡༡ ཟླ་ ༢ ཚེས་ ༡༨ རེས་གཟའ་པ་སངས།
༅༅། །ཕྱི་ལོ་ ༢༠༡༡ ཟླ་ ༢ ཚེས་ ༡༧ ཉིན་གྱི་ཕྱི་དྲོ་བྷར་ལིན་དུ་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་བོད་རིགས་དང་བོད་དོན་རྒྱབ་སྐྱོར་བ་རྣམས་ལ་གསུང་བཤད་གནང་ཡོད། དེ་ཡང་བཀའ་ཁྲི་མཆོག་གིས་གསུང་དོན། བརྩེ་བའི་བོད་ཀྱི་གྲོགས་པོ་རྣམ་པ། ཁྱེད་རྣམ་པས་བོད་དོན་ཐོག་རྒྱབ་སྐྱོར་གཡོ་བ་མེད་པ་གནང་བར་བཀའ་ཤག་གི་ངོས་ནས་བཀའ་དྲིན་རྗེས་དྲན་ཞུ་རྒྱུ་ཡིན། དེ་བཞིན་མུ་མཐུད་བོད་དོན་ཐོག་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཉེ་ཆར་ཨ་རབ་ཀྱི་ལུང་པའི་ནང་འགྱུར་བ་ཕྱིན་པ་བཞིན་འཛམ་གླིང་ནང་གི་གནས་སྟངས་ཐོག་འགྱུར་བ་ཤུགས་ཆེ་འགྲོ་བཞིན་ཡོད། རྒྱ་ནག་གི་གཅིག་སྡུད་དབང་འཛིན་དེ་ཡང་སྔར་བཞིན་གནས་ཐུབ་ཀྱི་མ་རེད། རྒྱ་ནག་ནང་བཟང་ཕྱོགས་ཀྱི་འགྱུར་བ་ཞིག་བྱུང་སྐབས་བོད་མི་
རྣམས་ལ་ཡང་རང་དབང་ཏན་ཏན་ཐོབ་ཀྱི་རེད། འགྱུར་བ་དེར་སྔོན་དཔག་བྱེད་དཀའ་བ་རེད། འོན་ཀྱང་རྒྱ་ནག་སྐམ་ས་ཆེན་པོའི་ནང་འགྱུར་བ་ཤུགས་ཆེ་འགྲོ་བཞིན་པ་དེར་གཞིགས་ན་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་མི་མང་ཚོར་རང་དབང་གི་རྨི་ལམ་དེ་གང་མྱུར་སྒྲུབ་རྒྱུའི་རེ་བ་ཡོད། ཅེས་སོགས་གསུངས་ཡོད། བཀའ་ཁྲི་མཆོག་གིས་བོད་རིགས་གཞོན་སྐྱེས་ཚོའི་ནང་རྒྱལ་གཅེས་རྒྱུན་གནས་ཡོད་པའི་དྲི་བར་ལན་འདེབས་གནང་དོན། ང་ཚོའི་མི་རབས་རྒན་པ་ཚོ་ལས་ཀྱང་གཞོན་སྐྱེས་རྣམས་སེམས་ཤུགས་ཆེ་བ་མཐོང་གི་འདུག དེ་ངོ་མཚར་ཅན་ཞིག་རེད། གཞིས་ལུས་རྒྱ་ཆེའི་མི་མང་ནང་ལོ་ ༥༠ མ་ལོན་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་མཇལ་མྱོང་མེད་པ་མ་ཟད། བོད་ཀྱི་གནའ་བོའི་རིག་གཞུང་མཐོང་མྱོང་མེད། བོད་རིགས་ན་གཞོན་རྣམས་རྒྱ་ནག་གི་དབང་འཛིན་འོག་འཚར་ལོངས་བྱས་ཡོད་ཀྱང་༸གོང་ས་མཆོག་དང་བོད་ཀྱི་ཆོས་དང་རིག་གཞུང་ལ་དད་པ་དང་ཡིད་ཆེས་བརྟན་པོ་དང་ཤུགས་ཆེ་བྱེད་བཞིན་ཡོད། གལ་ཏེ་ཁྱེད་རང་ཚོའི་བོད་ནང་བྱུང་བའི་ཕྱི་ལོ་ ༢༠༠༨ ལོའི་ཞི་བའི་གྱེན་ལངས་དེར་ཞིབ་འཇུག་གནང་ཚེ་གྱེན་ལངས་ནང་མཉམ་ཞུགས་བྱེད་མཁན་བརྒྱ་ཆ་བརྒྱད་བཅུ་བརྒལ་བ་མི་རབས་གཞོན་པ་ཚོ་ཆགས་ཡོད། ནུབ་ཕྱོགས་རྒྱལ་ཁབ་ནང་བོད་རིགས་གཞོན་སྐྱེས་ཁ་ཤས་ཀྱིས་བོད་སྐད་ཤེས་ཀྱི་མེད་ནའང་བོད་དོན་དང་འབྲེལ་བའི་ལས་འགུལ་ཐོག་མཉམ་ཞུགས་བྱེད་རྒྱུར་སེམས་ཤུགས་ཆེན་པོ་ཡོད། ཁོང་ཚོའི་རྒྱལ་གཅེས་དང་རང་དབང་གི་འཐབ་རྩོད་ཐོག་དོན་གཉེར་བྱེད་རྒྱུ་དེ་གཞོན་སྐྱེས་གཞན་ལས་ཤུགས་ཆེ་བ་མེད་ནའང་ཆུང་བ་མེད། འདི་ནི་ངས་བོད་མི་རྣམས་ཀྱི་མཉམ་དུ་ལས་ཀ་བྱས་པའི་ཉམས་མྱོང་ཞིག་ཡིན། ཞེས་སོགས་གསུངས་ཡོད།
