༢༠༡༠ ཟླ་ ༡༡ ཚེས་ ༨ རེས་གཟའ་ཟླ་བ།
༄༅། །འདི་གར་སུད་སི་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༠ ནང་སུད་སི་བོད་རིགས་ཚོགས་པའི་ཟླ་རེའི་འཐུས་མི་ཚོགས་འདུའི་ནང་༸གོང་ས་མཆོག་གི་མཛད་འཕྲིན་དང་། བཙན་བྱོལ་བོད་གཞུང་གི་སྲིད་བྱུས་ལམ་སྟོན་དང་འབྲེལ་བོད་ནང་གི་གནས་སྟངས་ངོ་སྤྲོད་ཞུ་མུས་དང་། དེ་བཞིན་སུད་སི་དང་ལེཀ་ཌེན་སྤྲཡན་བོད་རིགས་ཚོགས་པའི་འཐུས་མི་གསར་འདེམས་རྣམས་ལ་རང་གཞུང་གི་དཔྱ་ཁྲལ་བསྡུ་ཕྱོགས་ལམ་སྟོན་རྣམས་བོད་ཇར་སྐད་གཉིས་ཐོག་ཕུལ་ཡོད། ཕྱི་ཚེས་ ༡༩ ཉིན་སུད་སི་སྐུ་ཚབ་དོན་གཅོད་མཆོག་གིས་རི་ཀོན་མཁན་པོ་ཕུན་ཚོགས་བཀྲིས་མཆོག་ཝིན་ཌ་ཏུར་སྨན་ཁང་ནང་དགོངས་པ་རྫོགས་པའི་གནས་ཚུལ་ཐོས་མ་ཐག་སྨན་ཁང་དུ་ཆེད་བཅར་སོགས་དང་།
ཕྱི་ཚེས་ ༢༠ ཉིན་མདོ་སྨད་རེབ་གོང་ནས་འགོ་འཛུགས་ཀྱིས་བོད་ཀྱི་ས་ཁུལ་གཞན་ཁག་ནང་སློབ་ཕྲུག་སྟོང་ཕྲག་བརྒལ་བས་རྒྱ་ནག་སྲིད་གཞུང་ནས་བོད་ཡིག་གི་སློབ་གཞི་རྣམས་རྒྱ་ཡིག་ཐོག་བསྒྱུར་རྒྱུའི་སྲིད་བྱུས་གཏན་འབེབས་དྲིལ་བསྒྲགས་བྱས་པ་དེར་ངོ་རྒོལ་གནང་བའི་གནས་ཚུལ་ཐོན་མ་ཐག་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་དང་། དཀྱིལ་ཤར་ཡུ་རོབ་རྒྱལ་ཁབ་ཀྱི་ཕྱི་སྲིད་བློན་ཆེན་གྱི་མཚན་ཐོག་མྱུར་འཕྲིན་བརྒྱུད་ཞུ་ཡིག་ཕུལ་བའི་ནང་དོན་གཙོ་བོ་ནི། བོད་ཀྱི་ས་ཁུལ་ཡོངས་རྫོགས་ནང་བོད་ཡིག་སློབ་ཁྲིད་གཙོ་བོ་དགོས་པ་དང་། ཁྲོམ་སྐོར་བའི་སློབ་ཕྲུག་དང་ཕ་མ་དགེ་རྒན་བཅས་ལ་དཀའ་ངལ་མི་ཡོང་བའི་ཆེད་རྒྱ་ནག་སྲིད་གཞུང་ནས་ཁས་ལེན་ཡོང་བའི་འབོད་སྐུལ། དེ་བཞིན་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་ཨེ་ཤི་ཡ་སྡེ་ཚན་འགན་འཛིན་མཆོག་ནས་རྒྱལ་ཚོགས་དང་འབྲེལ་ཡོད་ཞིབ་འཇུག་པར་མཁྱེན་རྟོགས་དང་ཞིབ་འཇུག་ཆེད་སྙན་སེང་དང་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་སྡེ་རྣམས་ལའང་རྒྱབ་སྐྱོར་ཡོང་བའི་འབོད་སྐུལ་ཞུས་ཡོད། དེ་བཞིན་འཇིགས་བྲལ་གློག་བརྙན་བཟོ་མཁན་དོན་གྲུབ་དབང་ཆེན་གྱི་བཟའ་ཟླ་ལྷ་མོ་མཚོ་ཡུ་རོབ་ནང་གཞུང་གི་མི་སྣ་དང་། ཆབ་སྲིད་པ། གཞུང་འབྲེལ་མ་ཡིན་པའི་ཚོགས་པ་སོགས་ལ་དོན་གྲུབ་དབང་ཆེན་གློད་བཀྲོལ་ཆེད་རྒྱབ་སྐྱོར་ཡོང་བའི་འབོད་སྐུལ་ཞུས་བར་ཕེབས་ཏེ་ཚེས་ ༢༠ ཉིན་རྒྱལ་ཚོགས་ཀྱི་མནར་གཅོད་དང་སྨྲ་བརྗོད་རང་དབང་ཞིབ་འཇུག་པ་ཁག་སོ་སོར་ཐུག་འཕྲད་ཀྱི་བསྟན་འཛིན་བསམ་འཕེལ་ལགས་མཉམ་བཅར་གྱིས་ཞུ་གཏུགས་བྱས་ཡོད།
ཚེས་ ༣༠ ཉིན་སུད་སི་དང་ལེཀ་ཌེན་སྤྲཡན་བོད་རིགས་མི་མང་ནས་རི་ཀོན་མཁན་པོ་ཕུན་ཚོགས་བཀྲིས་ཀྱི་འདས་མཆོད་ལ་ལས་བྱེད་བསྟན་འཛིན་བསམ་འཕེལ་ལགས་ཆེད་བཅར་དང་། ཨི་ཌ་ལིའི་ཏུས་ཀ་ནི་གྲོང་སྡེ་ཀ་ར་ནས་ཨེ་ཤི་ཡའི་རིག་གཞུང་འགྲེམས་སྟོན་གནང་ཡོད་པ་ལྟར་གྲོང་ཁྱེར་མི་ལན་ནང་ཡོད་བོད་ཁང་ནས་མཉམ་ཞུགས་ཀྱིས་བོད་ཀྱི་རིག་གཞུང་འགྲེམས་སྟོན་གནང་བར་སྐུ་ཚབ་དོན་གཅོད་མཆོག་ངོ་བཅར་གྱིས་རྒྱ་ནག་སྲིད་གཞུང་ནས་བོད་ཀྱི་རིག་གཞུང་རྩ་གཏོར་གཏོང་བཞིན་པར་སྲུང་སྐྱོབ་ཡོང་བའི་འབོད་སྐུལ་ཡང་ཞུས་ཡོད་པ་བཅས།།
