༢༠༡༡ ཟླ་ ༡ ཚེས་ ༢༧ རེས་གཟའ་ཕུར་བུ།

༄༅། །ཕྱི་ལོ་ ༢༠༡༡ ཟླ་ ༡ ཚེས་ ༢༢ ཉིན་སི་པེན་ (Spain) གྱི་རྒྱལ་ས་སྦར་སེ་ལོ་ནའི་ནང་འཛམ་གླིང་རྐང་རྩེད་སྤོ་ལོའི་སྒྲིག་འཛུགས་ (FIFA BOARD) ནང་དེབ་སྐྱེལ་མ་བྱས་པའི་རྒྱལ་ཁབ་ ༣༢ ཙམ་ཀྱི་རྐང་སྤོལ་སྒྲིག་འཛུགས་ (NFB) ཀྱི་ལོ་འཁོར་ཚོགས་ཆེན་ཐེངས་བདུན་པ་དེ་ཚོགས་ཡོད། སྐབས་དེར་སྒྲིག་འཛུགས་དེས་བོད་རྒྱལ་ཡོངས་རྐང་རྩེད་སྤོ་ལོའི་རུ་ཁག་ལ་མགྲོན་འབོད་གནང་ཡོད་ཀྱང་བོད་རྒྱལ་ཡོངས་རྩེད་མོའི་མཐུན་ཚོགས་ཀྱི་དྲུང་ཆེ་སྐལ་བཟང་དོན་གྲུབ་ལགས་དཔལ་འབྱོར་གྱི་མཐུན་འགྱུར་འདང་གི་མེད་པར་བརྟེན། བོད་རྒྱལ་ཡོངས་རྩེད་མོའི་མཐུན་ཚོགས་ཀྱི་ཚབ་བྱས་ཏེ་སི་པེན་བོད་ཁང་གི་ (Casa Del Tibet) འགན་འཛིན་སྐུ་ཞབས་དགེ་བཤེས་ཐུབ་བསྟན་དབང་ཆེན་ལགས་ཆེད་ཕེབས་གནང་དགོས་བྱུང་ཡོད། ཚོགས་འདུའི་སྐབས་དགེ་བཤེས་དབང་ཆེན་ལགས་ཀྱིས་བོད་རྒྱལ་ཡོངས་རྩེད་མོའི་མཐུན་ཚོགས་ཀྱི་ལོ་རྒྱུས་དང་ལས་དོན་བྱེད་ཕྱོགས་རྣམས་གློག་བརྙན་གྱི་ལམ་ནས་གསལ་བཤད་གནང་ཡོད།   ཚོགས་འདུའི་སྐབས་ཕྱི་ལོ་ ༢༠༡༢ ལོར་ཁུར་ཌིས་ཐཱན་ (Kurdistan) ནང་རྐང་རྩེད་སྤོ་ལོའི་འགྲན་བསྡུར་ (VIVA WORLD CUP) ཚུགས་རྒྱུའི་ཐག་གཅོད་བྱུང་བ་མ་ཟད། སྐབས་དེར་བོད་ཀྱི་རྐང་རྩེད་སྤོ་ལོའི་རུ་ཁག་ཀྱང་མགྲོན་འབོད་གནང་ཡོད། ད་ཐེངས་ཀྱི་ཚོགས་འདུ་དེར་ཨི་ཊཱ་ལི་དང་ཕ་རན་སི། ནོར་ཝེ། ཁུར་ཌི་སི་ཐཱན།  སི་པེན་སོགས་ཀྱི་སྐུ་ཚབ་ཕེབས་ཡོད་པ་དང་། རྐང་རྩེད་སྤོ་ལོའི་འགྲན་བསྡུར་ (VIVA WORLD CUP) ཞེས་པ་དེ་ལོ་གཉིས་རེའི་མཚམས་སུ་ཐེངས་རེ་རྩེད་སྲོལ་ཡོད་པ་ཞིག་ཡིན་འདུག གཞུང་འབྲེལ་མིན་པའི་རྐང་རྩེད་སྤོ་ལོའི་མཐུན་ཚོགས་ (NFB) ཞེས་པ་དེ་རྒྱལ་སྤྱིའི་ནང་ངོས་འཛིན་མ་ཐོབ་པའི་རྒྱལ་ཁབ་ཆེ་ཆུང་དང་གྲངས་ཉུང་མི་རིགས། རྒྱལ་ཁབ་མེད་པའི་མི་རིགས་བཅས་ཚོགས་པ་འདྲ་མིན་ཁག་ ༣༢ ཙམ་མཚོན་པའི་རྩེད་མོའི་མཐུན་ཚོགས་ཀྱི་སྒྲིག་འཛུགས་ཤིག་ཡིན་འདུག་པ་བཅས།།