༢༠༡༠ ཟླ་ ༡༢ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༢ ཚེས་ ༩ རེས་གཟའ་ཕུར་བུ་སྔ་དྲོ་ཆུ་ཚོད་ ༧།༣༠ ཙམ་ལ་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་པེ་རེམ་ཀུ་མཱར་དྷུ་མལ་མཆོག་གི་དབུ་ཁྲིད་པའི་ཧ་མཱ་ཅལ་མངའ་སྡེའི་གྲོས་ཚོགས་འོག་མའི་ཚོགས་གཙོ་ཚོགས་གཞོན་མཆོག་དང། ཕྱོགས་འགལ་ཚོགས་པའི་ཚོགས་གཙོ་མཆོག  གཞན་ཡང་ཧི་མཱ་ཅལ་མངའ་སྡེའི་གྲོས་ཚོགས་ཀྱི་འཐུས་མི་ཁག་གཅིག་བཅས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཕེབས་རྒྱུ་ཡིན་འདུག དེ་ཡང་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱིས་གོང་བརྗོད་ཧི་མཱ་ཅལ་མངའ་སྡེའི་སྲིད་སྐྱོང་བ་རྣམས་ལ་ཆེ་བསྟོད་ཀྱི་ཞོགས་ཟས་གསོལ་སྟོན་ཞིག་བཤམ་རྒྱུ་ཡིན་འདུག་པ་དང། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ཀྱང་ལྷན་ཞུགས་ཀྱིས་མངའ་སྡེའི་བློན་ཆེན་མཆོག་དང་མཇལ་འཕྲད་མཛད་རྒྱུ་ཡིན་འདུག མཛད་སྒོའི་ཐོག་མར་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་གིས་སྐུ་མགྲོན་ཚོར་ཕེབས་བསུའི་གསུང་བཤད་གནང་རྒྱུ་གྲུབ་བསྟུན།  ཧི་མཱ་ཅལ་མངའ་སྡེའི་གྲོས་ཚོགས་ཀྱི་ཕྱོགས་འགལ་ཚོགས་པའི་ཚོགས་གཙོ་མཆོག་གིས་གསུང་བཤད་གནང་རྒྱུ་དང། དེ་རྗེས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གིས་གསུང་བཤད་གནང་བསྟུན། ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་གནང་མཛད་རྒྱུ་ཡིན་འདུག་པ་བཅས། སྔ་དྲོ་ཆུ་ཚོད་ ༩ ཙམ་ལ་སྐུ་མགྲོན་རྣམས་བཞུགས་སྒར་ནས་ཕེབས་ཐོན་གནང་རྒྱུ་ཡིན་འདུག་པ་བཅས།