༢༠༡༡ ཟླ་ ༡ ཚེས་ ༢༧ རེས་གཟའ་ཕུར་བུ།
༄༅། །འདི་གར་བོད་གཞུང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲིས་ལགས་ཀྱིས་བཏང་གནས་ནང་འཁོད་དོན། རང་གཞུང་དབུས་འོས་བསྡུ་ལས་ཁང་ནས་སྤྱི་འཐུས་སྐབས་ ༡༥ དང་། བཀའ་ཁྲི་སྐབས་ ༣ པའི་འོས་འཕེན་པའི་མིང་གཞུང་དེབ་འགོད་ཀྱི་གོ་སྐབས་ཕྱི་ཟླ་ ༡ བར་འཕར་འགྱངས་གནང་དོན་ལྟར། བྱང་ཨ་མི་རི་ཁའི་ས་གནས་འོས་བསྡུ་ལས་ཁང་གི་ཁྱབ་ཁོངས་ས་གནས་ཚང་མས་འོས་འཕེན་པའི་མིང་གཞུང་དེབ་འགོད་བྱེད་པའི་ལས་དོན་ལེགས་གྲུབ་ཟིན་པ་རྣམས་ས་གནས་འོས་བསྡུའི་འགན་འཛིན་དོན་གཅོད་བློ་བཟང་སྙན་གྲགས་མཆོག་གིས་ཕྱོགས་བསྡོམས་གནང་སྟེ་མཐའ་མའི་དེབ་འགོད་ཐོ་ཞུང་ཕྱི་ཟླ་ ༡ ཚེས་ ༢༥ ཉིན་དབུས་འོས་བསྡུ་ལས་ཁང་དུ་ཕུལ་ཟིན། ཁ་སྔོན་དེབ་སྐྱེལ་ཐེངས་དང་པོའི་སྐབས་བྱང་ཨ་རིའི་ཁུལ་ནས་དེབ་སྐྱེལ་བྱེད་མཁན་མི་གྲངས་ ༥༩༠༥ བྱུང་ཞིང་། ད་རེས་སླར་ཡང་དེབ་སྐྱེལ་གྱི་གོ་སྐབས་གསར་པ་གནང་བ་དེའི་སྐབས་དེབ་སྐྱེལ་བྱེད་མཁན་མི་གྲངས་ ༡༣༥༦ འཕར་སྣོན་བྱུང་སྟེ། མདོ་དོན་བྱང་ཨ་རི་ཁུལ་ནས་སྤྱི་འཐུས་སྐབས་ ༡༥ དང་། བཀའ་ཁྲི་སྐབས་ ༣ པའི་འོས་བསྡུ་ཆེན་མོར་དེབ་འགོད་བྱེད་མཁན་ཁྱོན་བསྡོམས་མི་གྲངས་ ༧༢༦༡ བྱུང་ཡོད།
ས་གནས་འོས་བསྡུའི་འགན་འཛིན་གྱིས་ས་གནས་ཁག་ལ་འབོད་སྐུལ་གནང་བའི་ནང་། དེ་ལས་གལ་ཆེ་བ་ནི་གང་འདྲ་བྱས་ནས་དེབ་སྐྱེལ་བྱེད་མཁན་ཚོས་ཕྱི་ཟླ་ ༣ ཚེས་ ༢༠ དངོས་གཞིའི་འོས་བསྡུའི་ཉིན་ཆ་ཤས་ལེན་ཐུབ་རྒྱུར་ཤུགས་སྣོན་རྒྱག་རྒྱུ་དེ་ཡིན་པས་འབྲེལ་ཡོད་ཚང་མས་དེའི་ཐོག་གྲ་སྒྲིག་གནང་དགོས་པའི་ནན་བརྗོད་གནང་ཡོད། བྱང་ཨ་རིའི་ནང་ཡོད་རྒྱ་སྐད་ཀྱི་བརྒྱུད་ལམ་ཞིག་ནས་བདུན་ཕྲག་རྗེས་མའི་ནང་བྱང་ཨ་རིའི་ས་གནས་འོས་བསྡུའི་འགན་འཛིན་སྐུ་ཚབ་དོན་གཅོད་བློ་བཟང་སྙན་གྲགས་མཆོག་ལ་བཙན་བྱོལ་བོད་མིའི་འདི་ལོའི་འོས་བསྡུ་ཆེན་མོ་དང་འབྲེལ་བའི་སྐོར་ལ་བཅར་འདྲི་གནང་གཏན་འཁེལ་ཡོད་པ་བཅས། །