༢༠༡༠ ཟླ་ ༡༡ ཚེས་ ༡༩ རེས་གཟའ་པ་སངས།

༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༡༩ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགྱུར་བརྒྱུད་ལམ་སི་ཨེན་ཨེན་ཨ་ཡི་བྷི་ཨེན་(CNN/IBN)གྱི་གསར་འགོད་པ་ཀཱ་རན་ཐཱ་པཱར་(Karan Thapar) ལགས་ཀྱིས་ཆེད་དོན་དྲི་བར་བཀའ་ལན་མཛད་ཡོད། དེ་ཡང་གསར་འགོད་པ་ཀཱ་རན་ཐ་པར་གྱིས་བོད་མཚོ་སྔོན་ཞིང་ཆེན་ཁུལ་དུ་བོད་ཡིག་གི་ཚབ་ཏུ་རྒྱ་ཡིག་སློབ་ཁྲིད་བྱེད་རྒྱུའི་རྒྱ་ནག་གཞུང་གི་སྲིད་བྱུས་སྐོར་ལ་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ཕྱི་ལོ་ ༡༩༨༦ ཙམ་ལ་པཎ་ཆེན་སྐུ་ཕྲེང་བཅུ་པ་མཆོག་དང། ང་ཕོད་ངག་དབང་འཇིགས་མེད། དེ་བཞིན་བོད་རང་སྐྱོང་ལྗོངས་ཀྱི་གནད་ཡོད་མི་སྣ་བཅས་ལྷན་ཚོགས་ཀྱིས་བོད་ཡིག་དེ་གཞུང་འབྲེལ་གྱི་སྐད་ཡིག་ཅིག་ཏུ་བཟོ་རྒྱུའི་ཐག་གཅོད་གནང་ཡོད། ཐག་གཅོད་དེ་ལ་བརྟེན་ནས་བོད་ཀྱི་གནའ་རབས་དཔེ་དེབ་ཁ་ཤས་བསྐྱར་གསོ་བྱེད་རྒྱུར་བློ་སྤོབས་གོང་འཕེལ་ཕྱིན་ཡོད། འོན་ཀྱང་ཁྲན་ཀུན་ཡུན་བོད་རང་སྐྱོང་ལྗོངས་ཀྱི་འགོ་ཁྲིད་ཆགས་རྗེས་ལས་རིགས་དེ་དག་མཚམས་འཇོག་བྱེད་དགོས་བྱུང་ཡོད་པ་མ་ཟད། ཁྲན་གྱིས་བོད་བརྒྱུད་ནང་བསྟན་དེ་ཉེན་ཁ་ཞིག་རེད་ཅེས་བཤད་ཡོད། ཉེ་ཆར་ལྷ་སར་ཡོད་པའི་བོད་ལྗོངས་སློབ་གྲྭ་ཆེན་མོའི་ལས་བྱེད་པ་ཁག་གཅིག་དང་ངོས་ཐུག་འཕྲད་སྐབས་ཁོང་ཚོས་ངོས་ལ་ཁྲན་ཀུན་ཡུན་འགོ་ཁྲིད་དུ་བསྐོ་གཞག་བྱས་པ་ནས་བཟུང་ཡིག་སྒྱུར་ཆ་ཚང་རྒྱ་ཡིག་གི་དེབ་ནས་མ་གཏོགས་བོད་ཡིག་ནས་བྱེད་བཅུག་མེད། དེ་བཞིན་བོད་རིགས་གཞན་ཁག་གཅིག་དང་ལྷན་ཐུག་འཕྲད་སྐབས་སུའང་ཁོང་ཚོས་དེང་སྐབས་བོད་ནང་རིག་གནས་གསར་བརྗེའི་ཆ་ཤས་ལག་བསྟར་བྱེད་བཞིན་འདུག དེ་ལྟར་བྱས་ཚེ་བོད་པའི་སྐད་ཡིག་དེ་གང་མྱུར་ཤུལ་མེད་དུ་འགྲོ་རྒྱུའི་ཉེན་ཁ་ཡོད་ལུགས་བརྗོད་བྱུང། ཞེས་བཀའ་ལན་སྩལ། དེ་ནས་ཐཱ་པཱར་ལགས་ཀྱིས་ཉེ་ཆར་ཕྱི་ཟླ་ ༡༠ པའི་ཟླ་མཇུག་ཏུ་རྒྱ་གཞུང་གི་བོད་པའི་དགོན་སྡེ་ཁག་ལ་དོ་དམ་བྱེད་དགོས་པའི་གསལ་བསྒྲགས་སྤེལ་ཏེ་བོད་བརྒྱུད་ནང་བསྟན་དགོན་པ་དང་གྲྭ་བཙུན་རྣམས་ནས་ཕྱི་མི་དང་འབྲེལ་བ་བྱེད་རྒྱུར་བཀག་འགོག་བྱེད་འགོ་བཙུགས་པའི་སྐོར་ལ་དྲི་བ་ཕུལ་བར་༸གོང་ས་མཆོག་གིས་བཀའ་ལན་སྩལ་དོན། ངོས་ཀྱིས་གོ་ཐོས་སུ་བོད་ནང་གི་དགོན་སྡེ་ཁག་མང་པོ་ཞིག་འགྲེམས་སྟོན་ཁང་ལྟ་བུ་ཆགས་ཏེ་དགོན་པའི་ནང་གི་དགེ་འདུན་པ་རྣམས་དེར་ལྟ་རྟོག་བྱེད་མཁན་ལྟ་བུརགྱུར་འདུག རྒྱ་ནག་གཞུང་ནས་བསམ་བཞིན་དུ་ཡིན་རུང་མིན་རུང་བོད་ནང་འདས་པའི་ལོ་ ༢༠ རིང་ནས་རིག་གཞུང་རྩ་གཏོར་གཏོང་བཞིན་ཡོད་པའི་གནས་ཚུལ་ཡོང་དང་ཡོང་མུས་ཡིན། འོན་ཀྱང་ང་ཚོས་གནས་ཚུལ་དེ་དག་བདེན་པ་ཡིན་མིན་ཞིབ་འཇུག་བྱེད་དགོས། ཞེས་བཀའ་ལན་སྩལ། ཡང་ཁོང་གིས་བོད་ནང་བོད་ཀྱི་སྐད་ཡིག་དང་རིག་གཞུང་ཐོག་ཉེན་ཁ་དེར་བོད་མི་ཚོས་ངོས་ནས་གདོང་ལེན་ཇི་ལྟར་བྱེད་ཀྱི་ཡོད་མེད་སྐོར་ལ་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། རྒྱ་ནག་མི་མང་སྤྱི་མཐུན་རྒྱལ་ཁབ་ལ་ངོས་ཀྱིས་བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཆེད་འབོད་སྐུལ་ཞུ་བཞིན་ཡོད། ཅེས་བཀའ་ལན་སྩལ་ཡོད། ཐེངས་འདིའི་ཆེད་དོན་གྱི་དྲི་བའི་ཐོག་༸གོང་ས་མཆོག་གི་སྒྲིག་འཛུགས་ནས་ཡང་སྲིད་ངོས་འཛིན་གནང་ཕྱོགས་དང་མགོན་པོ་གང་ཉིད་མཆོག་གི་ཡང་སྲིད་ཐོག་༸གོང་ས་མཆོག་གི་དགོངས་ཚུལ་གང་ཡོད་སྐོར་དྲི་བ་ཡང་ཕུལ་ཡོད། དེ་བཞིན་དྲི་བ་དྲིས་ལན་གྱི་ལས་རིམ་དེ་འདི་ཟླའི་ཚེས་ ༢༡ ཉིན་དགོང་དྲོ་ཆུ་ཚོད་ ༨ ཐོག་སི་ཨེན་ཨེན་ཨ་ཡི་བྷི་ཨེན་བརྙན་འཕྲིན་གསར་འགྱུར་བརྒྱུད་ལམ་(Devil’s Advocate Programme)ཞེས་པའི་ལས་རིམ་ནང་སྟོན་རྒྱུ་ཡིན་འདུག་པ་བཅས།།