༢༠༡༠ ཟླ་ ༡༢ ཚེས་ ༡༣ རེས་གཟའ་ཟླ་བ།
༄༅། །འདི་གར་ཤེས་བྱ་རྩོམ་སྒྲིག་པས་ཀ་སྦུག་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༡༢ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་གསར་པ་ནས་མཁའ་ལམ་བརྒྱུད་བག་ཌོ་ར་གནམ་ཐང་དུ་ཆིབས་སྒྱུར་བསྐྱངས། དེ་ནས་འབྲས་ལྗོངས་མངའ་གཞུང་གིས་ཐད་འཕུར་གནམ་གྲུའི་ཐོག་གདན་ཞུས་ཀྱིས་ཀ་སྦུག་གནམ་ཐང་དུ་༸ཞབས་སོར་འཁོད་རྗེས་ཕེབས་འགྲོའི་ཐོག་ཆིབས་སྒྱུར་བསྐྱངས་ཏེ་ཁུལ་དེར་རྟེན་གཞི་བྱས་པའི་དགའ་ལྡན་ཐར་པ་ཆོས་གླིང་དགོན་གྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་ཉིན་དེའི་ཕྱེད་ཡོལ་ཆུ་ཚོད་ ༡།༣༠ ཐོག་དགོན་དེར་༸ཞབས་སོར་འཁོད་སྐབས་དགོན་དེའི་དབུ་བླ་གྲོ་མོ་དགེ་བཤེས་རིན་པོ་ཆེ་མཆོག་དང་འདུས་དམངས་ནས་དུང་རྒྱ་སྤོས་སྣེས་སྔོན་བསུས་ཏེ་ཕེབ
ས་བསུ་གཟབ་རྒྱས་ཞུས་ཡོད། དེ་ཡང་༸གོང་ས་མཆོག་ཀ་སྦུག་ཁུལ་དུ་༸ཞབས་སོར་འཁོད་སྐབས་ལམ་བར་དུ་མདོ་སྟོད་མདོ་སྨད་དབུས་གཙང་དང་བོད་ཀྱི་གཞོན་ནུ་དང་བུད་མེད་ཚོགས་པ།
དེ་བཞིན་དགོན་སྡེ་དང་སློབ་གྲྭ་ཁག དེ་མིན་རྒྱ་གར་ཡུལ་མི་ཡིན་པ་རྟ་མང་དང་ཤར་པ། བལ་པོ་སོགས་ནས་ཀྱང་༸གོང་ས་མཆོག་ལ་ཕེབས་བསུའི་ཆེད་སྒོ་ཆེན་བཅུ་ཕྲག་བརྒལ་བ་དང་འཕྲེད་དར་སོགས་གསར་བཞེངས་ཞུས་ཡོད་པ་མ་ཟད། ལམ་གཡས་གཡོན་དུ་དད་ལྔན་སེར་སྐྱ་མི་མང་རྣམས་ནས་ལག་ཏུ་ཁ་བཏགས་དཀར་གཙང་དང་དྲི་བསང་། སྤོས་སྣེ་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། ༸གོང་ས་༸སྐྱབས་མགོན་ཆེན་པོ་མཆོག་དགའ་ལྡན་ཐར་པ་ཆོས་གླིང་དུ་༸ཞབས་སོར་འཁོད་རྗེས་ཐོག་མར་གསར་དུ་བཞེངས་པའི་དགོན་དེ་དབུ་འབྱེད་དང་རབ་གནས་བཀའ་དྲིན་ཆེ་བ་སྩལ་རྗེས་དགོན་པའི་ནང་གནས་གཟིགས་མཛད། དེ་རྗེས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་དགོན་དེའི་དབུ་བླ་གྲོ་མོ་དགེ་བཤེས་རིན་པོ་ཆེ་མཆོག་གིས་མནྜལ་རྟེན་གསུམ་འདེགས་འབུལ་ཞུས། དེ་ནས་དགོན་དེའི་དྲུང་ཡིག་ཕུར་བུ་ལགས་ནས་༸གོང་ས་༸སྐྱབས་མགོན་ཆེན་པོ་མཆོག་དགོན་དེར་༸ཞབས་སོར་བཀའ་དྲིན་འཁོད་པར་ཕེབས་བསུའི་གསུང་བཤད་དང་དགོན་པའི་གནས་སྟངས་མདོར་བསྡུས་ཤིག་སྙན་སྒྲོན་ཞུས།
དེ་རྗེས་༸གོང་ས་མཆོག་གིས་བཀའ་སློབ་ཕེབས་དོན། དེ་རིང་ངོས་རང་ཐར་པ་ཆོས་གླིང་དུ་འབྱོར་བ་འདི་ཧ་ཅང་དགའ་པོ་བྱུང་། གང་ལགས་ཞེ་ན། ཀ་སྦུག་ས་ཁུལ་འདི་ནི་དུས་ཡུན་རིང་པོ་ཞིག་ལ་ང་ཚོ་བོད་དང་འབྲེལ་ལམ་ཧ་ཅང་ཆེན་པོ་ཡོད་པ་ཞིག་ཡིན། དེ་བཞིན་དགོན་པ་འདི་ནི་ཧ་ལམ་རྒྱ་གར་ནང་བོད་ཀྱི་དགོན་པ་རྙིང་ཤོས་ལྟ་བུ་ཆགས་ཡོད། ཕྱི་ལོ་ ༡༩༥༦ ལོར་
ངོས་རང་རྒྱ་གར་དུ་སངས་རྒྱས་མྱ་ངན་ལས་འདས་ཏེ་ལོ་ངོ་ ༢༥༠༠ འཁོར་བའི་དུས་དྲན་ཆེད་ཡོང་སྐབས་ངོས་རང་དགོན་འདིར་འབྱོར་ཡོད་པ་དང་དེ་རྗེས་སླར་ཡང་ཐེངས་གཅིག་བསླེབས་ཡོད། དེ་ནས་བར་སྐབས་དགོན་པ་འདིའི་བླ་མ་དགེ་འདུན་ཚོས་དོལ་རྒྱལ་བསྟེན་གསོལ་ཤུགས་ཆེ་བྱས་པར་བརྟེན་ངོས་རང་འདིར་ཡོང་ཐུབ་མེད། ཕྱི་ལོ་ལྔ་བཅུའི་ནང་ངོས་ནས་ཀྱང་དོལ་རྒྱལ་བསྟན་པ་རེད། དེ་རྗེས་ཕྱི་ལོ་ཆིག་སྟོང་དགུ་བརྒྱ་བདུན་ཅུའི་ནང་ནས་བཟུང་ངོས་ནས་ཉམས་ཞིབ་དང་དོ་སྣང་བྱས་པར་བརྟེན། དེ་ནི་གདོན་འདྲེ་ཡིན་པ་གསལ་རྟོགས་བྱུང་སྟབས་ངོས་ནས་མཚམས་འཇོག་བྱས་པ་ཞིག་ཡིན།
དེ་ཡང་སྐབས་དེར་སྐྱབས་རྗེ་ཁྲི་བྱང་རིན་པོ་ཆེ་འཚོ་བཞིན་བཞུགས་ཡོད་པར་ཆ་ཚང་ཞུས་ཏེ་རྒྱབ་སྐྱོར་གཙང་མ་གནང་བ་ཞིག་ཡིན། བར་སྐབས་དགོན་པ་འདིའི་དགེ་འདུན་པ་ཚོས་རྒྱལ་པོ་ཤུགས་ལྡན་བསྟེན་རྒྱུ་མཚམས་འཇོག་གཙང་མ་བྱས་པར་མ་ཟད། ངོས་ལ་འདིར་ཡོང་རོགས་བྱེད་ཅེས་ཇི་ལྟར་འབོད་སྐུལ་བྱས་པ་ལྟར་ཡོང་བ་ཞིག་ཡིན། དེ་རིང་འདི་ཙམ་ཡིན་སང་ཉིན་སླར་ཡང་མཇལ་ཡོང་ཞེས་བཀའ་སློབ་བཀའ་དྲིན་ཆེ་བ་སྩལ་ནས་དགོན་དེའི་གཟིམ་ཆུང་ལ་ཆིབས་སྒྱུར་བསྐྱངས་ཏེ་ཁུལ་འདིའི་གནད་ཡོད་མི་སྣ་ཁག་གཅིག་ལ་མཇལ་ཁ་དང་གསུང་མོལ་མཛད་ཡོད།
དགའ་ལྡན་ཐར་པ་ཆོས་གླིང་དགོན་འདི་ནི་ཐོག་མར་ཕྱི་ལོ་ ༡༩༢༢ ལོར་གྲོ་མོ་དགེ་བཤེས་སྐུ་ཕྲེང་དང་པོ་མཆོག་གིས་ཕྱག་བཏབ་པའི་དགེ་ལུགས་པའི་དགོན་པ་ཞིག་ཡིན་པ་དང་ད་ལྟ་དགོན་འདིར་བཞུགས་པའི་གྲོ་མོ་དགེ་བཤེས་རིན་པོ་ཆེ་མཆོག་གི་ཡང་སྲིད་རིན་པོ་ཆེ་མཆོག་ནི་སྐུ་ཕྲེང་གསུམ་པ་དེ་ཡིན་འདུག
ཕྱི་ལོ་ ༡༩༥༦ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་དང་བཅས་རྒྱ་གར་དུ་གནས་གཟིགས་གྲུབ་སྟེ་ཀ་སྦུག་བརྒྱུད་རང་གི་རྒྱལ་ཁབ་བོད་གངས་ཅན་ཕྱོགས་སུ་ཆིབས་སྒྱུར་སྐབས་དགོན་འདིར་༸ཞབས་སོར་འཁོད་ཡོད་པ་མ་ཟད་སྐབས་དེར་དགོན་འདིར་མགོན་པོ་གང་ཉིད་མཆོག་གི་སྐུ་བན་ཞིག་དང་ཞོལ་པར་ཁང་གིས་པར་སྐྲུན་ཞུས་པའི་༸རྒྱལ་བའི་བཀའ་འགྱུར་རིན་པོ་ཆེ་ཆ་ཚང་ཞིག་གསོལ་རས་བཀའ་དྲིན་ཆེ་བ་སྩལ་ཡོད་པ་དེ་དག་ནི་དུས་ད་ལྟའང་དགོན་འདིར་མཇལ་རྒྱུ་འདུག ཕྱི་ལོ་ ༡༩༨༡ ལོར་༸གོང་ས་༸སྐྱབས་མགོན་ཆེན་པོ་མཆོག་ཀ་སྦུག་ཁུལ་དུ་ཆིབས་སྒྱུར་སྐབས་གང་སྐུའི་ཐུགས་བརྩེ་ཆེན་པོས་དགོན་པ་འདིར་ཆིབས་སྒྱུར་བསྐྱངས་ཡོད་པ་མ་ཟད། ལམ་གཙོ་རྣམ་གསུམ་དང་བཀའ་དབང་བཅས་ཀྱི་ཆོས་འབྲེལ་བཀའ་ཡང་བཀའ་དྲིན་ཆེ་བ་སྩལ་ཡོད།
འདི་ལོ་ཕྱི་ལོ་ ༢༠༡༠ ལོར་དེ་སྔའི་དགོན་རྙིང་དེ་བཤིག་སྟེ་སླར་ཡང་གསར་བཞེངས་གནང་ཡོད་པ་ཡོངས་སུ་ལེགས་གྲུབ་ཟིན་པར་མགོན་པོ་གང་ཉིད་མཆོག་ལ་རབ་གནས་དང་དབུ་འབྱེད་སྐྱབས་འཇུག་ཞུས་པ་ལྟར་བཀའ་བཞེས་བཟང་པོ་སྨིན་སྩལ་ཐོབ་པ་བཞིན་ཉིན་འདིར་དངོས་སུ་རབ་གནས་དང་དབུ་འབྱེད་བཀའ་དྲིན་ཆེ་བ་སྩལ་ཡོད། དགོན་འདིར་དེང་གི་ཆར་དགེ་འདུན་པ་ཞལ་གྲངས་ ༥༠ ཙམ་ཡོད་འདུག སྤྱིར་ཀ་སྦུག་ཁུལ་འདི་ནི་དེ་སྔ་བོད་རང་དབང་རང་བཙན་ཡོད་སྐབས་བོད་དང་རྒྱ་གར་བར་ཚོང་འབྲེལ་ཆེ་ཤོས་བྱེད་སའི་ས་གནས་གལ་ཆེ་ཤོས་ཤིག་ཡིན་འདུག དེ་ཡང་བོད་རིགས་ཚོང་པ་ཚོས་བལ་རིགས་གཙོ་བོར་གྱུར་བའི་བོད་ཟོག་རྣམས་འདི་ཕྱོགས་འཁྱེར་ཡོང་བ་དང་འདི་ཕྱོགས་ནས་རྒྱ་གར་གྱི་དངོས་ཟོག་རྣམས་བསྒྲུབས་ཏེ་བོད་ལ་འཁྱེར་འགྲོ་སའི་ཡུལ་ལུང་གཙོ་ཆེ་ཤོས་དང་འབྲེལ་བ་ཆེ་ཤོས་བྱེད་ས་དེ་ཡིན་འདུག་པ་བཅས།།
