༢༠༡༠ ཟླ་ ༡༡ ཚེས་ ༡༠ རེས་གཟའ་ཕུར་བུ།
༸གོང་ས་མཆོག་ལ་ཕེབས་བསུ་ཞུ་བཞིན་པ།
༄༅། །འདི་གར་བོད་མིའི་རང་དབང་རྩོམ་སྒྲིག་པས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༡ ཉིན་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོ
ང་གི་གྲོང་ཁྱེར་ཨོ་ས་ཀ་དང་སྣ་ར། ནི་ཧ་མ་བཅས་ཀྱི་ནང་ཆོས་འབྲེལ་དང་མང་ཚོགས་ལ་བཀའ་སློབ། གསར་འགོད་ལྷན་ཚོགས་བཅས་ཀྱི་མཛད་འཕྲིན་ཁག་ལེགས་པར་གྲུབ་སྟེ་ནི་ཧ་མ་ནས་ཐད་འཕུར་གནམ་གྲུ་བརྒྱུད་ཉི་ཧོང་གི་གྲོང་ཁྱེར་ཧི་རོ་ཤི་མའི་གྷ་ར་པི་རིན་སི་(Grand Prince Hotel Hiroshima)ཞེས་པའི་མགྲོན་ཁང་དུ་སྔ་དྲོ་ཆུ་ཚོད་ ༡༡།༢༠ ཙམ་ལ་༸ཞབས་སོར་བདེ་བར་འཁོད་མཚམས། ཨ་རི་བ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཇུ་ཌི་ཝིལ་ལེམ་སི་མཆོག་སོགས་ནས་ཕེབས་བསུ་ཞུས་ཡོད། སྐབས་དེར་མགོན་པོ་གང་ཉིད་མཆོག་གིས་མགྲོན་ཁང་ནང་ཆིབས་སྒྱུར་མ་བསྐྱང་སྔོན་ཙམ་དུ་མགྲོན་ཁང་གི་མདུན་དུ་རྒྱལ་སྤྱིའི་གསར་འགོད་པ་གྲངས་ ༢༠ ཙམ་ལ་སྐར་མ་བཅུ་ཙམ་རིང་གསར་འགོད་པའི་དྲི་བར་བཀའ་ལན་མཛད། དེ་ཡང་ཨེ་པི་གསར་འགོད་པ་གཅིག་གིས་རྒྱ་མི་རིགས་ནོ་བེལ་ཞི་བདེའི་གཟེངས་རྟགས་ཐོབ་མཁན་སྐུ་ཞབས་ལིའུ་ཞའོ་པོ་ད་རེས་ཧི་རོ་ཤི་མའི་ནང་རྒྱལ་སྤྱིའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་རྒྱལ་སྤྱིའི་ལྷན་ཚོགས་ཐེངས་ ༡༡ པ་དེར་ཕེབས་མ་ཐུབ་པར་དགོངས་ཚུལ་ཇི་ཡོད་ཀྱི་དྲི་བ་ཕུལ་བར། མགོན་པོ་གང་ཉིད་མཆོག་གིས་བཀའ་ལན་ཕེབས་དོན། སྐུ་ཞབས་ལིའུ་ཞའོ་པོ་དང་བྷར་མའི་མང་གཙོ་དོན་གཉེར་བ་ལྕམ་ཨང་སང་སུ་ཅི་རྣམ་གཉིས་ལྷན་ཚོགས་སུ་ཕེབས་མ་ཐུབ་པའི་གནས་ཚུལ་དེར་ཐུགས་ཕམ་བྱུང་ཡོད་ཚུལ་བཀའ་ལན་སྩལ་བ་མ་ཟད། སྐབས་ཤིག་ལ་མགོན་པོ་གང་ཉིད་མཆོག་གིས་བྷར་མའི་གཅིག་སྡུད་དབང་འཛིན་པའི་འགོ་ཁྲིད་ཚོར་ཕྱག་བྲིས་ཤིག་སྩལ་ནས་སྦར་མའི་རྒྱལ་ཁབ་དེ་བཞིན་ནང་པའི་རྒྱལ་ཁབ་ཅིག་ཡིན་པ་དང་། དེར་བརྟེན་སྦར་མའི་དམག་མིའི་སྲིད་གཞུང་གིས་བྷར་མའི་ནང་དུ་ནང་པའི་ལྟ་གྲུབ་དང་མཐུན་པའི་ལག་ལེན་བསྟར་དགོས་པའི་འབོད་སྐུལ་ཡང་མཛད་ཡོད་སྐོར་བཀའ་ལན་སྩལ་ཡོད། དེ་བཞིན་ཉི་ཧོང་གི་གྲོང་ཁྱེར་ཧི་རོ་ཤི་མའི་ནང་ཨེ་ཤི་ཡའི་རྒྱལ
་ཁབ་མཐུན་ཚོགས་ཀྱི་ཚོགས་འདུ་ཨེ་པེག་ཞེས་པ་དེར་མཉམ་ཞུགས་གནང་མཁན་དབུ་ཁྲིད་མང་པོ་ཕེབས་ཀྱི་ཡོད་པ་མ་ཟད། ཨ་རིའི་སྲིད་འཛིན་སྐུ་ཞབས་ཨོ་བྷ་མ་མཆོག་ཀྱང་ཕེབས་རྒྱུ་ཡིན་པས་༸གོང་ས་མཆོག་གིས་ཨ་རིའི་སྲིད་འཛིན་གྱིས་གཙོས་པའི་དབུ་ཁྲིད་རྣམས་ལ་འབོད་སྐུལ་ཞུ་འཆར་ཡོད་མེད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་ཕེབས་དོན། ངོས་ལ་འབོད་སྐུལ་དམིགས་བསལ་གང་ཡང་ཞུ་རྒྱུ་མེད། འཛམ་གླིང་འབྱོར་ལྡན་རྒྱལ་ཁབ་བརྒྱད་ཀྱི་སྒྲིག་འཛུགས་དང་འབྱོར་ལྡན་རྒྱལ་ཁབ་ཉི་ཤུའི་མཐུན་ཚོགས་དེ་དག་དངུལ་ཁོ་ན་གཙིགས་ཆེར་འཛིན་བཞིན་ཡོད། སྐབས་ཤིག་ལ་རྒྱ་གར་གྱི་སྲིད་བློན་མཆོག་ཨ་རིར་འཚམས་གཟིགས་སྐབས་རྒྱ་གར་གྱི་དཔལ་འབྱོར་གནས་བབ་དེ་རྒྱ་ནག་དང་བསྡུར་ན་ཏོག་ཙམ་རྗེས་ལུས་ཡིན་ནའང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཁྲིམས་རྩོད་ཀྱི་རང་དབང་། གསར་འགྱུར་རང་དབང་བཅས་གཞི་རྩའི་རིན་ཐང་དེ་དག་རྒྱ་གར་གྱིས་གཙིགས་ཆེར་འཛིན་བཞིན་ཡོད། རྒྱ་གར་སྲིད་བློན་མཆོག་གི་བཀའ་མོལ་དེས་འཛམ་གླིང་འབྱོར་ལྡན་རྒྱལ་ཁབ་ཚོ་དངུལ་གཅིག་པུར་གཙིགས་ཆེ་འཛིན་རྒྱུ་མེད་པ་དེ་དྲན་སྐུལ་ཐེབས་དགོས་པ་ཞིག་ཆགས་ཡོད། དངུལ་གྱིས་གནས་སྐབས་རང་གི་འདོད་དོན་རྣམས་སྒྲུབ་ཀྱི་ཡོད་པ་ལྟ་བུ་སྣང་བ་དེ་འཁྲུལ་སྣང་ཡིན། དོན་དངོས་ཐོག་དངུལ་གྱིས་ཞེ་སྡང་དང་ཁྲག་དོག་ཆེ་རུ་གཏོང་རྒྱུ་དང་། འཇིགས་སྣང་དང་དོགས་པ་རྣམ་རྟོག་སྐྱེ་གཞི་ཡིན། ང་ཚོར་ལུས་པོ་འདི་ཡོད་པར་བརྟེན་ཕྱི་དངོས་པོའི་དཔལ་འབྱོར་གྱི་ཡར་རྒྱས་དགོས་ཀྱི་ཡོད་ཀྱང་དངུལ་རྐྱང་པས་ནང་གི་བདེ་བ་བསྐྲུན་མི་ཐུབ་ཅེས་སོགས་ཀྱི་བཀའ་ལན་སྩལ། དེ་བཞིན་མགོན་པོ་གང་ཉིད་མཆོག་གིས་གསར་འགོད་པའི་དྲི་བར་བཀའ་ལན་སྩལ་དོན། ཧི་རོ་ཤི་མའི་གྲོང་ཁྱེར་གྱི་མིང་འདི་ག་དུས་ཐོས་ཀྱང་རྡུལ་ཕྲན་འབར་གས་དྲན་གསོ་སློང་གི་ཡོད་པ་དང་། ད་རེས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ལྷན་ཚོགས་དེས་རྡུལ་ཕྲན་མཚོན་ཆ་མེད་པ་བཟོ་མ་ཐུབ་ནའང་ལྷན་ཚོགས་དེ་བརྒྱུད་འཛམ་གླིང་ནང་རྡུལ་ཕྲན་མཚོན་ཆའི་དུས་ཚོད་དེ་ད་ཆ་ཡོལ་ཟིན་པའི་དྲན་སྐུལ་ཞིག་གཏོང་ངེས་ཡིན། གོམ་པ་རིམ་སྤོས་ཀྱིས་རྡུལ་ཕྲན་མཚོན་ཆ་མེད་པ་བཟོ་རྒྱུའི་འབད་བརྩོན་བྱ་རྒྱུ་གལ་ཆེན་པོ་ཆགས་ཡོད། ཨ་རི་ལྟ་བུ་སྟོབས་ཆེན་རྒྱལ་ཁབ་ཀྱིས་རྡུལ་ཕྲན་མཚོན་ཆ་མེད་པ་བཟོ་རྒྱུའི་ཁ་ཕྱོགས་དེར་གོམ་པ་སྤོ་འགོ་བཙུགས་ཡོད་སྐོར་སོགས་ཀྱི་བཀའ་སློབ་སྩལ་གྲུབ་བསྟུན་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས།།
