༢༠༡༡ ཟླ་ ༢ ཚེས་ ༤ རེས་གཟའ་པ་སངས།
༄༅། །ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༢ ཚེས་ ༣ ཉིན་གྱི་ཕྱེད་ཡོལ་ཆུ་ཚོད་ ༣།༢༥ ཐོག་༸གོང་ས་༸སྐྱབས་མགོན་ཆེན་པོ་མཆོག་དགའ་ལྡན་བྱང་རྩེ་གྲྭ་ཚང་དུ་ཆིབས་སྒྱུར་སྐྱོང་སྐབས་མཁན་རིན་པོ་ཆེ་ཆོས་འཕེལ་མཆོག་དང༌། མཁན་ལས་ཟུར་རྣམ་པས་སྤོས་སྣེས་སྔོན་བསུས་ཏེ་འདུ་ཁང་ནང་གདན་འདྲེན་ཞུས་ཏེ་བཞུགས་ཁྲིར་༸ཞབས་སོར་འཁོད་བསྟུན་མཁན་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་ཡོད། སྐབས་དེར་ཤར་བྱང་ཆོས་རྗེ་རྣམ་གཉིས་ཀྱིས་དབུས་མཁན་ལས་ཟུར་རྣམ་པ། དེ་བཞིན་དགེ་འདུན་འདུས་མང་བཅས་ཁྱོན་མི་གྲངས་ ༣༠༠༠ བརྒལ་བར་མགོན་པོ་གང་ཉིད་མཆོག་གིས་བཀའ་སློབ་ཕེབས་དོནü དེ་རིང་འདིར་ཡོང་རྒྱུའི་དགོས་དོན་གཙོ་བོ་དེ་སློབ་གཉེར་བ་ཚོའི་རྩོད་རྒྱུགས་མཇལ་རྒྱུ་བྱུང་ན་བསམས་ཏེ་བཅར་བ་ཡིན། སློབ་གཉེར་ཡག་ཉེས་སྐར་མ་ཁ་ཤས་རིང་རྟགས་གསལ་བཏང་བས་ཡོངས་རྫོགས་ལམ་སེང་ཤེས་ཐབས་མེད་ཀྱང་། སྦྱང་པ་ཆེ་ཆུང་གང་འདྲ་ཡོད་མེད་ལམ་སེང་ཤེས་ཐུབ་རྒྱུ་ཞིག་རེད། རྭ་སྟོད་གྲྭ་ཚང་ཆུང་ཆུང་ཞིག་ཡིན་ཡང་ཡག་ཐག་ཆོད་འདུག དེ་བཞིན་སྒོ་མང་གྲྭ་ཚང་དང་། བློ་གསལ་གླིང་གྲྭ་ཚང་ཡག་ཐག་ཆོད་འདུག དགོས་དོན་གཙོ་བོ་དེ་ཡིན། འབྲས་སྤུངས་ལ་རྒན་དབང་ཆེན་ལགས་དང་མཁའ་སྣེ་སྤྲུལ་སྐུ་གཉིས་ཀྱིས་ཁ་སེང་ནས་རེ་འདུན་གནང་གི་འདུག
དེ་རིང་འདིར་བྱང་རྩེར་ལྷ་མོའི་རྗེས་གནང་ཞིག་བྱུང་ན་ཞེས་ཉེ་ཆར་གསུང་གི་འདུག་ཀྱང། ངོས་ལ་དུས་ཚོད་མེད་དུས་བྱེད་རྒྱུ་གང་ཡང་མི་འདུག གང་ལྟར་ཕྱི་སྣོད་དང་ནང་བཅུད་ཀྱི་དགེ་འདུན་ཚོ་ཡིན་ནའང་རེད། དགེ་འདུན་འདུས་ཚོགས་ཆེན་པོས་བསླབ་པ་སློབ་གཉེར་ཡག་ཐག་ཆོད་འདུག་པས་ཚང་མར་བཀྲིས་བདེ་ལེགས་ཞུ་རྒྱུ་ཡིན། འགོ་སྟོད་ཤུགས་ལྡན་གྱི་རྙོག་གྲ་དང་པོ་ཡོང་སྐབས་བྱང་རྩེ་གྲྭ་ཚང་དང་པོའི་རྐྱེན་ལངས་ས་གཅིག་རེད། བྱང་རྩེ་གྲྭ་ཚང་ལ་བཀྲ་མ་ཤིས་པ་དེ་འདྲ་བྱུང་སྟེ་སྐྱབས་རྗེ་རིན་པོ་ཆེར་ཐུགས་དམ་ཞུས། སྐྱབས་རྗེ་རིན་པོ་ཆེ་ནས་ལྷ་མོ་འཁོན་ཞེས་བཀའ་གནང་བྱུང་ཞེས་དེ་དུས་རིན་པོ་ཆེས་གསུངས་པ་རེད། དེ་ནས་རི་བོ་དགེ་ལྡན་པའི་ལུང་རྟོགས་ཀྱི་བསྟན་པ་འཛིན་མཁན་གཙོ་གྲས་གལ་ཆེ་བ་ཞིག་ཆགས་ཡོད། གང་ལྟར་གྲྭ་ཚང་འདི་ནས་འགོ་སྟོད་ནས་བློ་གཅིག་སེམས་གཅིག་བསམ་པ་རྣམ་དག་གནང་སོང་བས་ཐུགས་རྗེ་ཆེ་ཞུ་གི་ཡིན། དེ་དང་ཆབས་ཅིག་མཁན་ཐོག་གོང་མའི་སྐབས་བྱང་རྩེ་གྲྭ་ཚང་གཙང་མ་ཞེ་དྲག་ཡིན་ཟེར་ཁས་ལེན་གནང་སོང་། ཡང་དེང་སྐབས་རྙོག་གྲ་ཏོག་ཙམ་ཐོན་ཡོང་གི་འདུག དང་པོ་ནས་གཙང་མ་ཞིག་བྱེད་དགོས་རྒྱུ་རེད་མ་གཏོགས་མིའི་མདུན་ལ་ངོ་སོ་འཁྱེར་ཏེ་གཙང་མ་ཆགས་ཡོད་བརྗོད། རྗེས་སུ་རྫོར་རྟགས་ཏོག་ཙམ་འདོན་རྒྱུ་དེ་ཡག་པོ་མི་འདུག སྤྱི་སྙོམས་ཀྱི་དགེ་འདུན་པ་ཚོས་ཧུར་ཐག་འབད་ཐག་གནང་ཡོད་པར་ཐུགས་རྗེ་ཆེ་ཞུ་གི་ཡིན། བྱང་རྩེ་གྲྭ་ཚང་གི་དགེ་འདུན་པ་འགའ་ཤས་ཀྱིས་སྤྱི་ཚོགས་ཐོག་ལྟ་རྟོག་གི་ཞབས་འདེགས་བསྒྲུབ་རྒྱུ་དང་། ཡུལ་པའི་ནང་ལྟ་རྟོགས་བྱེད་རྒྱུ་ལྟ་བུ། ཁ་སང་ས་སྐྱའི་དགོན་པར་ཁོ་རང་ཚོའི་སྦྱིན་བདག་རེ་ཟུང་གིས་ངོས་ལ་འབོད་སྐུལ་བྱས་ཏེ། གཞིས་ཆགས་ནང་གི་ཁྱིམ་ཚང་སྐྱོ་བ་འགར་རོགས་རམ་དང་ལྟ་རྟོག དེ་བཞིན་སློབ་ཡོན་གྱི་ལས་བསྡོམས་ཤིག་སྤྲད་འདུག་པས་ཞེ་དྲག་ཡག་པོ་རེད་ཅེས་བསྔགས་བརྗོད་བྱེད་རྒྱུ་བྱུང༌། འདིར་བྱང་རྩེ་གྲྭ་ཚང་ཁུངས་ཀྱི་ཁྱེད་རང་ཚོ་མི་འགའ་ཤས་ནས་ལས་དོན་དེ་ལྟར་སྒྲུབ་ཀྱི་ཡོད། རྒྱ་གར་ཡུལ་པའི་ནང་ཡིན་ནའང་སྤྱིར་སངས་རྒྱས་ཆོས་ལ་དོ་སྣང་གསར་པ་ཞིག་སླེབ་ཀྱི་ཡོད་པ་ཡག་པོ་བྱུང་འདུག ང་ཚོ་འདིར་བཤད་གྲྭ་ཁག་དེ་དག་དགེ་རྒན་སློབ་སྦྱོང་སྤྲོད་སའི་འདུ་ཤེས་ལྟ་བུ་བཞག་སྟེ་འདི་གར་ཡོད་པའི་སློབ་གཉེར་བ་ཚོ་གཙོ་བོ་སོ་སོ་སློབ་གཉེར་བྱས་ཏེ། རང་མགོ་གང་ཐོན་མིན་པར་སློབ་གཉེར་བྱས་རྗེས་ཐོན་སྐབས་སོ་སོའི་རང་ཡུལ་དུ་དགོན་པ་དང་ཡུལ་པ་རེད། དེ་འདྲའི་ཐོག་ཞབས་འདེགས་སྒྲུབ་མཁན་ད་ལྟ་བར་གདན་ས་སེར་འབྲས་དགའ་གསུམ་ནས་གང་ཙམ་བྱུང་འདུག་དེ་དག་དངོས་གནས་བྱས་རྗེས་ཆེན་པོ་རེད།
འདིར་རྒྱ་གར་ལ་ཚུར་ཡོང་སྟེ་ལོ་བཅུ་བཅོ་ལྔ་སློབ་སྦྱོང་བྱས་ཏེ་དགེ་བཤེས་ཐོན་ཡོད་མེད་ལ་མ་ལྟོས་པར་དཔེ་ཆ་གང་ཙམ་བལྟས་ཏེ། ཕ་ཡུལ་དུ་སླེབས་མཚམས་དགོན་པ་མཚན་ཉིད་ཡོད་པའི་གྲས་ལ་མཚན་ཉིད་སློབ་ཁྲིད་ཡར་རྒྱས་གཏོང་རྒྱུ་དང་། དེ་སྔ་གཞུང་ཆེན་གྱི་སློབ་ཁྲིད་མེད་མཁན་ཚོ་ཡིན་ཡང༌གཞུང་ཆེན་སློབ་ཁྲིད་གསར་པ་བྱེད་རྒྱུའི་བྱས་རྗེས་དངོས་གནས་ཡག་པོ་བཞག་འདུག རིགས་ལམ་ཐོག་ནས་དཔེ་ཁྲིད་བྱེད་རྒྱུའི་སྲོལ་ཡག་པོ་གཏོད་ཡོད་སྟབས། ཉེ་འཁོར་རྙིང་མ་དང་ས་སྐྱ། བཀའ་བརྒྱུད་བཅས་ཀྱི་དགོན་པའི་ནང་ནས་དོ་སྣང་གསར་པ་སླེབས་ཏེ། ས་དགེ་བཀའ་རྙིང་རིས་སུ་མ་ཕྱེ་པའི་ཉེ་འཁོར་དགོན་པ་ཚོ་རུབ་རུབ་བྱས་ཏེ་འཇང་དགུན་ཆོས་དང་རྩོད་གྲྭ་ལྟ་བུ་ཚུགས་རྒྱུ་བྱུང་སྐོར་ཕལ་ཆེར་གཅིག་གཉིས་གོ་ཐོས་བྱུང་བས་ཡག་པོ་བྱུང་འདུག དེར་བརྟེན་འདིར་ཡོད་པའི་དགེ་འདུན་ཚོས་བསླབ་པ་སློབ་གཉེར་བྱས་པ་དེ་དང་འབྲེལ་བའི་ཐོག་ནས་དགོན་པ་གྲྭ་ཚང་སྒྲིག་འཛུགས་ཡོད་པ་ཞིག་ནང་བསྡད་དེ་དབང་དང་རྒྱུད་པའི་འགྲོ་འདུག་སྤྱོད་གསུམ་གྱི་བཟང་པོའི་སྤྱོད་ལམ་གྱི་འགྲོ་སྟངས་དེ་ཚོའི་གྲས་དེ་སོ་སོའི་ཡུལ་ལུང་ལ་ཞབས་འདེགས་སྒྲུབ་བསམས་པའི་བསམ་བློ་གཏོང་དགོས། ད་ལྟ་འདིར་མོན་དང་ལ་དྭགས་ཁུལ། སྤྱི་ཏི འབྲུག འབྲས་ལྗོངས། དེ་བཞིན་འབྲུག་ནས་ཁྱེད་རང་ཚོ་སློབ་གཉེར་བ་ཁ་ཤས་ཡོད་འདུག་པས་ཧ་ཅང་ཡག་པོ་རེད། དེང་སང་འབྲུག་ནང་གནས་ཚུལ་མཐོང་རྒྱ་ཐོས་རྒྱ་ཆེ་རུ་ཕྱིན་ཏེ་ཡག་ཏུ་འགྲོ་གི་ཡོད་པ་ལྟ་བུ་འདུག ལོ་བཅོ་ལྔ་ཉི་ཤུའི་སྔོན་འབྲུག་པའི་གསར་འགྱུར་ཀུན་གསལ་མེ་ལོང་ཞེས་པ་དེ་འདྲ་ཞིག་གི་ཚགས་པར་ངོས་རང་གིས་མཐོང་བའི་ནང་རྩོམ་ཡིག་ཅིག་བྲིས་འདུག་པའི་ནང་། དགེ་ལུགས་པའི་ཆོས་དེ་ཡག་པོ་མ་རེད་ཅེས་བྲིས་འདུག དེ་བཞིན་ཏྰ་ལའི་བླ་མ་༸གོང་ས་ལྔ་པ་ཆེན་པོའི་སྐྱེ་ཕྲེང་ཡིན་དུས་དམ་ཚིག་སྲེད་ལྷད་ཡོད་པས་དེའི་ས་ནས་ཆོས་ཞུ་རྒྱུ་མེད་ཅེས་བྲིས་འདུག མཁན་རིན་པོ་ཆེ་ཀུན་དགའ་དབང་ཕྱུག་དེ་རྫོང་གསར་བཤད་གྲྭར་སྔོན་མ་འབྲུག་པའི་གྲྭ་རྒྱུན་གང་ཙམ་ཡོད། སྐབས་ཤིག་ལ་དེ་དག་ཚང་མ་འཐེན་འདུག ཡང་རྗེས་སུ་གསར་པ་སླེབས་ཡོད། དེ་ལྟར་མཐོང་རྒྱ་མེད་པས་བྱས་པ་རེད། དཔེར་ན། ང་རང་ཚོའི་དགེ་ལྡན་ཚོའི་ནང་ཡིན་ནའང་སྐབས་རེ་རྙིང་མ་བཀའ་བརྒྱུད་ལབ་པ་ཡིན་ནའང་ཧ་ལམ་ཆོས་འདི་ལས་ཕྱི་རོལ་དུ་འགྱུར་བ་ལྟ་བུ་བྱེད་ཀྱི་འདུག་པ་དེ་དག་ནོར་འཁྲུལ་རེད།
ཡང་རྙིང་མ་བཀའ་བརྒྱུད་ནང་དུ་དགེ་ལུགས་ཞེས་རྗེ་རིན་པོ་ཆེ་རྟོགས་བཟོ་ཚ་པོ་རེད་ཟེར་རྒྱུ་ལྟ་བུ་རེད། དེ་འདྲ་རྩ་བ་ནས་མ་རེད། ཅེས་སོགས་ཀྱི་འགྲེལ་བརྗོད་མཛད། དེ་རྗེས་མུ་མཐུད་བཀའ་སློབ་ཕེབས་དོན། ང་རང་ཚོས་གཟབ་གཟབ་བྱས་ན་མ་གཏོགས་ལྷོད་གཡེང་ཕྱིན་ཏེ། འདུས་ཚོགས་ཆེན་པོ་དང་གྲ་རྒྱས་པོ་བྱས་ནས་འཇིག་རྟེན་ཆོས་བརྒྱད་ཀྱི་རྣམ་གཡེང་སྟེང་ཕྱིན་པ་ཡིན་ན་འཐུས་ཤོར་འགྲོ་རྒྱུའི་ཉེན་ཁ་ཡོད་པས་ཡིན་གཅིག་མིན་གཅིག་ཚང་མས་རང་གི་རང་ལ་དྲན་གསོ་བཏང་ཐོག་སོ་སོའི་སེམས་ལ་སྐུལ་ལྕགས་བཏང་བ་དང་ཆབས་ཅིག་སོ་སོར་ཞུ་དག་གཏོང་རྒྱུ་གལ་ཆེན་པོ་རེད་བཀྲིས་བདེ་ལེགས། ཞེས་བཀའ་སློབ་སྩལ་ཡོད། དེ་རྗེས་མགོན་པོ་གང་ཉིད་མཆོག་ལ་ལྷ་མོའི་གསོལ་ཚོགས་འདེགས་འབུལ་ཞུས་ཏེ་རྟེན་འབྲེལ་གྱི་མཛད་སྒོ་གྲོལ་ཡོད། ༸གོང་ས་མཆོག་ཕྱི་ཚེས་ ༧ བར་དགའ་ལྡན་བྱང་རྩེ་གྲྭ་ཚང་དུ་བཞུགས་བཞག་མཛད་རྒྱུ་ཡིན་འདུག་པ་བཅས། །
