༢༠༡༡ ཟླ་ ༢ ཚེས་ ༥ རེས་གཟའ་སྤེན་པ།
༄༅། །ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༢ ཚེས་ ༤ ཉིན་གྱི་སྔ་དྲོ་ཆུ་ཚོད་ ༡༠།༡༥ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་སྟག་ལུང་རྩེ་སྤྲུལ་རིན་པོ་ཆེ་མཆོག་གི་དགོན་པའི་གཙུག་ལག་ཁང་དབུ་འབྱེད་བསྐྱངས་ཏེ་རྟེན་དང་བརྟེན་པ་བཅས་ལ་རབ་གནས་བཀྲིན་ཆེ་བ་མཛད་རྗེས་བཞུགས་ཁྲིར་༸ཞབས་སོར་འཁོད་དེ་བཀའ་སློབ་ཕེབས་དོན། དེ་རིང་འདིར་གཙོ་བོ་རྩེ་སྤྲུལ་རིན་པོ་ཆེ་སྐུ་གཟུགས་ལྗིད་པོ་ཞེ་དྲག་རེད་ཀྱང་འདིར་ཆེད་མངགས་ཕེབས་པར་ཐུགས་རྗེ་ཆེ་ཞུ་གི་ཡིན། འདི་གར་སྔོན་མ་སྟག་ལུང་དགོན་པ་ཆུང་ཆུང་ཞིག་ཡོད། དེ་དུས་སློབ་དཔོན་དེ་དབུ་དཀར་པོ་ཞིག་ཡོད། ངོས་ཀྱི་རྟག་ཏུ་ཁོང་ལ་ཁྱེད་རང་ཐང་སྟོང་རྒྱལ་པོ་ལྟར་རེད་རྒས་རྒྱུ་ཁྱོན་ནས་མེད་པ་ལྟ་བུ་ཞིག་ཡོད། དངོས་གནས་གྲོགས་པོ་ཡག་པོ་ཞིག་ཡིན། སྙིང་རྗེ་ད་ཆ་ཁོང་གྲོངས་ཚར་བ་རེད། ཡིན་ནའང་འདི་གར་གཙོ་བོ་རྩེ་སྤྲུལ་རིན་པོ་ཆེས་ཐུགས་ཁུར་བསྐྱེད། འདི་གར་བྱུང་ཐོ་ཞིག་འདུག་པ་དེའི་ནང་གི་འབྲེལ་ཡོད་སྦྱིན་བདག་དེ་དག་གི་རོགས་རམ་འོག་གཙུག་ལག་ཁང་འདི་འདྲ་ཞིག་བཞེངས་གྲུབ་པ་ཡག་པོ་ཞེ་དྲག་བྱུང་འདུག དང་པོ་དེར་བཀྲ་ཤིས་བདེ་ལེགས་ཞུ་རྒྱུ་ཡིན། ད་ལྟ་འདི་གར་རིག་འཛིན་དཔལ་སྦྱིན་གྱི་སྐུ་བརྙན་འདུག་རིག་འཛིན་དཔལ་མ་འཕྲིན་ལས་སྐྱབས་སུ་མཆི་༸གོང་ས་ལྔ་པ་ཆེན་པོའི་གསང་བ་རྒྱ་ཆེའི་ཆོས་བདག་གྲས་ཤིག་ཡིན་པ་རེད། རིག་འཛིན་འགྱུར་མེད་རྡོ་རྗེ་དང་རིག་འཛིན་དཔལ་སྦྱིན་གཉིས་ཐུན་མོང་མ་ཡིན་པ་རེད། རིག་འཛིན་དཔལ་སྦྱིན་དགུང་ལོ་མཐོ་ཙམ་རེད། སྐུ་བརྙན་འདི་སྐུ་གཞོན་ནུའི་སྐབས་ཀྱི་ཡིན་པའི་བཟོ་འདྲ་གཞོན་གཞོན་ཞིག་འདུག
འདི་གར་བྱང་གཏེར་གྱི་བསྟན་པ་འཛིན་མཁན་ཞིག་བྱས་ཏེ་གདན་ས་ཆགས་ཡོད། ཁྱེད་རང་ཚོས་འདི་གར་ཐུགས་ཁུར་བསྐྱེད་ནས་སྐུ་ངལ་མང་པོ་སྐྱོན་པ་དེར་ཐུགས་རྗེ་ཆེ་ཞེས་ཞུ་གི་ཡིན། གཙུག་ལག་ཁང་གྲུབ་ནས་དེའི་ནང་གཙོ་བོ་ཆོས་སྤྱོད་བཤད་སྒྲུབ་ཟུང་འབྲེལ་ཞིག་དགོས་རྒྱུ་ཧ་ཅང་གལ་ཆེན་པོ་རེད། དགོན་པ་གྲྭ་ཚང་ཕྱིའི་སྣོད་སྤུས་དག་པོ་དང་རྒྱ་ཆེན་པོ་ཞེ་དྲག་ཡོད་ཀྱང། ནང་ལ་བཤད་སྒྲུབ་འཆད་ཉན་བྱེད་མཁན་གདེང་འཁེལ་བ་ཞིག་མེད་ན་དེ་འདྲ་ཞིག་རེད། དེ་སྔའི་ང་ཚོའི་བོད་ཀྱི་ཉམས་མྱོང་ཐོག་ནས་མཐོང་རྒྱུ་དེ་རེད། དགོན་པ་ཁྲི་ཕྲག་མང་པོ་ཡོད་ལ་སྤུས་དག་པོ་ཡང་ཞེ་དྲག་ཡོད། འོན་ཀྱང་སྤུས་མ་དག་པ་མིང་ཙམ་དང་ཡང་སྐབས་རེ་འགའ་ཤས་དཔལ་འབྱོར་འདུ་འགོད་བྱེད་སའི་བཟོ་འདྲ་དང་། དེ་བཞིན་་བླ་མའི་བླ་བྲང་མང་པོ་ཞིག་དཔལ་འབྱོར་འདུ་འགོད་བྱེད་མཁན་བཟོ་འདྲ་རེད་མ་གཏོགས་བསྟན་པའི་ཞབས་འདེགས་སྒྲུབ་མཁན་བཟོ་འདྲ་ཞིག་མི་འདུག དེ་རིང་ཁ་སང་ཡང་བོད་ནང་གི་དགོན་པ་ཁ་ཤས་ཀྱི་བླ་མ་དེ་འདྲ་རྒྱ་ནག་ནང་ཆོས་ཤོད་དུ་ཕྱིན་ཏེ། དངུལ་ཏོག་ཙམ་བྱུང་ན་སོ་སོའི་བླ་བྲང་དང་ཁང་པ་རྒྱ་བསྐྱེད་བྱས་པ་དེ་དག་ནི་དཔལ་འབྱོར་འདུ་འགོད་བྱེད་མཁན་ལྟ་བུ་མ་གཏོགས་གཞན་གང་ཡང་མི་འདུག འདི་གར་ང་ཚོ་བཙན་བྱོལ་བ་བྱས་ཏེ་བསྡད་ཡོད། འདི་གར་གཙུག་ལག་ཁང་དང་དགོན་པ་སོགས་རིས་མེད་ཀྱི་ཆོས་ཁང་གང་འདྲ་ཞིག་ཡིན་ནའང་ཚང་མ་བཤད་སྒྲུབ་གཉིས་ཀྱི་ཐོག་ནས་བསྟན་པ་འཛིན་སྐྱོང་སྤེལ་གསུམ་གནང་རྒྱུ་དེ་ཡིན་གཅིག་མིན་གཅིག་ཐུགས་ལ་འཇགས་པ་གནང་རོགས་ཞུ་གི་ཡིན། ངོས་ཀྱིས་འབྲས་ལྗོངས་ཕྱོགས་ལ་ཡིན་ནའང་རེད། ལ་དྭགས་ཕྱོགས་ལ་ཡིན་ནའང་རེད། རྟག་ཏུ་འབོད་སྐུལ་བྱེད་ཀྱི་ཡོད། ང་ཚོ་བོད་པའི་སྤྱི་ཚོགས་ཟེར་ནའང་མི་འདུག་གང་ལྟར་ནང་པའི་སྤྱི་ཚོགས་ནང་དགོན་པ་ཡོད་པ་དེ་དག་མིའི་བློ་ལ་དགོན་པ་འཆར་ཡོང་དུས་སྤྱིར་སློབ་གཉེར་ཁང་ཡིན་བསམ་པ་ཞིག་འཆར་ཐུབ་པ་དེ་འདྲ་ཞིག་དགོས་ཀྱི་འདུག དེར་བརྟེན་དགོན་པ་ཚོས་སློབ་སྦྱོང་ཐོག་ཐུགས་སྣང་གནང་རྒྱུ་དང༌། དགོན་པའི་སྒྲིག་ལ་ཡོད་པའི་དགེ་འདུན་པ་དེ་དག་དང་འབྲེལ་བའི་སྒྲུབ་པ་སྒྲུབ་ཆེན་དེ་འདྲ་འཚོགས་རྒྱུའི་རིགས་ངེས་པར་དུ་དགོས་ཀྱི་རེད། དེ་ཡོང་བར་དབང་དང་བསྙེན་པར་དང་དོད་བྱས་ཏེ་མཚན་ཉིད་ཚང་བ་ཞིག་གི་ཐོག་ནས་སྒྲུབ་མཆོད་དུས་མཆོད་ཚུགས་ཐུབ་རྒྱུ་ཞིག་དང་། དབང་དང་བསྙེན་པའི་སྐད་ཆ་གང་ཡང་མེད་པར་ཆོ་ག་བློ་ལ་འདོན་ཤེས་ཙམ་དང་ཕྱག་རྒྱ་ཏོག་ཙམ་ཤེས་པ་ཙམ་གྱི་ཆོག་ཤེས་མེད་པ་བྱེད་རྒྱུ་དེ་ཞེ་དྲག་གལ་ཆེན་པོ་མཐོང་གི་འདུག
མདོར་དོན་ཡང་སྙིང་ང་ཚོས་ཆོས་དང་འཇིག་རྟེན་གང་ཡིན་ནའང་ཁ་ཡོད་ལག་ཡོད་དགོས་ཀྱིས་མ་གཏོགས་སྤམ་པོ་ཞིག་དང་འཁྲབ་བཞག་པའི་བཟོ་འདྲ་བྱས་ན་ཡག་པོ་མི་འདུག ཁ་སང་མཐོ་ལྡིང་ལའང་ཞུ་རྒྱུ་བྱུང་ཁོང་ཚོ་གྲྭ་པ་ཁ་ཤས་ཤིག་ལས་མི་འདུག སློབ་སྦྱོང་ཡོད་པའི་གྲྭ་པ་གཉིས་ཡོད་ཁོ་གཉིས་ནི་གྲྭ་པ་ལོག་ཚར་འདུག་གང་ཡང་མི་འདུག་ཅེས་ཟེར་གྱི་འདུག དེ་འདྲ་བྱས་ཏེ་སེམས་ཞུམ་རྒྱུ་མེད་ག་ཚོད་ཐུབ་ཐུབ་ཀྱིས་ནང་ཆོས་ངོ་སྤྲོད་མཚོན་པའི་སློབ་སྦྱོང་ཞིག་སྤྲོད་ཐུབ་ན་བསླབ་སྐྱོན་བྱུང་ནའང། སོ་སོའི་མི་ཚེའི་ནང་སློབ་སྦྱོང་བྱས་བཞག་པ་དེ་དག་ཕན་ཐོགས་ཡོང་གི་རེད། དགོན་པའི་ནང་བསྡད་ནས་ཆོ་ག་ཕྱག་ལེན་གཅིག་པུས་རྗེས་སུ་དེས་དགོན་པ་ནས་མར་ཐོན་ཚར་ན་ཕན་རྒྱུ་གང་ཡང་མེད་། དེར་བརྟེན་དགོན་པ་ཚོས་སློབ་སྦྱོང་ཐོག་ཐུགས་སྣང་བསྐྱེད་རོགས་གནང་ཞེས་ཁ་སང་ཁ་ཉིན་ཞུ་རྒྱུ་བྱུང་ལ་ཁ་སེང་སོག་པོ་མང་པོ་ཞིག་ཐུག་པ་རེད་ཁོང་ཚོ་ལའང་ལབ་རྒྱུ་བྱུང། དེ་བཞིན་བར་སྐབས་འབྲས་ལྗོངས་དང་ལ་དྭགས་གང་དུ་བསྐྱོད་ཀྱང་་རྟག་ཏུ་ཤོད་ཀྱི་ཡོད། འདི་གར་ཡང་དབུས་གཙང་ཁུལ་གྱི་སྨིན་གྲོལ་གླིང་དང་རྡོ་རྗེ་བྲག་ཅེས་ཁུངས་གཏུགས་ས་ཆགས་ཡོད། བྱས་ཙང་སྤུས་དག་པོ་ཞིག་ཡོང་བ་བྱ་རྒྱུར་ཚང་མས་ཐུགས་འཁུར་བསྐྱེད་རོགས་གནང་ཞུ་རྒྱུ་ཡིན། འདི་གའི་ཉེ་འཁོར་མི་མང་ཚོ་ལའང་ནང་ཆོས་ངོ་སྤྲོད་ཀྱི་སློབ་སྦྱོང་སྤྲོད་རྒྱུ་གནང་ཐུབ་ན་ཡག་པོ་ཡོང་གི་རེད། སྟབས་བདེ་མ་བདེ་ཁྱེད་རང་ཚོས་དགོངས་པ་བཞེས་རྒྱུ་རེད་མ་གཏོགས་མང་ཚོགས་རྣམས་ཀྱིས་ཚེས་བཟང་དུས་བཟང་ལ་ལྷ་ཁང་ནང་ཡོང་རུབ་རུབ་བྱས་ཏེ་མ་ཎི་དང་ཚིགས་བདུན་གསོལ་འདེབས་བསགས་རྒྱུ།དེ་བཞིན་བསྟན་པ་སྤྱིའི་སྤྱི་རིམ་བསགས་རྒྱུ་བྱུང་ན་ཡག་པོ་ཡོང་གི་རེད། དུས་དུས་ལ་ནང་ཆོས་ངོ་སྤྲོད་བྱེད་ཐུབ་ན་གང་ལྟར་རྟེན་གཞི་ཡོད་པ་དེ་སངས་རྒྱས་ཀྱི་ཆོས་སློབ་སྦྱོང་བྱེད་ས་ཞིག་བྱུང་ཐུབ་ན་ཏན་ཏན་དགོན་པ་དེ་འདྲ་ཞིག་ཚུགས་པའི་གོ་ཆོད་པ་ཞིག་ཡོང་གི་རེད། དེའི་ཐོག་ལ་འདི་གའི་སྒྲིག་ཁོངས་དགེ་འདུན་པ་ཚོས་དབང་དང་བསྙེན་པ་སྔོན་དུ་སོང་བའི་ཐོག་ནས་སྒྲུབ་པ་འཚོགས་རྒྱུ་གལ་ཆེན་པོ་རེད་ལ་ཡག་པོ་འདུག དེ་ལྟར་གནང་རོགས་ཞུ་རྒྱུ་ཡིན། སླར་ཡང་རིན་པོ་ཆེར་ཐུགས་རྗེ་ཆེ་ཞུ་རྒྱུ་ཡིན།
རིན་པོ་ཆེ་དགུང་ལོ་གང་ཙམ་ཕེབས་ཡོད་པ་སྤྱིར་བསྟན་འཛིན་གྱི་སྐྱེས་བུ་དང་ཡང་སྒོས་སྔ་འགྱུར་རྙིང་མའི་ནང་ནས་དངོས་གནས་རྡོ་རྗེ་འཛིན་པ་གསུང་ལྡན་རིག་པ་འཛིན་པ། རྟེན་དགེ་སློང་ཡིན་པ་ཉུང་ཉུང་ཞིག་འདུག་ད་དུང་རིན་པོ་ཆེ་སྐུ་ཚེ་རིང་དུ་འཚོ་རྒྱུར་གཙོ་བོ་འཕྲོད་བསྟེན་གནང་རྒྱུ་གལ་ཆེན་པོ་རེད། དེ་དང་ཆབས་ཅིག་སྐུ་གཟུགས་ལ་འཕྲོད་བསྟེན་ཆེད་སྐུ་འཆམ་དུ་མང་ཙམ་ཕེབས་རྒྱུ་སོགས་གནང་རྒྱུ་གལ་ཆེན་པོ་རེད། དུས་དུས་ལ་ལྷག་པའི་ལྷ་ཡིས་མཚན་བསྙེན་གནང་རྒྱུའི་ལྟ་བུ་རྡོ་རྗེ་བྲག་མ་རེད་པས་ཚེ་སྒྲུབ་ལྕགས་གདུང་ནང་བཞིན་མཁྲེགས་པོ་ཞིག་ཡོང་རྒྱུའི་གང་ལྟར་རིན་པོ་ཆེ་དུས་དུས་ལ་སྐུ་ཚེའི་ཚེ་སྒྲུབ་ལྗགས་བསྙེན་དེ་འདྲ་ཏོག་ཙམ་གནང་ཐུབ་ན་གཙོ་བོ་འཕྲོད་བསྟེན་གནང་རྒྱུ་དེ་ཞེ་དྲག་གལ་ཆེན་པོ་རེད། མང་པོ་ཞིག་ནམ་རྒྱུན་འཕྲོད་བསྟེན་དང་ཏོག་ཙམ་མ་བདེ་བྱུང་སྐབས་ཡིད་གཟབ་བྱེད་རྒྱུ་མ་བྱུང་བར་ལྷོད་གཡེང་ཤོར། ནད་ན་ཚ་གཞི་ཆེན་པོ་ཆགས་ཚར་ན་ཞེ་དྲག་བྱེད་རྒྱུ་མེད་མཁན་ཞིག ཉེ་ཆར་བོད་ནང་གི་མི་ཞིག་རེད་དངོས་གནས་དྲང་གནས་མི་མང་ལ་ཞབས་འདེགས་སྒྲུབ་རྒྱུ་དང་ཆོས་ཕྱོགས་ནས་མི་མང་ལ་སློབ་གསོ་སྤྲོད་རྒྱུར་ཧུར་ཐག་འབད་ཐག་བྱེད་མཁན་ཞིག་འཕོ་བ་ཀན་སན་བྱུང་ནས་མང་ཆེ་བ་བཀོག་དགོས་བྱུང་བ་རེད། ལོ་གཅིག་གཉིས་ཞིག་གོང་ངོས་ལ་ཐུག་བྱུང་ཧ་ལས་པའི་སེམས་ཁུར་དང༌། ལྷག་བསམ་ཡོད་པ་བསམ་བློ་རྒྱ་ཆེན་པོ་འཁོར་ཐུབ་མཁན་ཡག་པོ་ཞེ་དྲག་འདུག་པར་ད་ཆ་འཕོ་བ་སྐྱོན་ཤོར་ཡོད་པ་རེད་ཟེར་གྱི་འདུག འདི་ཚོའི་གྲས་དེ་རྒྱུན་དུ་ང་ཚོས་འཕྲོད་བསྟེན་དང་སྤྱོད་ལམ་བྱེད་རྒྱུར་་ཡིད་གཟབ་མ་བྱུང་བར་མཐའ་མ་ནད་ཆེན་ཞིག་གི་ཟིན་ཚར་དུས་ཞེ་དྲག་བྱེད་རྒྱུ་མི་འདུག་ལ་ཞབས་བརྟན་བྱས་ནས་ཕན་རྒྱུ་མེད། སྨན་གྱི་མ་ཕན་ན་ཞབས་བརྟན་གྱི་ཁག་པོ་ཞེ་དྲག་རེད་རྩ་རླུང་ལ་དབང་ཐོབ་པ་ཞིག་ཡིན་ན་ཕྲན་བུ་ཕན་གྱི་ཡོད་འགྲོ་བ་གཏོགསགཞན་ཁག་པོ་རེད་དེ་ཞུ་འདོད་བྱུང་ཞེས་བཀའ་སློབ་ཕེབས་ཡོད། སྤྱིར་དབུ་འབྱེད་མཛད་སྒོའི་ཐོག་རྩེ་སྤྲུལ་རིན་པོ་ཆེ་མཆོག་གིས་གཙོས་གནས་ཆུང་སྐུ་བསྟེན་མཆོག་ཀྱང་མཉམ་ཞུགས་གནང་ཡོད།
དེ་རྗེས་མགོན་པོ་གང་ཉིད་མཆོག་བཙུན་དགོན་བྱང་ཆུབ་ཆོས་གླིང་དུ་ཆིབས་སྒྱུར་བཀའ་དྲིན་བསྐྱངས་ཡོད། མགོན་པོ་གང་ཉིད་མཆོག་བཙུན་དགོན་དེར་ཆིབས་སྒྱུར་སྐྱོང་སྐབས་བཙུན་དགོན་དེའི་མཁན་པོ་ཐབས་མཁས་མཆོག་གིས་སྤོས་སྣེས་སྔོན་བསུས་ནས་ཕེབས་བསུ་ཞུས་ཏེ་བཞུགས་ཁྲིར་༸ཞབས་སོར་འཁོད་གྲུབ་སྟུན་མཁན་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་མགོན་པོ་གང་ཉིད་མཆོག་གིས་བཀའ་སློབ་ཕེབས་དོན། བཙུན་མའི་དགོན་པ་ཚོས་གཞུང་ཆེན་སློབ་གཉེར་བྱས་ནས་རྩོད་ར་ཡོད་པ་དེ་གལ་ཆེན་བརྩིས་ཀྱི་ཡོད། བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་དེ་དཔལ་ནཱ་ལེནྡྲ་ནས་བརྒྱུད་པའི་ཆོས་བརྒྱུད་གཙང་མ་ཞིག་ཡིན། དཔལ་ནཱ་ལེནྡྲའི་ཆོས་བརྒྱུད་ཀྱི་འགྲོ་སྟངས་དེ་རིག་པའི་ལམ་དང་རྒྱུ་མཚན་གྱི་ཐོག་ནས་གཞི་ལམ་འབྲས་གསུམ་གྱི་རྣམ་གཞག་གཏན་ལ་ཕབ་རྒྱུ་ཞིག་ཆགས་ཡོད། བཅོམ་ལྡན་འདས་ཉིད་ཀྱི་བཀའ་གནང་བའི་ལུང་ཞིག་དྲངས་ནས་དེར་ཡིད་ཆེས་བྱས་ཏེ་སྡོད་ཀྱི་མེད། དེར་བརྟེན་བོད་གངས་ཅན་གྱི་ལྗོངས་ལ་དཔལ་ནཱ་ལེནྡྲའི་མཁས་པའི་གཙུག་རྒྱན་མཁན་ཆེན་ཞི་བ་འཚོ་རང་ཉིད་ཀྱིས་བོད་ལ་སངས་རྒྱས་ཀྱི་ཆོས་དར་སྤེལ་གནང་ཡོད། ཆོས་རྒྱལ་སྲོང་བཙན་སྐབས་ནས་ཆོས་ཀྱི་དབུ་བརྙེས་ཡོད། འོན་ཀྱང་དེ་མཁན་སློབ་ཆོས་གསུམ་སྐབས་རྒྱ་ཆེ་སྤེལ་གནང་ཡོད། དེའི་ནང་ནས་མཁན་ཆེན་ཞི་བ་འཚོ་དེ་གཙོ་བོ་ཆགས་ཡོད། ཁོང་ནི་དཔལ་ནཱ་ལེནྡྲ་ནས་ཕེབས་པའི་གྲུབ་མཐའ་སྨྲ་བ་དེའི་ནང་ནས་ཚད་མའི་གཞུང་ལ་ཧ་ཅང་མཁས་པ་ཞིག་གིས་བསྟན་པ་བཙུགས་པའི་སྐབས་ནས་དུས་ད་ལྟ་བར་བོད་གངས་ཅན་གྱི་ལྗོངས་ནས་སྔ་འགྱུར་རྙིང་མ་དང་། བཀའ་གདམས་པ། བཀའ་བརྒྱུད། ས་སྐྱ། དགེ་ལྡན་པ་བཅས་ཚང་མར་གཞུང་ཆེན་གྱི་ལུགས་སྲོལ་བྱུང་ཡོད། སྒྲུབ་བརྒྱུད་ཅེས་རྒྱ་གར་གྱི་གྲུབ་ཆེན་ལ་གཏུགས་གནང་བ་ཡང་ཡོད། འོན་ཀྱང་བསྟན་པ་སྤྱིའི་གཞུང་ཆེན་མོ་འཆད་ཉན་ཐོག་བསྟན་པ་འཛིན་སྐྱོང་སྤེལ་གསུམ་གནང་གི་ཡོད་པ་གསལ་པོ་རེད། དེར་བརྟེན་བཙན་བྱོལ་དུ་ཡོད་པའི་བོད་པ་ཚོས་རིམ་པས་སོ་སོ་རང་ཉིད་ཤེས་ཚད་ཡོད་པ་ཙམ་མིན་པར། ཕྱིན་ཆད་སོ་སོ་གང་ནས་ཡོང་བའི་ས་ཁུལ་དེའི་མང་ཚོགས་ལ་སངས་རྒྱས་པའི་ཆོས་ཀྱི་གོ་རྟོགས་སྤེལ་ཐུབ་པ་ཞིག་དང་། སངས་རྒྱས་པའི་ཆོས་པ་མིང་དོན་མཚུངས་པ་ཞིག་ཡོང་ཐུབ་རྒྱུར་ཞབས་འདེགས་སྒྲུབ་མཁན་འདིར་ཡོད་པའི་རབ་བྱུང་ཕོ་མོ་ཚང་མའི་ལས་འགན་ཆགས་ཡོད། དེར་བརྟེན་འདིར་སློབ་སྦྱོང་བྱེད་རྒྱུ་དེ་དགེ་རྒན་སྦྱོང་བརྡར་སྤྲོད་ཀྱི་ཡོད་པ་ལྟ་བུ་ཆགས་འདུག ཁྱེད་རང་ཚོས་སློབ་སྦྱོང་ཐོག་ཧུར་ཐག་བྱེད་ཀྱི་ཡོད་པ་དེ་ངོས་རང་ལ་སྔོན་མ་ནས་དོ་སྣང་བྱུང་། ཁྱེད་རང་ཚོར་ད་བར་གྲུབ་འབྲས་ཡག་པོ་ཐོན་འདུག ད་དུང་ཡང་མུ་མཐུད་སློབ་སྦྱོང་ཐོག་འབད་བརྩོན་བྱེད་རོགས་ཞེས་ཞུ་རྒྱུ་ཡིན།
སངས་རྒྱས་པའི་ཆོས་ཞེས་པ་དེར་མི་རིགས་ཀྱི་དབྱེ་བ་གང་ཡང་མེད། གདན་ས་ཆེན་པོ་དེ་ཚོས་ནང་སློབ་གཉེར་བྱེད་མཁན་ཡུལ་འདྲ་མིན་ནས་ཡོང་གི་ཡོད། བོད་གངས་ཅན་ལྗོངས་ལ་ཡོད་པའི་ས་དགེ་བཀའ་རྙིང་ཇོ་ནང་དང་བཅས་པ། དེ་བཞིན་བོན་པོ་ཚོ་ཡང་དེ་སྔ་ནས་གདན་ས་ཁག་གི་ནང་སློབ་སྦྱོང་བྱས་པ་ཡོད། སོ་ལན་གྱི་བོན་པོའི་ཆོས་སྒར་ལ་ཆ་བཞག་ན་རྟགས་གསལ་ཧ་ཅང་ཡག་པོ་གཏོང་གི་འདུག སོ་ལན་གྱི་སྨན་རི་དགོན་པའི་ནང་རྟགས་གསལ་གཏོང་སྐབས་སངས་རྒྱས་པའི་གཞུང་གི་ལུང་དྲངས་ཏེ་གཏོང་གི་རེད། ཐུའུ་ཀྭན་གྱིས་བོན་ལ་ཆོས་འདྲེས། ཆོས་ལ་བོན་འདྲེས། ཞེས་གསུངས་པ་ལྟར། ང་ཚོས་ཀི་ཀི་བསྭོ་བསྭོ་ལྷ་རྒྱལ་ལོ་ཟེར་བ་དེ་བོན་པོའི་སྐད་ཆ་རེད། དེ་བཞིན་ང་ཚོས་གཡང་འགུགས་རྒྱུ་དང་གཡང་སྒྲུབ་བྱེད་རྒྱུ་དེ་ཚོ་ཕལ་ཆེར་བོན་པོའི་ལུགས་སྲོལ་རེད། གཞུང་ཆེན་སློབ་སྦྱོང་བྱེད་རྒྱུར་ཆོས་བརྒྱུད་ཀྱི་ཁྱད་པར་གང་ཡང་མེད། དེར་བརྟེན་གཞུང་ཆེན་བསླབ་རྒྱུ་ཧ་ཅང་གལ་ཆེན་པོ་ཡིན་པ་མ་ཟད། སློབ་སྦྱོང་བྱེད་སྟངས་དེ་ཡང་རིགས་ལམ་གྱི་ཐོག་ནས་སློབ་ཁྲིད་བྱེད་རྒྱུ་དེ་སྤྱིར་ས་སྐྱ་དང་དགེ་ལྡན་ཡག་ཤོས་ཡིན། དུས་ཕྱིས་སུ་དགེ་ལུགས་པ་ཡག་ཤོས་རེད། བསྟན་པའི་སྤྱི་ནོར་ཆགས་ཡོད་པར་བརྟེན་དགེ་ལུགས་པའི་རེད་ཅེས་ཟུར་དུ་འཇོག་རྒྱུ་མེད། ཅེས་སོགས་ཀྱི་བཀའ་སློབ་ཟབ་མོ་ཕེབས་ཡོད།
དེ་བཞིན་མགོན་པོ་གང་ཉིད་མཆོག་གིས་དགེ་བཤེས་མའི་ཕྱག་འཁྱེར་སྐོར་ལ་བཀའ་སློབ་སྩལ་དོན། སྔོན་མ་ནས་ཆོས་དོན་ལས་ཁུངས་ཀྱིས་དགེ་བཤེས་མ་འཇོག་རྒྱུའི་འཆར་གཞི་སྒྲིག་བཞིན་ཡོད། ཐོག་མར་ང་ཚོས་དེའི་ཐོག་གོ་བསྡུར་བྱེད་སྐབས་དགེ་བཤེས་མ་ཞེས་པ་ཞིག་ཡོང་གི་མ་རེད་ཅེས་གསུངས་མཁན་ཡང་ཡོད། དེ་དུས་ངོས་ཀྱིས་བཅོམ་ལྡན་འདས་ཀྱིས་དགེ་སློང་མ་གནང་ཡོད་པས་ང་ཚོས་དགེ་བཤེས་མ་སྒྲུབ་མ་ཆོག་པ་ཁྱོན་ནས་མེད་ཅེས་བརྗོད་རྒྱུ་བྱུང་། བསླབ་པ་སློོབ་གཉེར་བྱེད་རྒྱུ་དེ་ནང་པ་ཡོངས་རྫོགས་ལ་དབང་བ་ཞིག་རེད་མ་གཏོགས་རབ་བྱུང་ཁོ་ནར་དབང་མེད། རྗེས་མ་ཁྱེད་རང་ཚོ་དཔེ་ཁྲིད་བྱེད་མཁན་ཚོ་དང་གོ་བསྡུར་བྱས་ཏེ་དུས་ཆེན་ཞིག་དང་སྟབས་བསྟུན་ནས་དགེ་བཤེས་མའི་ལག་འཁྱེར་སྤྲོད་རྒྱུ་ཞིག་བཟོ་དགོས་འདུག་ཅེས་སོགས་ཀྱི་བཀའ་སློབ་ཕེབས་ཡོད། དེ་ནས་༸གོང་ས་མཆོག་གིས་བཙུན་མའི་རྟགས་གསལ་དམ་བཅར་གཟིགས་ཞིབ་མཛད་རྗེས་ཁོང་རྣམས་དང་སྐུ་པར་ཡང་ལྷན་དུ་སྒྲོན་གནང་མཛད་ཡོད། སྤྱིར་བཙུན་དགོན་འདིའི་ནང་བོད་རིགས་ཀྱིས་གཙོས་ཧི་མ་ལ་ཡའི་རི་བརྒྱུད་ཀྱི་མོན་དང་། ལ་དྭགས། འབྲུག་པ་བཅས་ཁྱོན་བཙུན་མ་གྲངས་ ༢༣༠ ཙམ་སློབ་གཉེར་གནང་བཞིན་ཡོད་པ་བཅས།།
