༢༠༡༡ ཟླ་ ༡ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༡༩ ཉིན་ཨ་རིའི་མང་གཙོ་ཚོགས་པའི་གྲོས་ཚོགས་ཀྱི་འཐུས་མི་བོད་དོན་རྒྱབ་སྐྱོར་བ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་གིས་རྒྱ་ནག་གི་སྲིད་འཛིན་སྐུ་ཞབས་ཧུའུ་ཅིན་ཐའོ་ཨ་རིར་རྒྱལ་དོན་འཚམས་གཟིགས་སུ་བསྐྱོད་པ་དང་སྟབས་བསྟུན། གཏམ་བཤད་ཀྱི་གསལ་བསྒྲགས་སྤེལ་བའི་ནང་འཁོད་དོན།
ཕྱི་ལོ་ ༡༩༨༩ ལོར་པེ་ཅིང་གནམ་སྡེ་སྒོ་མོའི་ཐང་ཆེན་གྱི་དོན་རྐྱེན་བྱུང་རྗེས་ཨ་རིའི་གྲོས་ཚོགས་ནང་གཞུང་འཛིན་དང་ཕྱོགས་འགལ་ཚོགས་པ་གཉིས་ཀས་རྒྱ་ནག་དང་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་སེམས་འཚབ་བྱུང་ཡོད། དེ་བཞིན་རྒྱ་ནག་སྲིད་གཞུང་གིས་ཨ་རིས་ལྟ་ཕྱོགས་བཟང་པོ་མེད་པའི་རྒྱལ་ཁབ་ཁག་ལ་རྒྱབ་སྐྱོར་བྱེད་རྒྱུ་དང། ཚོང་དོན་དང་འབྲེལ་བའི་རྒྱ་ནག་གི་དངུལ་གྱི་རྫ་ཐང་ལ་རྒྱ་ནག་གཞུང་ཕྱོགས་ནས་སྟངས་འཛིན་བྱ་ཕྱོགས།  གནམ་གཤིས་འགྱུར་ལྡོག་དང་རང་བྱུང་ཁམས་ལ་གནོད་འཚེ་མེད་པའི་ནུས་ཤུགས་གཙང་མ་བཅས་ཀྱི་གནད་དོན་རྣམས་ནི་ཉེ་ལམ་ཨ་རི་དང་རྒྱ་ནག་སྲིད་གཞུང་གཉིས་དབར་གླེང་མོལ་བྱ་རྒྱུའི་གནད་དོན་གཙོ་བོ་ཆགས་ཡོད། ད་རེས་རྒྱ་ནག་གི་སྲིད་འཛིན་ཨ་རིར་རྒྱལ་དོན་འཚམས་གཟིགས་སུ་ཕེབས་པའི་སྐབས་འདིར་གོང་བརྗོད་ཀྱི་གནད་དོན་དེ་དག་ལ་བཟང་ཕྱོགས་ཀྱི་འགྱུར་བ་ཡོང་རྒྱུར་ངས་རེ་བ་ཞུ་བཞིན་ཡོད་ཅེས་སོགས་བཀོད་འདུག་པ་བཅས།།