༢༠༡༠ ཟླ་ ༡༡ ཚེས་ ༢༥ རེས་གཟའ་ཕུར་བུ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༠༨ ལོར་བོད་ཁྱོན་ཡོངས་སུ་ཞི་རྒོལ་ཆེན་མོ་བྱུང་རྗེས་ཕྱི་ལོ་ ༢༠༠༨ ཟླ་ ༤ ཚེས་ ༡ ཉིན་པེ་ཅིང་དུ་རྒྱ་ནག་དབུས་གཞུང་སྤྱི་བདེ་ལས་ཁུངས་ནས་ལྷ་སའི་ ༣།༡༤ དོན་རྐྱེན་དང་འབྲེལ་བའི་མི་ཤི་རྨས་བྱུང་བ་སོགས་ཀྱི་སྐོར་གསར་འགོད་གསལ་བསྒྲགས་ཚོགས་འདུར་དོན་དངོས་མ་ཡིན་པའི་གནས་ཚུལ་མང་དག་ཅིག་གསར་འགོད་པ་ཚོར་དྲིལ་བསྒྲགས་རྫུན་མ་བྱས་ཡོད་པ་མ་ཟད། ལྷག་པར་དུ་བོད་མི་འདས་གྲོངས་སོང་བའི་ཐད། དྲག་ཆས་ཉེན་རྟོག་དམག་མིས་ལྷ་སའི་ནང་བོད་མི་ཞི་རྒོལ་བ་ཚོར་གང་བྱུང་མེ་མདའ་བརྒྱབ་སྟེ་དམར་གསོད་བཏང་བའི་དངོས་ཡོད་གནས་ཚུལ་རྣམས་འགེབས་ཐབས་བྱས་ཡོད། འོན་ཀྱང་ཁུངས་ལྡན་ཡིག་ཆ་འབྱོར་དོན་ལྟར་ན། ཕྱི་ལོ་ ༢༠༠༨ ལོའི་ཟླ་ ༣ པའི་ནང་ལྷ་སར་བྱུང་བའི་ཞི་རྒོལ་ཆེ་མོའི་སྐབས་གཤམ་གསལ་རྣམས་ལ་མེ་མདའ་བརྒྱབ་སྟེ་འདས་གྲོངས་སོང་བ་རྒྱ་ནག་གཞུང་གི་ཡིག་ཆའི་ནང་གསལ་ཡོད་པ་རེད།
༡ ལྷ་ས་ཀླུ་སྒུག་སྲང་ལམ་ ༦ ནང་གསེས་ ༤ ཁང་ཨང་ ༡ ནང་སྡོད་བདེ་འབྱུང་དང་།
༢ ལྷ་ས་ཀླུ་སྒུག་སྲང་ལམ་ ༢ པ་ཕྱི་སྒོ་ ༡༡ ནང་གསེས་ ༡ ནང་སྡོད་ལྷག་པ་ཚེ་རིང་།
༣ ལྷ་ས་བར་བསྐོར་བསྟན་རྒྱས་གླིང་སྒོ་རྟགས་ ༩ པའི་ནང་སྡོད་བསྟན་འཛིན་སྒྲོལ་དཀར།
༤ ལྷ་ས་དགའ་ལྡན་ཁང་གསར་ཕྱི་སྒོ་ ༡ ནང་གསེས་ ༡༠ པའི་སྒོ་རའི་ནང་སྡོད་སྤེན་ཕྲུག
༥ ལྷ་ས་གྲོང་ཁྱེར་རྒྱ་མཚོ་གྲོང་སྡེ་ཨུ་ཡོན་ལྷན་ཁང་ཙུའུ་དང་པོ་སྒོ་རྟགས་ ༤༣ ནང་སྡོད་བཀྲིས་ཚེ་རིང་།
༦ ལྷ་ས་གྲོང་ཁྱེར་ཁྲེན་ཀོང་ཆུས་འཛུགས་སྐྲུན་བདེ་འཁོད་ལས་གྲའི་ཡན་ལག་ཀུང་སི་ཨང་ལྔ་པའི་ནང་སྡོད་དབང་འདུས་དར་རྒྱས་སོགས་ལ་མེ་མདའ་བརྒྱབ་སྟེ་རྐྱེན་འདས་སུ་གྱུར་བའི་ར་འཕྲོད་གསལ་པོ་བྱས་ཡོད་པ་མ་ཟད། འདས་གྲོངས་སོང་བ་དེ་དག་ཀྱང་ངོ་རྒོལ་ནང་ཞུགས་མཁན་གྲས་ཡིན་པ་སོགས་ཁ་གསལ་འཁོད་ཡོད།
གོང་གསལ་མིང་གཞུང་བཏོན་པའི་རྐྱེན་འདས་སུ་གྱུར་བའི་བོད་མི་དེ་དག་ནི་བཙན་བྱོལ་བོད་གཞུང་ནས་སྔ་རྗེས་གསར་འགྱུར་ཐོག་གསལ་བསྒྲགས་བྱས་ཟིན་པའི་ཕྱི་ལོ་ ༢༠༠༨ ལོའི་ཞི་རྒོལ་ནང་ཞུགས་ཏེ་བོད་མི་འདས་གྲོངས་སོང་བའི་མིང་གཞུང་ཁོངས་བཏོན་ཟིན་པ་དང་གཅིག་མཐུན་བྱུང་ཡོད་པ་ལྟར། ཕྱི་ལོ་ ༢༠༠༨ ལོའི་ཟླ་ ༣ པའི་ནང་གི་ཞི་རྒོལ་སྐབས་རྒྱ་ནག་གཞུང་གིས་དྲག་ཆས་ཉེན་རྟོག་པས་མེ་མདའ་གང་བྱུང་བརྒྱབ་སྟེ་བོད་མི་ཞི་རྒོལ་བ་དམར་གསོད་བཏང་ཡོད་པའི་དངོས་ཡོད་གནས་ཚུལ་ཁག་རྒྱ་ནག་གཞུང་ནས་ཤེས་རྟོགས་ཡོད་བཞིན་དུ་དངོས་ཡོད་གནས་ཚུལ་སྦས་བསྐུངས་བྱས་ཏེ་རྒྱལ་སྤྱིའི་སྟེང་འཁྱོག་བཤད་ཁོ་ན་བྱས་ཡོད་པ་ར་འཕྲོད་གསལ་པོ་ཐུབ་ཡོད།།
