༢༠༡༡ ཟླ་ ༡ ཚེས་ ༡༡ རེས་གཟའ་མིག་དམར།
༅༅། །ཕྱི་ལོ་ ༢༠༡༡ ཟླ་ ༡ ཚེས་ ༩ ཉིན་ལྡི་ལིར་རྟེན་གཞི་བྱས་པའི་མོར་ཌན་སློབ་གྲྭའི་ཤང་ཀར་ལལ་ཚོགས་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཊུ་ཤི་ཏ་ཐེག་ཆེན་སྒོམ་སྒྲུབ་བསྟི་གནས་ཁང་(Tushita Mahayana Meditation Centre) དབུ་བརྙེས་ཏེ་ལོ་ངོ་ ༣༠ འཁོར་བའི་དུས་དྲན་གྱི་མཛད་སྒོའི་ཐོག་བདེ་སྐྱིད་ཀྱི་རིམ་པ་འདྲ་མིན་(Different Levels of Happiness) ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། དངོས་ཡོད་གནས་ཚུལ་ལ་གཞི་བཅོལ་ཏེ་དཀའ་ངལ་སེལ་རྒྱུའི་ཐབས་ལམ་བཙལ་བ་ཡིན་ན་དཀའ་ངལ་ཆེན་པོ་ཇི་འདྲ་ཞིག་ཡིན་རུང་སེལ་མ་ཐུབ་པ་མེད། བསམ་བློ་ལྷིང་འཇགས་པོ་ཞིག་ཡོད་ན་དངོས་ཡོད་གནས་ཚུལ་ཇི་ཡིན་གསལ་པོ་རྟོགས་ཐུབ། འཁྲུག་པའི་སེམས་ཀྱིས་སེམས་ནང་ཞི་བདེ་མེད་པ་ཟོ་བཞིན་ཡོད། གང་ཡིན་བརྗོད་ན། སྐབས་དེར་སེམས་ཉོན་རྨོངས་ཀྱི་གཞན་དབང་དུ་སོང་བར་བརྟེན་མིའི་རྣམ་སྤྱོད་ཀྱིས་ལེགས་ཉེས་རྣམ་པར་འབྱེད་མི་ཐུབ། ནང་གཤིས་བརྒྱུད་ཀྱི་ཉོན་རྨོངས་རྣམས་རང་གི་དགྲ་བོ་ངོ་མ་དེ་ཡིན། དགྲ་བོ་དེ་རང་གཅིག་པུས་མེད་པ་བཟོ་ཐུབ་ཅེས་བཀའ་སྩལ།
དེ་བཞིན་མགོན་པོ་གང་ཉིད་མཆོག་གི་བདེ་སྐྱིད་དང་འབྲེལ་བའི་ཐོག་བཀའ་སློབ་སྩལ་དོན། དབང་ཤེས་དང་ཡིད་ཤེས་གཉིས་ཀྱི་ཐོག་ནས་བདེ་སྐྱིད་སྒྲུབ་ཐུབ་ཀྱི་ཡོད། དབང་ཤེས་ལ་བརྟེན་པའི་བདེ་སྐྱིད་དེ་དུད་འགྲོས་ཀྱང་ཉམས་སུ་མྱོང་ཐུབ། བདེ་སྐྱིད་དེ་གཟུགས་ཕུང་ལ་བརྟེན་དགོས་པར་བརྟེན་ཡུན་རིང་གནས་མི་ཐུབ། འོན་ཀྱང་འགྲོ་བ་མིའི་ཡིད་ཤེས་ལ་བརྟེན་པའི་བདེ་སྐྱིད་མྱོང་ཐུབ། ཡིད་ཤེས་ལ་བརྟེན་པའི་བདེ་སྐྱིད་དེ་མིའི་རྣམ་སྤྱོད་ཀྱི་ལམ་ནས་བསྐྲུན་ཐུབ། བདེ་སྐྱིད་དེ་ནི་ཡང་དག་པ་ཞིག་ཡིན། མཚམས་རེ་ཆོས་ཀྱི་སྒྲ་སྙན་པོ་དང་རྟེན་སྐུ་རྩ་ཆེན་མཇལ་སྐབས་ཀྱི་དབང་ཤེས་ཀྱི་ཚོར་བ་བདེ་བ་དེས་ཡིད་ཤེས་ཀྱི་ཚོར་བ་བདེ་བ་འདྲེན་གྱི་ཡོད། ངོས་ཀྱིས་ཕྲུ་གུ་ལག་ཏུ་འཛིན་པའི་ཡེ་ཤུའི་ཨ་མ་མེ་རིའི་སྐུ་བརྙན་ནམ་མཇལ་ཡང་སྐུ་བརྙན་དེ་བྱམས་པ་དང་བརྩེ་བའི་མཚོན་དོན་ཞིག་ཡིན་པའི་བསམ་བློ་ཤུགས་ཆེ་བསླེབས་ཀྱི་འདུག འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་སུ་ཡིན་རུང་རང་གཅེས་འཛིན་གྱི་བསམ་བློ་དེ་ཤུགས་ཆུང་དུ་གཏོང་རྒྱུའི་ཐབས་ལམ་འདྲ་མིན་ལག་བསྟར་བྱེད་བཞིན་ཡོད། འཇིག་རྟེན་བཀོད་པ་པོ་འདོད་མཁན་ཡེ་ཤུ་ལྟ་བུ་མཚོན་ན་རང་ཉིད་མཐའ་གཅིག་ཏུ་འཇིག་རྟེན་བཀོད་པ་པོའི་སྐྱབས་འོག་ཏུ་ཡོད་བསམ་པའི་བློ་དེས་ང་རྒྱལ་ཆུང་དུ་གཏོང་གི་ཡོད། འཇིག་རྟེན་བཀོད་པ་པོ་མི་འདོད་མཁན་ནང་པ་དང་གཅེར་བུ་བ་ལྟ་བུར་མཚོན་ན་ལས་འབྲས་ཀྱི་རྣམ་གཞག་ཁས་ལེན་པར་བརྟེན་ལས་བཟང་པོ་ལས་མཐར་འབྲས་བུ་བཟང་པོ་ཡོང་བར་ཡིད་ཆེས་བྱེད་ཀྱི་ཡོད།
ནང་པ་ལྟ་བུར་མཚོན་ན་དགེ་བའི་ལས་ལ་བརྟེན་ནས་རྣམ་སྨིན་མི་དགེ་བ་འགོག་ཐུབ་པའི་ཡིད་ཆེས་བྱེད་ཀྱི་ཡོད། བྱམས་བརྩེ་དང་གཞན་དོན་གྱི་བསམ་པ་སོགས་ནང་གི་རིན་ཐང་གོང་འཕེལ་གཏོང་རྒྱུར་ཆོས་ཁས་ལེན་མིན་ལ་ཁྱད་པར་གང་ཡང་མེད། མི་ཚེ་བདེ་སྐྱིད་ལྡན་པ་ཞིག་ཡོང་ཆེད་ནང་གི་རིན་ཐང་དེ་ཚོ་དགོས་ངེས་ཤིག་ཆགས་ཡོད། ང་ཚོས་ཚེ་ཕྱི་མ་དང། ལྷ་ཡུལ། མྱལ་བ་སོགས་ཀྱི་སྐད་ཆ་ཤོད་ཀྱི་མེད་ཅེས་སོགས་ཀྱི་བཀའ་སློབ་སྩལ་ཡོད། མཛད་སྒོ་དེའི་སྐབས་མི་གྲངས་ ༣༠༠༠ བརྒལ་བ་འདུ་འཛོམས་བྱུང་ཡོད་འདུག་པ་བཅས།།
