༢༠༡༡ ཟླ་ ༢ ཚེས་ ༡ རེས་གཟའ་མིག་དམར།
༄༅། །སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་སྤྱི་འཐུས་བསོད་ནམས་དགྲ་འདུལ་ལགས།  སྤྱིི་འཐུས་དགེ་བཤེས་ག་ཟི་ཚེ་རིང་པོ་ལགས་བཅས་བདུན་ཕྲག་གཅིག་གི་རིང་རྒྱ་གར་བྱང་ཕྱོགས་ཨུ་ཏར་ཁཎྜ་མངའ་སྡེའི་རྒྱལ་ས་སྡེ་ར་ལྡུན་དུ་གཞུང་དོན་ཕྱོགས་བསྐྱོད་ཀྱི་ལས་དོན་ལེགས་གྲུབ་ཐོག་རྡ་སར་ཕྱིར་ཕེབས་ཏེ་ཕྱི་ཚེས་ ༣༡ ཉིན་གསར་འགོད་གསལ་བསྒྲགས་་སྤེལ་ཡོད།  དེ་ཡང་ཁོང་རྣམས་སྡེ་ར་ལྡུན་དུ་ཕེབས་སྐབས་ཨུ་ཏར་ཁཎྜ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ར་མེ་ཤི་ཕོཀ་ཁྱི་རི་ཡཱལ་ (Ramesh Pokhriyal) མཆོག་གིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་དང་། སྐབས་དེར་རང་གཞུང་གི་མཛད་གཙོ་རྣམ་པས་མངའ་སྡེའི་བློན་ཆེན་མཆོག་ལ་མངའ་སྡེའི་མཐོ་སློབ་ཁག་གི་ནང་བོད་ཕྲུག་ཚོར་སྨན་དང་བཟོ་འཕྲུལ་རིག་གནས་(Medicine & Engineering) ཀྱི་ས་མིག་དམིགས་བསལ་གནང་སྐྱོང་ཡོང་བའི་འབོད་སྐུལ་ཞུས་པར་བློན་ཆེན་མཆོག་གིས་གནད་དོན་དེར་དགོངས་བཞེས་གནང་རྒྱུའི་ཁས་ལེན་གནང་ཡོད་སྐོར་གསར་འགོད་གསལ་བསྒྲགས་སྐབས་བརྗོད་ཡོད།
གཞན་ཡང་སྐབས་དེར་རང་གཞུང་གི་མཛད་གཙོ་རྣམ་པས་ཨུ་ཏར་ཁཎྜ་མངའ་སྡེའི་ཕྱོགས་འགལ་ཚོགས་པའི་ཚོགས་གཙོ་སྐུ་ཞབས་ཧ་རཀ་སིངྒ་རཱ་ཝཏ་ (Dr. Harak Singh Rawat) མཆོག་དང་མངའ་སྡེའི་གྲོས་ཚོགས་ཀྱི་འཐུས་མི་སྐུ་ཞབས་ཧི་ར་སིངྒ་བྷི་ཤི་ཊི་མཆོག  གཞན་ཡང་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཧར་བྷན་ཀ་པུར་ (Harbans Kapoor) བཅས་ཐུག་འཕྲད་གནང་ཡོད་པ་མ་ཟད།  བོད་མིར་ཤ་ཚ་ཡོད་པའི་གཞུང་འབྲེལ་དང་གཞུང་འབྲེལ་མིན་པའི་མི་སྣ་ཁག་གཅིག་ཀྱང་ཐུག་འཕྲད་གནང་ཡོད་པ་བཅས།།