༢༠༡༡ ཟླ་ ༡ ཚེས་ ༣༡ རེས་གཟའ་ཟླ་བ།
༄༅། །འདི་གར་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༦ ཙམ་ལ་དཔལ་ལྡན་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་མོན་གྷོ་འདོད་རྒུ་གླིང་གཞིས་ཆགས་སུ་ཕེབས་འབྱོར་གནང་སྟེ་་སྔ་དྲོ་ཆུ་ཚོད་ ༩།༣༠ ཐོག་མོན་གྷོ་འདོད་རྒུ་གླིང་དུ་གདན་ས་ཆེན་པོ་དཔལ་ལྡན་འབྲས་སྤུངས་དང་དགའ་ལྡན་གཙོ་བོར་གྱུར་བའི་དགེ་བཙུན་ཡོངས་ལ་བཀའ་བློན་ཁྲི་པ་སྐབས་དང་པོ་དང་གཉིས་པའི་ལས་ཡུན་རིང་བཀའ་ཤག་གི་སྲིད་བྱུས་དང་ལས་དོན་ཐོག་རྒྱབ་སྐྱོར་གནང་བར་བཀྲིན་རྗེས་དྲན་གྱི་ཐུགས་རྗེ་ཆེ་ཞུས་པ་དང་ཆབས་ཅིག་གསུང་བཤད་གནང་དོན།
སྔ་ལོའི་ཕྱི་ཟླ་ ༥ ནས་འགོ་འཛུགས་ཀྱིས་མི་མང་ནས་ཐད་ཀར་འོས་འདེམས་གནང་བའི་བཀའ་བློན་ཁྲི་པ་སྐབས་དང་གཉིས་ཀྱི་ལས་ཡུན་རྫོགས་མཚམས་དང་བསྟུན་བོད་མི་གནས་བསྡོད་ས་གནས་གང་སར་བཅར་རྒྱུའི་འབད་བརྩོན་ཞུ་བཞིན་ཡོད། དེའི་རྒྱུ་མཚན་གཙོ་བོ་ཐོན་མཇལ་ཞུ་རྒྱུ་དང་མང་ཚོགས་ལ་བཀྲིན་རྗེས་དྲན་གྱི་ཐུགས་རྗེ་ཆེ་ཞུ་རྒྱུའི་ཆེད་དུ་ཡིན་ཞེས་དང།
དེ་ཡང་བཀའ་ཁྲི་མཆོག་གིས་གསུང་དོན། བོད་མི་མང་ཚོགས་ཀྱི་འགྱུར་བ་མེད་པའི་རྒྱབ་སྐྱོར་ལ་བརྟེན་ནས་ལས་ཡུན་རིང་གཞུང་གི་སྲིད་བྱུས་དང་འཛིན་སྐྱོང་གི་ལས་དོན་ཐོག་གྲུབ་འབྲས་ཆེན་པོ་གང་ཡང་སྒྲུབ་ཐུབ་མེད་ཀྱང་འཐུས་ཤོར་ཆེན་པོ་དེ་འདྲ་ཡང་བྱུང་མེད། མང་གཙོའི་ལམ་སྲོལ་ནང་གནད་དོན་གང་ཞིག་ཡིན་རུང་མང་ཚོགས་ཀྱི་རྒྱབ་སྐྱོར་དང་། མོས་མཐུན། བཀའ་ལུང་མེད་པར་གཞུང་གི་སྣེ་མོ་བ་ཚོས་ལས་དོན་གང་ཡང་སྒྲུབ་མི་ཐུབ་ལ། གཉིས་སྨན་དབུ་མའི་ལམ་ལྟ་བུར་མཚོན་ནའང་མི་མང་གི་ཚད་མཐོའི་མང་མོས་རྒྱབ་སྐྱོར་བྱས་པ་ལ་བརྟེན་་སྲིད་བྱུས་རྒྱུན་འཁྱོངས་ལག་བསྟར་བྱེད་ཐུབ་བྱུང་བསྟབས་། ད་ལྟའི་ཆར་རྒྱལ་སྤྱིའི་ནང་བོད་ཀྱི་གནས་བབས་དེ་ཉིན་རེ་བཞིན་ཇེ་གསལ་དུ་འགྲོ་བཞིན་པ་དེ་ཡང་མང་ཚོགས་ཀྱི་རྒྱབ་སྐྱོར་དང་མོས་མཐུན་ལས་བྱུང་བ་ཞིག་ཡིན་པས་བཀའ་ཤག་སྔ་ཕྱི་གཉིས་ཀྱི་ལས་རོགས་དང་བཀའ་བློན་ཚང་མའི་ངོས་ནས་མགྲིན་དབྱངས་གཅིག་གྱུར་གྱིས་བཀྲིན་རྗེས་དྲན་གྱི་ཐོག་ནས་ཐུགས་རྗེ་ཞུ་རྒྱུ་ཡིན་ཞེས་གསུངས་ཡོད་པ་མ་ཟད། འབྱུང་འགྱུར་ཡང་བཀའ་ཤག་དང་བཀའ་བློན་ཁྲི་པ་སུ་འདྲ་ཞིག་ཕེབས་ཀྱང་མང་ཚོགས་ནས་རྒྱབ་སྐྱོར་དང་མཐུན་འགྱུར་ད་ལྟ་བཞིན་གནང་སྐྱོངས་ཡོང་བའི་འབོད་སྐུལ་ཡང་ཞུས་ཡོད།
ཡང་བཀའ་ཁྲི་མཆོག་གིས་ཞོར་དུ་དགེ་འདུན་པ་ཚོས་ཆབ་སྲིད་ནང་ཆ་ཤས་བཞེས་སྐབས་འདོད་ཆགས་ཞེ་སྡང་རྨོངས་གསུམ་གྱི་དབང་དུ་མ་སོང་བར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོག་ནས་རང་གི་རྣམ་དཔྱོད་རང་གིས་བེད་སྤྱོད་བཏང་སྟེ་དྲིལ་བསྒྲགས་དང་། བརྒྱུད་སྐུལ། ཞུ་བ་། གནོན་ཤུགས་ཇི་འདྲ་ཞིག་གི་དབང་དུ་མ་སོང་བར་རང་ཐག་རང་གཅོད་ཀྱིས་ཀུན་སློོང་རྣམ་པར་དག་པ་ཞིག་གི་ཐོག་ནས་ཆ་ཤས་ལེན་རྒྱུ་གལ་ཆེན་པོ་ཡིན་པ་དང་། དེ་ནི་ང་ཚོའི་ད་ལྟའི་སྤྱི་ཚོགས་དང་ཆབ་སྲིད་ཀྱི་དགོས་མཁོ་དང་མཐུན་པ་ཞིག་ཀྱང་ཡིན་ཞེས་སོགས་ཀྱི་གསུང་བཤད་གནངཡོད།
ཉིན་རྒྱབ་ཆུ་ཚོད་ ༢ པའི་ཐོག་འབྲས་སྤུངས་བློ་གསལ་གླིང་ཆོས་རིག་འཛིན་སྐྱོང་སློབ་གྲྭའི་ཚོགས་ཁང་ (Drepung loseling Buddhist Cultural School) ནང་ས་གནས་འགོ་འཛིན་གྱིས་གཙོས་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་ལས་ཀྱི་སྣེ་མོ་བ་རྣམ་པ་དང་། ཆོས་སྡེ་ཁག་གི་ཕྱག་མཛོད་རྣམ་པ། སློབ་གྲྭའི་དགེ་ཆེ་རྣམ་པས་གཙོས་བོད་དགེ་རྣམ་པ་བཅས་ཁྱོན་མི་གྲངས་ ༡༠༠ བརྒལ་བ་འདུ་འཛོམས་ཐོག་བཞུགས་མོལ་ཚོགས་འདུ་ཞིག་ཚོགས་ཡོད། སྐབས་དེར་བཀའ་ཁྲི་མཆོག་གིས་མང་ཚོགས་ལ་ཐོན་མཇལ་དང་བཀའ་དྲིན་རྗེ་དྲན་གྱི་གསུང་བཤད་གནང་གྲུབ་བསྟུན། ཚོགས་བཅར་བ་དང་ལྷན་དྲི་བ་དྲིས་ལན་ཡང་གནང་ཡོད་པ་བཅས།།
