༢༠༡༠ ཟླ་ ༡༡ ཚེས་ ༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༢ ནས་ ༣ བར་ཉིན་གྲངས་གཉིས་རིང་བཞུགས་སྒར་ཕོ་བྲང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བགྲོ་གླེང་ཚོགས་ཡོད། དེ་ཡང་ཕྱི་ལོ་ ༡༩༧༠ དང་ ༡༩༨༠ ཙམ་ནས་བཞུགས་སྒར་དུ་ཡུན་རིང་གཏན་སྡོད་བྱེད་མྱོང་བའི་ནུབ་ཕྱོགས་རྒྱལ་ཁབ་འདྲ་མིན་ཁག་གི་མི་ཐོག་རྒན་རབས་པ་ཚོ་དང་དེ་དག་གི་མི་རབས་གཉིས་པ་དང་གསུམ་པ་བཅས་ཁྱོན་མི་གྲངས་ ༡༨༠ བརྒལ་བ་རྣམས་དུས་གཅིག་ཏུ་ལྷན་འཛོམས་གནང་སྟེ་བཞུགས་སྒར་ཕོ་བྲང་དུ་༸གོང་ས་མཆོག་གི་མཇལ་ཁ་ཞུས་པ་མ་ཟད། ཉིན་གཉིས་རིང་གི་བགྲོ་གླེང་ནང་གཙོ་བོ་མི་ཐོག་རྒན་རབས་དེ་དག་གི་མི་ཚེའི་གནས་བབ་དང་ལོ་རྒྱུས། མི་ཚེའི་ནང་ནང་ཆོས་ཉམས་ལེན་བྱས་པའི་ཕན་ཐོགས་དེ་བཞིན་སྤྱི་ཚོགས་ཀྱི་ཉམས་མྱོང་སོགས་ཀྱི་ཐད་མགོན་པོ་གང་ཉིད་མཆོག་ལ་རང་གི་དངོས་མྱོང་གང་བྱུང་བ་རྣམས་སྙན་སྒྲོན་དང་སྦྲགས་བགྲོ་གླེང་གནང་ཡོད། དེ་ཡང་ཉིན་དང་པོའི་བགྲོ་གླེང་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ནང་པའི་སངས་རྒྱས་པའི་ཆོས་ལུགས་ནང་འཇིག་རྟེན་བཀོད་པ་པོ་ཁས་མི་ལེན་པ་དང་བདག་མེད་པའི་ལྟ་བ་སོགས་གསུངས་ཀྱི་ཡོད་པས། མི་རང་ཉིད་ཀྱིས་འབད་བརྩོན་ལ་བརྟེན་ནས་ནང་སེམས་ལ་བསྒྱུར་བཅོས་གཏོང་ཐབས་གཙོ་བོ་གསུངས་ཡོད་པ་ལས་དད་པ་དང་ཡིད་ཆེས་གཙོ་བོ་གསུང་གི་མེད། དེ་བཞིན་ནུབ་ཕྱོགས་པའི་ཚན་རིག་པ་མང་པོ་ཞིག་ལའང་ཡེ་ཤུ་དང་ཇེའུ་སོགས་ཀྱི་ཆོས་ལུགས་ཀྱི་ཤུགས་རྐྱེན་དང་བག་ཆགས་ཡོད། ཚན་རིག་པས་ཕྱི་དངོས་པོར་བརྟག་དཔྱད་ཞིབ་འཇུག་བྱས་ཡོད་ཀྱང་ནང་སེམས་ལ་དོ་སྣང་དང་ཞིབ་འཇུག་དེ་ཙམ་བྱུང་མེད། འོན་ཀྱང་ཚན་རིག་དང་འཕྲུལ་ཆས་དར་རྒྱས་བྱུང་བར་བརྟེན་ཕྱི་དངོས་པོའི་ལོངས་སྤྱོད་ཀྱི་མཐུན་རྐྱེན་ཕུན་སུམ་ཚོགས་པོ་བསྐྲུན་ཡོད་སྟབས། བར་སྐབས་ཤིག་མི་མང་པོས་དེ་ལ་དོ་སྣང་ཤུགས་ཆེན་བྱེད་བཞིན་ཡོད། འོན་ཀྱང་དོན་ངོ་མའི་ཐོག་མིའི་སེམས་ཀྱི་བདེ་སྐྱིད་དང་ཞི་བདེ་སོགས་ཕྱི་དངོས་པོ་ཡར་རྒྱས་ལ་བརྟེན་ནས་ཡོང་ཐུབ་ཀྱི་མེད་པར་བརྟེན། དེང་སང་རིམ་བཞིན་ཤར་ཕྱོགས་པའི་ནང་སེམས་ཀྱི་བདེ་སྐྱིད་བསྐྲུན་ཐབས་ཀྱི་རིག་གཞུང་ལ་འཛམ་གླིང་ནས་དོ་སྣང་ཇི་ཆེར་འགྲོ་བཞིན་ཡོད། ཅེས་སོགས་ཀྱི་བཀའ་སློབ་སྩལ་ཡོད་པ་བཅས།།
