༢༠༡༠ ཟླ་ ༡༡ ཚེས་ ༡༡ རེས་གཟའ་ཕུར་བུ།
༄༅། །འདི་གར་བོད་མིའི་རང་དབང་རྩོམ་སྒྲིག་པས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༡༠ ནས་ ༡༢ བར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་ཤི་ཀོ་གུ་གླིང་ཕྲན་གྱི་གྲོང་ཁྱེར་ནི་ཧ་མའི་ཀོ་ཨོ་པོ་རེ་ཤན་ཀའི་ཀན་ཚོགས་ཁང་ཆེན་མོའི་ནང་ཉི་ཧོང་ནང་པའི་དགེ་འདུན་པ་གྲངས་ ༤༠༠ བརྒལ་བ་དང་གཞན་ཡང་དད་ལྡན་མང་ཚོགས་བཅས་ལ་ཤེས་རབ་སྙིང་
པོའི་བཀའ་ཆོས་བཀའ་དྲིན་ཆེ་བ་སྩལ་ཡོད། སྐབས་དེར་ཐོག་མར་མགོན་པོ་གང་ཉིད་མཆོག་གིས་སྤྱིར་འཛམ་གླིང་གི་ཆོས་ལུགས་ཕན་ཚུན་དབར་གཞི་རྩའི་ལྟ་གྲུབ་དང་ཡིད་ཆེས་མི་མཐུན་པ་ཡོད་ནའང་། བྱམས་པ་དང་བརྩེ་བ། བཟོད་བསྲན་སོགས་ཀྱི་བསླབ་བྱ་ནི་ཆོས་ལུགས་ཚང་མའི་ནང་གཅིག་མཚུངས་སུ་ཡོད་སྐོར་བཀའ་སློབ་སྩལ་རྗེས་མགོན་པོ་གང་ཉིད་མཆོག་གིས་ནང་ཆོས་ངོ་སྤྲོད་མཛད་དོན། ནང་ཆོས་ནས་ཆོས་ཐམས་ཅད་གཙོ་བོ་རྒྱུ་འབྲས་རྟེན་འབྱུང་གི་རྣམ་གཞག་ལ་གཞི་བཞག་དགོས་པ་གསུངས་ཡོད། ཆོས་གང་དང་གང་ཡིན་རུང་རང་གི་རྒྱུ་ལ་བརྟེན་ནས་སྐྱེ་བར་འདོད། རྒྱུ་ལ་མ་བརྟེན་པའི་འབྲས་བུ་ཡོང་མི་སྲིད། ཆོས་གང་དང་གང་ཡིན་ནའང་རང་གི་རྒྱུ་རྐྱེན་སྔ་མ་ལས་སྐྱེས་པའི་རྣམ་གཞག་དེ་ཚན་རིག་པས་གས་འཐོར་ཆེན་པོ་ལས་འཛམ་གླིང་ཐོག་མར་གྲུབ་སྟངས་ཀྱི་རྣམ་གཞག་དེ་རིག་པས་སྒྲུབ་ཐུབ། དེར་བརྟེན་ནང་པ་སངས་རྒྱས་པའི་ཆོས་དེ་ཡིད་ཆེས་དང་དད་པ་ཁོ་ནར་གཞི་བཅོལ་བ་ཞིག་མ་ཡིན་པར་ངེས་པ་རྙེད་པའི་རྒྱུ་མཚན་དང་རིག་པ་གཞི་ལ་བཞག་ནས་གསུངས་པའི་ཆོས་ཤིག་ཆགས་ཡོད། འོན་ཀྱང་ངོས་ཀྱིས་ནང་ཆོས་དེ་ཆོས་ལུགས་ཡག་ཤོས་ཤིག་ཡིན་པ་བརྗོད་ཀྱི་མེད། མི་སོ་སོར་སེམས་ཁམས་དང་བསམ་ཤེས། འཚར་ལོངས་བྱེད་སྟངས། ལེགས་བྱང་མི་འདྲ་བ་ཡོད་པས་ཆོས་ལུགས་མི་འདྲ་བ་དགོས་པ་ཞིག་ཆགས་ཡོད་པར་བརྟེན། མི་སོ་སོའི་ཁམས་དང་མོས་པར་འཚམས་པའི་ཆོས་དེ་ཆོས་ཡག་ཤོས་ཆགས་ཡོད། ནང་ཆོས་ནས་ཐོག་མར་སྡུག་བསྔལ་བདེན་པ་དང་དེ་ནས་ཀུན་འབྱུང་བདེན་པ། འགོག་བདེན། ལམ་བདེན་བཅས་བདེན་བཞིའི་རྣམ་གཞག་གསུངས་ཡོད་ཅེས་སོགས་ཀྱི་ནང་ཆོས་ངོ་སྤྲོད་མཛད་ཡོད། དེ་རྗེས་མགོན་པོ་གང་ཉིད་མཆོག་གིས་ཤེས་རབ་སྙིང་པོའི་བཀའ་ཆོས་དངོས་གཞི་དབུ་འཛུགས་མཛད་པ་མ་ཟད། ཆོས་འབྲེལ་སྐབས་དད་ལྡན་མང་ཚོགས་རྣམས་ལ་དྲི་བ་འབུལ་རྒྱུའི་གོ་སྐབས་ཀྱང་སྩལ། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་ཆོས་ཞུ་བ་རྣམས་ལ་གལ་ཏེ་ནང་ཆོས་སློབ་གཉེར་ཚད་ལྡན་ཞིག་བྱེད་འདོད་ན་མགོན་པོ་ཀླུ་སྒྲུབ་ཀྱི་དབུ་མའི་གཞུང་དང་། སློབ་དཔོན་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པ། སློབ་དཔོན་ཀ་མ་ལ་ཤི་ལའི་སྒོམ་རིམ་བཅས་ལ་སློབ་གཉེར་བྱེད་དགོས་སྐོར་གྱི་ལམ་སྟོན་བཀའ་སློབ་སྩལ་གྲུབ་བསྟུན་མགོན་པོ་གང་ཉིད་མཆོག་གིས་གསུང་ཆོས་གོ་སྒྲིག་གནང་མཁན་ཚོར་ཐུགས་རྗེ་ཆེ་ཞུས་གནང་མཛད། ཕྱོགས་མཚུངས་༸གོང་ས་མཆོག་ནི་ཧ་མར་གདན་ཞུ་ཚོགས་ཆུང་གི་ཚོགས་གཙོ་མཁན་པོ་ས་ཡི་ཏོ་ཨུ་གན་མཆོག་ནས་མགོན་པོ་གང་ཉིད་མཆོག་གིས་བཀའ་ཆོས་དང་བཀའ་སློབ་ལམ་སྟོན་མཛད་པ་དེས་སྤྱིར་ཚོགས་བཅར་མི་མང་ཚོས་ནང་ཆོས་སློབ་གཉེར་བྱ་རྒྱུའི་འདུན་པ་ཆེ་རུ་འགྲོ་རྒྱུ་དང་ལྷག་པར་དགེ་འདུན་པ་ཚོས་ནང་ཆོས་སློབ་གཉེར་བྱ་རྒྱུ་ཙམ་མིན་པར་ཉམས་ལེན་ཐོག་འབད་བརྩོན་ཆེ་རུ་གཏོང་རྒྱུར་ཏན་ཏན་ཕན་ཐོགས་ཡོང་རྒྱུའི་རེ་བ་ཡོད་ཚུལ་གྱི་གསུངས་བཤད་གནང་ཡོད། དེ་བཞིན་ཁོང་གིས་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་ཤི་ཀོ་གུ་གླིང་ཕྲན་ནང་རྟེན་གཞི་བྱས་པའི་ནི་ཧ་མའི་གྲོང་ཁྱེར་དུ་ཆིབས་སྒྱུར་བསྐྱངས་ཏེ་ནི་ཧ་མའི་མང་ཚོགས་ལ་ཆོས་འབྲེལ་དང་ལམ་སྟོན་བཀའ་སློབ་རྒྱ་ཆེ་སྩལ་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན་སོགས་ཀྱི་གསུང་བཤད་གནང་ཡོད་པ་བཅས། །
