༢༠༡༡ ཟླ་ ༡ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༥ ཉིན་རྡ་ས་ཉེ་འགྲམ་ཤེས་རབ་དགའ་ཚལ་སློབ་གླིང་གི་འཛིན་སྐྱོང་སམ་བྷོ་ཊའི་ཁྱབ་ཁོངས་སུ་སྤོ་བསྒྱུར་གནང་བའི་མཛད་སྒོ་ཚོགས་ཡོད། དེ་ཉིན་རྒྱབ་ཆུ་ཚོད་ ༢། ཐོག་སློབ་གྲྭའི་ཚོགས་ཁང་དུ་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་དང་། དྲུང་འཕར་བཀྲ་ཤིས་སྒྲོལ་མ་ལགས། སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་དག་ལགས། དཔལ་འབྱོར་ལས་ཁུངས་ཀྱི་དྲུང་ཆེ་ཟླ་བ་རྡོ་རྗེ་ལགས། ཤེས་རབ་དགའ་ཚལ་སློབ་གླིང་གི་འགན་འཛིན་བུ་ཕྲུག་ཤཱསྟྲི་ལགས། སློབ་སྤྱི་ཚེ་གྲུབ་རྡོ་རྗེ་ལགས་ཀྱིས་གཙོས་འབྲེལ་ཡོད་དགེ་རྒན་ལས་བྱེད་དང་སློབ་ཕྲུག་བཅས་ཁྱོན་མི་གྲངས་ ༥༠༠ བརྒལ་བ་འདུ་འཛོམས་ཀྱི་ཐོག་མར་སློབ་གྲྭའི་འགན་འཛིན་གྱིས་ངོ་སྤྲོད་གསུང་བཤད་གནང་མཚམས་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཀྱིས་མཛད་སྒོར་ཕེབས་མཁན་ཚང་མར་འཚམས་འདྲི་ཞུས་པ་དང་ཆབས་ཅིག་གསུང་དོན། རྩ་བའི་སམ་བྷོ་ཊ་སྤྱི་ཁྱབ་ཡིག་ཚང་འདི་ནི་ཕྲུ་གུའི་ཤེས་ཡོན་ཐོག་ལས་ཀ་བྱེད་མཁན་གྱི་སྡེ་ཚན་ཞིག་ཆགས་ཡོད།
དེ་བཞིན་ཕྲུ་གུའི་ལོ་ཚད་ལ་ཆ་བཞག་ནའང་ལོ་གསུམ་ནས་བཅོ་བརྒྱད་ཤ་སྟག་ཆགས་ཡོད། དེ་རིང་འདིར་ཤེས་རབ་དགའ་ཚལ་སློབ་གླིང་གི་སློབ་མ་ཚོར་ལྟ་སྐབས་སློབ་མ་དེ་དག་ལོ་ཚད་རྒན་པ་ཤ་སྟག་ཡིན་སྟབས་ཕྲན་བུ་མི་འདྲ་བ་ཞིག་ཆགས་ཡོད། ཁྱེད་རང་ཚོ་རྒྱ་གར་དུ་ཡོང་དགོས་དོན་ཡང་བོད་ནང་བཟའ་འཐུང་མེད་པར་བརྟེན་ནས་ཡོང་བ་ཞིག་མིན། རང་སྲོག་འབེན་ལ་བཙུགས་ཏེ་ཡོང་དོན་ནི་ཁྱེད་རྣམ་པས་ཤེས་གསལ་རེད། ངའི་བསམ་ཚུལ་ལྟར་ན། ཁྱེད་རང་ཚོ་འདིར་ཡོང་དགོས་པའི་རྒྱུ་མཚན་ནི་བོད་ནང་སློབ་སྦྱོང་སོགས་ཀྱི་གོ་སྐབས་མ་རག་པ་མང་པོ་ཞིག་འདིར་ནས་རག་གི་ཡོད་སྟབས་ཡོང་བ་ཞིག་རེད་སྙམ་གྱི་འདུག དཔེར་ན། ༸གོང་ས་༸སྐྱབས་མགོན་ཆེན་པོ་མཆོག་གི་ཞལ་མཇལ་དང། བོད་ཀྱི་སྐད་ཡིག་ཐོག་སློབ་སྦྱོང་བྱེད་རྒྱུ་སོགས་ཡོད་པར་བརྟེན་ཡོང་བ་ཞིག་ཡིན་སྟབས། ཁྱེད་རང་ཚོས་སློབ་སྦྱོང་གི་གོ་སྐབས་བཟང་པོ་ཐོབ་པ་དེ་ནམ་ཡང་ཆུད་ཟོས་སུ་གཏོང་རྒྱུ་མེད། ཅེས་སོགས་ཀྱི་གསུང་བཤད་གནང། དེ་ནས་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་གིས་གསུང་བཤད་གནང་བའི་སྙིང་དོན། བཀའ་བློན་འཛིན་སྐྱོང་ལས་ཁུངས་ཤིག་གི་འོག་སློབ་གྲྭའི་འཛིན་སྐྱོང་ཞེས་པ་ཧ་ལམ་མེད། འོན་ཀྱང་ང་ཚོ་བཙན་བྱོལ་བ་གནས་སྟངས་གཞན་ཞིག་ཡིན་པ་དང་སམ་བྷོ་ཊའི་འོག་ཏུ་འཛིན་སྐྱོང་གནང་བ་དེས་ལས་ཀའི་ངོ་བོའི་ཐོག་ནས་སློབ་གྲྭ་རང་གི་འཛིན་སྐྱོང་བྱས་ཏེ་འགྲོ་སྐབས་ཏན་ཏན་ཚགས་ཚུད་དུ་འགྲོ་གི་རེད། ང་ཚོའི་ལས་ཀའི་ཆ་ནས་འཐུས་ཤོར་དང་རྒན་ལགས་རྣམ་པར་སྟབས་མ་བདེའི་ཐུགས་སྣང་དེ་འདྲ་བྱུང་ཡོད་ན། ང་རང་སྒེར་དང་ཤེས་རིགས་ལས་ཁུངས་ཀྱི་ཚབ་ཞུས་ཏེ་དགོངས་སེལ་ཞུ་རྒྱུ་ཡིན། དེ་བཞིན་སློབ་ཕྲུག་ཁྱེད་རྣམས་ནི་བོད་ནང་གི་སྐུ་ཚབ་མཚོན་གྱི་ཡོད་ལ་སློབ་སྦྱོང་བྱེད་རྒྱུ་དེ་ལྟོ་གོས་ཙམ་གྱི་ཆེད་དུ་མིན་པར་བོད་མི་རིགས་དང་འཛམ་གླིང་ཞི་བདེའི་སླད་དུ་ཡིན་པས་ཚོའི་ནང་ནས་བཙན་བྱོལ་སྒྲིག་འཛུགས་ནང་ཕྱག་ལས་གནང་ཐུབ་པའི་རེ་བ་དང་སློབ་སྦྱོང་ཧུར་ཐག་གནང་རོགས་ཞེས་འབོད་སྐུལ་ཡང་ཞུས་གནང་ཡོད། དེ་རྗེས་སློབ་སྤྱི་ཚེ་གྲུབ་རྡོ་རྗེ་ལགས་ཀྱིས་ཐུགས་རྗེ་ཆེ་ཞུས་ཏེ་མཛད་སྒོ་གྲོལ་ཡོད་པ་བཅས། །
