པར་ལེན་རྣམ་རྒྱལ་ཚེ་དབང།
༢༠༡༠ ཟླ་ ༡༢ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡༢ ཚེས་ ༩ རེས་གཟའ་ཕུར་བུ་ཉིན་གྱི་སྔ་དྲོ་ཆུ་ཚོད་ ༨།༣༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་དང་ཧི་མཱ་ཅལ་མངའ་སྡེའི་བློན་ཆེན་སྐུ་ཞབས་པེ་རེམ་ཀུ་མཱར་དྷུ་མལ་མཆོག ཧི་མཱ་ཅལ་མངའ་སྡེའི་སྲིད་གཞུང་གི་ཕྱོགས་འགལ་ཚོགས་པའི་ཚོགས་གཙོ་ལྕམ་སྐུ་ཝིདྷྱ་སི་ཊོཀ་ (Vidhya Stokes) དང། ཧི་མཱ་ཅལ་མངའ་སྡེའི་གྲོས་ཚོགས་ཀྱི་ཚོགས་གཙོ་ཏུལ་སི་རཱམ་ (Tulsi Ram) བཅས་ལ་ཐེག་ཆེན་ཆོས་གླིང་གཙུག་ལག་ཁང་གི་སྒོ་མཆོར་དུ་ཞོགས་ཟས་ཀྱི་གསོལ་སྟོན་མཛད་སྒོ་སྟབས་བདེ་ཞིག་བོད་མི་མང་སྤྱི་འཐུས་ལྷན་ཚོགས་ཀྱིས་གོ་སྒྲིག་གནང་ཡོད། ཧི་མཱ་ཅལ་མངའ་སྡེའི་བློན་ཆེན་རྣམས་ཕྱི་ཚེས་ ༦ ནས་ ༩ བཅས་ཉིན་བཞིའི་རིང་ཧི་མཱ་ཅལ་མངའ་སྡེའི་དགུན་ཁའི་གྲོས་ཚོགས་ཀྱི་ཚོགས་འདུ་དེ་བཞིན་རྡ་སར་ཚོགས་ཆེད་ཕེབས་པ་ཡིན་འདུག
པར་ལེན་རྣམ་རྒྱལ་ཚེ་དབང།
དེ་ཡང་མཛད་སྒོ་དབུ་འཛུགས་ཀྱི་ཐོག་མར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་དང་། བཀའ་བློན་རྣམ་པ། སྤྱི་འཐུས་རྒྱུན་ལས་ཁག་གཅིག་གིས་ཧི་མཱ་ཅལ་མངའ་སྡེའི་བློན་ཆེན་མཆོག་གི་གཙོས་སྐུ་མགྲོན་ཚོར་ཕོ་བྲང་གི་རྒྱལ་སྒོའི་མདུན་དུ་ཕེབས་བསུ་ཞུས། དེ་རྗེས་སྐུ་མགྲོན་རྣམས་ཕོ་བྲང་ནང་དུ་ཕེབས་ཏེ་༸གོང་ས་མཆོག་དང་མཇལ་འཕྲད་མཛད་གྲུབ་བསྟུན། ༸གོང་ས་མཆོག་དང་ཧི་མཱ་ཅལ་མངའ་སྡེའི་བློན་ཆེན་མཆོག་གི་གཙོས་སྐུ་མགྲོན་རྣམས་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་གི་སྒོ་མཆོར་གྱི་མདུན་དུ་༸ཞབས་སོར་འཁོད། དེ་ནས་ཐོག་མར་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་སྐུ་མགྲོན་ཚོར་ཕེབས་བསུའི་གསུང་བཤད་གནང་།
པར་ལེན་རྣམ་རྒྱལ་ཚེ་དབང།
དེ་རྗེས་ཧི་མཱ་ཅལ་མངའ་སྡེའི་སྲིད་གཞུང་གི་ཕྱོགས་འགལ་ཚོགས་པའི་ཚོགས་གཙོ་ལྕམ་སྐུ་ཝི་ཌི་ཡ་སི་ཊོཀ་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང། དེ་ནས་མངའ་སྡེའི་བློན་ཆེན་མཆོག་གིས་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ང་ཚོར་ཁྱུག་ཙམ་རིང་ཞོགས་ཟས་ཆེད་ཡོང་རོགས་ཞེས་མགྲོན་འབོད་མཛད་པར་དགའ་སྤོབས་ཆེན་པོ་ཐོབ་བྱུང། ང་ཚོ་འདིར་བཅར་རྒྱུ་དེ་གཙོ་བོ་ཞོགས་ཟས་གཅིག་པུའི་དོན་དག་མིན་པར་དམིགས་ཡུལ་གཙོ་བོ་དེ་བོད་ཀྱི་༸སྐྱབས་མགོན་ཏཱ་ལའི༌བླ་མ་མཆོག་མཇལ་རྒྱུ་དང་ཁོང་གི་བྱིན་རླབས་ཐོབ་ཆེད་ཡིན། ༸གོང་ས་ཏཱ་ལའི་བླ་མ་མཆོག་ནི་ད་ཡོད་ནང་པའི་དགེ་སློང་སྙན་གྲགས་ཆེ་ཤོས་ཆགས་ཡོད། ད་ལྟའི་དུས་སྐབས་སུ་སྟོན་པ་བཅོམ་ལྡན་འདས་ཀྱི་ངོ་བོར་བྱོོན་ནས་འཛམ་གླིང་ནང་འཚེ་མེད་ཞི་བ་དར་སྤེལ་མཛད་བཞིན་ཡོད། སྐུ་ཉིད་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ཀྱི་གནད་དོན་སེལ་ངེས་ཡིན། ལྷག་པར་འཕགས་བོད་གཉིས་བྱུང་རབས་ཁྲོད་འབྲེལ་བ་ཧ་ཅང་ཟབ་པོ་ཡོད། སྐབས་ཤིག་ལ་འཕགས་ཡུལ་ནས་ནང་ཆོས་དར་སྤེལ་ཆེད་ནང་པའི་མཁས་དབང་བོད་དུ་ཕེབས་ཡོད། ད་ལྟའི་ཆར་འཛམ་གླིང་ནང་དུ་ནང་ཆོས་སློབ་ཁྲིད་མཛད་མཁན་སྙན་གྲགས་ཆེ་ཤོས་༸གོང་ས་ཏཱ་ལའི་བླ་མ་མཆོག་རྡ་སར་༸ཞབས་སོར་འཁོད་ཡོད། ངས་སྐུ་ཉིད་མཆོག་གི་སྐུ་གཟུགས་གསལ་ཐང་ངང་སྐུ་ཚེ་ཡུན་ནས་ཡུན་དུ་གནས་ཆེད་དཀོན་མཆོག་ལ་གསོལ་བ་འདེབས་རྒྱུ་མ་ཟད། འཕགས་བོད་གཉིས་ཀྱི་འབྲེལ་ལམ་སྔར་ལས་དར་ཞིང་རྒྱས་པ་ཡོང་རྒྱུ་དང། བོད་མི་རྣམས་རང་གི་ཐོབ་ཐང་མགྱོགས་ནས་མྱུར་དུ་འཐོབ་པའི་སྨོན་འདུན་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང་། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ངོས་ཀྱིས་རྒྱུན་དུ་ Chief Minister ངོས་ཀྱི་མངའ་སྡེའི་བློན་ཆེན་ཞེས་བརྗོད་ཀྱི་ཡོད། ངོས་ཀྱི་མངའ་སྡེའི་བློན་ཆེན་དང་། དེ་བཞིན་གསུང་བཤད་གནང་མཁན་མངའ་སྡེའི་སྲིད་གཞུང་གི་ཕྱོགས་འགལ་ཚོགས་པའི་གཙོ་འཛིན་རེད། གཞན་ཡང་མངའ་སྡེའི་གྲོས་ཚོགས་ཀྱི་ཚོགས་གཙོ་གཙོས་གྲོས་ཚོགས་འཐུས་མི་རྣམ་པ་དང་། དེ་མིན་གྱི་བློན་ཆེན་རྣམ་པ་བཅས་རྡ་སར་ཕེབས་པའི་འབྲེལ་ཡོད་མངའ་སྡེའི་བློན་ཆེན་ཚང་མ་ང་ཚོའི་གྲོས་ཚོགས་ནས་གདན་ཞུས་ལྟར་དེ་རིང་འདིར་ཆེད་ཕེབས་གནང་བར་ཐུགས་རྗེ་ཆེ་ཟེར་རྒྱུ་ཡིན། སྤྱིར་འཕགས་བོད་གཉིས་བླ་སློབ་ཀྱི་འབྲེལ་བ་ཟབ་པོ་ཡོད་པ་ཚང་མས་ཤེས་གསལ་ཡིན། ངོས་སྒེར་གྱི་མི་ཚེའི་ནང་ལའང་། ངོས་ཀྱིས་ཆོས་ཞུ་སའི་བླ་མའི་ནང་ལ་ཁུ་ནུ་བླ་མ་བསྟན་འཛིན་རྒྱལ་མཚན་དང་རྒན་རིག་འཛིན་བསྟན་པ་རྣམས་གཉིས་ཁུ་ནུ་ཁུལ་ནས་རེད། དེའི་ཆ་ནས་མངའ་སྡེ་འདི་དང་དམིགས་བསལ་གྱི་འབྲེལ་བ་ཆགས་ཡོད། ལོ་ལྔ་བཅུ་ལྷག་གི་རིང་ལ་ས་གནས་འདིར་ལུས་སེམས་བདེ་ཞིང་སྐྱིད་པའི་སྒོ་ནས་བསྡད་པ་རེད། དེའི་ཐོག་ལ་བསྟན་པ་སྤྱི་དང་འགྲོ་བ་མི་སྤྱིའི་ཞབས་འདེགས་བསྒྲུབ་རྒྱུ། ལྷག་པར་བོད་གངས་ཅན་གྱི་རང་དབང་འཐབ་རྩོད་བྱེད་རྒྱུའི་ལས་ཀ་སོགས་ས་གནས་འདི་ནས་བསྒྲུབས་དང་སྒྲུབ་མུས་ཡིན་པར་བརྟེན། ས་ཆ་འདི་བཀྲ་ཤིས་པ་ཞིག་ཡིན། དེ་བཞིན་འདས་པའི་ལོ་བཅུ་ཕྲག་ལྔ་དེའི་རིང་ལ་ལོ་ཁ་ཤས་ཁ་ཤས་ནང་བློན་ཆེན་རེ་རེ་ཕེབས་སྐབས། ཁོང་རྣམ་པའི་བཞིན་རས་མི་འདྲ་བ་གསར་པ་རེ་རེ་སླེབ་ཀྱི་ཡོད་པ་འདིས། རྒྱ་གར་ནང་མང་གཙོའི་ལག་ལེན་དངོས་གནས་ཡོད་པ་ཞིག་མཚོན་གྱི་ཡོད། དེ་བཞིན་མི་མང་གི་འོས་བསྡུའི་ཐོག་ནས་གཙོ་འཛིན་བདམས། དེ་ནས་ལོ་ཁ་ཤས་ཕྱིན་རྗེས། མི་མང་ནས་མི་གསར་པ་ཞིག་འོས་འདེམས་བྱེད་ཀྱི་ཡོད་པ་དེ་ནི་གཟི་བརྗིད་ཆེན་པོ་རེད། དེར་བརྟེན་ས་ཆ་འདིར་བསྡད་ཏེ་མང་གཙོའི་ཉམས་མྱོང་བསླེབ་རྒྱུ་གལ་ཆེན་པོ་རེད་འདུག སྐབས་ཤིག་བྷི་ཧར་གྱི་རྒྱལ་ས་པ་ཊི་ནའི་མངའ་སྡེ་གཞུང་གིས་ནང་པའི་ལྷ་ཁང་ཆེན་པོ་ཞིག་བཞེངས་འདུག དེར་ནང་པའི་ཡུལ་ཁག་འདྲ་མིན་ནས་བཅོམ་ལྡན་འདས་ཀྱི་སྐུ་གདུང་རིང་བསྲེལ་དེ་འདྲ་གདན་ཞུ་གནང་སྟེ་ང་དེར་ཤོག་ཟེར་བ་ལྟར་བཅར་རྒྱུ་བྱུང། སྐབས་དེར་བྷི་ཧཱར་མངའ་སྡེའི་བློན་ཆེན་མཆོག་གིས་སྟོན་པ་བཅོམ་ལྡན་འདས་ཀྱི་ཐུགས་རྗེ་བྱིན་རླབས་ལ་རྟེན་ནས་མངའ་སྡེེ་མགྱོགས་པོ་ཡར་རྒྱས་འགྲོ་ཐུབ་པའི་རེ་བ་ཡོད་ཅེས་གསུངས་པ་རེད། དེ་རྗེས་ངོས་ཀྱིས་གཏམ་བཤད་བྱེད་སྐབས། མངའ་སྡེ་བློན་ཆེན་ལ་ནང་ཚགས་བྱས་ཏེ་སངས་རྒྱས་བཅོམ་ལྡན་འདས་ཀྱི་ཐུགས་རྗེ་བྱིན་རླབས་ལ་རྟེན་ནས། མངའ་སྡེ་ཡར་རྒྱས་འགྲོ་གི་ཡོད་ན་སྔ་མོ་ནས་ཡར་རྒྱས་འགྲོ་དགོས་པ་ཞིག་རེད། མངའ་སྡེ་བློན་ཆེན་འཇོན་ཐང་ཡོད་མཁན་ཞིག་མ་བསླེབས་བར་མངའ་སྡེ་ཡར་རྒྱས་འགྲོ་ཐུབ་ཀྱི་མེད། དེར་བརྟེན་སངས་རྒྱས་བཅོམ་ལྡན་འདས་ཀྱི་བྱིན་རླབས་དེ། མངའ་སྡེ་བློན་ཆེན་གྱི་ལག་པ་བརྒྱུད་ནས་འགྲོ་དགོས་རེད་ཅེས་དེ་འདྲ་བརྗོད་རྒྱུ་བྱུང། མངའ་སྡེ་འདིའི་ནང་ཆ་བཞག་ནའང་ལྷ་ཁང་མང་པོ་དང་ལོ་རྒྱུས་ཡོད་པའི་གནས་ཆེན་དེ་འདྲ་མང་པོ་ཡོད་ཀྱང། དངོས་ཡོད་གནས་ཚུལ་མངའ་སྡེ་ཡར་རྒྱས་འགྲོ་རྒྱུར་མངའ་སྡེ་བློན་ཆེན་གྱིས་དབུ་ཁྲིད་པས་ཕྱོགས་འགལ་ཚོགས་པ་ཡིན་ནའང་འདྲ། ཚང་མས་དངོས་སུ་ལག་ལེན་གྱི་ཐོག་ནས་མངའ་སྡེ་ཡར་རྒྱས་གཏོང་དགོས་པ་ཡིན་སྟབས། མངའ་སྡེ་ཡར་རྒྱས་གཏོང་རྒྱུར་ཁྱེད་རང་ཚོའི་ཕྱག་ལས་རྣམས་བཟང་པོ་དང་ལམ་ལྷོང་ཡོང་བའི་ངོས་ཀྱིས་སྨོན་ལམ་ཞུ་རྒྱུ་ཡིན་ཞེས་བཀའ་སློབ་སྩལ།།
