པར་ལེན་ཆོས་འབྱོར།
༢༠༡༠ ཟླ་ ༡༢ ཚེས ༢༠ རེས་གཟའ་ཟླ་བ།
པར་ལེན་ཆོས་འབྱོར།
༄༅། །འདི་གར་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པས་བཏང་གནས་ནང་གསལ། ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༡༨ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འབྲས་ལྗོངས་གནས་ཀྱི་ལྟེ་བ་བྲག་དཀར་བཀྲ་ཤིས་སྡིངས་དགོན་གྱི་ཉེ་འདབས་སུ་འབྲས་ལྗོངས་གཞུང་ཕྱོགས་ནས་དམིགས་བསལ་གསར་དུ་བཞེངས་པའི་མཚམས་ཁང་དེར་ཉིན་གཉིས་རིང་གི་སྐུ་མཚམས་ལྗགས་ཐུན་ཡོངས་སུ་གྲུབ་སྟེ་སྔ་དྲོའི་ཆུ་ཚོད་ ༧།༤༥ ཐོག་ར་བང་ལར་ཆིབས་ཞལ་སྐྱོང་སྐབས་ལམ་བར་དུ་འབྲས་ལྗོངས་མངའ་སྡེ་གཞུང་གི་དྲུང་ཡིག་ཆེ་མོ་མཆོག་དང་། དགོན་གནས་ལས་ཁུངས་ཀྱི་དྲུང་ཆེ། ས་གནས་གྲོས་ཚོགས་ཀྱི་འཐུས་མི་སོགས་གནད་ཡོད་མི་སྣས་ཕེབས་བསུ་གཟབ་རྒྱས་ཞུས་ཡོད། དེ་རྗེས་ཆུ་ཚོད་ ༡༠ ཐོག་ར་བང་ལ་ཀུན་ཕན་གླིང་བོད་མིའི་གཞིས་ལས་ཁང་ཡོད་སར་༸ཞབས་སོར་བདེ་བར་འཁོད་སྐབས་སེར་སྐྱ་མི་མང་རྣམས་ནས་ཕེབས་བསུ་གཟབ་རྒྱས་ཞུས་ཡོད། ཐོག་མར་༸གོང་ས་༸སྐྱབས་མགོན་ཆེན་པོ་མཆོག་ར་བང་ལ་གཞིས་ཆགས་ཀྱི་ཉེ་འགྲམ་དུ་གསར་དུ་བཞེངས་དང་བཞེང་བཞིན་ཡོད་པའི་གཉགས་སྟོན་བརྒྱུད་པའི་གདན་ས་སླེ་ལུང་ཆོས་སྡེར་ཆིབས་སྒྱུར་གྱིས་དགོན་དེར་༸ཞབས་སོར་འཁོད་བསྟུན་གཉགས་སྟོན་རིན་པོ་ཆེ་མཆོག་ནས་གུས་བསུའི་མཇལ་དར་དང་བཅས་བླ་གྲྭ་ཐུན་མོང་ནས་དུང་རྒྱ་སྤོས་སྣེས་ལྷ་ཁང་དུ་གདན་འདྲེན་ཞུས། ༸གོང་ས་མཆོག་ལྷ་ཁང་དེའི་བཞུགས་ཁྲིར་འཁོད་བསྟུན་གསོལ་ཇ་དང་གྲོ་མ་འབྲས་སིལ་འདེགས་འབུལ་དང་བླ་གྲྭ་ཐུན་མོང་ནས་ཡན་ལག་བདུན་པ་གསུང་མུར་གཉགས་སྟོན་རིན་པོ་ཆེ་མཆོག་ནས་མཎྜལ་སྐུ་གསུང་ཐུགས་རྟེན་འདེགས་འབུལ་ཞུས། དེ་རྗེས་སླེ་ལུང་ཆོས་སྡེའི་ལས་བསྡོམས་དང་ལས་འཆར་རྣམས་གང་སྐུ་མཆོག་ལ་སྙན་སྒྲོན་ཞུས། དེ་རྗེས་༸གོང་ས་མཆོག་ལ་དགོན་དེར་མ་འོངས་ཇི་དགེའི་སྐོར་བཀའ་སློབ་སྙིང་བསྡུས་སྐྱབས་འཇུག་ཞུས་དོན་ལྟར་བཀའ་སློབ་ལམ་སྟོན་ཕེབས་ཡོད། དེ་ནས་༸གོང་ས་མཆོག་ལྷ་ཁང་དེ་ནས་གྲྭ་ཤག་གི་བར་སྟེང་དུ་གདན་འདྲེན་ཞུས་མཚམས་མགོན་པོ་གང་ཉིད་མཆོག་གིས་མ་འོངས་ཚོགས་ཁང་བཞེངས་ཡུལ་དུ་ཕྱག་གནས་དང་ཐུགས་སྨོན་བཀའ་དྲིན་ཆེ་བ་གྲུབ་བསྟུན་ར་བང་ལ་ས་གནས་གཞིས་ཆགས་ཀྱི་དགོན་དུ་ཆིབས་ཞལ་བསྒྱུར།
ཆུ་ཚོད་ ༡༡ ཐོག་ར་བང་ལ་ཀུན་ཕན་གླིང་གཞིས་ཆགས་ཀྱི་དགོན་དེར་༸ཞབས་སོར་འཁོད་སྐབས་ལམ་གཡས་གཡོན་དུ་གཞིས་མི་རྣམས་ཀྱི་སྐུ་གསང་དང་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་དང་སློབ་ཕྲུག་རྣམས་ནས་བཀྲ་ཤིས་ཞོལ་པ་འཁྲབ་སྟོན་གྱི་ལམ་ནས་ཕེབས་བསུ། དགོན་དེའི་དགེ་འདུས་རྣམས་ཀྱིས་སེར་སྦྲེངས་དང་དུང་རྒྱ་སྤོས་སྣེས་སྔོན་བསུས་ཏེ་དགོན་དེར་གདན་འདྲེན་ཞུས། དགོན་པའི་བཞུགས་ཁྲིར་འཁོད་མཚམས་དགོན་དེའི་འགོ་བྱེད་དང་ས་གནས་འགོ་འཛིན། ས་གནས་གྲོས་ཚོགས་ཀྱི་ཚོགས་གཙོ་སོགས་ནས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་གྲུབ་རྗེས་དགོན་དེའི་མདུན་ཐང་དུ་མི་མང་རྣམས་ལ་སྐྱབས་འགྲོ་གཙོ་བོར་གྱུར་བའི་ནང་ཆོས་ངོ་སྤྲོད་ཆུ་ཚོད་གཅིག་རིང་བཀའ་དྲིན་མཛད་པ་མ་ཟད་ཐུབ་པའི་གཟུངས་བསྔགས་དང་། མ་ཎི། སྒྲོལ་མ། བཛྲ་གུ་རུ། ཨ་ར་པ་ཙ། རྟ་མགྲིན་བཅས་ཀྱི་གཟུངས་བསྔགས་ཀྱང་ལྗགས་ལུང་བཀའ་དྲིན་ཆེ་བ་སྩལ་རྗེས་ཉིན་གུང་གི་ལྗགས་སྨིན་དགོན་དེར་མཛད།
ཕྱེད་ཡོལ་ཆུ་ཚོད་ ༡ ཐོག་མགོན་པོ་གང་ཉིད་མཆོག་དགོན་དེའི་མདུན་ཐང་དུ་ར་བང་ལ་ཀུན་ཕན་གླིང་གཞིས་ལས་ཁང་གི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་ཞུ་རྒྱུའི་ཚོགས་དགོན་དུ་༸ཞབས་སོར་འཁོད་བསྟུན་ས་གནས་འགོ་འཛིན་ནས་གཞིས་ལས་ཁང་དེའི་ལས་བསྡོམས་རྣམས་སྙན་སྒྲོན་ཞུས། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་རྣམས་འཚམས་འདྲི་བཀའ་སློབ་ལམ་སྟོན་ཕེབས་དོན། དེ་རིང་འདིར་འབྲས་ལྗོངས་ནང་གི་བོད་མིའི་གཞིས་ཆགས་ར་བང་ལའི་མི་མང་རྣམས་སླར་ཡང་གཅིག་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། གཞིས་ཆགས་ཀྱི་ཁང་པ་སོགས་སྔོན་མ་ངོས་ཡོང་སྐབས་དང་བསྡུར་ན་ཅུང་ཡར་རྒྱས་ཕྱིན་པ་འདུག གཡས་གཡོན་གྱི་གྲོང་གསེབ་འདི་དག་ཡར་རྒྱས་ཆེན་པོ་འགྲོ་གི་ཡོད་པ་ལྟ་བུ་འདུག་ལ། ང་ཚོ་བོད་མིའི་གཞིས་ཆགས་འདི་དག་ཀྱང་གང་ཙམ་ཡར་རྒྱས་ཕྱིན་འདུག
ང་ཚོ་བཙན་བྱོལ་བ་ཆགས་ཏེ་ལོ་མང་པོ་ཕྱིན་པ་རེད། ཡིན་ཡང་གཙོ་བོ་ས་གནས་ཀྱི་ལས་བྱེད་དང་མི་མང་ཚོས་སེམས་ཤུགས་མ་ཆགས་པར་གང་ཡོང་ཅི་ཡོང་བྱེད་ཀྱི་ཡོད་པར་བརྟེན་ཡར་རྒྱས་ཕྱིན་ཡོད། དེ་འདྲ་ཡིན་དུས་ཁྱེད་ཚོར་ཐུགས་རྗེ་ཆེ་ཟེར་རྒྱུ་ཡིན། འདི་གའི་ལས་བྱེད་པ་ཚོར་ཆ་བཞག་ནའང་མི་མང་གི་ཞབས་ཞུ་བ་ཡིན་བསམས་པ་བྱེད་དགོས། ལས་བསྡོམས་ནང་ཁྱེད་ཚོས་ཡག་པོ་ཞེ་དྲག་བྱས་འདུག དེའི་ནང་སློབ་གྲྭའི་སློབ་ཕྲུག་ཚོས་ཡི་གེ་མ་ཤེས་པ་ཚོར་ཡི་གེ་ཤེས་རྒྱུའི་སློབ་སྦྱོང་སྤྲད་ཡོད་བརྗོད་སོང་། དེ་ནི་ད་བར་གཞིས་ཆགས་གཞན་དག་ཁག་གི་ལས་བསྡོམས་ནང་གཅིག་ཀྱང་བྱུང་མ་སོང་། ཁྱེད་རང་ཚོས་དེ་ནི་གསར་གཏོད་ལྟ་བུ་ཡིན་པས་ཡག་པོ་རེད། གང་ལྟར་ཤེས་བྱ་ཡོན་ཏན་དེ་གལ་ཆེན་པོ་ཞེ་དྲག་ཡིན། རང་གི་ཉམས་མྱོང་གི་ཆ་ནས་གསལ་པོ་ག་རེ་ར་ཕྲོད་པ་རེད་ཅེ་ན། དེ་སྔ་ལྔ་བཅུའི་ནང་དུས་ལོག་འགོ་ཚུགས་པ་རེད།
དེ་ལྟ་བུའི་རྐྱེན་ངན་འཕྲད་རྒྱུ་དེ་ང་ཚོ་བོད་པ་རང་ཉིད་ཀྱི་ངོས་ནས་དེང་དུས་ཀྱི་ཤེས་ཡོན་དང་འབྲེལ་བའི་ཐོག་འཛམ་གླིང་ཕྱི་ལ་འགྱུར་བ་གང་འདྲ་འགྲོ་གི་ཡོད་མེད་ཐད་ཉམས་ཞིབ་དང་དོ་སྣང་བྱས། འཛམ་གླིང་གི་འགྱུར་བར་གཞིགས་པའི་ང་ཚོའི་ངོས་ནས་ཐབས་ཤེས་གང་བྱེད་དགོས་འདུག དེ་འདྲའི་བསམ་བློ་ང་ཚོར་རྩ་བ་ནས་འཁོར་གྱི་མེད་ལ་གཏོང་གི་ཡང་མེད། རྒྱ་གར་ལ་གནས་སྐོར་འགྲོ་མཁན་རེ་ཟུང་རེ་ཟུང་གིས་རྒྱ་གར་ནས་ཚུར་འཁོར་རྗེས་རྒྱ་གར་ནང་འགྱུར་བ་ཆེན་པོ་འགྲོ་བཞིན་འདུག བོད་གཞུང་གི་བསམ་བློ་གཏོང་དགོས་ཀྱི་འདུག་བརྗོད་མཁན་རེ་ཟུང་བྱུང་ཡོད། འོན་ཀྱང་སྤྱི་ཡོངས་ཀྱི་འཆར་ཅན་ཁོ་ནར་བསྡད་ཡོད། དེ་སྔ་བོད་ནང་བོད་འདི་ལྷ་ཆོས་སྐྱོང་སྲུང་མས་སྐྱབས་ཡོད་ཅེས་ཤོད་ཀྱི་ཡོད། དེ་ནི་ཆོས་ལ་དད་པ་བྱེད་སྟངས་མ་ཤེས་པ་རེད། ནང་པའི་ཆོས་ངོ་མ་དེ་ལས་རྒྱུ་འབྲས་བརྗོད་ཀྱི་ཡོད་མ་གཏོགས་སྨོན་ལམ་བརྒྱབ་ནས་བསྒྲུབ་ཀྱི་ཡོད་བརྗོད་ཀྱི་མེད།
ང་ཚོས་ཆོས་ཡག་པོ་མ་ཤེས་པར་གསོལ་འདེབས་སྨོན་ལམ་གྱི་འགྲིག་གི་ཡོད་པ་ལྟ་བུ་ལས་འཛམ་གླིང་གི་འགྱུར་བར་གཞིགས་པའི་ང་ཚོས་ཐབས་ཤེས་ཡོད་རྒུ་རྩལ་སྤྲུགས་བྱེད་རྒྱུ་མ་བྱུང་བ་རེད། དེ་དག་ནི་མ་ཤེས་པའི་རྐྱེན་དང་དེང་དུས་ཀྱི་ཤེས་ཡོན་མེད་པས་སྐྱོན་དེ་ལྷག་པ་རེད། དེར་བརྟེན་ང་ཚོ་རྒྱ་གར་ལ་བསླེབས་ཏེ་ཕྱི་ལོ་ ༡༩༥༩ ཟླ་ ༤ ནང་ལ་མ་སུ་རིར་བསླེབས་པ་རེད། ༡༩༥༩ ནས་ལོ་གཅིག་ནང་ཚུན་ཕྱི་ལོ་ ༡༩༦༠ དབྱར་སྟོད་ཙམ་ལ་ང་ཚོས་མ་སུ་རིར་སློབ་གྲྭ་དང་པོ་དེ་བཙུགས་པ་རེད། དེ་དུས་ང་ཚོས་དགོན་པ་རྒྱག་རྒྱུ་སོགས་ཀྱི་འབད་བརྩོན་བྱས་མེད། སྐབས་དེར་བོད་ནས་ས་དགེ་བཀའ་རྙིང་རིས་སུ་མ་ཆད་པའི་མཁས་པ་དགེ་བཤེས་སློབ་གཉེར་བ་ཡག་པ་གྲངས་ ༡༥༠༠ ཞིག་སྦག་སར་སློབ་གཉེར་བྱེད་ས་བཙུགས་ཡོད།
ཐོག་མར་རྒྱ་གར་གཞུང་གི་འཆར་གཞིར་མི་གྲངས་ ༣༠༠ རེད། དེས་ཉུང་དྲགས་ཀྱི་འདུག་ཅེས་མཐར་གྲངས་ཚད་ ༡༥༠༠ བྱས་པ་ཞིག་བཙུགས་ཡོད་པ་མ་གཏོགས་གཞན་ང་ཚོས་དགོན་པ་གྲྭ་ཚང་དང་ལྷ་ཁང་རྒྱག་རྒྱུར་འབད་བརྩོན་གང་ཡང་བྱས་མེད། སློབ་གྲྭ་འཛུགས་རྒྱུ་དེ་གལ་ཆེ་ཤོས་བརྩིས་ཡོད། དེར་བརྟེན་འདས་པའི་ལོ་ལྔ་བཅུའི་རིང་ལ་ང་ཚོས་དེང་དུས་ཀྱི་ཤེས་ཡོན་གྱི་སློབ་གསོ་སྤྲོད་རྒྱུ་དེར་གང་ལ་གང་ཙམ་གྱི་གྲུབ་འབྲས་ཐོན་ཡོད། ང་ཚོ་བཙན་བྱོལ་དུ་ཡོད་མཁན་བོད་མི་ཡིག་རྨོངས་ཧ་ཅང་ཉུང་ཉུང་རེད། མི་རབས་གསར་པ་དེ་དག་སློབ་གྲྭ་འཛིན་རིམ་མཐོ་དམའ་ལ་མ་ལྟོས་པར་སློབ་གྲྭར་འགྲོ་མྱོང་བ་ཆགས་ཡོད། ས་གནས་འདིར་ཡང་ཁྱེད་ཚོས་ཤེས་ཡོན་སྐོར་ཡག་ཐག་ཆོད་འདུག མི་རྒན་པ་ཡིག་རྨོངས་ཚོར་ཡང་ཡི་གེ་སློབ་རྒྱུ་དེ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ་ཡོད།
ཡང་༸གོང་ས་མཆོག་གིས་བཙན་བྱོལ་བོད་མིའི་སློབ་གྲྭ་ཁག་གི་བོད་ཡིག་གི་ཤེས་ཚད་སྐོར་བཀའ་སློབ་ཕེབས་དོན། བཙན་བྱོལ་ནང་ཡོད་སློབ་གྲྭ་ཁག་གི་བོད་ཡིག་གི་གནས་ཚད་དེ་ཏན་ཏན་སྐྱོ་རུ་འགྲོ་གི་ཡོད་པ་ལྟ་བུ་འདུག དེར་བརྟེན་ཁྱེད་ཚོ་བོད་ཡིག་སློབ་སབྱོང་སྤྲོད་མཁན་ཚོས་དོ་འཁུར་ཆེ་ཙམ་བྱེད་དགོས་པ་དང་སློབ་ཕྲུག་ཚོ་རང་རང་སོ་སོའི་ངོས་ནས་ཀྱང་བོད་ཡིག་སློབ་སབྱོང་བྱེད་རྒྱུར་དོ་འཁུར་ཆེ་ཙམ་བྱེད་དགོས། བོད་ཡིག་གི་དཔལ་འབྱོར་དང་ཁྲིམས་སོགས་ཀྱི་སློབ་སྦྱོང་ནང་དེ་ཙམ་བེད་སྤྱོད་མེད་ཀྱང་བོད་ཀྱི་སངས་རྒྱས་པའི་ཆོས་བཀའ་འགྱུར་དང་བསྟན་འགྱུར་པོད་ ༣༠༠ ལྷག་ཙམ་ཡོད་པ་དེ་དག་སློབ་སྦྱོང་བྱེད་དགོས་བྱུང་ན་བོད་ཡིག་ལས་ལྷག་པའི་སྐད་ཡིག་གཞན་གང་ཡང་མེད་པས་བོད་ཡིག་དེ་ཧ་ཅང་གལ་ཆེན་པོ་ཆགས་ཡོད། དེང་སྐབས་ཕྱི་རྒྱལ་བ་ནང་པའི་མཁས་པ་དེ་དག་གིས་བོད་ཡིག་ཀློག་རྒྱུར་སྦྱོང་བརྡར་བྱས་ཏེ་ཡག་པོ་ཀློག་ཐུབ་ཀྱི་འདུག ཁོང་ཚོས་དཀའ་ལས་རྒྱག་ཐུབ་ཀྱི་ཡོད་པ་རེད། ང་ཚོ་སོ་སོའི་རང་སྐད་ཡིན་དུས་བདག་པོ་རྒྱག་མཁན་ང་ཚོ་རེད། ཕྱི་མི་ཚོས་དེ་ཙམ་དོ་སྣང་བྱེད་དུས་ང་ཚོས་དེ་བས་ཀྱང་རང་གི་ནོར་བུ་ཡིན་བསམས་ཏེ་བདག་པོ་རྒྱག་རྒྱུ་ཧ་ཅང་གལ་ཆེན་པོ་ཡིན། ཞེས་དང་དེ་བཞིན་ཕྱེད་རྒན་ཡོལ་སྐོར་ཀ་སྦག་ཏུ་སྩལ་བ་ལྟར་བཀའ་སློབ་སྩལ།
པར་ལེན་ཆོས་འབྱོར།
ལྷག་པར་༸གོང་ས་མཆོག་གིས་རྒྱ་བོད་གནས་ཚུལ་ཐད་བཀའ་སློབ་ཕེབས་དོན། རྒྱ་བོད་ཀྱི་འབྲེལ་བའི་སྐོར་དེ་ཕྱི་ལོ་ ༢༠༠༨ ཀྱི་གནས་ཚུལ་བྱུང་རྗེས་ངོས་ཀྱིས་ད་ཆ་རྒྱ་ནག་གཞུང་ལ་ཡིད་ཆེས་བྱེད་རྒྱུ་དེ་ཁག་པོ་འདུག འོན་ཀྱང་རྒྱ་ནག་མི་མང་ལ་ཡིད་ཆེས་རྩ་བ་ནས་བརླགས་མེད་ཅེས་རྟག་ཏུ་བརྗོད་ཀྱི་ཡོད་ལ་རྒྱ་རིགས་ཤེས་ཡོན་ཅན་དང་རྒྱ་རིགས་ཆོས་པ་མང་པོ་ཞིག་གིས་ང་ཚོས་བརྗོད་བཞིན་པའི་དབུ་མའི་ལམ་དེར་བརྒྱ་ཆ་བརྒྱ་ཐམ་པ་རྒྱབ་སྐྱོར་བྱེད་ཀྱི་འདུག ང་ཆོས་རང་བཙན་ཞེས་བརྗོད་ན་རྒྱ་རིགས་མང་པོ་ཞིག་གིས་རྒྱབ་སྐྱོར་བྱེད་རྒྱུ་ཧ་ལམ་ཁག་པོ་རེད། ད་ལྟ་ང་ཚོས་བརྗོད་བཞིན་པའི་དབུ་མའི་ལམ་དེ་རང་རྒྱལ་གཞན་ཕམ་ཟེར་རྒྱུ་མིན་པར་རྒྱ་བོད་གཉིས་ཀར་ཁེ་ཕན་ཡོད་པ་ཞིག་ཆགས་ཡོད། དཔེར་ན། ཕྱི་ལོ་ ༢༠༠༨ ལོའི་གནས་ཚུལ་བྱུང་སྟེ་ད་ལྟ་བར་ལོ་གཉིས་ལྷག་ཙམ་རིང་ལ་ང་ཚོས་དོ་སྣང་བྱུང་བར་གཞིགས་ན་རྒྱ་ཡིག་ནང་རྒྱ་མི་མཁས་པ་དེ་འདྲས་རྩོམ་ཡིག་བྲིས་པ་གྲངས་ ༡༠༠༠ ལྷག་ཙམ་བྱུང་འདུག དེའི་ནང་མི་ ༢༠༠ ལྷག་ཙམ་རྒྱ་ནག་སྐམ་ས་ཆེན་པོ་ནས་ཡིན་པའི་རྒྱ་མིས་བྲིས་ཡོད། དེ་དག་ཚང་མས་ང་ཚོས་དབུ་མའི་ལམ་ཟེར་རྒྱུ་དེར་བརྒྱ་ཆ་བརྒྱ་ཐམ་པ་རྒྱབ་སྐྱོར་ཡོད་པ་ཆགས་ཡོད། རྒྱ་ནག་དབུས་གཞུང་གི་སྲིད་བྱུས་ལ་སྐྱོན་བརྗོད་བྱེད་མཁན་ཤ་སྟག་ཆགས་ཡོད། དེ་རིང་སང་རྒྱ་ནག་ནང་གི་ནང་པ་ཆ་བཞག་ན་ཉེ་ལམ་བདུན་གཉིས་གོང་ངོས་ཀྱིས་གནས་ཚུལ་འདི་ཐོས་བྱུང་།
རྒྱ་ནག་གི་སློབ་གྲྭ་ཆེ་བ་ཞིག་གིས་རྒྱ་ནག་ནང་དུ་ནང་པ་ག་ཚད་ཡོད་མེད་གྲངས་བཤེར་ཞིབ་འཇུག་བྱས་འདུག་པ་དེའི་ནང་མི་མང་ས་ཡ་སུམ་བརྒྱ་ཡོད་པ་ཆགས་ཡོད། དེར་བརྟེན་འཛམ་གླིང་འདིའི་སྟེང་གི་ནང་པ་མང་ཤོས་དེ་རྒྱ་ནག་ཆགས་ཡོད། དེ་རིང་ཁ་སང་རྡ་སར་ཧ་ལམ་བདུན་རེའི་ནང་རྒྱ་ནག་སྐམ་ས་ཆེན་པོ་ནས་རྒྱ་མི་ངོས་རང་ཐུག་པར་ཡོང་མཁན་མི་གཉིས་གསུམ་རེ་དང་ཡང་བཅུ་གྲངས་རེ་བཅས་ཧ་ལམ་བར་མ་ཆད་པར་ཡོང་གི་འདུག དེ་དག་ཐུག་སྐབས་མང་ཆེ་བས་མིག་ཆུ་བཏང་སྟེ་ང་ཚོ་རྒྱ་ནག་ནང་གི་མི་མང་ཚོ་མ་བརྗེད་པ་གནང་རོགས། ཞེས་བརྗོད་ཀྱི་འདུག མང་པོ་ཞིག་ཁོ་རང་ཚོ་རྒྱ་རིགས་ཡིན་པའི་ཆ་ནས་རྒྱ་མིས་བོད་ནང་ལ་སྡུག་པོ་བཏང་པ་དེ་དག་གིས་ང་ཚོ་ངོ་ཚ་གི་འདུག ༸རྒྱལ་བ་རིན་པོ་ཆེར་དགོངས་དག་ཞུ་གི་ཡོད། ཅེས་བརྗོད་མཁན་མང་པོ་ཡོང་གི་འདུག དེ་ནི་ང་ཚོའི་བདེན་པའི་ནུས་པ་གསལ་ཡོང་གི་ཡོད། ང་ཚོ་བོད་པ་དེ་དག་བོད་མིའི་གཏམ་དཔེར་ཡོད་པ་བཞིན། གནམ་གྱི་ས་བརྡུངས་པ་ཞེས་པ་ལྟར་བཅིངས་བཀྲོལ་གྱི་མིང་སྙན་པོ་ཞིག་གིས་འོག་ནས་དོན་དག་ཡང་སྙིང་བོད་ཀྱི་སྣོད་བཅུད་ཡོངས་རྫོགས་དབང་ཡོད། རྒྱ་མི་རིགས་རྒྱ་ནག་གི་རིང་གཞུང་ལ་སྤོབས་པ་ཡོད་པ་རེད། ང་ཚོ་བོད་པར་ཆ་བཞག་ནའང་བོད་རང་གི་རིག་གཞུང་ལ་ང་ཚོ་སྤོབས་པ་བྱེད་དགོས་པ་ཡིན། ལྷག་པར་དུ་ཡང་ནང་པ་སངས་རྒྱས་པའི་ཆོས་ཀྱི་ཐོག་ནས་ཆ་བཞག་ན་རྒྱ་ནག་ནང་པའི་ལུང་པ་རེད། རྒྱ་ནག་ནང་དུ་ནང་པའི་དགོན་པ་ཁྲི་ཕྲག་འབུམ་ཕྲག་ཡོད་པ་རེད། ནང་པའི་དགེ་སློང་མང་པོ་ཡོད་པ་རེད། བོད་ལ་ནང་ཆོས་མ་དར་གོང་ནས་རྒྱ་ནག་ནང་ལོ་སུམ་བརྒྱ་བཞི་བརྒྱའི་གོང་ནས་དར་བ་རེད། འོན་ཀྱང་བོད་ནང་མཁས་པ་ལེགས་བཤད་རྩོམ་མཁན་གང་འདྲ་བྱུང་བ་བཞིན་རྒྱ་ནག་ནང་ཧ་ཅང་དཀོན་པོ་རེད། དེ་རིང་ཁ་སང་རྒྱ་ནག་གི་མཁས་པ་འདྲ་ཐུག་སྟེ་སྐད་ཆ་ཤོད་སྐབས་ཁོ་ཚོ་ཤེས་ཚད་ཞེ་དྲག་སྐྱོ་བ་ཆགས་ཡོད། རྒྱ་ནག་བརྒྱུད་ནང་ཆོས་དར་བ་ཀོ་རི་ཡ་དང་ཉི་ཧོང་། ཝེ་ཏི་ནམ་རེེད། ཐེག་ཆེན་གྱི་ཆོས་གཅིག་པ་རེད། ངོས་རང་ལ་ཆ་བཞག་ན་དགེ་བཤེས་སློབ་གཉེར་རྩེར་སོན་པ་ཞིག་གི་མདུན་ལ་བསླེབས་ན་ངོས་རང་སྐྱོ་པོ་རེད། འོན་ངོས་ཀྱི་ཤེས་ཚད་འདིས་རྒྱ་ནག་ནས་ཡིན་པའི་ནང་པའི་མཁས་པ་ཡིན་ཟེར་མཁན་ཚོ་དང་བསྡུར་ན་སྐྱོ་པོ་རང་མི་འདུག བྱས་ཙང་ང་ཚོ་བོད་པ་ཚོ་བོད་ཚོ་བོད་པ་ཡིན་བསམ་པའི་འདུ་ཤེས་བཟུང་སྟེ་སྤོབས་པ་བྱེད་རྒྱུ་དེ་ཧ་ཅང་གལ་ཆེན་པོ་ཡིན། རྒྱ་ནག་གུང་ཁྲན་ཏང་གིས་བོད་ལ་དབང་བསྒྱུར་བྱས་ནས་ལོ་ངོ་དྲུག་ཅུ་ལྷག་ཙམ་འགྲོ་གི་ཡོད་པ་རེད། བོད་པའི་སྙིང་སྟོབས་དང་སེམས་ཤུགས་དེ་འཇམ་རྩབ་ཐབས་ཤེས་སྣ་ཚོགས་བྱས་པ་རེད་དེ་བོད་པའི་སེམས་ཤུགས་བཅག་ཐུབ་མེད། ཅེས་སོགས་དང་དེ་མིན་བོད་པའི་སྤྱི་ཚོགས་ནང་ཡ་རབས་སྤྱོད་བཟང་ཉམས་རྒུད་འགྲོ་བཞིན་པ་དེས་བོད་པའི་རིན་ཐང་ཅུང་ཉམས་འགྲོ་རྒྱུའི་ཉེན་ཁ་འདུག་པ
ར་གཟབ་གཟབ་བྱེད་དགོས་པ་དང་ཡུལ་པ་ཚོ་དང་འཆམ་མཐུན་བྱེད་དགོས་པ་སོགས་ཀྱི་བཀའ་སློབ་ཟབ་རྒྱས་ཕེབས་ཡོད། དེ་རྗེས་ར་བང་ལ་བོད་གཞུང་སློབ་གྲྭའི་སློབ་ཕྲུག་དང་གཞིས་མི་ཚོས་གཞས་སྣ་འཁྲབ་སྟོན་གྱིས་གཟིགས་འབུལ་ཞུས་རྗེས་ར་བང་ལ་ས་གནས་གྲོས་ཚོགས་ཀྱི་ཚོགས་གཙོས་ཐུགས་རྗེ་ཆེ་ཞུའི་གསུང་བཤད་གནང་སྟེ་ལྷན་ཚོགས་ཡོངས་སུ་ལེགས་གྲུབ་ཟིན་པ་བཅས། ཐེངས་འདི་ནི་༸གོང་ས་༸སྐྱབས་མགོན་ཆེན་པོ་མཆོག་ར་བང་ལ་ཀུན་ཕན་གླིང་བོད་མིའི་གཞིས་ཆགས་སུ་ཆིབས་སྒྱུར་བསྐྱངས་ཐེངས་ལྔ་པ་དེ་ཡིན་པ་དང་ཐེངས་འདིར་༸གོང་ས་མཆོག་གིས་ཆོས་འབྲེལ་དང་བཀའ་སློབ་ཞུ་བར་འབྲས་ལྗོངས་མངའ་སྡེའི་གྲོས་ཚོགས་ཀྱི་ཚོགས་གཙོ་མཆོག་དང་། མངའ་སྡེའི་བློན་ཆེན་ཁག་གཅིག་དང་དྲུང་ཆེ་ཆེ་མོ་སོགས་གནད་ཡོད་མི་སྣ་མང་དག་ཅིག་དང་བོད་མི་དང་ས་གནས་མི་དམངས་གྲངས་ ༣༠༠༠ བརྒལ་བ་བཅར་འདུག་ལ་འབྲས་ལྗོངས་གཞུང་ཕྱོགས་ནས་ཕེབས་བསུ་དང་ཕེབས་སྒྲིག་སོགས་ཧ་ཅང་གཟབ་རྒྱས་ཞུས་དང་ཞུ་བཞིན་པ་མ་ཟད་མི་མང་རྣམས་ནས་དོ་སྣང་ཆེན་པོ་བཀའ་ཆོས་དང་བཀའ་སློབ་ཞུ་བཞིན་འདུག་པ་བཅས།།
