༢༠༡༡ ཟླ་ ༢ ཚེས་ ༡༡ རེས་གཟའ་པ་སངས།
༄༅། །འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༢ ཚེས་ ༡༠ རེས་གཟའ་ཕུར་བུའི་ཉིན་གྱི་སྔ་དྲོ་ཆུ་ཚོད་ ༩ པ་ཙམ་ལ་ར་ཇི་སི་ཐན་བོད་མི་སུད་ཚོང་བ་རྣམས་དང་ས་གནས་ཧིན་བོད་མཛའ་འབྲེལ་ཚོགས་པས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ་དེར་འདུས་མི་མང་རྣམས་ལ་བླང་དོར་གྱི་བཀའ་སློབ་ཟབ་མོ་སྩལ་ཡོད།
པར་པ་ཕྱི་དྲིལ་འགྲེམས་སྟོན་ཚན་པའི་བཀྲིས་ཕུན་ཚོགས་ལགས།
དེ་ཡང་མཛད་སྒོའི་སྐབས་ཇོ་ཌ་པུར་རྒྱལ་པོ་དང་རྒྱལ་པོའི་གཅེན་མོ། རྒྱ་གར་གྲོས་ཚོགས་གོང་མའི་འཐུས་མི་ལྕམ་སྐུ་ཅན་ཌེ་རེ་ཤི་ཀུ་མ་རི་མཆོག དེ་བཞིན་ཇོ་ཌ་པུར་གྲོང་ཁྱེར་གྱི་སྤྱི་ཁྱབ་གཙོ་འཛིན་དང་ཇོ་ཌ་པུར་ཨུ་ཌེ་པུར། བྷི་ཀ་ནེར། མོན་ཊི་ཨ་བྷུ། བོད་མི་སུད་ཚོང་བ་བཅས་མི་གྲངས་ ༣༠༠ ཙམ་དང་ས་གནས་ཧིན་བོད་མཛའ་འབྲེལ་ཚོགས་པའི་ཚོགས་མི་བཅས་ཁྱོན་མི་གྲངས་ ༤༠༠ བརྒལ་བར་ཧ་རི་ཏཱ་ཇི་མགྲོན་ཁང་དུ་འདུ་འཛོམས་གནང་ཡོད། མཛད་སྒོའི་ཐོག་མར་བཙན་བྱོལ་བོད་མི་མང་སྤྱི་འཐུས་ཡེ་ཤེས་ཕུན་ཚོགས་ལགས་ཀྱིས་ཕེབས་བསུའི་གསུང་བཤད་གནང་གྲུབ་བསྟུན། ༸གོང་ས་མཆོག་གིས་སྣང་གསལ་ཞལ་ཕྱེ་མཛད་རྗེས་བོད་མི་སུད་ཚོང་སྐྱིད་སྡུག་གི་སྐུ་ཚབ་མཛད་དེ་རྒྱལ་པོ་དང་ཅན་ཌེ་རི་ཤི་ཀུ་མ་རི། གྲོང་ཁྱེར་སྤྱི་ཁྱབ་པ་བཅས་ལ་ཕྱག་རྟགས་གསོལ་རས་སྩལ། དེ་ནས་གྲོང་ཁྱེར་སྤྱི་ཁྱབ་པས་མཛད་སྒོ་དང་འབྲེལ་བའི་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཇོ་ཌ་པུར་ས་གནས་སུ་ཆིབས་སྒྱུར་བསྐྱངས་པ་དེ་ང་ཚོའི་བསོད་ནམས་ཀྱི་གོ་སྐལ་ཡིན། སྐུ་ཉིད་འཛམ་གླིང་ནང་མཚན་སྙན་ཤིན་ཏུ་ཆེ་བ་ཞིག་ཡིན་པ་མ་ཟད། གང་ཉིད་ཀྱི་མཛད་འཕྲིན་ལ་འཛམ་གླིང་མི་མང་ཀུན་གྱིས་བསྔགས་བརྗོད་ཆེན་པོ་ཞུ་བཞིན་ཡོད། སྐུ་ཉིད་ཀྱི་མཛད་རྗེས་ལ་གཞིགས་ན་ནོ་བེལ་ཞི་བདེའི་གཟེངས་རྟགས་དེ་ཆུང་ཆུང་ཞིག་ཆགས་ཡོད། རྒྱ་ནག་གིས་བོད་དེ་དབང་སྒྱུར་བྱས་ཡོད་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སྐུ་འཚོ་བཞུགས་རིང་བོད་མི་ཚོར་རང་དབང་འཐོབ་རྒྱུ་ཡིན་པ་ང་ལ་ཡིད་ཆེས་བརྟན་པོ་ཡོད། 
ཅེས་སོགས་ཀྱི་གསུང་བཤད་གནང་གྲུབ་བསྟུན། མ་སྐུ་ཅན་ཌེ་རི་ཤི་ཀུ་མ་རི་མཆོག་གིས་གསུང་བཤད་གནང་དོན། ང་རང་ཇོ་ཌ་པུར་ནས་ཧི་མ་ཅལ་ལ་མནའ་མར་བསླེབས་པ་ནས་བཟུང་ཧི་མ་ཅལ་འདི་ངའི་ནང་ཆགས་ཡོད། ང་རང་ལོ་ ༤༢ ཙམ་རིང་ཧི་མ་ཅལ་ལ་སྡོད་རིང་༸གོང་ས་ཏཱ་ལའི་བླ་མ་མཆོག་དང་མཇལ་རྒྱུའི་སྐལ་བཟང་གི་གོ་སྐབས་ཐོབ་བྱུང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་རྒྱ་གར་གྱི་གནའ་རབས་བཟང་སྤྱོད་འཚེ་མེད་ཞི་བ་དང་བྱམས་བརྩེའི་བསླབ་བྱ་བཟང་པོ་དེ་དག་གོང་འཕེལ་གཏོང་གནང་མཛད་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད། དེ་ནས་རྒྱལ་པོ་ག་ཇི་སིངྒ་མཆོག་གིས་གསུང་བཤད་གནང་དོན། ས་གནས་ཡུལ་མི་མང་པོ་ཞིག་གིས་དེ་སྔ་བརྙན་འཕྲིན་དང་གསར་ཤོག་བརྒྱུད་ནས་མ་གཏོགས་༸གོང་ས་ཏཱ་ལའི་བླ་མ་མཆོག་མཇལ་མྱོང་མེད། དེ་རིང་སྐུ་ཉིད་འདིར་དངོས་སུ་ཆིབས་སྒྱུར་བསྐྱངས་པ་དེས་ང་ཚོར་བློ་སྤོབས་ཧ་ཅང་ཐོབ་བྱུང་། ས་གནས་འདིར་བོད་མི་སུད་ཚོང་བ་རྣམས་ནས་བལ་གོས་ལ་ཡུལ་མི་ཚོས་དགའ་མོས་ཆེན་པོ་བྱེད་ཀྱི་ཡོད། གང་ཡིན་བརྗོད་ན་བལ་གོས་དེ་ཚོ་རྒྱུ་ཆ་ཡག་པོ་ཡོད་པ་མ་ཟད་གོང་ཚད་ཀྱང་རན་པོ་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་ནས་ས་གནས་བོད་མི་སུད་ཚོང་བ་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་བ་འབུལ་ལམ་ཞུས་རྗེས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ང་ཚོ་བོད་མི་རྣམས་བཙན་བྱོལ་བ་ཆགས་ཏེ་ད་ཆ་མི་ལོ་ ༥༢ ཙམ་འགྲོ་གི་ཡོད། ང་ཚོ་བཙན་བྱོལ་བ་ཆགས་དགོས་དོན་སོ་སོའི་ལུང་པའི་ནང་ཁྲིམས་འགལ་གྱི་ལས་ཀ་བྱས་པ་དང་རང་འབྱུང་གོད་ཆག་ཕོག་པ་དེ་འདྲ་གང་ཡང་མིན། ང་ཚོ་བཙན་བྱོལ་བ་ཆགས་པ་དེ་བོད་ནང་དཔོན་པོ་གསར་པ་ཞིག་བསླེབས་ཏེ་ང་ཚོར་བཀའ་བཏང་ནས་བོད་མི་ཚོ་འུ་ཐུག་སྟེ་མཐར་ཕྱི་ལོ་ ༡༩༥༩ ལོར་བཙན་བྱོལ་དུ་ཡོང་དགོས་བྱུང་བ་རེད། འདས་པའི་ལོ་དེའི་རིང་བོད་ནང་གཞིས་ལུས་རྒྱ་ཆེའི་མི་མང་ཚོས་སེམས་ཤུགས་མ་ཆག་པར་གནས་ཡོད། དེ་ལྟར་གནས་ཡོད་པ་ཕྱི་ལོ་ ༢༠༠༨ ལོར་བོད་ས་ཡོངས་སུ་བོད་མི་རྣམས་ཀྱིས་རྒྱ་ནག་གཞུང་ལ་ཞི་རྒོལ་བྱས་ཡོད། ང་ཚོས་རང་དབང་ལུང་པའི་ནང་གཞིས་ལུས་རྒྱ་ཆེའི་མི་མང་ཚོས་ཚབ་བྱས་ཏེ་འབད་བརྩོན་བྱེད་ཀྱི་ཡོད། བཙན་བྱོལ་བོད་མིའི་འཚོ་རྟེན་གཙོ་བོ་དེ་སོ་ནམ་ཞིང་ལས་ཆགས་ཡོད་ཀྱང་དེས་མ་འདང་པར་བརྟེན། སུད་ཚོང་རྒྱག་དགོས་པའི་གནས་སྟངས་ཆགས་ཡོད། རྒྱ་གར་གྱི་ས་གནས་འབྲེལ་ཡོད་ཚོས་བོད་མི་རྣམས་ལ་མཐུན་འགྱུར་གནང་རྒྱུའི་ཁས་ལེན་གནང་བྱུང་བས་ངོས་ཀྱིས་ཁྱེད་རྣམས་ལ་ཐུགས་རྗེ་ཆེ་ཟེར་རྒྱུ་ཡིན། བོད་མི་གཞོན་སྐྱེས་རྣམས་ནས་སྤྱིར་སློབ་སྦྱོང་དང་ཡང་སྒོས་ནང་ཆོས་སློབ་གཉེར་བྱེད་རྒྱུར་འབད་བརྩོན་གང་ཐུབ་བྱེད་དགོས། ང་ཚོ་རང་བཙན་ཤོར་དགོས་པའི་རྒྱུ་རྐྱེན་གཙོ་བོ་གཅིག་ནི་དེང་དུས་ཀྱི་ཤེས་ཡོན་མ་འདང་བའི་རྐྱེན་ལས་བྱུང་བ་ཞིག་ཡིན། ཤེས་ཡོན་སྦྱོང་རྒྱུར་འཐུས་ཤོར་ནམ་ཡང་གཏོང་རྒྱུ་མེད། ཕ་མ་ཚོས་ག་ཚོད་ཐུབ་ཐུབ་ཀྱི་རང་གི་ཕྲུ་གུ་ཚོར་ཤེས་ཡོན་སྤྲོད་དགོས། བོད་མི་ཚོ་སེམས་བག་ཕེབས་པོ་ཡོད་པར་བརྟེན། རྡ་སའི་ས་ཆ་གཙང་མ་དེ་ཙམ་མེད་ནའང་བོད་མི་ཚོའི་ཁྲོད་སྡོད་སྐབས་བློ་བག་ཕེབས་པོ་འདུག་ཅེས་ཕྱི་རྒྱལ་བ་མང་པོས་བོད་མིའི་བཟང་སྤྱོད་ལ་དགའ་མོས་བྱེད་བཞིན་ཡོད། ཅེས་སོགས་ཀྱི་བཀའ་སློབ་སྩལ་ཡོད།
ཐེངས་འདིའི་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་དང་བསྟབས་བསྟུན་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པས་བཙན་བྱོལ་ནང་གི་འགྲུལ་བཞུད། ཕ་ཡུལ་ཕྱོགས་སུ་རྒྱང་བལྟ། ཞེས་པའི་པར་རིགས་འདྲ་མིན་ཁག་འགྲེམས་སྟོན་ཞུས་ཡོད་པ་བཅས། །
