༢༠༡༠ ཟླ་ ༡༡ ཚེས་ ༢༠ རེས་གཟའ་སྤེན་པ།

༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༡༩ ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་ལྡི་ལིར་ཡོད་པའི་སྤྱི་ཚོགས་ཚན་རིག་སློབ་གཉེར་ཁང་ཞེས་པ་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་ཐོག་༸གོང་ས་༸སྐྱབས་མགོན་ཆེན་པོ་མཆོག་ལ་གདན་ཞུའི་གསོལ་འདེབས་ཞུས་དོན་བཞིན་ཆིབས་སྒྱུར་བཀའ་དྲིན་བསྐྱངས་པ་མ་ཟད། འགྲོ་བ་མིས་འཛམ་གླིང་ཞི་བདེ་བསྐྲུན་ཐབས་(Human Approach to World Peace)ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། ངོས་ཀྱིས་འཛམ་གླིང་འདིའི་སྟེང་དྲག་སྤྱོད་མེད་པ་བཟོ་རྒྱུར་དམག་ཤུགས་ཕྱིར་བསྡུ་བྱེད་དགོས་པའི་འབོད་སྐུལ་ཞུ་གི་ཡོད། ང་ཚོས་འཛམ་གླིང་ཁྱོན་ཡོངས་ཀྱི་གོ་མཚོན་བཀག་སྡོམ་མ་བྱས་གོང་སོ་སོའི་ནང་སེམས་ཀྱི་འཁོན་འཛིན་དང་འགྲན་རྩོད་དེ་དག་མེད་པ་བཟོ་དགོས། འདས་པའི་དུས་རབས་ཀྱི་ནང་མི་གྲངས་ས་ཡ་ཉིས་བརྒྱ་ལྷག་ཙམ་ངྲག་པོའི་དམག་འཁྲུག་འོག་ཚེ་སྲོག་ཤོར་ཡོད། གལ་ཏེ་རྡུལ་ཕྲན་མཚོན་ཆ་དེ་དག་འཚེ་བའི་ཆེད་བེད་སྤྱོད་བྱས་མེད་ཚེ་རྡུལ་ཕྲན་མཚོན་ཆ་དེ་དག་རྒྱལ་ཁབ་ཀྱི་འཕེལ་རྒྱས་ཆེད་བཟོས་པ་རེད་ཅེས་བརྗོད་ན་འགྲིག གལ་ཏེ་མི་གཅིག་གིས་མི་གཞན་ཞིག་བསད་ན་དེ་ལ་སྲོག་གཅོད་མཁན་ཞེས་བརྗོད་ཀྱི་ཡོད། མི་གཅིག་གིས་དྲག་སྤྱོད་བྱས་ཏེ་དམག་འཁྲུག་སྐབས་མི་སྟོང་ཕྲག་མང་པོ་བསད་ན་དེར་དཔའ་བོར་ངོས་འཛིན་བྱེད་རྒྱུ་དེ་བསམ་ཡུལ་ལས་འདས་པ་ཞིག་རེད། དོན་དངོས་སུ་མི་དེར་ཡང་མི་གསོད་མཁན་ལག་དམར་བ་ཞེས་བརྗོད་དགོས་ངེས་ཤིག་རེད། འདས་པའི་ལོ་རྒྱུས་ནས་བསླབ་བྱ་མ་ལེན་པར་རྡུལ་ཕྲན་མཚོན་ཆ་བཟོ་ཆེད་དངུལ་ཐེར་འབུམ་མང་པོ་འགྲོ་སོང་བཏང་བར་བརྟེན་རྒྱལ་ཁབ་དང་གོ་ལའི་ཐོག་འགྲོ་བ་མིའི་དབུལ་ཕོངས་ཀྱི་དཀའ་ངལ་ད་དུང་སེལ་མ་ཐུབ་པར་ལུས་ཡོད། ཕན་སེམས་དང་ཡིད་ཆེས་ཀྱི་བྱ་བ་ཆུང་ངུ་ཞིག་གིས་ཕུགས་རྒྱང་རིང་པོར་འཛམ་གླིང་འདིའི་སྟེང་ཁྱད་པར་བཟོ་ཐུབ། མི་ཁ་ཤས་ཤིག་གོ་ལའི་དཀའ་ངལ་མང་དག་ཅིག་འཕྲད་སྐབས་ཅི་བྱ་གཏོད་བྲལ་གྱི་ཚོར་བ་ཡོང་བཞིན་ཡོད་པ་མ་ཟད། ཁོང་ཚོ་སེམས་ཤུགས་ཀྱང་ཆག་གི་ཡོད། དེ་ནོར་འཁྲུལ་རེད། གོ་ལའི་ནང་གི་དཀའ་ངལ་དང་མི་མཐུན་པའི་ཆ་དེ་དག་སེལ་ཆེད་གྲོས་མོལ་དང་། ཞི་འགྲིག ཕྱི་གསལ་ནང་གསལ་གྱི་སྙིང་སྟོབས་བསྐྲུན་སླད། ཐོག་མར་མི་སྒེར་སོ་སོས་དང་དུ་བླངས་ཏེ་བྱ་བ་འགོ་བརྩམ་དགོས།  འདི་ནི་འགྲོ་བ་མིས་ཞི་བདེ་བསྐྲུན་ཐབས་ཡིན། ང་ཚོ་བོད་མི་ཚོས་ཀྱང་བོད་ཀྱི་དཀའ་རྙོག་དེ་ཕྱོགས་གཉིས་ཀའི་མོས་མཐུན་གྱིས་ཕན་ཚུན་གྲོས་མོལ་གྱི་ལམ་ནས་སེལ་ཐབས་བྱེད་བཞིན་ཡོད། ཅེས་སོགས་ཀྱི་བཀའ་སློབ་སྩལ་ཡོད། དེ་ནས་མང་ཚོགས་ཀྱི་དྲི་བ་ཁག་གཅིག་ལ་བཀའ་ལན་སྩལ་ཡོད་པ་བཅས།།