༢༠༡༡ ཟླ་ ༡ ཚེས་ ༡༤ རེས་གཟའ་པ་སངས།
སྐུ་པར་ཆོས་འབྱོར་ལགས།
ངོས་ཀྱིས་ནམ་རྒྱུན་རྒྱ་ཡི་ཆོས་གྲོགས་ཚོར་ཆོས་འབྲེལ་བྱེད་སྐབས་ང་ཚོ་དགེ་ཕྲུག་གཞོན་པ་ཡིན་པའི་ཆ་ནས་གུས་འདུད་བྱེད་ཀྱི་ཡོད་ཅེས་ཤོད་ཀྱི་ཡོད། དེ་བཞིན་སེར་སྐྱ་མི་མང་ནང་ནས་དོལ་རྒྱལ་བསྟེན་མཁན་ཡོད་ན། དབང་ལ་མ་ཡོང་རོགས། གཞིས་ལུས་རྒྱ་ཆེའི་མི་མང་དང་བཙན་བྱོལ་དུ་གནས་པའི་བོད་མི་ཡིན་ནའང་རེད། དེ་བཞིན་ཧི་མཱ་ལ་ཡའི་རི་རྒྱུད་ཡིན་ནའང་རེད། བོད་ཀྱི་ཆོས་རྒྱུད་འཛིན་མཁན་ཡོངས་ནས་ངོས་ཀྱིས་དགེ་སྐྱོན་ཡོ་སྲང་གསལ་བཤད་བྱས་རྗེས་སོ་སོས་བསམ་བློ་བཏང་ཐོག་ངོས་ཀྱིས་བསམ་འཆར་བཏོན་པ་དེར་རྒྱུ་མཚན་ལྡན་པ་ཞིག་མཐོང་སྟེ། དེ་སྔ་བསྟེན་མཁན་དེ་དག་གིས་དོལ་རྒྱལ་བསྟེན་གསོལ་མཚམས་བཞག་སྟེ་ཧ་ཅང་ཡག་པོ་བྱུང་འདུག བོད་ནང་དུའང་དེ་དེ་བཞིན་བྱས་ཏེ་མང་ཆེ་བ་ཧ་ཅང་ཡག་པོ་འདུག་པས་ངོས་ཀྱིས་དམིགས་བསལ་ཤོད་དགོས་དོན་མེད། དེར་བརྟེན་ངོས་ཀྱིས་རྟག་པར་ཤོད་དགོས་དོན་མེད་ཀྱང་འགའ་ཤས་ཀྱིས། རྒྱལ་བ་རིན་པོ་ཆེའི་མཇལ་ཁ་ཞུས་པ་ཡིན་ཡང་དོལ་རྒྱལ་སྐོར་ལ་གང་ཡང་གསུང་གི་མི་འདུག ཕལ་ཆེར་གཅིག་བྱས་ནས་དེ་དཀྲོག་གཏམ་ཡིན་གྱི་རེད་ཅེས་དེ་འདྲ་བརྗོད་མཁན་འདུག། རྒྱལ་པོ་ཤུགས་ལྡན་དེ་སྡ་ངོས་ཀྱིས་ཀྱང་བསྟན་པ་རེད། སྐྱབས་རྗེ་ཁྲི་བྱང་རིན་པོ་ཆེ་མཆོག་དང་སྐྱབས་རྗེ་ཕ་བོང་ཁང་ནས་བསྟན་གྱི་ཡོད། དེ་འདྲའི་ཤུགས་རྐྱེན་བྱས་ནས་ངོས་ཀྱིས་བསྟན་པ་རེད། ཕྱི་ལོ་ ༡༩༧༠ མགོ་སྟོད་ནས་ངོས་རང་དེར་དོགས་པ་ཟ་རྒྱུ་བྱུང་། དེ་རྗེས་ཆོས་ཕྱོགས་ཐོག་ནས་བརྟག་དཔྱད་མང་པོ་བྱས་ཡོང་སྐབས་དེ་མ་འགྲིག་པ་ཞིག་རེད་འདུག དེ་ནས་ངོས་ཀྱིས་བསྟན་རྒྱུ་དེ་ཡོངས་སུ་མཚམས་བཞག་པ་ཡིན། རིམ་པས་ཉམས་ཞིབ་མཐིལ་ཕྱིན་བྱེད་སྐབས།
༸གོང་ས་ལྔ་པའི་རྣམ་ཐར་དཱུ་གུ་ལས་གོས་བཟང་ནང་རྒྱལ་པོ་ཤུགས་ལྡན་གང་འདྲ་ཡིན་པའི་སྐོར་བཀོད་ཡོད། ངོས་ཀྱིས་དེར་དམ་བསྒྲགས་བྱེད་དགོས་དོན་ནི་ངོས་ཀྱིས་གཏང་བྱུག་བྱས་པ་དེ་འདྲ་མིན་པར་ཞིབ་འཇུག་སྐབས་རྒྱུ་མཚན་དང་གནད་འགག་དེ་འདྲ་ཞིག་ཐུག་ཡོང་སྐབས། ངོས་རང་ཨ་མདོ་ཕྲུ་གུ་དཀྱུས་མ་ཞིག་ལ་༸རྒྱལ་བ་སྐུ་ཕྲེང་བཅུ་བཞི་པའི་མིང་ཐོགས་ཡོད་དུས་རྒྱལ་བ་གོང་མ་ཚོས་གནང་བའི་ལམ་དུ་ངོས་ཀྱིས་འགྲོ་དགོས་པ་ཞིག་ཡིན། དེར་བརྟེན་བོད་གངས་ཅན་ལྗོངས་ཀྱི་རིས་མེད་ཀྱི་བསྟན་པར་ཞབས་འདེགས་སྒྲུབ་རྒྱུ་དེ་ངོས་ཀྱིས་ལས་འགན་ཡིན། དེར་བརྟེན་ཁྱེད་རང་ཚོས་གནས་ཚུལ་ཚང་མ་ཤེས་དགོས། ཤེས་པའི་ཐོག་ནས་ཕྱིན་ཕྱི་སློག་ན་སོ་སོའི་རང་དབང་རེད། ཕྱོགས་གཅིག་གི་གནས་ཚུལ་མ་གཏོགས་མ་ཤེས་པ་བྱས་ཏེ་༸རྒྱལ་བ་རིན་པོ་ཆེ་གང་འདྲ་ཡིན་ན་བསམ་ན་ངོས་ཀྱིས་དག་འབུད་ཅིག་མ་བྱས་ན་འགྲིག་གི་མི་འདུག ལོ་རྒྱུས་ལ་ཞིབ་འཇུག་བྱོས་དང་བོད་ནང་དགོན་པ་ཁག་མང་པོ་ཞིག་གིས་སྔར་དོལ་རྒྱལ་བསྟེན་གྱི་མེད་ཀྱང་རྗེས་སུ་བསྟན་པའི་དབང་གིས་ཕྱི་ནང་བཀྲ་མ་ཤིས་པ་མང་པོ་ཞིག་ཡོང་གི་འདུག
གཙོ་བོ་ཁྱེད་རང་བོད་ནས་ཡོང་མཁན་ཚོས་གནས་ཚུལ་དེ་དག་ཤེས་སོང་ངམ། བར་སྐབས་ངོས་ཀྱིས་དེར་དམ་བསྒྲགས་བྱས་པ་དེས་བོད་ནང་མང་པོ་ཞིག་གིས་སྤང་བླང་ཚུལ་བཞིན་བྱས་པའི་འབྲས་བུར་དགོན་ཁག་ཆོས་ལུགས་མི་འདྲ་བ་ཕན་ཚུན་ཐུགས་མཐུན་ཁྲིམས་གཙང་དང་དགོན་པ་དང་འབྲེལ་བ་ཡོད་པའི་སྦྱིན་བདག་ཚོ་ཡང་ཐུགས་མཐུན་ཁྲིམས་གཙང་བྱུང་ཞེས་ངོས་ལ་བརྗོད་མཁན་མང་པོ་བྱུང་། དེར་བརྟེན་འདི་གར་ཡོད་པའི་ཁྱེད་རང་ཚོ་ཚང་མས་དེ་དག་ངེས་པའི་ཐོག་ནས་གཟབ་གཟབ་བྱེད་དགོས། ཞེས་བཀའ་སློབ་སྩལ་ཏེ་ཆོས་འབྲེལ་འཕྲོ་སྐྱོང་བཀའ་དྲིན་བསྐྱངས་ཡོད་པ་བཅས།།
