༄༅། །བོད་རྒྱལ་ལོ་ ༢༡༣༧ ཕྱི་ལོ་ ༢༠༡༠ ཟླ་ ༩ ཚེས་ ༢ ཉིན་བཙན་བྱོལ་བོད་མིའི་མང་གཙོ་དབུ་བརྙེས་ཏེ་མི་ལོ་ཧྲིལ་པོ་ ༥༠ འཁོར་བའི་དུས་ཆེན་དང་སྟབས་བསྟུན་བོད་མི་མང་སྤྱི་འཐུས་ལྷན་ཚོགས་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་སྤྱི་དང་། ལྷག་པར་བོད་འབངས་རྣམས་ལ་མང་གཙོའི་ལམ་བཟང་གསོལ་སྩལ་བཀའ་དྲིན་བསྐྱངས་པར་བཀའ་དྲིན་རྗེས་དྲན་མཚོན་ཕྱིར་གསེར་གྱི་གཟེངས་རྟགས་ཤིག་འབུལ་ལམ་ཞུས་པར་མང་ཚོགས་ནས་ཞལ་འདེབས་ཇི་བྱུང་དང་། གཟེངས་རྟགས་ཆེད་འགྲོ་གྲོན་ཇི་སོང་། ཞལ་འདེབས་ཀྱི་དངུལ་ལྷག་གནས་སྟངས་བཅས་གཤམ་གསལ།

བཅས་གོང་གསལ་རྒྱ་བལ་འབྲུག་གསུམ་དང་། ཨ་རི། ཉི་ཧོང་། ཕ་རན་སི་བཅས་ནས་ཞལ་འདེབས་ཁྱོན་བསྡོམས་ཧིན་སྒོར་ ༥༦༡༧༥༦༢།༠༠ (འབུམ་ལྔ་བཅུ་ང་དྲུག་དང་ཆིག་ཁྲི་བདུན་སྟོང་ལྔ་བརྒྱ་དྲུག་ཅུ་རེ་གཉིས་) བྱུང་ཐོག་ནས་གསེར་གྱི་གཟེངས་རྟགས་ཆེད་འགྲོ་གྲོན་ཧིན་སྒོར་ ༢༦༣༡༤༦༢།༠༠ སོང་བ་འཐེན་འཕྲོས་ཧིན་སྒོར་ ༢༩༨༦༡༠༠།༠༠ (འབུམ་ཉི་ཤུ་རྩ་དགུ་དང་བརྒྱད་ཁྲི་དྲུག་སྟོང་བརྒྱ་ཐམ་པ་)ལྷག་བསྡད་ཡོད་པ་རྣམས་རང་གཞུང་དཔལ་འབྱོར་ལས་ཁུངས་སུ་འབུལ་རྒྱུ་གནང་པ་ལྟར་ཕུལ་དང་འབུལ་བཞིན་ཡིན་ཅིང་། ཡང་སྐུ་ཞབས་བློ་བཟང་ཆོས་འཕེལ་ལགས་ནས་གསེར་གྱི་གཟེངས་རྟགས་ཀྱི་ཞལ་འདེབས་ཆེད་གསེར་གྱི་ཚིགས་ཁེབ་གྷ་རམ་ ༢༣ ཡོད་པ་ཕྲ་རྒྱན་རང་སྒྲིག་གཅིག་ཕུལ་འབྱོར་བྱུང་བ་སྐུ་སྒེར་ཡིག་ཚང་དུ་འབུལ་ལམ་ཞུས་ཡོད། གསེར་གྱི་གཟེངས་རྟགས་ཆེད་ཞལ་འདེབས་འབུལ་མཁན་ཚང་མ་དང་། སྐུ་ཚབ་དོན་གཅོད་རྣམ་པ་དང་། ས་གནས་འགོ་འཛིན་རྣམ་པ་སོགས་ཞལ་འདེབས་བསྡུ་འབུལ་ལ་མཐུན་འགྱུར་གནང་མཁན་རྣམ་པ་ཚང་མར་ཐུགས་རྗེ་ཆེ་ཞུ་རྒྱུ་དང་། ལྷག་པར་བོད་མི་མང་སྤྱི་འཐུས་ལྷན་ཚོགས་ཀྱི་གཟེངས་རྟགས་བཞེང་སྐྲུན་གྱི་ཚོགས་ཆུང་གི་ཚོགས་མི་སྤྱི་འཐུས་སྒྲོལ་མ་མཚོ་མོ་ལགས་དང་། སྤྱི་འཐུས་སྤྲུལ་སྐུ་ཨོ་རྒྱན་སྟོབས་རྒྱལ་ལགས། སྤྱི་འཐུས་རྒྱལ་ནོར་ཚེ་དབང་ལགས་བཅས་ནས་གཟེངས་རྟགས་བཞེང་བསྐྲུན་གྱི་ཞུ་སྒོར་ལྷག་བསམ་ཧུར་བསྐྱེད་ཅི་ཆེ་གནང་སོང་བ་མ་ཟད། གཟེངས་རྟགས་དང་འབྲེལ་བའི་གནང་སྒོའི་ཆེད་ཕན་ཚུན་ཕྱོགས་ཕེབས་སྐབས་འགྲིམས་འགྲུལ་དང་ཟུར་ཕོགས་སོགས་ཀྱི་འགྲོ་གྲོན་ཡང་མ་བཞེས་པ་བཅས་ལ་སྤྱི་འཐུས་རྒྱུན་ལས་ཀྱིས་ལེགས་སོ་བསྔགས་བརྗོད་ཞུ་རྒྱུ། འདིར་མང་ཚོགས་སོགས་ཀྱི་ཞལ་འདེབས་རྣམས་རྒྱལ་ཁབ་བམ་ས་གནས་སོ་སོ་ནས་ཇི་བྱུང་གི་བསྡོམས་ཐོ་ཙམ་ལས་འགོད་མ་ཐུབ་པས། གལ་ཏེ་དགོས་གལ་གྱུར་ཚེ་སྐུ་ཚབ་དོན་གཅོད་རྣམ་པ་དང་། ས་གནས་འགོ་འཛིན་རྣམ་པ་སོགས་འབྲེལ་ཡོད་རྣམ་པས་ས་གནས་མང་ཚོགས་འདུ་འཛོམས་ཆེ་སྐབས་དང་བསྟུན་ཁུངས་སོ་སོ་ནས་ཞལ་འདེབས་ཇི་ཕུལ་ཞིབ་ཕྲའི་གསལ་བསྒྲགས་གནང་ལེགས་བཅས་ཀྱི་གསལ་བསྒྲགས་སུ། བོད་མི་མང་སྤྱི་འཐུས་རྒྱུན་ལས་ཀྱིས་ཕྱི་ལོ་ ༢༠༡༡ ཟླ་ ༡ ཚེས་ ༡༨ ལ།། །།