༢༠༡༡ ཟླ་ ༢ ཚེས་ ༡༥ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༡༥ ཉིན་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་མང་གཙོའི་འཕེལ་རིམ་དང་འགྲོ་བ་མིའི་ཐོབ་ཐང་སྐོར་ལ་ཟབ་སྦྱོང་ཚོགས་པ།
དེ་ཡང་ཐོག་མར་དགུ་བཅུ་གསུམ་ལས་འགུལ་ཚོགས་པའི་ལས་བྱེད་ཚེ་རིང་བསམ་གྲུབ་ལགས་ཀྱིས་ད་ཐེངས་ཀྱི་ཟབ་སྦྱོང་ཚོགས་དགོས་པའི་རྒྱུ་མཚན་སྐོར་ལ་ངོ་སྤྲོད་གནང་ཡོད། དེ་ནས་སྔ་དྲོ་ཆུད་ཚོད་ ༡༡།༣༠ ཐོག་མང་གཙོའི་དགེ་སྐྱོན་ཞེས་པའི་བརྗོད་གཞིའི་ཐོག་དབུས་འོས་བསྡུ་ལས་ཁང་གི་འགན་འཛིན་ལས་འཕར་གཡང་མཁོ་རྒྱལ་ལགས་ཀྱིས་དེར་འདུས་ས་རཱ་མཐོ་སློབ་དང་ནོར་གླིང་མཐོ་སློབ་ཀྱི་སློབ་མ། དེ་བཞིན་ཤེས་རབ་དགའ་ཚལ་སློབ་གླིང་གི་སློབ་མ། དགུ་བཅུ་གསུམ་ལས་འགུལ་ཚོགས་པའི་སློབ་མ་བཅས་ཁྱོན་སློབ་ཕྲུག་གྲངས་ ༡༠༠ བརྒལ་བར་གཏམ་བཤད་གནང་དོན། དེ་རིང་འདིར་ཕེབས་པའི་མཐོ་སློབ་ཁག་གི་སློབ་མ་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། བཀའ་བློན་ཁྲི་པ་སྐབས་གསུམ་པ་དང་སྤྱི་འཐུས་སྐབས་བཅོ་ལྔ་པའི་གཞུང་འབྲེལ་གྱི་ལས་རིམ་དེ་དག་ད་ལྟ་འགྲོ་མུས་ཡིན། ཕྱི་ལོ་ ༡༩༥༩ ལོར་བོད་མདོ་དབུས་ཁམས་གསུམ་གྱི་ས་ཆ་ཡོངས་རྫོགས་ལ་དུས་འགྱུར་ངན་པ་ཞིག་བྱུང་བ་རེད། དེར་བརྟེན་ཕྱི་ལོ་ ༡༩༥༩ ཟླ་ ༤ ཚེས་ ༢༩ ཉིན་མ་སུ་རིར་བཙན་བྱོལ་གྱི་སྒྲིག་འཛུགས་ཐེངས་དང་པོར་སླར་གསོ་གནང་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞིའི་འོག་ཕྱི་ལོ་ ༡༩༦༢ ལོར་གནས་མཆོག་རྡོ་རྗེ་གདན་དུ་ཚོགས་འདུ་འཚོགས་སྐབས་ང་ཚོའི་སྔ་མོའི་ལུགས་སྲོལ་རྙིང་པ་རྣམས་ལ་བཅོས་སྒྱུར་བཏང་སྟེ། མང་གཙོའི་ལམ་བཟང་ཐོག་དངོས་སུ་བསྐྱོད་འགོ་ཚུགས་པ་མ་ཟད། ང་ཚོ་བོད་གཞིས་བྱེས་གཉིས་ཀྱི་ཚབ་མཚོན་མི་སྣ་གྲོས་ཚོགས་ཀྱི་འཐུས་མི་ཡང་སྐབས་དེར་མནའ་གན་མཐུ་མོ་ཆེ་བཞག་སྟེ་དབུ་འཛུགས་གནང་བ་ཞིག་ཡིན།
དེ་བཞིན་ང་ཚོས་རང་ཉིད་ཀྱི་འདོད་མོས་ཡོད་པའི་མི་དེར་འོས་ཤོག་བླུག་པར་ཐོག་མར་རང་ཉིད་ཀྱི་ལག་དེབ་ལྗང་གུ་དེབ་སྐྱེལ་བྱེད་དགོས་པ་ཡིན། ཕྱོགས་མཚུངས་བཀའ་སྤྱི་གཉིས་ཀྱི་འོས་ཤོག་འཕེན་སྐབས་དེབ་སྐྱེལ་ཐེངས་གཅིག་མ་གཏོགས་བྱེད་དགོས་ཀྱི་མེད། གང་ལྟར་རང་ཉིད་ས་གནས་གང་དུ་བསྐྱོད་ཀྱང་ལག་དེབ་ལྗང་གུ་ངེས་པར་མཉམ་དུ་འཁྱེར་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་རས་སྩལ་བའི་མང་གཙོའི་ཁེ་དབང་དེ་ང་ཚོས་ངེས་པར་དུ་བེད་སྤྱོད་ཡག་པོ་ཞིག་བཏང་སྟེ། རང་ཉིད་ཀྱིས་འདོད་མོས་ཡོད་པའི་མི་སྣ་དེར་འོས་ཤོག་འཕེན་རྒྱུ་ཧ་ཅང་གལ་ཆེན་ཞིག་ཡིན།
དེང་སྐབས་ང་ཚོ་བཙན་བྱོལ་སྤྱི་ཚོགས་ནང་བཀའ་བློན་ཁྲི་པར་གལ་ཆེན་རྩི་བཞིན་ཡོད། དེ་བཞིན་བོད་མི་མང་སྤྱི་འཐུས་རྣམས་ནི་དེ་བས་ཀྱང་གལ་ཆེ་བ་ཆགས་ཡོད། དེར་བརྟེན་ང་ཚོས་བཀའ་བློན་ཁྲི་པ་དང་སྤྱི་འཐུས་ཀྱི་འོས་མི་ཡག་པོ་བསླེབ་རྒྱུར་འབད་བརྩོན་བྱེད་དགོས་པ་མ་ཟད། བཙན་བྱོལ་སྤྱི་ཚོགས་ཀྱི་སྒྲིག་གཞི་ཡང་སྔར་ལྷག་ཚགས་ཚུད་པ་ཞིག་དགོས་རྒྱུ་ནི་གལ་འགངས་ཆེན་པོ་ཡིན། གལ་སྲིད་བཀའ་སྤྱི་གཉིས་ཀྱི་འོས་མི་ཡག་པོ་ཞིག་འོས་འདེམས་བྱེད་མ་ཐུབ་ན། བོད་ཕྱི་ནང་གཉིས་ནས་རེ་བ་རྒྱག་སའི་སྒྲིག་འཛུགས་འདི་ཐོར་རྒྱུའི་ཉེན་ཁ་ཡོང་མི་སྲིད་པ་མིན། དེར་བརྟེན་ང་ཚོས་ལྷག་བསམ་རྣམ་དག་གིས་སྒོ་ནས་འོས་ཤོག་བླུག་སྐབས་བསམ་བློ་ནན་ཏན་བཏང་ཐོག་འོས་འཕེན་དགོས་པ་ཞིག་ཡིན་ཞེས་གཏམ་བཤད་གནང་རྗེེས་དྲི་བ་དྲིས་ལན་ཡང་གནང་ཡོད།
དེ་བཞིན་ཕྱེད་ཡོལ་ ༢ ནས་ ༣ བར་རྒྱ་ནག་གི་དེ་རིང་དང་སང་ཉིན་ཞེས་པའི་བརྗོད་གཞིའི་ཐོག་བཀའ་ཡིག་དྲུང་འཕར་ཚེ་རིང་དབང་ཕྱུག་ལགས་ཀྱིས་ཟབ་ཁྲིད་གནང་རྗེས་དྲི་བ་དྲིས་ལན་ཡང་གནང་ཡོད་པ་བཅས། །