༢༠༡༡ ཟླ་ ༢ ཚེས་ ༡༤ རེས་གཟའ་ཟླ་བ།

༄༅། །འདི་གར་ཨོ་སི་ཊོ་ལི་ཡའི་བོད་གཞུང་སྐུ་ཚབ་དོན་ཁང་གིས་བཏང་གནས་ནང་འཁོད་དོན། ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་རྒྱལ་ས་ཀན་བྷེ་ར་ནས་རྒྱང་ཐག་ཆུ་ཚོད་ ༢ ཙམ་སར་ཡོད་པའི་འོ་ལོང་གོང་(Wollongong)གྲོང་ཁྱེར་རོ་ཊ་རི་ཁ་ལབ་(Rotary Club) ཞེས་པའི་ཚོགས་པ་ནས་གདན་ཞུས་ལྟར་ཆེད་ཕེབས་གནང་སྟེ། ཕྱི་ལོ་ ༢༠༡༡ ཟླ་ ༢ ཚེས་ ༩ ཉིན་ཚོགས་པ་དེས་གོ་སྒྲིག་ཞུས་པའི་ཐེངས་དང་པོའི་ཞི་བདེའི་གཏམ་གླེང་ཞེས་པའི་ལས་འཆར་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་ཞི་བདེ་དང་གྲོས་མོལ། དེ་བཞིན་གཉིས་ཕན་དབུ་མའི་ལམ་གྱི་མཛད་བྱུས་ཐོག་ནས་སེལ་རྒྱུའི་དགོངས་གཞི་མཛད་ཀྱི་ཡོད་སྐོར་དེར་འདུས་མཁས་དབང་སོགས་ལ་ངོ་སྤྲོད་ཀྱིས་གསུང་བཤད་གནང་ཡོད།
དེ་བཞིན་ཁོང་དང་མཉམ་(Australian National University)ཨོ་སི་ཊོ་ལི་ཡའི་རྒྱལ་ཡོངས་མཐོ་རིམ་སློབ་གྲྭའི་དགེ་རྒན་ཆེན་མོ་བ་ཨེ་ལེག་སི་བུ་རུ་སི་(Alex Bruce)ལགས་ཀྱིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེ་ཡོང་སླད། བྱམས་བརྩེ་དང་སྙིང་རྗེ། གཞན་ཕན། ཆོས་ལུགས་ཕན་ཚུན་མཐུན་སྒྲིལ་གྱི་དགོངས་གཞི་མཛད་ཀྱི་ཡོད་སྐོར་སོགས་ཀྱི་གསུང་བཤད་ཀྱང་གནང་ཡོད། ཨོ་སི་ཊོ་ལི་ཡའི་མཁས་དབང་དང་ཚོང་འབྲེལ་བཅས་ཁྱོན་མི་གྲངས་ ༨༠ བརྒལ་བས་ཐེངས་འདིའི་ཚོགས་འདུར་མཉམ་ཞུགས་གནང་ཡོད་པ་མ་ཟད། གོང་གསལ་བརྗོད་གཞིའི་ཐོག་དྲི་བ་དྲིས་ལན་ཡང་གནང་ཡོད་པ་བཅས། །