༢༠༡༡ ཟླ་ ༢ ཚེས་ ༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༢ རེས་གཟའ་ལྷག་པའི་ཉིན་བརྒྱུད་སྟོད་དགོན་པར་རྒྱལ་བ་ཀརྨ་པ་མཆོག་ལ་གདུང་སེམས་མཉམ་སྐྱེ་ཞུ་ཆེད་ས་གནས་གང་ས་ནས་གོམ་བགྲོད་བྱས་མཐར་འདུ་འཛོམས་བྱུང་བའི་མང་ཚོགས་རྣམས་ལ་རིན་པོ་ཆེ་མཆོག་གིས་བཀའ་སློབ་གནང་དོན། འདིར་ངོས་ལ་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་ཆེད་མི་མང་ཧ་ཅང་མང་པོ་ཕེབས་པར་ངས་སྙིང་ཐག་པ་ནས་ཐུགས་རྗེ་ཆེ་ཟེར་རྒྱུ་དང། ལས་ཀ་བྱ་ཕྱོགས་ནོར་བ་དང་གནས་ཚུལ་གོ་ནོར་ལ་བརྟེན་ནས་ད་ཆ་ང་ཚོར་གནས་ཚུལ་འདི་འདྲ་ཞིག་བྱུང་བ་རེད། 
གནས་ཚུལ་དེ་༸གོང་ས་༸སྐྱབས་མགོན་ཆེན་པོ་མཆོག་ཀྱང་ཐུགས་འཚབ་མཛད་གཞི་གཅིག་ཀྱང་ཆགས་པ་རེད། རྒྱ་གར་ནི་བོད་མི་ཚོའི་ཕ་ཡུལ་་གཉིས་པ་ལྟ་བུ་ཆགས་ཡོད་པ་མ་ཟད། ང་ཚོ་ཚང་མ་འདིར་བཙན་བྱོལ་བ་བྱས་ནས་གནས་ཡོད། རྒྱ་ནག་ལས་ལྡོག་སྟེ་རྒྱ་གར་ནི་རང་དབང་དང་ཁྲིམས་ལུགས་ལྡན་པའི་མང་གཙོའི་ལུང་པ་ཞིག་རེད། དེར་བརྟེན་རིམ་བཞིན་གནས་ཚུལ་འདིར་བཟང་ཕྱོགས་ཀྱི་འགྱུར་བ་ཞིག་ཡོང་རྒྱུ་དང་བདེན་པའི་མཐའ་གསལ་རྒྱུ་ཡིན་པར་ངོས་ལ་ཡིད་ཆེས་ཡོད། དེར་བརྟེན་ཁྱེད་རང་ཚོ་སེམས་འཚབ་མ་བྱེད་རོགས། ཁྱེད་ཚོས་ཉི་མ་ཚ་པོ་ཡོད་པར་མ་འཛེམས་པར་འདིར་ཕེབས་པར་ངས་ཐུགས་རྗེ་ཆེ་ཞུ་རྒྱུ་དང། མང་ཚོགས་ཕོན་ཆེན་པོ་ཞིག་འདིར་འདུ་འཛོམས་བྱུང་བར་བརྟེན་ངས་མི་རེ་རེ་བཞིན་ཐུག་ཐུབ་པ་མི་འདུག ང་ཚོ་ཕན་ཚུན་གསལ་པོ་མཐོང་ཐུབ་པ་དེས་མཇལ་ཁ་གོ་ཆོད་པ་ཞིག་ཆགས་པའི་རེ་བ་ཡོད་ཅེས་སོགས་ཀྱི་བཀའ་སློབ་གནང། སྐབས་དེར་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་གཞན་ཡང་སྤྱི་འཐུས་ཁག་གཅིག་ཀྱང་ཆེད་ཕེབས་གནང་ཡོད་པ་བཅས།།
