འཇིགས་མེད་རྒྱ་མཚོ་ལགས།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། དུས་ཡུན་ལོ་ངོ་ ༡༧ ཁྲིམས་ཆད་འཁུར་ཏེ་ལྷ་སའི་ཆུ་ཤུལ་བཙོན་ཁང་ནང་ཡོད་པའི་་སྲིད་དོན་བཙོན་པ་འཇིགས་མེད་རྒྱ་མཚོའི་གཟུགས་པོ་གནས་སྟངས་སྐྱོན་ཅན་དུ་གྱུར་ནས་ཚེ་སྲོག་ལ་ཉེན་ཁ་ཡོད་པའི་གནས་ཚུལ་ཐོན་འདུག འཇིགས་མེད་རྒྱ་མཚོ་ལགས་ནི་ཕྱི་ལོ་ ༡༩༩༦ ལོར་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ནས་གསར་རྗེར་ངོ་ལོག་པའི་ཚོགས་པ་བཙུགས་པའི་ཉེས་མིང་འོག་ཁོང་དང་ལྷ་ས་གྲོང་ཁྱེར་ཁོངས་ཀྱི་བོད་མི་ཁག་གཅིག་ལ་ཁྲིམས་ཆད་བཏང་ཡོད་པ་ལྟར། འཇིགས་མེད་རྒྱ་མཚོ་ལགས་སུ་དུས་ཡུན་ལོ་ངོ་ ༡༥ ཁྲིམས་ཐག་བཅད་དེ་གྲྭ་བཞི་བཙོན་ཁང་སོགས་སུ་ངལ་རྩོལ་སྒྱུར་བཀོད་བྱ་བཅུག་ཡོད་པ་དང་། ཁོང་བཙོན་ཁང་ནང་ཡོད་མུས་སྐབས་སུ་ཕྱི་ལོ་ ༢༠༠༤ ལོར་༸གོང་ས་མཆོག་སྐུ་ཚེ་བརྟན་པར་ཤོག་ཅེས་སྐད་འབོད་བྱས་པའི་ཉེས་མིང་འོག་དུས་ཡུན་ལོ་ངོ་ ༢ སྤར་ཆ་བྱས་ཡོད་པ་རེད། ཡིན་ནའང་ཁོང་ནས་མུ་མཐུད་བཙོན་ཁང་ནང་ལངས་ཕྱོགས་བརྟན་བཟུང་བྱས་པར་བརྟེན་ཉེས་རྡུང་ཚབས་ཆེ་ཕོག་སྟེ་ལུས་པོ་ནད་གཅོང་ཆགས་ཡོད་པ་མ་ཟད། ཆུ་ཤུལ་བཙོན་ཁང་དུ་སྤོ་སྐྱེལ་བྱས་པའི་རྗེས་སུའང་མུ་མཐུད་ཉེས་རྡུང་བཏང་བ་སོགས་ལས་དེང་སྐབས་ལུས་པོ་ནད་གཅོང་དུ་གྱུར་ཏེ་སྲོག་ཉེན་ཡོད་པའི་གནས་སུ་གྱར་ཡོད་པ་དང་། ཕྱི་ལོ་ ༢༠༡༠ ལོར་ཡང་ཐུག་འཕྲད་བཀག་འགོག་བྱས་པ་དང་ཟུར་བཀག་ཁང་དུ་ཟུར་བཅུག་བྱས་པ་སོགས་ལས་ད་ལྟའི་ཆར་འཇིགས་མེད་རྒྱ་མཚོའི་གཟུགས་པོའི་གནས་སྟངས་ཇི་འདྲ་ཡོད་མེད་ཤེས་རྟོགས་མེད་པར་གྱུར་ཡོད་པའི་གནས་ཚུལ་འབྱོར་འདུག
འཇིགས་མེད་རྒྱ་མཚོ་ལགས་ནི་ ༡༩༦༡ ལོར་ཨ་མདོ་བསང་ཆུ་རྫོང་ཁོངས་སུ་སྐྱེས་པ་དང་། འཛིན་བཟུང་མ་བྱས་གོང་ལྷ་སར་གནས་སྡོད་བྱ་གི་ཡོད་ཅིང་། པ་ལགས་དེ་སྔ་ནས་ཚེ་འདས་ཟིན་པ་དང་། ཨ་མ་ལགས་ཁོང་བཙོན་དུ་ཚུད་རྗེས་ཀྱི་ལོ་གཉིས་རྗེས་ཚེ་ལས་འདས་ཟིན་ཡོད་པ་རེད། འཇིགས་མེད་རྒྱ་མཚོ་ལགས་ནི་ཨ་མདོ་བླ་བྲང་བསང་ཆུ་རྫོང་ཁུལ་དུ་ཐོག་མར་བོད་སྤྱི་དོན་སླད་ལས་འགུལ་སྤེལ་མཁན་གྱི་ཐོག་མའི་མི་སྣའི་གྲས་ཡིན་པ་མ་ཟད། ལྷ་སར་གཏན་སྡོད་རིང་འཐབ་གྲོགས་ཁག་གཅིག་དང་མཉམ་དུ་བོད་སྤྱི་དོན་སླད་ལྷག་བསམ་རྣམ་དག་གིས་ལས་འགུལ་སྤེལ་མྱོང་མཁན་ཞིག་ཀྱང་ཡིན་པ་རེད།
ད་ལྟའི་ཆར་ཁོང་དང་ཁོང་འདྲ་བའི་རྒྱ་ནག་དམར་པོའི་གཞུང་གི་བཙོན་ཁང་ནང་སྡུག་སབྱོང་མྱོང་བཞིན་པའི་བོད་མི་ཆབ་སྲིད་བཙོན་པ་མང་དག་ཅིག་ལུས་པོ་གཅོང་ཅན་དུ་གྱུར་ཟིན་ནའང་སེམས་ཤུགས་དང་སྙིང་སྟོབས་མི་ཉམས་པར་ཐོག་མའི་དམ་བཅའ་ཇི་བཞིན་མུ་མཐུད་དཀའ་ངལ་ལ་གདོང་ལེན་གྱིས་བཙོན་ཁང་ནང་དཀའ་སྡུག་མྱོང་བཞིན་པ་དེ་དག་གི་ཆེད་ཚང་མས་གདུང་སེམས་མཉམ་སྐྱེ་གནང་རྒྱུ་ནི་ཧ་ཅང་གལ་ཆེན་པོ་ཡིན།།
