མུམ་བྷེའི་གཙུག་ལག་སློབ་གྲྭས་༸གོང་ས་མཆོག་ལ་ཕྱག་རྟགས་འབུལ་བཞིན་པ།
༢༠༡༡ ཟླ་ ༢ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༡༨ རེས་གཟའ་པ་སངས་ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྲོང་ཁྱེར་མུམ་བྷེའི་གཙུག་ལག་སློབ་གྲྭར་ཆིབས་སྒྱུར་བསྐྱངས་ཏེ་སྲོལ་རྒྱུན་གྱི་ལེགས་བཤད་། དེང་རབས་ཀྱི་བསམ་བློ། ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་སྩལ་དོན།
འཚེ་མེད་ཞི་བ་དང་ཆོས་ལུགས་མཐུན་སྒྲིལ་གཉིས་པོ་ནི་འཛམ་གླིང་གཞན་ལ་མིག་དཔེར་འོས་པའི་རྒྱ་གར་སྲོལ་རྒྱུན་གྱི་གཅེས་ནོར་ཞིག་ཡིན། འཛམ་གླིང་མི་ཚོས་གནད་དོན་དེ་གཉིས་ཀྱི་ཐོག་རྒྱ་གར་བ་ཚོ་ནས་ལེགས་བཤད་ལེན་དགོས་པ་བསམ་བཞིན་ཡོད། རྒྱལ་སྤྱིའི་མི་སྣ་གྲགས་ཅན་མར་ཊིན་ལུ་ཐར་ཀིང་མཆོག་དང་ནེལ་སོན་མན་ཌེ་ལ་སོགས་ཀྱིས་མེས་པོ་དམ་པ་གྷན་དྷིས་དབུ་ཁྲིད་པའི་རྒྱ་གར་སྲོལ་རྒྱུན་གྱི་འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་ལས་འགུལ་སྤེལ་བ་དེ་དག་གིས་བློ་སྟོབས་དང་སེམས་འགུལ་ཆེན་པོ་ཐེབ་ཡོད། དེར་བརྟེན་རྒྱ་གར་གྱི་ལྟ་གྲུབ་དེ་དག་འཛམ་གླིང་རྒྱ་ཁྱབ་ཏུ་ངོས་འཛིན་དང་བསྔགས་བརྗོད་ཆེན་པོ་ཐོབ་ཡོད།
རྒྱ་གར་དེ་བཞིན་འཛམ་གླིང་ནང་ཆོས་ལུགས་རིས་མེད་དང་མང་གཙོའི་རྒྱལ་ཁབ་ཆེ་ཤོས་ཤིག་ཆགས་ཡོད། རྒྱ་གར་གཞུང་གི་རྩ་ཁྲིམས་ནང་ཆོས་ལུགས་རིས་མེད་ཅེས་པའི་བརྗོད་ཚིགས་བཀོད་པ་ཙམ་དུ་མ་ཟད། དོན་དངོས་ཐོག་རྒྱ་གར་ནང་ཆོས་ལུགས་འདྲ་མིན་ཚང་མར་ཁྲིམས་ཀྱིས་སྲུང་སྐྱོབས་དང་གུས་རྩི་ཆེན་པོས་ཆོས་ལུགས་རིས་མེད་ཀྱི་ལྟ་གྲུབ་ལག་བསྟར་བྱེད་བཞིན་ཡོད། རྒྱ་གར་བ་ཚོས་སྲོལ་རྒྱུན་གྱི་གཅེས་ནོར་དེ་དག་འཛམ་གླིང་ཁྱོན་ཡོངས་སུ་ཁྱབ་བརྡལ་བྱེད་དགོས། ལྷག་པར་ཤེས་ཡོན་སློབ་སྟོན་པ་ཚོས་རྐང་འགན་ཁུར་བཞེས་ཏེ་རིམ་པས་སློབ་ཕྲུག་ཚོས་རྒྱ་གར་སྲོལ་རྒྱུན་གྱི་གཅེས་ནོར་དང་ལེགས་བཤད་དེ་དག་འཛམ་གླིང་མི་ཚོར་གོ་རྟོགས་སྤེལ་དགོས། དེང་རབས་གཞོན་སྐྱེས་ཚོར་བཟང་པོའི་བསླབ་བྱ་དེ་དག་སྤྲོད་རྒྱུ་དེ་གཙོ་བོ་དགེ་རྒན་ཚོའི་ལས་འགན་ཆགས་ཡོད། གཞོན་སྐྱེས་ཚོས་ཀྱང་འཚེ་བ་མེད་པ་དང་ཆོས་ལུགས་མཐུན་སྒྲིལ་གྱི་ལེགས་བཤད་དེ་དག་གོང་འཕེལ་གཏོང་ཐབས་བྱེད་དགོས་ཞེས་བཀའ་སློབ་ཕེབས་ཡོད། ཕྱོགས་མཚུངས་སྐབས་དེར་མགོན་པོ་གང་ཉིད་མཆོག་གིས་གོ་ལའི་ཚ་དྲོད་རྒྱས་པའི་གནད་དོན་ཐོག་བཀའ་སློབ་སྩལ་དོན།
ཨེ་ཤི་ཡའི་ས་ཁུལ་ནང་ཆུ་རུད་དང་འདམ་རུད་སོགས་འབྱུང་བའི་འཇིག་པ་བྱུང་དང་འབྱུང་བཞིན་པ་དེ་དག་གིས་འགྲོ་བ་མི་རིགས་སྤྱི་ཡོངས་ལ་ཉེན་ཚབས་ཆེན་པོ་ཡོང་གཞི་དེ་ཡང་གོ་ལའི་ཚ་དྲོད་རྒྱས་པ་ལས་བྱུང་བ་ཞིག་རེད་ཅེས་སོགས་ཀྱི་བཀའ་སློབ་སྩལ་ཡོད་པ་བཅས།།
