༢༠༡༠ ཟླ་ ༡༢ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༢༩ ཉིན་གུང་ཆུ་ཚོད་ ༢།༣༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ཨུ་རུ་སུའི་གསར་འགོད་པ་ ༢༧ ཙམ་ལ་བཀའ་སློབ་སྩལ་དོན། ཨུ་རུ་སུ་སྤྱི་མཐུན་རྒྱལ་ཁབ་ནང་བོད་ཀྱི་ཆོས་དང་རིག་གཞུང་ལ་དོ་སྣང་ཇེ་ཆེར་འགྲོ་བཞིན་ཡོད་པ་དང། ཨུ་རུ་སུའི་ནང་པ་ཚོའི་མངོན་འདོད་ལྟར་ངོས་རང་ཨུ་རུ་སུར་ཕྱིན་ཏེ་ངོས་ཀྱི་གྲོགས་པོ་གསར་རྙིང་མང་པོ་ཡོད་པ་ཁོང་ཚོ་དང་ཐུག་འཕྲད་བྱས་ཏེ་བསམ་ཚུལ་བརྗེས་ལེན་བྱ་འདོད་ཡོད། དེ་སྔ་ཨུ་རུ་སུའི་རྒྱལ་པོ་ཛར་(Czar) གྱིས་༸གོང་ས་སྐུ་ཕྲེང་བཅུ་གསུམ་པ་ཆེན་པོར་ཕྱག་རྟགས་སུ་ཕུལ་བའི་ཨམ་ཕྲག་ཆུ་ཚོད་དེ་ལྷ་སར་ངོས་ཀྱིས་ཤག་ཏུ་ཉར་ཡོད། ཨུ་རུ་སུ་སྤྱི་མཐུན་རྒྱལ་ཁབ་ནང་ཡོད་པའི་ཁལ་མུཀ་དང་ཐུ་བ། བྷུར་ཡ་བཅས་ཀྱིས་ལོ་ངོ་བརྒྱ་ཕྲག་མང་པོའི་རིང་ནང་ཆོས་བྱེད་ཀྱི་ཡོད། ངོས་རང་ན་གཞོན་སྐབས་སུ་ས་གནས་དེ་དག་ནས་བོད་དུ་སློབ་གཉེར་བྱས་ཏེ་མཁས་དབང་མང་པོ་ཐོན་པ་ཤེས་ཀྱི་ཡོད།  དེར་བརྟེན་བྱུང་རབས་ཁྲོད་བོད་དང་ཨུ་རུ་སུའི་དབར་འབྲེལ་བ་ཉེ་པོ་ཡོད་ཅེས་བཀའ་སློབ་སྩལ་བ་མ་ཟད། ཨུ་རུ་སུའི་གསར་འགོད་པ་གཅིག་གིས་དྲི་བར་བཀའ་ལན་སྩལ་དོན། ཏཱ་ལའི་བླ་མ་ཞེས་པའི་མིང་འདི་སོག་ཡུལ་ནས་བྱུང་བ་ཞིག་ཡིན་པས་ཁལ་མུཀ་ཡུལ་དང་ང་ཚོ་འབྲེལ་བ་ཡོད། ཁལ་མུཀ་ནང་སངས་རྒྱས་ཀྱི་བསྟན་པ་མི་ཉམས་རྒྱུན་འཛིན་བྱས་དང་བྱེད་མུས་ཡིན། ད་ཆ་ཁོང་ཚོར་རོགས་པ་བྱ་རྒྱུ་ངོས་ཀྱི་ལས་འགན་ཆགས་ཡོད། ཁལ་མུཀ་དང་ཐུ་བ། བྷུར་ཡ་བཅས་ནས་སློབ་ཕྲུག་གྲངས་ ༢༤༠ ཙམ་རྒྱ་གར་དུ་བཙན་བྱོལ་བོད་མིའི་སྤྱི་ཚོགས་ནང་བོད་ཀྱི་ནང་ཆོས་དང་རིག་གཞུང་སློབ་གཉེར་བྱེད་བཞིན་ཡོད་པ་མ་ཟད། ཧི་མཱ་ལ་ཡའི་རི་རྒྱུད་ནས་སློབ་གཉེར་བ་གྲངས་ ༥༠༠༠ ཙམ་རྒྱ་གར་དུ་བཙན་བྱོལ་བོད་མིའི་སྤྱི་ཚོགས་ནང་བོད་ཀྱི་སངས་རྒྱས་པའི་ཆོས་ལ་སློབ་གཉེར་བྱེད་བཞིན་ཡོད། རྒྱ་གར་དུ་བཙན་བྱོལ་བོད་མིའི་སྤྱི་ཚོགས་ནང་བྷུར་ཡ་ནས་ཁྱོན་སློབ་གཉེར་བ་གྲངས་ ༡༢༠ ཙམ་ཡོད་པ་ལས་སློབ་གཉེར་བ་ ༡༧ ཙམ་ད་ཆ་དགེ་བཤེས་ཐོན་པའི་མཚམས་སུ་བསླེབས་ཡོད། ཕྱོགས་མཚུངས་སློབ་གཉེར་བ་ཁག་གཅིག་རང་ཡུལ་དུ་ལོག་ནས་སློབ་གྲྭ་གསར་འཛུགས་བྱས་པ་དང་དགོན་སྡེ་ཁག་གི་ནང་དུ་ནང་ཆོས་སློབ་ཁྲིད་བྱ་རྒྱུ། དེ་བཞིན་སྤྱི་ཚོགས་ཞབས་ཞུའི་ལས་འགན་སྒྲུབ་བཞིན་ཡོད་ཅེས་བཀའ་ལན་སྩལ། དེ་བཞིན་ཁལ་མུཀ་གསར་འགོད་པ་གཅིག་གིས་དགའ་ལྡན་ལྔ་མཆོད་ཀྱི་དུས་ཆེན་དང་འབྲེལ་བའི་ཁལ་མུཀ་མི་མང་ཚོར་བཀའ་སློབ་ཇི་ཡོད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན།  སྲོལ་རྒྱུན་དང་ཚན་རིག་ཟུང་འབྲེལ་ཐོག་སློབ་གཉེར་བྱ་རྒྱུ་གལ་ཆེན་པོ་རེད། ཚན་རིག་གི་ལམ་ནས་རིག་པས་བརྡར་ཤ་གཅད་དེ་ངེས་པ་རྙེད་པ་ཞིག་བྱུང་ན་སངས་རྒྱས་ཀྱི་ཆོས་ལ་དད་པ་བརྟན་པོ་ཐོབ་ཀྱི་རེད། ཚན་རིག་པ་མང་པོ་ཞིག་གིས་བྱམས་པ་དང་བརྩེ་བ་སོགས་ནང་སེམས་ཚོར་གྱི་རྣམ་གཞག་ལ་སློབ་སྦྱོང་བྱས་ཏེ་བཟང་སྤྱོད་དེ་དག་བརྒྱུད་འཛམ་གླིང་གི་གནས་སྟངས་ཇེ་བཟང་དུ་གཏོང་ཐབས་བྱེད་བཞིན་ཡོད་ཅེས་བཀའ་ལན་སྩལ།
ཨུ་རུ་སུའི་གསར་འགོད་པ་ཚོས་དེ་ཉིན་བཙན་བྱོལ་བོད་གཞུང་བཀའ་བློན་ཁྲི་པ་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་མཇལ་འཕྲད་ཀྱང་གནང་ཡོད་པ་བཅས།