༢༠༡༠ ཟླ་ ༡༡ ཚེས་ ༡ རེས་གཟའ་ཟླ་བ།
༅༅། །ཕྱི་ལོ་ ༢༠༡༠ ཟླ༌ ༡༠ ཚེས་ ༢༩ ནས་བཟུང་ཉིན་གསུམ་རིང་ཨི་ཊ་ལིའི་མངའ་སྡེ་ཊོ་སི་ཀ་ནིའི་ (Tuscany) གྲོང་ཁྱེར་ཀ་རཱ་རའི་ནང་ (Carrara) ཀ་རཱ་རའི་གྲོང་ཁྱེར་སྲིད་གཞུང་གིས་གོ་སྒྲིག་གནང་བའི་ཨེ་ཤི་ཡའི་རིག་གཞུང་འགྲེམས་སྟོན་ཚོགས་སྐབས་སུད་སི་བོད་གཞུང་སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས་ཆེད་ཕེབས་ཀྱིས་གསུང་བཤད་གནང་དོན། བོད་ནང་རྒྱ་ནག་གཞུང་གིས་བོད་ཀྱི་རིག་གཞུང་རྩ་གཏོར་གཏོང་བཞིན་ཡོད་པས་ང་ཚོའི་རིག་གཞུང་སྲུང་སྐྱོབ་དང་བདག་གཅེས་བྱེད་རྒྱུར་རྒྱབ་སྐྱོར་གནང་རོགས་གནང། འདིར་འགྲེམས་སྟོན་བྱ་རྒྱུའི་བོད་ཀྱི་གནའ་རབས་ཀྱི་རིག་གཞུང་དེ་བཙན་བྱོལ་དུ་འཛིན་སྐྱོང་དར་སྤེལ་བྱེད་བཞིན་ཡོད་ནའང་བོད་ནང་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་རྩ་གཏོར་གཏོང་བཞིན་ཡོད།

བྱྱམས་པ་དང་བརྩེ་བར་གཞི་བཅོལ་བའི་རྒྱལ་ཁབ་འདྲ་མིན་བཅུ་ཙམ་གྱི་ནང་པ་ཚོ་ཐུན་མོང་གིས་རིག་གཞུང་འགྲེམས་སྟོན་ཚོགས་པའི་སྐབས་འདིར་ང་ལ་གཏམ་བཤད་བྱ་རྒྱུའི་གོ་སྐབས་གནང་བ་ཆེ་མཐོང་ཐོབ་བྱུང་ཞེས་གསུངས། འགྲེམས་སྟོན་སྐབས་དམིགས་བསལ་མཛད་སྒོ་ཞིག་གོ་སྒྲིག་ཐོག་ཀ་རཱ་རའི་གྲོང་ཁྱེར་སྤྱི་ཁྱབ་པ་སྐུ་ཞབས་ཨེན་ཇོ་ལོ་ཛུ་བྷ་ནི་མཆོག་ཆེད་ཕེབས་ཀྱིས་༸གོང་ས་མཆོག་གི་སྐུ་ཚབ་མཆོག་ལ་འཚམས་འདྲི་ཞུས་པ་མ་ཟད། དྲན་རྟེན་གྱི་ཚུལ་དུ་རྡོ་ཀ་མ་རུ་པའི་སྡེར་མ་ཞིག་ཕྱག་རྟགས་སུ་ཕུལ་ཡོད། བོད་པའི་འགྲེམས་སྟོན་དེ་ནི་ཨི་ཊ་ལི་རྒྱལ་ས་མི་ལཱན་ (Milan) དུ་རྟེན་གཞི་བྱས་པའི་བོད་ཀྱི་རིག་གཞུང་ཁང་པའི་(Tibet Culture House) སྐུ་ཞབས་རྟ་མགྲིན་ཆོས་འཕེལ་ལགས་ཀྱིས་གོ་སྒྲིག་ཞུས་པ་ཞིག་ཡིན། ཨེ་ཤི་ཡའི་རིག་གཞུང་འགྲེམས་སྟོན་ནང་མཉམ་ཞུགས་གནང་མཁན་བོད་དང། རྒྱ་གར། རྒྱ་ནག ཉི་ཧོང། ཐ་ཡེ་ལན་ཌི། ཨིན་ཌོན་ཨེ་ཤི་ཡ། ཕི་ལི་པིན། ཀོ་རི་ཡ། ཝེ་ཏི་ནམ་བཅས་ཡིན།།