༢༠༡༠ ཟླ་ ༡༢ ཚེས་ ༡ རེས་གཟའ་
༅༅། །བོད་གཞུང་འཕྲོད་བསྟེན་ལས་ཁུངས་ཀྱིས་གོ་སྒྲིག་ཐོག་ཕྱི་ལོ་ ༢༠༡༠ ཟླ་ ༡༢ ཚེས་ ༡ ནས་ཚེས་ ༥ བར་ཉིན་གྲངས་ལྔའི་རིང་བོད་གཞུང་བདེ་ལེགས་སྨན་ཁང་གི་ཚོགས་ཁང་དུ་འཕྲོད་བསྟེན་ཁྱབ་ཁོངས་ས་གནས་སྨན་ཁང་ཁག་གི་སྨན་ཞབས་དང་འཕྲོད་ལས་པ་ཁག་གཅིག་ལ་ཕྲུ་གུ་སྐྱེས་བསུའི་ལག་ལེན་གཙོ་གྱུར་མ་དང་བྱིས་པའི་འཕྲོད་བསྟེན་གྱི་ཟབ་སྦྱོང་དབུ་འཛུགས་གནང་ཡོད། དེ་ཡང་ཟབ་སྦྱོང་དབུ་འཛུགས་ཀྱི་མཛད་སྒོར་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་གིས་གཙོས་འཕྲོད་བསྟེན་ཟུང་དྲུང་ཚེ་རིང་དབྱངས་སྐྱིད་ལགས་དང།
བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། བདེ་ལེགས་སྨན་ཁང་གི་སྨན་པ་དཀོན་མཆོག་རྡོ་རྗེ་ལགས། བདེ་ལེགས་སྨན་ཁང་གི་སྤྱི་ཚོགས་འཕྲོད་བསྟེན་(Public health)སྨན་ཞབས་ཚེ་རིང་དཔལ་སྒྲོན་ལགས། དེ་བཞིན་ཕྱོགས་མཐའ་ཁག་གི་སྨན་ཞབས་དང་འཕྲོད་ལས་པ་ཁྱོན་མི་གྲངས་ ༡༨ ཙམ་འདུ་འཛོམས་ཀྱིས་ཐོག་མར་འཕྲོད་བསྟེན་ཟུང་དྲུང་གིས་ཟབ་སྦྱོང་དང་འབྲེལ་བའི་ངོ་སྤྲོད་གནང། དེ་རྗེས་འཕྲོད་བསྟེན་བཀའ་བློན་མཆོག་གིས་གསུང་བཤད་གནང་དོན།
བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱི་གཙོས་འདི་གར་ཟབ་སྦྱོང་ལ་ཕེབས་པ་རྣམ་པ་ཚོར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་གི་ཟབ་སྦྱོང་འདིའི་བརྗོད་གཞི་གཙོ་བོ་མ་དང་བྱིས་པའི་འཕྲོད་བསྟེན་ཡིན་པ་དེ་ཧ་ཅང་གི་གནད་འགག་ཆེན་པོ་ཞིག་ཆགས་ཡོད། བོད་མིའི་སྤྱི་ཚོགས་དེ་ལུས་སེམས་གཉིས་ཀར་བདེ་ཐང་གནས་པའི་ཐོག་ང་ཚོའི་མི་རིགས་ཀྱི་འཐབ་རྩོད་ཐུབ་པ་ཞུ་རྒྱུ་དང། ང་ཚོའི་ཕྲུ་གུ་རྣམས་འཕགས་པ་སྤྱན་རས་གཟིགས་ཀྱི་རྣམ་སྤྲུལ་༸སྐྱབས་མགོན་ཆེན་པོ་མཆོག་གི་གདུལ་ཞིང་དུ་སྐྱེས་ཀྱི་ཡོད། དེར་བརྟེན་མ་དང་བྱིས་པའི་འཕྲོད་བསྟེན་བདག་གཅེས་ཀྱིས་ཐོག་ནས་གང་བཙས་རྒྱུ་ཡིན་པའི་ཕྲུ་གུ་དེ་དག་གི་ལུས་སེམས་བདེ་ཐང་ཡོང་རྒྱུར་འབད་བརྩོན་བྱེད་རྒྱུ་གལ་ཆེན་པོ་ཡིན། ཟབ་སྦྱོང་འདིའི་ཐོག་ལྟ་སྐབས་མི་བཅུ་གཉིས་བཅུ་གསུམ་ཙམ་ལས་མེད་པ་དང་བོད་གཞུང་གི་སྒྲིག་འཛུགས་འདི་བཙན་བྱོལ་བོད་མིའི་སྒྲིག་འཛུགས་ཤིག་ཆགས་ཡོད། དངོས་ཡོད་གནས་ཚུལ་གྱི་ཆ་ནས་ང་རང་ཚོ་འདི་དག་བོད་མི་རིགས་ཀྱི་མ་འོངས་པའི་ཕྲུ་གུ་ཚོ་དང་ཁོང་ཚོའི་སྐྱེད་མ་རྣམས་ཀྱི་ཐུགས་འགན་བཞེས་མཁན་ཞིག་ཆགས་ཡོད། དེར་བརྟེན་རྣམ་པ་ཚོས་ཕྲུ་གུ་བཙས་སྐབས་ཀྱི་དུས་ཚོད་ཙམ་མིན་པར་ཐོག་མར་སྐྱེད་མ་ཕྲུ་གུ་བཙའ་རྒྱུ་ཡོད་མཁན་རྣམས་ཟླ་དགུ་རིང་སྨན་ཁང་དུ་བརྟག་དཔྱད་བྱེད་རྒྱུའི་དུས་ཚོད་ཐོག་དམ་འཛིན་གནང་རྒྱུ་དང། བྱིས་པ་བཙས་པའི་སྐབས་ཨ་མའི་སྐུ་གཟུགས་དང། ཕྲུ་གུ་རང་བཞིན་གྱི་བདེ་ཐང་ངང་སྐྱེས་ཐུབ་རྒྱུའི་སྔོན་ཚུད་ནས་ལམ་སྟོན་གནང་དགོས་པ་མ་ཟད། ཕྲུ་གུ་བཙས་པའི་སྐབས་མཐུན་འགྱུར་སྦྱར་རྒྱུ། བྱིས་པ་བཙས་རྗེས་ལོ་ལྔ་དྲུག་བར་ཕྲུ་གུར་ནད་གཞི་སྔོན་འགོག་གི་སྨན་ཁབ་རྒྱག་རྒྱུར་ཐུགས་སྣང་དང་སྐྱེད་མ་ཚོར་དྲན་སྐུལ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན་ང་ཚོའི་ཐུན་མིན་སྲོལ་རྒྱུན་གྱི་ལམ་ལུགས་སུ་ཕྲུ་གུ་བཙས་མ་ཐག་ཏུ་རིག་པ་འཕེལ་རྒྱུར་ལྕེའི་ཐོག་དམ་ཕྲུག་རྒྱག་གི་ཡོད་པ་དེ་དག་ལ་དོ་སྣང་ཆེར་སྐྱེད་གནང་སྟེ། གང་ལྟར་གནའ་དེང་ཟུང་འབྲེལ་གྱིས་མ་དང་བྱིས་པའི་ལུས་སེམས་བདེ་ཐང་ཁར་མི་རབས་རྗེས་མ་ཚོའི་ལུས་སྟོབས་བཟང་ལ་རིག་རྩལ་ལྡན་པ་ཞིག་ཡོང་རྒྱུར་ཐུགས་འགན་བཞེས་དགོས་བསམ་པའི་སྒོ་ནས་ལྷག་བསམ་རྣམ་དག་གནང་རོགས་ཞུ་རྒྱུ་ཡིན། ཁྱེད་རང་ཚོ་ལྟ་བུ་ཡིན་ན་སྤྱི་ཚོགས་ནང་ཕན་པ་སྒྲུབ་མཁན་གྱི་མི་སྣ་ཞིག་ཡིན་པས་ལས་ཀ་གང་ཞིག་བྱས་ཀྱང་སྤྲོ་སྣང་ལྡན་པའི་ཐོག་བྱས་ཚེ་རང་གཞན་གཉིས་ཀར་ཕན་ཐོགས་ཡོང་གི་རེད། གོང་དུ་ཞུས་པ་ལྟར་མི་རིགས་ཤིག་གི་རྩ་དོན་ཆ་ནས་ཁྱེད་རང་ཚོའི་ལས་ཀ་དེ་གལ་ཆེན་པོ་ཆགས་ཡོད། ཁྱེད་རང་ཚོས་སྐུ་ངལ་འཛེམས་མེད་ཐོག་འདི་གར་ཕེབས་པར་ཐུགས་རྗེ་ཆེ་ཞུ་རྒྱུ་དང་། ཟབ་སྦྱོང་འཁྲིད་སྐབས་དོ་སྣང་ཡག་པོ་གནང་སྟེ་མ་འོངས་པར་སོ་སོའི་ས་གནས་སུ་དེ་དག་ལག་ལེན་དོན་འཁྱོལ་བ་ཞིག་གནང་དགོས། ཞེས་གསུང་བཤད་གནང་རྗེས་ཟབ་སྦྱོང་དངོས་གཞི་དབུ་འཛུགས་གནང་ཡོད། ཐེངས་འདིའི་ཟབ་སྦྱོང་ཐོག་ཏི་ཛུ་དང། བསྟན་འཛིན་སྒང། ལ་དྭགས། སྦིར། ཅོན་ཏ་ར། མན་སྤར། ཨོ་རི་ས། ཌལ་ཧོར། བཀྲ་ཤིས་ལྗོངས། བདེ་སྐྱིད་གླིང། མཚོ་པདྨ། བཅས་ཀྱི་སྨན་ཞབས་ཁྱོན་མི་གྲངས་བཅོ་ལྔ་ཙམ་གྱིས་མཉམ་ཞུགས་གནང་ཡོད་པ་བཅས།།
