༢༠༡༠ ཟླ་ ༡༢ ཚེས་ ༡༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༡༤ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགའ་ལྡན་ཐར་པ་ཆོས་གླིང་དགོན་ནས་ཀ་སྦུག་བོད་གཞུང་སློབ་གྲྭར་༸ཞབས་སོར་འཁོད་སྐབས་སློབ་ཕྲུག་རྣམས་ནས་བཀྲ་ཤིས་ཞོལ་པ་དང་གླུ་གཞས་ཀྱི་མཆོད་སྤྲིན་འབུལ་ལམ་ཞུས་ཏེ་ཕེབས་བསུ་གཟབ་རྒྱས་ཞུས་ཏེ་སློབ་གྲྭའི་རྩེད་ཐང་དུ་གདན་འདྲེན་ཞུས། དེ་རྗེས་༸གོང་ས་མཆོག་གིས་ཆུ་ཚོད་ཕྱེད་ཀའི་རིང་སྒྲུབ་གཞག་མཛད། དེ་ཡང་ཆུ་ཚོད་ ༩ ཐོག་བཞུགས་ཁྲི་རིན་པོ་ཆེར་༸ཞབས་སོར་འཁོད་དེ་ནང་ཆོས་ངོ་སྤྲོད་དང་སྦྲགས་སྒྲོལ་དཀར་ཡིད་བཞིན་འཁོར་ལོའི་ཚེ་དབང་ཟབ་མོ་བཀའ་དྲིན་སྩལ་གནང་མཛད་པ་དང་། ཆོས་འབྲེལ་གྲུབ་རྗེས་ཀ་སྦུག་བོད་གཞུང་སློབ་གྲྭའི་འགོ་འཛིན་སྐལ་བཟང་ལགས་ནས་སློབ་གྲྭ་དེའི་ལས་བསྡོམས་སྙིང་བསྡུས་དང་།
དེ་བཞིན་ས་གནས་བདེ་དོན་ནམ་ས་གནས་འགོ་འཛིན་གྱིས་ལས་བསྡོམས་སྙན་སྒྲོན་ཞུས། དེ་རྗེས་༸གོང་ས་མཆོག་གིས་མི་དམངས་ལ་ལམ་སྟོན་བཀའ་སློབ་ཟབ་ཅིང་རྒྱས་པ་སྩལ་རྗེས་ཀ་སྦུག་ལྷ་མོ་ཚོགས་པ་དང་ཀ་སྦུག་བོད་གཞུང་སློབ་གྲྭ ས་གནས་རྟ་མང་མི་མང་བཅས་ནས་འཁྲབ་སྟོན་གཟིགས་འབུལ་མདོར་བསྡུས་རེ་ཞུས་ཡོད། ༸གོང་ས་མཆོག་གིས་ཀ་སྦུག་བོད་གཞུང་སློབ་གྲྭའི་རྩེད་ཐང་གི་མདུན་དུ་བསྒྲོན་པའི་བཞུགས་ཁྲིར་༸ཞབས་སོར་འཁོད་རྗེས་ཐོག་མ་ཆོས་འབྲེལ་དབུ་འཛུགས་དང་སྦྲགས་བཀའ་སློབ་ཕེབས་དོན། དེ་རིང་འདི་ག་ཀ་སྦུག་སློབ་གྲྭར་ཐེངས་གཅིག་བསླེབས་ནས་ང་ཚོ་ཡང་བསྐྱར་རུག་རུག་བྱས་ཏེ་ཐུག་རྒྱུ་བྱུང་བར་ཧ་ཅང་དགའ་པོ་བྱུུང་། ཁྱེད་རང་ཚོ་སློབ་ཕྲུག་ཕོ་མོ་གཙོ་བོར་གྱུར་བའི་འདིར་འདུས་ཚང་མར་འཚམས་འདྲི་ཞུ་གི་ཡོད། ང་ཚོ་མ་ཐུག་པ་གང་ཙམ་སོང་ཡོད་པས་ཁྱེད་རང་སློབ་ཕྲུག་ཚོའི་ཤེས་ཚད་ཡར་རྒྱས་གང་འདྲ་འགྲོ་ཡི་ཡོད་དམ། ཁྱེད་ཚོས་སློབ་སྦྱོང་ཡག་པོ་བྱེད་རྒྱུ་དེ་ཧ་ཅང་གལ་ཆེན་པོ་ཡིན། ང་ཚོ་རྒྱ་གར་ལ་བསླེབས་ནས་ལས་ཀ་གལ་ཆེ་ཤོས་གཅིག་དེ་སློབ་གྲྭ་འཛུགས་རྒྱུ་དེ་བྱས་པ་རེད། ཕྱི་ལོ་ ༡༩༦༠ ལོ་ནས་ང་ཚོས་དེང་དུས་ཀྱི་ཤེས་ཡོན་སློབ་སྦྱོང་བྱེད་སའི་སློབ་གྲྭ་བཙུགས་པའི་ཁོངས་ནས་ཀ་སྦུག་སློབ་གྲྭ་འདི་གཅིག་རེད། དེ་ལྟར་ང་ཚོས་ཐོག་མར་དམིགས་ཡུལ་ངེས་ཅན་ཞིག་དང་རེ་བ་ཇི་ལྟར་བརྒྱབ་པ་བཞིན་ད་ལྟ་བར་དུ་གྲུབ་འབྲས་སུ་སློབ་སྦྱོང་ཐོན་པའི་ཕྲུ་གུ་མང་པོ་ཞིག་བྱུང་ཡོད་ལ། ད་ལྟ་སློབ་སྦྱོང་བྱེད་བཞིན་པ་ཚོས་ཀྱང་ཧུར་ཐག་ངང་སློབ་སྦྱོང་ཡག་པོ་བྱེད་རོགས་ཟེར་རྒྱུ་ཡིན། འདི་གར་ཁྱེད་རང་ཚོ་དགེ་འདུན་པ་མང་པོ་ཞིག་འདུག ཁྱེད་རྣམ་པས་འདས་པའི་དུས་ཡུན་དེ་དག་གི་རིང་ལ་སློབ་གཉེར་གང་འདྲ་བྱུང་སོང་ངམ། ལྷག་པར་རབ་ཏུ་བྱུང་བ་ཚོ་སློབ་གཉེར་གཅིག་པུ་མ་རེད། སློབ་གཉེར་བྱས་པའི་དགོས་དོན་རྒྱུད་ལ་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ་དགོས་རྒྱུ་ཞིག་རེད། ཁྱེད་ཚོས་བསླབ་པ་གསུམ་ཐད་རྒྱུགས་སྤྲོད་བྱེད་དགོས་བྱུང་ན་བརྒྱ་ཆ་ག་ཚོད་ལེན་པ་འདུག་གམ། མི་མང་སྐྱེ་བོ་ཕོ་མོ་ཚོར་ཆ་བཞག་ནའང་ལོ་རྒས་འགྲོ་གི་ཡོད། དུས་ཚོད་ཉིན་རེ་བཞིན་འགྲོ་བཞིན་ཡོད་པས་དུས་ཚོད་ཀྱི་སྒུག་སྡོད་རྒྱུ་མེད་ལ་དུས་ཚོད་འཕྲོ་བརླག་ཕྱིན་སོང་ཞེས་ཕྱིར་སློག་རྒྱག་རྒྱུ་མེད། ངོས་རང་ལ་ཆ་བཞག་ནའང་ལོ་ ༧༦ ལ་སླེབས་ཡོད། སོ་སོའི་ཉིན་རེའི་མི་ཚེ་དེ་དོན་དང་ལྡན་པ་ཞིག་བྱུང་ན་དུས་ཚོད་འགྲོ་ཡང་ཁྱད་པར་མེད། ཅེས་དང་ཡང་༸གོང་ས་མཆོག་གིས་ནང་ཆོས་ངོ་སྤྲོད་སྐབས། དུས་རབས་ཉེར་གཅིག་པ་འདིར་དངོས་པོ་ཡར་རྒྱས་ཧ་ཅང་ཚད་མཐོ་པོར་འགྲོ་དང་འགྲོ་བཞིན་པ་རེད། ཡིན་ནའང་འཛམ་གླིང་འདིའི་སྟེང་གི་རིས་མེད་ཆོས་བརྒྱུད་དེ་དག་གིས་མི་ས་ཡ་མང་པོར་ཕན་ཐོགས་ཡོད་པ་ཆགས་ཡོད། ཅེས་སོགས་དང་ནང་ཆོས་ལ་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ནང་ཆོས་ངོ་སྤྲོད་མཛད་རྗེས་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་སྩལ། དེ་རྗེས་མ་ཎི་དང་རྟ་མགྲིན། སྒྲོལ་མ། ཨ་ར་པ་ཙ། བཛྲ་གུ་རུ། དམིགས་བརྩེ་མ་བཅས་ཀྱི་ལྗགས་ལུང་བཀའ་དྲིན་སྩལ། དེ་རྗེས་ཀ་སྦུག་བོད་གཞུང་གཏན་སློབ་ཀྱི་སློབ་སྤྱི་སྐལ་བཟང་ལགས་ནས་སློབ་གྲྭ་དེའི་ལས་བསྡོམས་དང་ཀ་སྦུག་ས་གནས་འགོ་འཛིན་ནས་ལས་བསྡོམས་སྙིང་བསྡུས་སྙན་སྒྲོན་ཞུས། དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ལ་བཀའ་སློབས་ཕེབས་དོན། དེ་རིང་གཙོ་བོ་སློབ་གྲྭའི་སློབ་ཕྲུག་ཚོ་དང་བོད་མི་བཙན་བྱོལ་བ་སེར་སྐྱ་མང་ཚོགས་རྣམས་མཉམ་འཛོམས་ཀྱི་དེ་རིང་འདིར་ལས་བསྡོམས་ཀྱི་ཚོགས་འདུ་མདོར་བསྡུས་ཤིག་ཚོགས་པ་རེད། ད་ལྟ་སློབ་གྲྭའི་ལས་བསྡོམས་དང་ས་གནས་འགོ་འཛིན་གྱི་ལས་བསྡོམས་ནང་ཞིབ་ཚགས་པོ་ཡག་པོ་བྱུང་འདུག ང་ཚོས་བོད་རིགས་གཞོན་སྐྱེས་ཚོས་དེང་དུས་ཀྱི་ཤེས་ཡོན་དང་ང་ཚོ་བོད་ཀྱི་གནའ་རབས་ཀྱི་ཤེས་ཡོན་གཉིས་ལྡན་ཞིག་དགོས་ཀྱི་འདུག ཅེས་དྲུག་ཅུ་ཐམ་པའི་ལོར་སློབ་གྲྭ་ཐོག་མ་འཛུགས་སྐབས་སྲིད་བྱུས་འདི་བཟུང་བ་རེད། སྐབས་དེར་པཎྜི་ནེ་རུ་བཞུགས་ཡོད་པ་ཁོང་གིས་བོད་པའི་སློབ་གྲྭ་འཛུགས་རྒྱུར་དམིགས་བསལ་ཐུགས་འཁུར་བཞེས་ཏེ་བོད་ཕྲུག་ཚོའི་ཆེད་སློབ་གྲྭ་ཟུར་དུ་བཙུགས་ཡོད། བོད་ཡིག་དང་བོད་ཀྱི་གནའ་རབས་ཀྱི་ཤེས་ཡོད་འདི་དག་སློབ་དགོས་པར་སོང་།
སློབ་གྲྭ་ཟུར་དུ་བཙུགས་པ་རེད། འདས་པའི་ལོ་ལྔ་བཅུ་ཙམ་ལ་སློབ་གྲྭ་ཁག་གིས་བྱས་རྗེས་ངེས་ཅན་ཞིག་ཐོན་ཡོད། ང་ཚོ་བཙན་བྱོལ་དུ་ཡོད་པའི་གཞོན་སྐྱེས་བརྒྱ་ཆ་དགུ་བཅུ་ལྷག་ཙམ་སློབ་གྲྭ་བསྒྲིམས་མྱོང་མཁན་ཆགས་ཡོད་པ་དེ་ང་ཚོས་བྱས་རྗེས་རེད། ང་ཚོའི་སློབ་གྲྭ་ཁག་ནས་ཐོན་ཏེ་རྒྱ་གར་དང་ཕྱི་རྒྱལ་གྱི་མཐོ་སློབ་ཁག་ནང་བསྐྱོད་ནས་ཐོན་ཐུབ་པ་གང་ཙམ་བྱུང་ཡོད། མདོ་དོན་སོ་སོའི་ལུང་པའི་ནང་ཡོད་པའི་བོད་མི་དེ་དག་དང་འདི་ག་བཙན་བྱོལ་དུ་ཡོད་པའི་བོད་མི་དེ་དག་ཤེས་ཡོན་ཡག་པ་ཆགས་ཡོད་ཅེས་བཀའ་སྩལ། དེ་བཞིན་མགོན་པོ་གང་ཉིད་མཆོག་གིས་ནང་པའི་ལྟ་གྲུབ་དང་ནང་པའི་ཚན་རིག་ཤེས་དགོས་རྒྱུ་དང་སངས་རྒྱས་པའི་ཆོས་ལ་དོ་སྣང་བྱེད་དགོས་པའི་སྐོར་ལ་བཀའ་སློབ་ཟབ་རྒྱས་ཕེབས་ཡོད། དེ་རྗེས་༸གོང་ས་མཆོག་གིས་ཕྱེད་རྒན་ཡོལ་སྐོར་ལ་བཀའ་སློབ་ཕེབས་དོན།
ཕྱི་ལོ་ ༢༠༠༡ ལོར་མི་མང་གིས་མང་གཙོའི་ལམ་ནས་འོས་བསྡུ་བྱས་པའི་བཀའ་བློན་ཁྲི་པ་བསླེབས་ཡོད་པས་གཙོ་བོའི་འགན་བཞེས་ཀྱི་ཡོད། ངོས་རང་ཕྱི་ལོ་ ༢༠༠༡ ལོ་ནས་བཟུང་ཕྱེད་རྒན་ཡོལ་ཞེས་རྟག་ཏུ་ཤོད་ཀྱི་ཡོད། དངོས་ཡོད་གནས་ཚུལ་ཡང་དེ་ཡིན། དཔེར་ན། དེ་སྔ་ཡིན་ན་བཀའ་ཤག་ནང་བཀའ་བློན་རྣམ་པའི་ལྷན་བདུན་ཕྲག་རེ་རེར་ཚོགས་ཀྱི་ཡོད། བཀའ་བློན་ཁྲི་པས་འགན་ཆ་ཚང་བཞེས་པ་ནས་བཟུང་དུས་དུས་ལ་བཀའ་བློན་ཁྲི་པ་མཇལ་གྱི་ཡོད་མ་གཏོགས་བཀའ་ཤག་ལྷན་རྒྱས་སྒོར་སྒོར་བྱས་ཏེ་ཚོགས་ནས་གོ་བསྡུར་བྱེད་རྒྱུ་ཧ་ལམ་བྱུང་མེད། དེ་དག་ནི་ངོས་རང་ཕྱེད་རྒན་ཡོལ་ལ་བསྡད་པའི་རྣམ་པ་ལྟ་བུ་དེ་ཡིན། ངོས་རང་ཕྱེད་རྒན་ཡོལ་ལ་བསྡད་ནས་འགན་འོས་བསྡུ་བྱས་པའི་བཀའ་བློ་ཁྲི་པ་དང་བཀའ་ཤག་ལྷན་རྒྱས་དེ་དག་གིས་ངོས་རང་ཕྱེད་རྒས་ཡོལ་བསྡད་པ་དེས་རྐྱེན་བྱས་ཏེ་འཐུས་ཤོར་ཕྱིན་པ་ཏིལ་འབྲུ་ཙམ་བྱུང་མེད། ད་ཆ་ངོས་ནས་རྒན་ཡོལ་རང་བསམ་བློ་གཏོང་གི་ཡོད་ཅེས་ཤོད་རྒྱུ་དེ་ཡང་དེ་རང་ཡིན། ངོས་ནས་རྒན་ཡོལ་ཞེས་བོད་སྤྱི་པའི་དོན་ལ་ངོས་ནས་ཁུར་མི་ལེན་རྒྱུ་དང་། ངོས་རང་སེམས་ཤུགས་ཆག་པ་དེ་འདྲ་རྩ་བ་ནས་མ་རེད། ངོས་རང་བོད་མི་སྤྱི་འབངས་ཤིག་ཆགས་ཡོད། བོད་མི་སྤྱི་བོ་གནམ་བསྟན་ཡོངས་ལ་བོད་སྤྱི་པའི་འགན་ཡོད་ཡོད་པ་རེད། ངོས་ལ་ཆ་བཞག་ནའང་གཞིས་ལུས་རྒྱ་ཆེའི་མི་མང་དང་དེ་བཞིན་བཙན་བྱོལ་བོད་མི་བརྒྱ་ཆ་དགུ་བཅུ་གོ་དགུས་ངོས་ལ་ཡིད་ཆེས་བློ་འགེལ་བྱེད་ཀྱི་ཡོད། དེར་བརྟེན་ངོས་ནས་བོད་དོན་བློས་གཏོང་དང་སེམས་ཤུགས་ཆགས་ཏེ་སྡོད་རྒྱུ་རྩ་བ་ནས་ཡོང་ཤེས་རྒྱུ་མེད། ངོས་ཀྱིས་ལོ་ངོ་ཉི་ཤུ་སུམ་ཅུའི་གོང་ནས་རྟག་པར་ཤོད་ཀྱི་ཡོད། ཁྱེད་ཚོ་འགན་འཁྱེར་མཁན་ཚོས་འགན་ཆ་ཚང་འཁྱེར་ཏེ་༸རྒྱལ་བ་རིན་པོ་ཆེ་མེད་པ་ལྟར་ཆ་བཞག་སྟེ་ཁྱེད་ཚོས་འགན་གཙང་མ་འཁྱེར་དགོས་པ་ཡིན། དེ་ལྟར་བྱས་ན། ང་ཚོ་བཙན་བྱོལ་བའི་གནད་དོན་ཐོག་ལས་བྱེད་ཚོས་འགན་ཆ་ཚང་འཁྱེར་ཐུབ་ཀྱི་རེད་ལ་ངོས་ལས་ཀྱང་ཞིབ་ཚགས་པ་དང་མགོ་ཚོས་པ་ཡོང་གི་རེད། གང་ལ་ཟེར་ན། ལས་དོན་དེའི་སྟེང་དུས་ཚོད་བཏང་ནས་སྡོད་ཀྱི་ཡོད། ངོས་ཀྱིས་དུས་རྒྱུན་བསམ་བློ་གཏོང་སྐབས་ངོས་རང་འཛམ་གླིང་འདིའི་སྟེང་མི་དུང་ཕྱུར་བདུན་ཅུར་ཉེ་བ་ཡོད་པ་དེའི་ནང་གི་མི་གཅིག་ཡིན། དུང་ཕྱུར་བདུན་ཅུར་ཉེ་བའི་མི་དེ་དག་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་ཤ་སྟག་རེད། བདེ་སྐྱིད་ཀྱི་རྩ་བ་མཐར་ཐུག་ན་ནང་སེམས་ནང་འདུག་མ་གཏོགས་དངུལ་ལ་མེད། ངོས་ཀྱི་ངོ་ཤེས་འབྱོར་ལྡན་དེ་འདྲ་ལ་དངུལ་མང་པོ་ཡོད་པ་རེད། འོན་ཀྱང་སེམས་མ་སྐྱིད་པ་བྱས་ནས་སྡོད་ཀྱི་འདུག ང་ཚོ་མི་སྐྱོ་བོ་དེ་འདྲར་དངུལ་ཞེ་དྲགས་མེད་ཀྱང་སེམས་སྐྱིད་པོ་བྱས་ནས་སྡོད་ཐུབ་ཀྱི་འདུག་པས་བདེ་སྐྱིད་ཀྱི་རྩ་བ་སེམས་ལ་ཐུག་ཡོད། ངོས་ཀྱིས་ཆོས་བྱེད་དགོས་པ་རེད་ཅེས་ཟེར་གྱི་མེད། ཆོས་མེད་ཀྱང་འགྲིག སེམས་བཟང་པོ་བྱེད་དགོས། སེམས་བཟང་པོ་དེ་བདེ་སྐྱིད་ཀྱི་རྩ་བ་རེད། ཅེས་ཤོད་ཀྱི་ཡོད། དེར་བརྟེན་ངོས་ཀྱི་ལས་འགན་གཅིག་འདི་སྒྲུབ་ཀྱི་ཡོད། ངོས་རང་འཛམ་གླིང་གི་ས་གནས་ཕལ་ཆེ་བར་ཡང་ཡང་སླེབ་ཀྱི་ཡོད། དེ་དག་གིས་༸རྒྱལ་བ་རིན་པོ་ཆེས་ནང་ཆོས་འཆད་ན་བསམས་ནས་སྐད་གཏོང་གི་མེད། མི་ཞིག་ཡིན་པའི་ཆ་ནས་སེམས་ཀྱི་བདེ་སྐྱིད་འཚོལ་སྟངས་སྐོར་ལ་ངོས་ནས་ ནམ་རྒྱུ་ཤོད་ཀྱི་ཡོད། འཛམ་གླིང་འདིའི་སྟེང་གི་ཆོས་ཀྱི་དབུ་ཁྲིད་ཧ་ལམ་མང་ཆེ་བས་སེམས་ཀྱི་བདེ་སྐྱིད་ལ་ཆོས་དགོས་སྐོར་གསུང་གི་ཡོད། ཡ་རབས་ཀྱི་སྤྱོད་པ་ཞེས་པ་དེ་ཆོས་ཀྱི་དད་པ་དང་འདྲེས་ཡོད་གསུང་གི་འདུག འོན་ཀྱང་ངོས་ནས་དེ་ལྟར་ཤོད་ཀྱི་མེད། ཆོས་དད་བྱེད་མིན་ཐ་དད་ཡིན། དེ་ནི་མི་སྒེར་གྱི་གནས་ཚུལ་རེད། ངོས་ཀྱིས་འགྲོ་བ་མི་སྤྱི་འཆམ་མཐུན་དང་མཛའ་གྲོགས་ཡོང་རྒྱུ་དེ་ཆོས་དང་མ་འདྲེས་པའི་ཐོག་ནས་ཡོང་རྒྱུ་གཙོ་འདོན་བྱེད་ཀྱི་ཡོད། དེར་བརྟེན་འཛམ་གླིང་ས་ཕྱོགས་མང་པོའི་གི་ནང་མི་མང་པོ་ཞིག་གིས་ངོས་ཀྱི་སྐད་ཆ་ཉན་ནས་སེམས་སྐྱིད་དུ་ཕྱིན་སོང་མི་ཚེ་ལ་འགྱུར་བ་ཕྱིན་སོང་ཟེར་མཁན་མང་པོ་ཡོང་གི་འདུག དེ་དག་ངོས་ཀྱི་ལས་འགན་གཅིག་སྒྲུབ་ཀྱི་ཡོད། ལས་འགན་གཞན་ཞིག་ནི་ཆོས་ལུགས་མཐུན་སྒྲིལ་བྱེད་ཀྱི་ཡོད། ངོས་ཀྱིས་ཆོས་ལུགས་མཐུན་སྒྲིལ་ཐོག་ལ་ཞབས་འདེགས་གང་ཙམ་སྒྲུབ་ཡོད། དེ་དག་ལ་བོད་པའི་ནང་ནས་སྤྱིར་བཏང་བྱེད་ཐུབ་རྒྱུ་ཁག་པོ་རེད། དེ་དག་ངོས་ནས་བྱེད་རྒྱུའི་གོ་སྐབས་ཕྲན་བུ་ཡོད་པ་རེད། ངོས་ནས་དེ་ཚོའི་ནང་ནུས་པ་མང་ཙམ་བཏོན་ཚུར་ཕྱོགས་འདིར་བཙན་བྱོལ་སྒྲིག་འཛུགས་ནང་ད་ལྟ་ཡིན་ནའང་ངོས་རང་ཕྱེད་རྒན་ཡོལ་སྟེང་བསྡད་ཡོད་ལ་རིང་མིན་གྲོས་ཚོགས་ཚུགས་རྒྱུ་རེད་དེའི་སྟེང་ངོས་ནས་ཡིག་ཐོག་ནས་སྙན་སེང་ཞུ་དགོས་བསམ་ནས་བསྡད་ཡོད། རྒན་ཡོལ་ཞེས་ནམ་རྒྱུན་ཚོགས་འདུ་ཚོགས་གྲོལ་བྱེད་རྒྱུ་དང་རྩིས་ཕྲར་ངོས་ནས་མིང་རྟགས་བཀོད་ཀྱི་ཡོད། དེ་ཚོའི་གྲས་༸རྒྱལ་བ་རིན་པོ་ཆེས་མིང་གནས་རྗེས་འབྲེལ་བྱས་ཏེ་རྒྱལ་ཁབ་གཅིག་གི་གཙོ་འཛིན་ལྟ་བུ་བྱེད་རྒྱུའི་འགྲོ་སྟངས་ཆགས་ཡོད་པ་དེ་ཚོ་བསྒྱུར་བཅོས་གཏོང་དགོས་ཀྱི་འདུག དེ་དག་བཙན་བྱོལ་སྒྲིག་འཛུགས་རང་ངོས་ནས་འགན་གཙང་མ་ཞིག་འཁྱེར་དགོས་ཀྱི་འདུག ཅེས་པ་འདི་རེད་མ་གཏོགས་ངོས་ནས་བོད་སྤྱི་པའི་དོན་ལ་འགན་ལེན་རྒྱུ་མིན་ཞེས་བརྗོད་ཀྱི་མེད། ཁ་སང་ལྡི་ལིར་གསར་འགྱུར་འགོད་མཁན་ཚོ་དང་སྐད་ཆ་ཞིག་བྱུང་བ་རེད། ངོས་ཀྱིས་དེ་ནམ་རྒྱུན་ནས་ཤོད་ཀྱི་ཡོད། འོན་ཀྱང་གསར་འགྱུར་འགོད་མཁན་གྱི་སྐད་ཆ་གསར་པའི་བཟོ་ལྟ་བུ་གོ་སྟེ་དེ་ཁྱབ་ཆེན་པོ་ཞིག་བཟོས་རྐྱེན་རྒྱ་གར་ནང་གི་ལྷོ་ཕྱོགས་གཞིས་ཆགས་ཁག་ནས་ངོས་ལ་སྙན་ཞུ་མང་པོ་ཞིག་འབྱོར་བྱུང་། ལྷག་པར་བོད་ནང་དུའང་འགའ་ཞིག་གིས་བློ་ཕམ་བྱེད་རྒྱུ་དེ་འདྲ་བྱུང་ཡོད་པ་འདྲ། བློ་ཕམ་བྱེད་དགོས་དོན་དོན་རྩ་བ་ཉིད་ནས་མེད། གནས་ཚུལ་དེ་དེ་འདྲ་རེད་དེ་བཞིན་རིམ་པས་གསལ་པོ་ཆགས་ཀྱི་རེད། ཅེས་བཀའ་ཕེབས་ཡོད། ཡང་༸གོང་ས་མཆོག་གིས་རྒྱ་བོད་འབྲེལ་བའི་སྐོར་བཀའ་སློབ་ཕེབས་མདོར་བསྡུས་སྩལ་གྲུབ་རྗེས་ཀ་སྦག་ལྷ་མོ་ཚོགས་པ་དང་ཀ་སྦག་བོད་གཞུང་སློབ་གྲྭ ས་གནས་རྟ་མང་མི་མང་བཅས་ནས་འཁྲབ་སྟོན་གཟིགས་འབུལ་མདོར་བསྡུས་རེ་ཞུས་ཏེ་ཆོས་འབྲེལ་དང་ལས་བསྡོམས་ཚོགས་འདུ་ཡོངས་སུ་ལེགས་གྲུབ་ཟིན་ཏེ་ཉིན་གུང་ལྗགས་སྨིན་སྐུའི་གཅེན་པོ་རྒྱ་ལོ་དོན་གྲུབ་མཆོག་གི་གཟིམ་ཤག་ཏུ་གདན་འདྲེན་ཞུས་པ་ལྟར་ཆིབས་ཞལ་བསྒྱུར། ཕྱེད་ཡོལ་ཆུ་ཚོད་ ༢།༤༠ ཐོག་ཁུལ་དེའི་བརྒྱུད་ལམ་ཁག་དང་དེ་བཞིན་ཕྱི་ནང་གི་གསར་འགོད་པ་གྲངས་ ༣༠ ལ་གསར་འགོད་གསལ་བསྒྲགས་སྐབས་སྐུའི་རླབས་ཆེན་མཛད་ཁུར་གསུམ་གྱི་སྐོར་ངོ་སྤྲོད་བཀའ་སློབ་སྩལ་གྲུབ་རྗེས་གསར་འགོད་པ་ཚོའི་དྲི་བར་བཀའ་ལན་མཛད་དེ་ཐེངས་འདིའི་ཀ་སྦག་ཁུལ་གྱི་མཛད་འཕྲིན་རྣམས་ཡོངས་སུ་ལེགས་གྲུབ་ཟིན་ཡོད་པ་བཅས།།
