༢༠༡༡ ཟླ་ ༡ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༧ རེས་གཟའ་པ་སངས་ཉིན་རྒྱ་གར་གྱི་རྒྱལ་ས་ལྡི་ལི་གསར་པའི་རྒྱལ་ཡོངས་འགྲེམས་སྟོན་གྱི་ཚོགས་ཁང་ཆེན་མོའི་ནང་རྒྱ་གར་གྱི་སྲིད་བློན་ཟུར་པ་སྐུ་གཤེགས་ལལ་བྷ་ཧཱ་དྷུར་ཤཱསྟྲི་མཆོག་གི་རྗེས་དྲན་མཛད་སྒོ་ཐེངས་ ༡༨ པའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེའི་ནུས་པ། ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན།  སྐུ་གཤེགས་ལལ་བྷ་ཧཱ་དྷུར་ཤཱསྟྲི་མཆོག་ཆུང་དུས་ནས་གཞན་གྱི་བདེ་དོན་ཆེད་བྱམས་བརྩེའི་བསམ་པ་ཤུགས་ཆེན་པོ་ཡོད་མཁན་ཞིག་དང་། བྱམས་བརྩེའི་བློ་དེ་སེམས་ཅན་ཐམས་ཅད་བདེ་བ་དོན་དུ་གཉེར་རྒྱུ་དང་སྡུག་བསྔལ་ལས་བྲལ་རྒྱུའི་ཐོབ་ཐང་ཡོད་པའི་ལྟ་གྲུབ་ལ་གཞི་བཅོལ་བ་ཞིག་ཡིན་རྐྱེན་ཕྱོགས་ལྷུང་མེད་པ་ཞིག་ཡིན།  གཞན་དོན་གྱི་བསམ་པ་གོམས་པའི་དབང་གིས་རང་རྒྱུད་ལ་ཕྱོགས་ལྷུང་སྤངས་པའི་བྱམས་བརྩེའི་བློ་ཡང་དག་པ་ཞིག་སྐྱེ་ཐུབ། བྱམས་བརྩེའི་བློ་དེས་རང་རྒྱུད་ཀྱི་འཇིགས་དངངས་དང་དོགས་པ་སོགས་ཞི་བར་བྱེད་ཀྱི་ཡོད། སེམས་ནང་ཞེ་སྣང་ཡོད་ཚེ་གསང་རྒྱ་བྱ་རྒྱུ་དང་མགོ་སྐོར་སླུ་ཁྲིད། གཉའ་གནོན་དང་དབང་ཡོད་ཤོད་དགོས་པའི་གནས་སྟངས་ཆགས་རྐྱེན་མི་སྒེར་ཕན་ཚུན་དང་རྒྱལ་ཁབ་ཕན་ཚུན་དབར་ཡིད་ཆེས་དང་ཡང་དག་པའི་མཐུན་ལམ་ཞིག་ཡོང་རྒྱུར་སྒེག་བྱེད་ཀྱི་ཡོད། ངོས་སྒེར་གྱིས་སྐུ་གཤེགས་ལལ་བྷ་ཧཱ་དྷུར་ཤཱསྟྲི་མཆོག་ལ་ཆེ་མཐོང་དང་བསྔགས་བརྗོད་ཆེན་པོ་ཞུ་བཞིན་ཡོད། གང་ཡིན་བརྗོད་ན་དམ་པ་ཁོང་ལ་ཡང་དག་པའི་དབུ་ཁྲིད་ཀྱི་ཡོན་ཏན་ཆ་ཚང་ལྡན་ཡོད་ཅེས་སོགས་ཀྱི་བཀའ་སློབ་སྩལ།  དེ་རྗེས་ཚོགས་བཅར་བ་ཁག་གཅིག་གིས་་རྒྱ་གར་ནང་ལྐོག་བཟའ་རུལ་སུངས་ཀྱི་དཀའ་ངལ་འཕྲད་བཞིན་པའི་གནད་དོན་ཐོག་དྲི་བ་ཕུལ་བར་༸གོང་ས་མཆོག་གིས་བཀའ་ལན་སྩལ་དོན།  གཞུང་གི་ལས་བྱེད་པའི་ནང་ལྐོག་བཟའ་རུལ་སུངས་ལ་སྟངས་འཛིན་བྱ་རྒྱུའི་ཐབས་ལམ་དེ་རྒྱ་ནག་དང་པཱ་ཀི་སི་ཐན་ལས་རྒྱ་གར་དེ་ཕྲན་བུ་དྲག་པ་ཡོད། གང་ཡིན་བརྗོད་ན་རྒྱ་གར་ནང་གསར་འགྱུར་རང་དབང་ཡོད་པར་བརྟེན། ཆབ་སྲིད་པ་དང་ལས་བྱེད་པ་རྣམས་ཀྱི་བྱ་སྤྱོད་ངན་པ་དེ་དག་གསལ་སྟོན་བྱེད་ཐུབ། ལྐོག་བཟའ་རུལ་སུངས་སྟངས་འཛིན་བྱ་རྒྱུར་རྒྱ་གར་གྱི་ཁྲིམས་བཟོ་ལྷན་ཚོགས་ལ་རང་དབང་ཡོད་པ་མ་ཟད།  ཁྲིམས་བཟོ་ལྷན་ཚོགས་དེ་དམར་ཤོག་རྒྱལ་ཁབ་བཞིན་སྲིད་དོན་ཚོགས་པས་དབང་སྒྱུར་འོག་མེད། ལྐོག་བཟའ་རུལ་སུངས་བྱེད་མཁན་ལས་བྱེད་མཐོ་དམའ་རིམ་པ་ཚང་མའི་ནང་ཡོང་གི་ཡོད། མཐར་བསྟུགས་ན་རང་ཁྲིམས་རང་སྲུང་དང་ནང་གི་བཟང་སྤྱོད་ཀྱི་བསམ་བློ་ཁོ་ནའི་ཐོག་ནས་ལྐོག་ངན་གྱི་ཉེན་འཚབ་དེ་མེད་པ་བཟོ་ཐུབ་ཅེས་བཀའ་སློབ་སྩལ། དེ་རྗེས་ཚོགས་བཅར་བ་ཞིག་གིས་མགོན་པོ་གང་ཉིད་མཆོག་ལ་རྒྱ་གར་ནང་ལྐོག་བཟའ་རུལ་སུངས་འགོག་ཐབས་ཇི་ཡོད་སྐོར་གྱི་དྲི་བ་ཕུལ་བར་བཀའ་ལན་ཕེབས་དོན། རྒྱ་གར་གྱི་ཁྲིམས་བཟོ་ལྷན་ཚོགས་ནི་རང་དབང་ཅན་ཞིག་ཡིན་པ་མ་ཟད། ད་ཡོད་གཞུང་འཛིན་པ་ཀོང་རེ་སི་ཚོགས་(Congress Party) པའི་དབང་སྒྱུར་འོག་མེད་པར་བརྟེན་མ་མཐར་ཡང་ཕྱི་གསལ་ནང་གསལ་དང་འགན་འཁུར་ལྡན་པའི་ཚན་པ་ཞིག་ཆགས་ཡོད། ཕྱོགས་མཚུངས་རྒྱ་གར་ནང་གསར་འགོད་རང་དབང་ཡང་ཡོད་ཅེས་བཀའ་ལན་སྩལ། གཞན་ཡང་༸གོང་ས་མཆོག་ལ་འཇིགས་སྐུལ་རིང་ལུགས་དང་འབྲེལ་བའི་དྲི་བ་ཕུལ་བར་བཀའ་ལན་སྩལ་དོན། འཛམ་གླིང་ནང་ད་ཆ་འཇིགས་སྐུལ་རིང་ལུགས་པ་འདི་རེད་ཅེས་དངོས་སུ་མཐོང་རྒྱུ་མེད་པར་རྟེན་ཉེན་ཁ་ཡོད་པའི་དཀའ་ངལ་ཞིག་ཆགས་ཡོད།
དེ་འགོག་ཐབས་སུ་ང་ཚོས་འཇིགས་སྐུལ་རིང་ལུགས་པའི་དཀའ་ངལ་དེའི་རྒྱུ་རྐྱེན་གཙོ་བོ་གང་ཡིན་ཤེས་པ་བྱེད་དགོས།  ཤེས་ཡོན་དང་གོ་རྟོགས་ཀྱི་ལམ་ནས་འཛམ་གླིང་ནང་ཞི་བདེ་བསྐྲུན་ཐུབ་པ་ལས་སྨོན་ལམ་བརྒྱབ་སྟེ་ཞི་བདེ་བསྐྲུན་མི་ཐུབ། དེང་དུས་ཤེས་ཡོན་གྱི་ལམ་ལུགས་ནང་བཟང་སྤྱོད་དང་དེའི་རིན་ཐང་ཐོག་སློབ་ཚན་སློབ་ཁྲིད་མི་བྱེད་པ་ནི་བློ་ཕམ་རེད། ཅེས་སོགས་ཀྱི་བཀའ་ལན་སྩལ་ཡོད།  མཛད་སྒོ་དེ་བཞིན་ལལ་བྷ་ཧཱ་དྷུར་ཤཱསྟྲི་རྒྱལ་ཡོངས་དྲན་རྟེན་ཐེབས་རྩ་ཁང་དང་ རྒྱལ་ཡོངས་འགྲེམས་སྟོན་ཁང་གཉིས་ཟུང་འབྲེལ་ཐོག་གོ་སྒྲིག་ཞུས་པ་ཞིག་ཡིན་འདུག མཛད་སྒོའི་སྐབས་མཁས་དབང་དང་སྲིད་དོན་པ། སློབ་ཕྲུག སྒྱུ་རྩལ་བ། མི་སྣ་གྲགས་ཅན་ཁག་གཅིག་བཅས་མཉམ་བཞུགས་གནང་ཡོད།  ཕྱི་ཚེས་ ༩ ཉིན་ཕྱེད་ཡོལ་(Modern School) ཚོགས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཊུ་ཤི་ཊ་ཆོས་ཚོགས་(Tushita Dharma ) བཙུགས་ཏེ་ལོ་ངོ་ ༣༠ འཁོར་བའི་དུས་དྲན་གྱི་མཛད་སྒོའི་ཐོག་བདེ་སྐྱིད་ཀྱི་རིམ་པ་འདྲ་མིན། (Different Levels of Happiness) ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད་པ་བཅས།།