༢༠༡༠ ཟླ་ ༡༡ ཚེས་ ༢༢ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ། ཉེ་ཆར་ལྷོ་ཁ་ས་ཁུལ་འབྲིང་རིམ་མི་དམངས་ཁྲིམས་ཁང་ནས་ཆབ་སྲིད་དོགས་གཞིའི་འོག་བསོད་ནམས་བག་གྲོ་ལགས་དང་བཀྲིས་སྟོབས་ལགས་ཕྱི་ལོ་ ༢༠༠༩ ལོ་དཀྱིལ་དུ་གློ་བུར་དུ་ལྷོ་ཁ་ས་ཁུལ་འབྲེལ་ཡོད་སྤྱི་བདེ་ཚན་པས་འཛིན་བཟུང་བྱས་ཏེ་ཕྱི་ལོ་ ༢༠༡༠ ཟླ་ ༡༠ པའི་ནང་ལྷོ་ཁ་ས་ཁུལ་འབྲིང་རིམ་མི་དམངས་ཁྲིམས་ཁང་ཟེར་བའི་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཏང་བའི་ཉེས་མིང་འོག་བསོད་ནམས་བག་གྲོར་དུས་བཀག་བཙོན་འཇུག་ལོ་ ༡༥ དང་། བཀྲིས་སྟོབས་རྒྱལ་ལ་དུས་བཀག་བཙོན་འཇུག་ལོ་ ༥ ཡི་ཁྲིམས་ཐག་བཅད་དེ་ལྷ་ས་གྲོང་ཁྱེར་ཁོངས་ཀྱི་བཙོན་ཁང་ཞིག་ཏུ་སྤོ་སྐྱེལ་བྱས་ཡོད་འདུག
དེ་ཡང་བསོད་ནམས་བག་གྲོ་ལགས་ནི། ༡༩༦༥ ལོར་མཚོ་སྣ་རྫོང་སྦྱོང་ར་ཤང་ཁོངས་སུ་སྐྱེས་པ་དང་། རྫོང་སློབ་འབྲིང་ཐོན་རྗེས་ ༡༩༨༢ ལོ་ཙམ་ལ་གུང་ཁྲན་ཏང་ནང་ཞུགས་པའི་ཏང་མི་ཞིག་ཡིན་པ་མ་ཟད། སྒེར་གྱི་ཚོང་གཉེར་བྱས་ཏེ་སྤྱི་ཚོགས་སྟེང་མང་ཚོགས་སྐྱོ་པོ་ཚོར་སྨན་བཅོས་རོགས་སྐྱོར་དང་། དགོན་པ་ཞིག་གསོ། བུ་ཕྲུག་ཚོའི་ཤེས་ཡོན་སླད་ས་གནས་སློབ་ཕྲུག་ལ་སློབ་ཡོན་དང་ཟས་གོས་སོགས་ཀྱི་ཐད་རོགས་རམ་གང་ལེགས་གནང་མཁན་གྱི་ཚོང་པ་དྲག་གྲས་ཤིག་ཡིན་པར་བརྟེན་ས་གནས་ཀྱི་ཚན་པ་ཁག་གཅིག་ནས་ཁོང་ལ་སྔོན་ཐོན་གྱི་ཞབས་ཞུ་བའི་བྱ་དགའ་དེ་འདྲའང་སྤྲད་མྱོང་ཡོད་པ་རེད། དེ་བཞིན་བཀྲིས་སྟོབས་རྒྱལ་ནི། ད་ལྟ་རང་ལོ་ ༣༠ ཙམ་དུ་སོན་པ་དང་། མཚོ་སྣ་རྫོང་སྦྱོར་ར་ཤང་ཁོངས་ནས་ཡིན་ཅིང་། སྒེར་གཉེར་ཚོང་པ་ཞིག་ཀྱང་རེད་འདུག ལྷོ་ཁ་ས་ཁུལ་མཚོ་སྣ་རྫོང་ནི་རྒྱ་གར་དང་བོད་ཀྱི་ས་མཚམས་ཀྱི་ས་ཁུལ་ཞིག་ཡིན་ཅིང་། རྒྱ་ནག་གཞུང་ནས་ཆབ་སྲིད་ཐོག་དམིགས་བསལ་གྱི་ས་གནས་དེར་སློབ་གསོ་དང་དམ་བསྒྲགས་ཤུགས་ཆེ་བྱེད་ཡུལ་ཞིག་ཡིན་འདུག
