༢༠༡༠ ཟླ་ ༡༢ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༢ ཚེས་ ༨ རེས་གཟའ་ལྷག་པའི་ཉིན་གནས་མཆོག་རྡ་རྗེ་ལྡན་དུ་དཔལ་རྒྱལ་བ་ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་བྱོན་ནས་མི་ལོ་ཧྲིལ་པོ་ ༩༠༠ འཁོར་བའི་དུས་དྲན་གྱི་མཛད་སྒོའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་སྩལ་བའི་ནང་འཁོད་དོན། རང་གི་བླ་མས་གང་གསུངས་པ་དེ་ཉམས་ལེན་དུ་སྐྱེལ་ཐུབ་ན་རྒྱལ་བ་དགྱེས་པའི་མཆོད་སྤྲིན་ཞིག་ཡོང་རྒྱུ་རེད། ཆོས་ལུགས་རིས་སུ་མ་ཕྱེ་བའི་ནང་པ་སངས་རྒྱས་པའི་གཞུང་དོན་ལ་སློབ་གཉེར་བྱས་ཏེ་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཡོང་རྒྱུར་ངོས་ཀྱིས་དོན་གཉེར་བ་ཚོར་འབོད་སྐུལ་ཞུ་རྒྱུ་ཡིན་ཞེས་སོགས་འཁོད་ཡོད།  མཛད་སྒོའི་སྐབས་དཔལ་རྒྱལ་བ་ཀརྨ་པ་སྐུ་ཕྲེང་ ༡༧ པ་ཨོ་རྒྱན་འཕྲིན་ལས་རྡོ་རྗེ་མཆོག་དང་སྐུ་མགྲོན་གཙོ་བོ་བཙན་བྱོལ་བོད་གཞུང་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ལྷན་ཞུགས་ཀྱིས་དུས་དྲན་སྲུང་བརྩི་ཟབ་རྒྱས་ཞུས་ཡོད། མཛད་སྒོའི་ཐོག་མར་སྨོན་ལམ་གསུང་འདོན་གནང་རྗེས་རྒྱལ་བ་ཀརྨ་པ་རིན་པོ་ཆེ་མཆོག་གིས་དུས་དྲན་དང་འབྲེལ་བའི་གསུང་བཤད་གནང། དེ་རྗེས་རྒྱལ་ཚབ་རིན་པོ་ཆེ་མཆོག་གིས་གསུང་བཤད་གནང་གྲུབ་བསྟུན། བཀའ་ཁྲི་ཟམ་གདོང་རིན་པོ་ཆེ་མཆོག་གིས་དུས་དྲན་དང་འབྲེལ་བའི་གསུང་བཤད་གནང་ཡོད་པ་བཅས།།