༢༠༡༠ ཟླ་ ༡༡ ཚེས་ ༡༥་རེས་གཟའ་ཟླ་བ།
༄༅། །རྒྱལ་སྤྱིའི་བོད་དོན་རྒྱབ་སྐྱོར་ཚོགས་ཆེན་ཐེངས་དྲུག་པ་འཚོགས་དགོས་དོན་ནི་གྲོས་མོལ་གྱི་ལམ་ནས་བོད་ཀྱི་གནད་དོན་སེལ་ཐབས་གནང་བཞིན་པའི་ལས་རིམ་དང་།ད་ལྟའི་བོད་ནང་གི་གནས་སྟངས།འཛམ་གླིང་ཐོག་གཞུང་འཛིན་མ་ཡིན་པའི་བོད་དོན་རྒྱབ་སྐྱོར་ཚོགས་པ་དང་བོད་རིགས་ཚོགས་པ་རྣམས་ནས་རྒྱ་ནག་དང་བོད་ནང་གི་འགྱུར་བའི་འགྲོས་ལ་གཞིར་བཞག་སྟེ་ཐབས་ལམ་དང་ལས་གཞི་ཁག་ཤུགས་ཆེ་རུ་གཏོང་རྒྱུའི་ཐོག་གྲོས་བསྡུར་གནང་རྒྱུ་དེ་ཡིན།
ཐེངས་འདིའི་ཚོགས་ཆེན་ཐོག་ཕེབས་པའི་ཚོགས་བཅར་བ་རྣམས་ནས་གཤམ་འཁོད་ཐོག་ཐུགས་མཐུན་བྱུང་ཡོད་།
༡༽ ༸གོང་ས་ཏཱ་ལའི་བླ་མ་མཆོག་དང་བཙན་བྱོལ་བོད་གཞུང་ནི་བོད་མི་མང་གི་ཁྲིམས་མཐུན་གྱི་སྐུ་ཚབ་ཡིན་པར་ཡང་བསྐྱར་གསལ་བརྗོད་ཞུས།
༢༽བོད་ནང་དུ་ཡོད་པའི་བོད་མི་རྣམས་ཀྱིས་རྒྱ་ནག་གཞུང་གིས་སྲིད་བྱུས་དམ་བསྒྲགས་སུ་འགྲོ་བཞིན་ཡོད་པར་མ་འཛེམ་ནས་འགྱུར་བ་མེད་པའི་ཐག་གཅོད་་དང་འཚེ་མེད་ཞི་བའི་ལམ་ཁས་ལེན་གནང་བཞིན་པར་སྙིང་ཐག་པ་ནས་བསྔགས་བརྗོད་ཞུས།
༣༽བོད་མི་རྣམས་ནས་རང་ཉིད་ཀྱི་བདེ་སྡུག་དང་རེ་སྨོན་རྣམས་ཕྱི་ལོ་ ༢༠༠༨ ལོར་བོད་ཁྱོན་ཡོངས་སུ་མང་ཚོགས་ནས་སྙིང་སྟོབས་ཆེན་པོའི་ཐོག་ནས་ཁྲོམ་སྐོར་བརྒྱུད་བཏོན་པ་དེར་བསྐྱར་དུ་དྲན་གསོ་ཞུས།
༤༽པཎ་ཆེན་རིན་པོ་ཆེ་མཆོག་ས་གནས་གང་དུ་ཡོད་མིན་རྒྱ་ནག་གཞུང་ཕྱོགས་ནས་འཛམ་གླིང་ལ་གསལ་བསྒྲགས་བྱེད་དགོས་པ་དང་།པཎ་ཆེན་རིན་པོ་ཆེ་མཆོག་གཙོས་བོད་ནང་གི་ཆབ་སྲིད་བཙོན་པ་རྣམས་གློད་བཀྲོལ་དགོས་པའི་འབོད་བསྐུལ་གནང་།
༥༽ཚོགས་འདུའི་དབུ་འབྱེད་མཛད་སྒོའི་ཐོག་༸གོང་ས་མཆོག་གིས་བཀའ་སློབ་དང་བཀའ་བློན་ཁྲི་པ་མཆོག་གིས་གསུང་བཤད་གནང་བ་དེས་ཚོགས་བཅར་ཚང་མ་སེམས་ཤུགས་འཕར་བྱུང་བས་ཡི་རངས་ཞུས་པ་དང་། ཚོགས་ཆེན་འདི་བརྒྱུད་བཀའ་བློན་ཁྲི་པ་མཆོག་གིས་ལོ་མང་པོའི་རིང་དབུ་ཁྲིད་གནང་བ་དང་བོད་དོན་རྒྱབ་སྐྱོར་ཚོགས་པར་མཐུན་འགྱུར་གནང་བར་ཐུགས་རྗེ་ཆེ་ཞུས།
༦༽རྒྱ་གར་དང་རྒྱ་ནག་གི་འབྲེལ་ལམ་དེ་འགྱུར་བ་གང་འདྲ་འགྲོ་མིན་ལ་མ་ལྟོས་པར་རྒྱ་གར་གྱིས་བོད་ཀྱི་རེ་འདོད་སྒྲུབ་རྒྱུར་རྒྱབ་སྐྱོར་མུ་མཐུད་གནང་རྒྱུ་ཡིན་པའི་སྐོར་སྲིད་བློན་གཞོན་པ་ཟུར་པ་ཨ་ཌེ་ཝ་ནི་མཆོག་ནས་གསུངས་གནང་བར་དགའ་བསུ་ཞུས།
༧༽ རྒྱ་གར་གཞུང་མང་གཉིས་ནས་བོད་མི་མང་ལ་ཁྱད་དུ་འཕགས་པའི་རྒྱབ་སྐྱོར་མུ་མཐུད་གནང་བར་བསྔགས་བརྗོད་ཞུས།དེ་འདྲ་བའི་རྒྱབ་སྐྱོར་གྱིས་བོད་མི་རིགས་ཀྱི་ངོ་བོ་བཙན་བྱོལ་སྤྱི་ཚོགས་ནང་སྲུང་སྐྱོབ་དང་གོང་འཕེལ་གཏོང་རྒྱུའི་གཞི་རྩ་བརྟན་པོ་བཙུགས་ཐུབ་ཡོད་།
༨༽ང་ཚོ་ཚང་མ་མཉམ་རུབ་ཐོག་ནས་རྒྱལ་སྤྱིའི་རྒྱབ་སྐྱོར་ཕྱོགས་གཅིག་ལ་སྒྲིལ་ཏེ་མཉམ་འབྲེལ་རྒྱལ་ཚོགས་ཀྱི་རང་ཐག་རང་བཅོད་ཀྱི་ཐོབ་ཐང་སྤྲད་པ་གཞིར་བཟུང་བོད་མི་མང་གི་དཀའ་ངལ་སེལ་བ་དང་བོད་དོན་ལ་ཆབ་སྲིད་ཀྱི་ཐབས་ལམ་ཡོང་བར་འབོད་སྐུལ་ཞུས།
༩༽ད་ཐེངས་ཚོགས་ཆེན་ཐོག་རྒྱ་མི་རིགས་ཀྱི་ཚོགས་བཅར་བ་མང་དུ་ཕྱིན་པར་དགའ་བསུ་ཞུས་པ་དང་། དེས་རྒྱ་རིགས་ནང་བོད་མི་མང་གི་དངོས་ཡོད་གནས་ཚུལ་ལ་རྒྱབ་སྐྱོར་དང་གོ་རྟོགས་ཇེ་ཆེར་སོང་ཡོད་པ་དང་བོད་ཀྱི་མ་འོངས་པའི་དཀའ་ངལ་སེལ་ཐབས་ལ་རྒྱ་རིགས་ཀྱི་ངོས་ནས་ལས་འགན་བཞེས་གནང་རྒྱུ་ཡིན་པར་ངོས་འཛིན་ཞུས།
༡༠༽ལྷོ་ཤར་ཨེ་ཤི་ཡའི་ནང་ནས་ཚོགས་བཅར་བ་སྐུ་ཚབ་དངོས་གསལ་གྱི་མང་དུ་ཕྱིན་ཡོད་པར་བསྔགས་བརྗོད་ཞུས།
༡༡༽ རང་དབང་དུ་ཡོད་པའི་བོད་མི་རྣམས་ནས་མང་གཙོའི་ལམ་ལུགས་བརྒྱུད་བཀའ་བློན་ཁྲི་པ་དང་སྤྱི་འཐུས་ཀྱི་འོས་བསྡུའི་ལས་འགུལ་ལ་ཞུགས་བཞིན་པར་བསྔགས་བརྗོད་ཞུས།
༡༢༽ རྒྱལ་སྤྱིའི་གྲོས་ཚོགས་ཀྱི་བོད་དོན་འབྲེལ་མཐུད་ཚོགས་པས་བལ་ཡུལ་ནང་འོས་བསྡུའི་སྐབས་རྒྱལ་སྤྱིའི་ལྟ་རྟོག་བྱེད་མཁན་གདན་ཞུ་བྱ་རྒྱུའི་ལས་འགུལ་སྤེལ་བ་ལ་རྒྱབ་སྐྱོར་ཞུས་པ་དང་། ཕྱི་ལོ་ ༢༠༡༠ ཟླ་ ༡༠ ནང་བལ་ཡུལ་དུ་བོད་མི་རྣམས་ཀྱིས་འོས་བསྡུ་བྱེད་སྐབས་བལ་ཡུལ་གཞུང་གིས་ཐེ་བྱུས་བྱས་པ་དེར་བློ་འཚབ་ཡོད། ང་ཚོས་བལ་གཞུང་ནས་བོད་མི་རྣམས་ཀྱིས་མང་གཙོའི་ལམ་ནས་མཉམ་ཞུགས་བྱས་པ་དེར་གུས་བརྩི་ཡོང་བའི་འབོད་སྐུལ་ཞུས།
༡༣༽བལ་ཡུལ་གཞུང་དང་མི་མང་རྣམས་ནས་ད་བར་བལ་ཡུལ་ནང་གནས་སྡོད་བོད་མི་རྣམས་ཀྱི་བདེ་རྩའི་ཆེད་རྒྱབ་སྐྱོར་དང་གདུང་སེམས་མཉམ་སྐྱེ་གནང་བར་བསྔགས་བརྗོད་ཞུ་རྒྱུ་དང་འབྲེལ་ཉེ་དུས་བལ་ཡུལ་གཞུང་ཕྱོགས་ནས་བོད་མི་སྐྱབས་བཅོལ་བའི་ཐོག་འཛིན་པའི་ལྟ་བར་འགྱུར་བ་འགྲོ་བཞིན་པར་བློ་འཚབ་ཆེན་པོ་ཞུས།
༡༤༽རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་པར་ང་ཚོས་སྐྱོན་བརྗོད་བྱས་པ་དང་ཆབས་ཅིག་རྒྱ་གཞུང་ནས་རྒྱ་ནག་གཞུང་གི་རྩ་ཁྲིམས་ནང་ཡོད་པའི་ཐོབ་ཐང་རྩིས་མེད་བཏང་བ་དང་། བོད་མིའི་ཆོས་ལུགས་དང་དགོན་སྡེའི་འཛིན་སྐྱོང་ཐད་རྒྱལ་སྤྱྲིའི་ཆིངས་ཡིག་གཞི་བཟུང་འགན་འཁུར་མ་འཁྱེར་བ་དང་། བོད་མིས་བོད་ཡིག་དེ་བཞིན་ཤེས་ཡོན་ལས་རིམ་ནང་བེད་སྦྱོད་བྱེད་རྒྱུའི་ཐོབ་ཐང་ལ་རྡོག་རོལ་བཏང་འདུགརྒྱལ་སྦྱིའི་བོད་དོན་རྒྱབ་སྐྱོར་ཚོགས་པས་གནས་སྟངས་དེར་ཞིབ་ཚགས་པོས་དོ་སྣང་བྱེད་རྒྱུ་དང་། རྒྱ་གཞུང་ནས་བོད་མིའི་ཐོབ་ཐང་དེ་དག་ལ་གུས་བརྩི་ཞུས་དགོས་པའི་འོས་འབབ་ཀྱི་ལས་འགུལ་སྤེལ་རྒྱུ། རྒྱ་ནག་མི་མང་སྤྱི་མཐུན་རྒྱལ་ཁབ་ནས་སེམས་ངན་བཅངས་ཏེ་བོད་ནང་ལ་གནོད་གཞིའི་འཛུགས་སྐྲུན་གྱི་ལས་གཞི་སྤེལ་བ་དེས་བོད་ཀྱི་ཁོར་ཡུག་ཙམ་མ་ཟད། འཛམ་གླིང་གི་ས་གནས་ཚང་མར་གནོད་སྐྱོན་བཟོ་གི་ཡོད་པས་དེ་དག་མཚམས་འཇོག་དགོས་པའི་རྒྱ་གཞུང་ལ་གསལ་སྟོན་བྱ་རྒྱུ་ཞུས།
༡༥༽བོད་ཀྱི་ཁོར་ཡུག་སྲུང་སྐྱོབ་བྱ་རྒྱུའི་ལས་གཞི་དེ་མ་འོངས་པར་བོད་དོན་རྒྱབ་སྐྱོར་ཚོགས་པའི་ལས་གཞི་ནང་གལ་གནད་ཆེ་ཤོས་ཀྱི་གྲས་སུ་བརྩི་རྒྱུ་ཞུས།
༡༦༽ཚོགས་ཆེན་ཐོག་མཉམ་ཞུགས་གནང་མཁན་གྱི་ཚོགས་བཅར་བ་ཚོས་སོ་སོའི་གཞུང་ཙམ་མ་ཟད།མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་པ་གཞན་ཁག་ནས་༸གོང་ས་མཆོག་དང་བཙན་བྱོལ་བོད་གཞུང་བོད་མི་མང་གི་ཁྲིམས་མཐུན་གྱི་སྐུ་ཚབ་ཡིན་པར་ངོས་འཛིན་བྱ་རྒྱུའི་འབོད་སྐུལ་ཞུ་རྒྱུ་མ་ཟད། ཁ་ཡོད་ལག་ཡོད་ཀྱི་བོད་ནང་ཆབ་སྲིད་ཀྱི་དཀའ་ངལ་རྣམས་སེལ་རྒྱུའི་ཐོག་ལས་འགུལ་སྤེལ་དགོས་པའི་འབོད་སྐུལ་བྱ་རྒྱུ། དེ་བཞིན་ཡུ་རོབ་སྤྱི་མཐུན་གྱི་གྲོས་ཚོགས་གཙོས་གཞུང་དང་གྲོས་ཚོགས་ཁག་ནས་དེ་སྔོན་བོད་ལ་རྒྱབ་སྐྱོར་བྱ་རྒྱུའི་ཁས་ལེན་རྣམས་སྒྲུབ་ཐབས་སུ་ནུས་ལྡན་གྱི་གོམ་སྟབས་སྤོ་རོགས་ཞེས་སྐུལ་མ་གཏོང་རྒྱུ་ཞུས།
༡༧༽སུ་རཇ་ཀུན་ཌ་རུ་བཞག་པའི་བོད་དོན་རྒྱབ་སྐྱོར་ཚོགས་པའི་ལག་བསྟར་འཆར་གཞི་དེ་དག་ལ་ང་ཚོ་ཐུན་མོང་ནས་མོས་མཐུན་ཡོད། ཅེས་བཀོད་ཡོད།
གོང་གསལ་རྣམས་དབྱིན་ཡིག་ཐོག་ཡོད་པ་ནས་བོད་བསྒྱུར་ཞུས་ཏེ་བཀོད་ཡོད་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོང་བ་ཞུ།
