༢༠༡༠ ཟླ་བ་ ༡༡ ཚེས་ ༡༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༡༧ ཉིན་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་འདོན་སྤེལ་གནང་ཡོད། ཨ་རིའི་གཞུང་གིས་བོད་མི་རིགས་ཀྱི་ཐུན་མིན་ཆོས་དང། ལེགས་བྱང་། སྐད་ཡིག་སྲུང་སྐྱོབ་དང་འཕེལ་རྒྱས་གཏོང་རྒྱུ། གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་མུ་མཐུད་བྱེད་རྒྱུ་ཡིན་ཞེས་གསུངས་ཡོད།  ལོ་འཁོར་སྙན་ཐོ་དེའི་ནང་བོད་ནང་ཆོས་དད་རང་དབང་བཀག་སྡོམ་དང་། ཆོས་དད་རང་དབང་རྡོག་རོལ་གཏོང་བཞིན་པ་མ་ཟད། ཆོས་ལུགས་བརྗེ་བསྒྱུར་བྱེད་བཞིན་ཡོད་པས་ཨ་རིའི་གཞུང་གིས་བོད་ནང་ཆོས་དད་རང་དབང་རྒྱ་ཆེ་སྤེལ་རྒྱུའི་འབད་བརྩོན་བྱེད་ཀྱི་ཡིན་སྐོར་ཞིབ་ཕྲ་བཀོད་ཡོད། དེ་ཡང་སྙན་ཐོའི་ནང་འཁོད་དོན། བོད་རང་སྐྱོང་ལྗོངས་ཁུལ་དང་བོད་ཀྱི་ས་གནས་གཞན་ཁག་ཏུ་ཆོས་དད་ཐོག་ངྲག་གནོན་ཤུགས་ཆེ་བྱེད་བཞིན་ཡོད། ཕྱི་ལོ་ ༢༠༠༨ ལོར་བོད་ཀྱི་ས་ཁུལ་ཡོངས་ལ་ཞི་བའི་གྱེན་ལངས་རྒྱ་ཆེ་བྱུང་བ་ནས་བཟུང་རྒྱ་ནག་གཞུང་གིས་ཆོས་ཉམས་ལེན་དང་། དགོན་སྡེ་ཁག་དང་གཞན་ཆོས་སློབ་གཉེར་ཁང་བཅས་ཀྱི་ཉིན་རེའི་འཛིན་སྐྱོང་ཐོག་དམ་བསྒྲགས་ཇེ་ཆེར་གཏོང་བཞིན་ཡོད། དཔེར་ན། བོད་ནང་གི་དགེ་འདུན་པ་དང་བཙུན་མ་རྣམས་བཙན་དབང་གི་སྒོ་ནས་རྒྱལ་གཅེས་སློབ་གསོའི་ལས་འགུལ་ནང་ཞུགས་བཅུག་པ་མ་ཟད། རྒྱལ་གཅེས་སློབ་གསོའི་ཚོགས་ཐུན་སྐབས་བཙན་དབང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་རྒྱུ་དང་རྒྱ་ནག་དམར་ཤོག་ཚོགས་པའི་དབུ་ཁྲིད་དང་སྤྱི་ཚོགས་རིང་ལུགས་པའི་ལམ་ལུགས་ལ་བསྟོད་བསྔགས་བྱེད་དུ་འཇུག་གི་ཡོད། རྒྱལ་གཅེས་སློབ་གསོའི་ལས་འགུལ་སྤེལ་སྐབས་ཁས་མི་ལེན་མཁན་རྣམ་དགོན་པ་ནས་ཕྱིར་འབུད་བྱེད་ཀྱི་ཡོད་པར་བརྟེན། གྲྭ་བཙུན་རྣམས་སོསོའི་དགོན་སྡེ་ཁག་ནས་ཁ་བྲལ་དགོས་ཐུག་ཡོད། དེ་བཞིན་སྙན་ཐོའི་ནང་རྒྱ་ནག་གཞུང་གི་བོད་ཀྱི་སྲོལ་རྒྱུན་ཆོས་ལུགས་ཐོག་དབང་སྒྱུར་བྱས་པར་སྐྱོན་བརྗོད་བྱས་ཡོད་པ་མ་ཟད། རྒྱ་གཞུང་གི་ཆོས་དོན་ལས་ཁུངས་ནས་སྤྲུལ་སྐུའི་ཡང་སྲིད་ངོས་འཛིན་བྱེད་ཕྱོགས་ཐད་དབང་སྒྱུར་བྱས་པ་ལའང་སྐྱོན་བརྗོད་བྱས་ཡོད། ཨ་རིའི་རྒྱལ་ཡོངས་གྲོས་ཚོགས་ཀྱི་ཚོགས་མི་ལྷན་ཚོགས་ནས་ཕྱི་ལོ་ ༢༠༡༠ ཟླ་ ༩ ཚེས་ ༡ བར་རྒྱ་ནག་གི་ཆབ་སྲིད་བཙོན་པའི་གྲངས་ཐོ་ ༨༢༤ བཏོན་ཡོད་པ་ནས་ ༤༧༩ བོད་པའི་སྤྲུལ་སྐུ་དང་གྲྭ་བཙུན་རྣམས་ཡིན་འདུག སྙན་ཐོ་མཇུག་བསྡོམས་བྱེད་སྐབས་གྲྭ་བཙུན་མང་པོར་ཕྱི་ལོ་ ༢༠༠༨ ལོའི་ཞི་བའི་གྱེན་ལངས་ནང་མཉམ་ཞུགས་བྱས་པར་བཙོན་འཇུག་བྱས་ཡོད། དགེ་འདུན་པ་འགས་དགོན་པའི་ནང་གི་གནས་སྟངས་ངྲག་པོ་དང་ཆོས་དད་ཐོག་བཀག་སྡོམ་བྱས་པར་བརྟེན་རང་ཤི་ཡང་བརྒྱབ་ཡོད་སྐོར་བཏོན་ཡོད། གཞན་ཡང་ཨ་རི་གཞུང་གིས་རྒྱ་གཞུང་དང་ས་གནས་དཔོན་རིགས་ཚོར་ཆོས་དད་རང་དབང་ལ་གུས་བརྩི་བྱེད་རྒྱུ་དང། བོད་ཀྱི་ཐུན་མིན་ཆོས་ལུགས་སྲུང་སྐྱོབ་དང་འཕེལ་རྒྱས་ཡོང་ཆེད་སྐུལ་མ་ཡང་བྱས་ཡོད། ཨ་རིའི་ཕྱི་འབྲེལ་མི་སྣའི་སྙན་ཐོ་འགོད་སྐབས་བོད་རང་སྐྱོང་ལྗོང་གི་དཔོན་རིགས་མི་སྣའི་ཁོང་ཚོར་བོད་མི་རྣམས་དང་ལྷན་སྐད་ཆ་འངྲ་མིན་ཤོད་རྒྱུར་བཀག་འགོག་བྱས་ཡོད་སྐོར་བཀོད་ཡོད། དེ་བཞིན་ཨ་རིའི་གཞུང་ནས་རྒྱ་གཞུང་ལ་༸གོང་ས་མཆོག་དང་ཁོང་གི་སྐུ་ཚབ་ལྷན་གྲོས་མོལ་མིང་དོན་མཚུངས་པ་ཞིག་བྱེད་དགོས་པའི་འབོད་སྐུལ་མུ་མཐུད་བྱེད་བཞིན་ཡོད་སྐོར་སོགས་ཀྱང་བཀོད་ཡོད་པ་བཅས།།