༢༠༡༠ ཟླ་ ༡༡ ཚེས་ ༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༦ ཉིན་ཕྱི་དྲིལ་ཟུང་དྲུང་རྡོ་ཐུབ་སྒོ་ནུབ་ཚེ་དབང་ནོར་བུ་ལགས་བོད་གཞུང་བདེ་ལེགས་སྨན་ཁང་དུ་གློ་བུར་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བརྟེན། ཕྱི་དྲོ་ཆུ་ཚོད་ ༣།༠༠ ཐོག་ལས་བྱེད་གསོལ་ཐབ་ཡང་སྟེང་གི་ཚོགས་ཁང་དུ་སྲི་ཞུ་བ་རྣམས་ཚང་འཛོམས་ཀྱིས་ཐོག་མར་ཆོས་རིག་བཀའ་བློན་མཆོག་གིས་དམ་པ་ཁོང་གི་ལོ་རྒྱུས་མདོ་བསྡུས་སྒྲོགས་སྦྱང་གནང་རྗེས་སྲི་ཞུ་བ་རྣམས་ནས་ཁོང་ལ་མྱ་ངན་གུས་འདུད་མཚོན་ཆེད་དབུས་ལས་ཁུངས་ཁག་སྒོ་བརྒྱབ་སྟེ་ཆུ་ཚོད་གཅིག་རིང་སྨོན་ལམ་གསུང་འདོན་གནང་ཡོད། དེ་ཡང་སྐུ་གཤེགས་ཚེ་དབང་ནོར་བུ་ལགས་ཀྱི་ལོ་རྒྱུས་སྙིང་བསྡུས་ནི། དམ་པ་དེ་ཉིད་འབྲུག་བོད་སྒར་གཞིས་ཆགས་སུ་ཕ་དབང་འདུས་ཚེ་རིང་དང་། མ་བདེ་ཆེན་སྒྲོལ་མ་གཉིས་ཀྱི་ཕྲུ་གུར་ཕྱི་ལོ་ ༡༩༧༣ ལོར་སྐྱེས། ཕྱི་ལོ་ ༡༩༩༢ རྡ་སྟེང་བོད་ཁྱིམ་ནས་གཞི་རིམ་འཛིན་གྲྭ་བཅུ་གཉིས་ཐོན་པ་དང་ཕྱི་ལོ་ ༡༩༩༦ ཅན་ལྡི་སྒར་མཐོ་སློབ་ནས་འཛིན་གྲྭ་བཅོ་ལྔ་ཐོན་རྗེས་ཕྱི་ལོ་ ༡༩༩༨ བར་བོད་གཞུང་དབུས་འཕྲོད་བསྟེན་ལས་ཁུངས་སུ་རང་ཁོངས་ལས་བྱེད་གནང་བ་དང་། ཕྱི་ལོ་ ༢༠༠༡ ནས་དྲུང་ལས་ཀྱི་གནས་རིམ་ཐོག་ཕྱི་དྲིལ་ལས་ཁུངས་སུ་ཟླ་དྲུག་ཚོད་ལྟར་བསྐོ་གཞག་དང་། ཕྱི་ལོ་ ༢༠༠༣ ནས་དྲུང་གཞོན་གནས་རིམ་དུ་གནས་སྤར་དང་། ཕྱི་ལོ་ ༢༠༡༠ ཟླ་ ༨ ནས་ཟུང་དྲུང་གནས་རིམ་དུ་གནས་སྤར་གྱིས་ལས་འགན་གནང་མུས་ཀྱིས་ལོ་ངོ་ ༡༢ རིང་རང་གཞུང་ལ་སྲི་ཞུའི་ཞབས་འདེགས་ཞུས་ཡོད། ཚེ་དབང་ནོར་བུ་ལགས་དམ་པ་དེ་ནི་ཤེས་འཇོན་གཉིས་ལྡན་གྱི་སྲི་ཞུ་བ་ཞིག་ཡིན། ཁོང་ནི་ལོ་ངོ་བཅུ་ལྷག་དབྱིན་བོད་གཉིས་ཀྱི་ཕབ་སྒྱུར་ལས་རིགས་ནང་ཞབས་ཞུའི་ཉམས་མྱོང་ཕུན་སུམ་ཚོགས་པའི་སྲི་ཞུ་བ་ཞིག་ཡིན། འོན་ཀྱང་སྟབས་མ་ལེགས་པར་ཡིད་སྐྱོ་དགོས་པ་ཞིག་ལ་ཕྱིི་ལོ་ ༢༠༡༠ ཟླ་ ༡༡ ཚེས་ ༦ ཉིན་གྱི་ཐོ་རེངས་གློ་བུར་དུ་འདས་གྲོངས་སུ་གྱུར་ཡོད་པ་བཅས།
