༢༠༡༠ ཟླ་ ༡༡ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༢༠ ནས་ ༢༣ བཅས་ཉིན་གྲངས་བཞིའི་རིང་རྒྱ་གར་གྱི་རྒྱལ་ས་ལྡི་ལི་གསར་པའི་ནང་རྟེན་གཞི་བྱས་པའི་ཨིན་ཌི་ཡ་ཧེ་བྷི་ཊེཊ་ཚོགས་ཁང་ཆེན་མོའི་ནང་སྲོལ་རྒྱུན་ནས་དར་བའི་ནང་བསམ་བློའི་ཚན་རིག་དང་དེང་རབས་ཚན་རིག་གཉིས་དབར་བགྲོ་གླེང་ཚོགས་འདུ་ཚོགས་ཡོད་པའི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཡོད། ཚོགས་འདུ་དེ་བཞིན་གོ་སྒྲིག་གནང་མཁན་རྒྱལ་ས་ལྡི་ལིའི་ནང་རྟེན་གཞི་བྱས་པའི་༸གོང་ས་༸སྐྱབས་མགོན་ཆེན་པོ་མཆོག་གི་ཀུན་ཕན་བདེ་རྩ་ཚོགས་པ་དང་ཝར་ཎ་བོད་ཀྱི་མཐོ་སློབ་ཁང། བྷེང་ལོར་གྲོང་ཁྱེར་ནང་རྟེན་གཞི་བྱས་པའི་རྒྱལ་ཡོངས་ཆེས་མཐོའི་ཤེས་ཡོན་སྟི་གནས་ཁང་བཅས་ཟུང་འབྲེལ་ཐོག་ཡིན་འདུག སེམས་དང་སྲོག་གི་བགྲོ་གླེང་ཚོགས་འདུ་རྒྱ་གར་ནང་ཐེངས་དང་པོ་ཚོགས་ཐུབ་པ་དེ་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་བཞེད་ལ་བརྟེན་ནས་བྱུང་བ་ཞིག་ཡིན་འདུག  དེ་སྔ་སེམས་དང་སྲོག་གི་བགྲོ་གླེང་སྐབས་གཙོ་བོ་ནང་པ་སངས་རྒྱས་པའི་ཆོས་ནས་གསུངས་པའི་སྒོམ་སྒྲུབ་ཉམས་ལེན་བརྒྱུད་ནང་སེམས་ཀྱི་རྣམ་གཞག་དང་དེང་དུས་ཚན་རིག་ནས་སེམས་ཁམས་རིག་པའི་རྣམ་གཞག་གི་གནད་དོན་ཐོག་བགྲོ་གླེང་མཛད་ཡོད། ཐེངས་འདིའི་སེམས་དང་སྲོག་གི་བགྲོ་གླེང་ཚོགས་འདུ་དེ་བཞིན་གཙོ་བོ་རྒྱ་གར་ནང་དར་བའི་རིག་བྱེད་གསང་བ་མཐར་པ་དང་གཅེར་བུ་བ། རྣལ་འབྱོར་བ་བཅས་ཀྱི་སྲོལ་རྒྱུན་ནང་གསུངས་པའི་ནང་སེམས་ཀྱི་རྣམ་གཞག་དང་དེང་དུས་ཚན་རིག་དབར་འབྲེལ་བའི་སྐོར་བགྲོ་གླེང་མཛད་ཡོད།
ཚོགས་ཐེངས་དང་པོའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། རྒྱ་གར་ནཱ་ལེནྜའི་སྲོལ་རྒྱུན་དང་དེ་བཞིན་རྒྱ་གར་ནང་དར་བའི་སྲོལ་རྒྱུན་གྱི་ལྟ་གྲུབ་གཞན་ཁག་གི་ནང་དངོས་ཡོད་ཀྱི་གནས་ཚུལ་ཇི་འདྲ་ཞིག་ཡིན་རུང་རྒྱུ་མཚན་དང་རིགས་ལམ་གཞི་ལ་བཞག་ནས་གཏན་ལ་ཕབ་དགོས་པ་གསུངས་ཡོད། དེར་བརྟེན་ཚན་རིག་ནི་ཆོས་རྩ་མེད་བཟོ་མཁན་གྱི་དུག་རེད་ཟེར་བ་དེ་ནོར་བ་ཡིན་པ་ར་སྤྲོད་གསལ་པོ་བྱུང་ཡོད། ཚན་རིག་དང་མཐུན་པར་རྒྱ་གར་སྲོལ་རྒྱུན་གྱི་ལྟ་གྲུབ་དེ་དག་ཀྱང་རྒྱུ་མཚན་དང་རིགས་ལམ་ལ་གཞི་བཅོལ་ནས་ཉམས་རྟོགས་རྒྱུད་ལ་སྐྱེས་ཏེ་འགྲོ་བ་སྤྱི་ལ་ཕུགས་རྒྱང་རིང་པོར་ཕན་པ་སྒྲུབ་ཀྱི་ཡོད། ཚོགས་འདུ་འདི་ལྟ་བུ་ཞིག་ཚོགས་ཏེ་ལྟ་གྲུབ་ཕན་ཚུན་ཡག་ཉེས་ཀྱི་སྐད་ཆ་མིན་པར་དངོས་ཡོད་གནས་ཚུལ་གང་ཡིན་ཤེས་ཐབས་བྱེད་རྒྱུ་ཡིན་པས་ཆོས་ལ་ཉེན་ཁ་གང་ཡང་མེད། མཚམས་རེ་ཚན་རིག་དང་འཕྲུལ་ཆས་དེ་དག་གཏོར་ཤིག་གཏོང་རྒྱུར་བེད་སྤྱོད་བྱེད་ཀྱི་ཡོད། དཔེར་ན།  རྡུལ་ཕྲན་མཚོན་ཆ་ལྟ་བུ་ཡིན། ཚན་རིག་དང་འཕྲུལ་ཆས་དེ་དག་བེད་སྤྱོད་ཡག་པོ་བཏང་ན་རང་གཞན་གཉིས་ཀྱི་བདེ་དོན་ལ་ཕན་པའི་ཞབས་འདེགས་རླབས་ཆེན་སྒྲུབ་ཐུབ། ཆོས་ཀྱི་ཐབས་ལམ་རྐྱང་པས་བྱམས་བརྩེ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་མི་ཐུབ་ཅེས་བཀའ་སློབ་སྩལ།