༢༠༡༠ ཟླ་ ༡༡ ཚེས་ ༡༢ རེས་གཟའ་པ་སངས།
༄༅། །འདི་གར་བོད་མིའི་རང་དབང་རྩོམ་སྒྲིག་པས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༡ ཉིན་རྒྱབ་ཆུ་ཚོད་ ༢ ནས་ ༤ བར་༸གོང་ས་༸སྐྱབས་མགོན་ཆེན་པོ་མཆོག་གིས་གྲོང་ཁྱེར་ཧི་རོ་ཤི་མའི་བྷུན་ཀ་ཀོར་ཡུ་ཀཡི་ཀན་ཞེས་པའི་རིག་གཞུང་དང་འབྲེལ་བའི་མཛད་སྒོ་གོ་སྒྲིག་བྱེད་སའི་ཚོགས་ཁང་ཆེན་མོའི་ནང་གྲོང་ཁྱེར་ཧི་རོ་ཤི་མར་རྟེན་གཞི་བྱས་པའི་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གི་འཇམ་དབྱངས་ཐེག་ཆེན་ཆོས་ཚོགས་ནས་ཇི་ལྟར་གསོལ་འདེབས་ཞུས་དོན་བཞིན་
བཀའ་བཞེས་བཟང་པོ་སྨིན་སྩལ་གྱིས་ཉི་ཧོང་ནང་པའི་ཆོས་ཚོགས་ཁག་གི་དགེ་འདུན་པ་དང་བོད་པའི་དགེ་འདུན་པ་བཅས་ཁྱོན་དགེ་འདུན་པ་གྲངས་ ༥༠ ལྷག་ཙམ་དང་གཞན་ཡང་དད་ལྡན་མང་ཚོགས་ ༢༠༠༠ ཙམ་ལ་འཁོར་བ་དང་ལས་འབྲས་སྐོར་བཀའ་ཆོས་སྩལ། བཀའ་ཆོས་དབུ་འཛུགས་མ་མཛད་གོང་གྲོང་ཁྱེར་ཧི་རོ་ཤི་མའི་ནང་པའི་ཆོས་ཚོགས་ཀྱི་ཚོགས་གཙོ་སྐུ་ཞབས་ཨ་ཀ་མ་ཙི་ལགས་ཀྱིས་༸གོང་ས་མཆོག་ལ་ཕེབས་བསུའི་འཚམས་འདྲི་ཞུས་གྲུབ་བསྟུན། འབྲས་སྤུངས་སྒོ་མང་དགེ་བཤེས་བློ་བཟང་ཚུལ་ཁྲིམས་ལགས་ཀྱིས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་ཏེ་རིམ་པས་དགོན་པའི་སྦྱིན་བདག་དང་འབྲེལ་ཡོད་ཆོས་ཚོགས་ཀྱི་མི་སྣ་ཁག་ལ་མཇལ་ཁ་སྩལ། དེ་ནས་གྲོང་ཁྱེར་ཧི་རོ་ཤི་མའི་རྡཨོ་ཤོ་རྗི་དགོན་པའི་དགེ་འདུན་པ་ ༢༠ ཙམ་གྱིས་ཤིས་བརྗོད་བཏོན། དེ་རྗེས་མགོན་པོ་གང་ཉིད་མཆོག་གིས་བཀའ་ཆོས་དབུ་འ
ཛུགས་ཀྱིས་ཐོག་མར་ནང་ཆོས་ངོ་སྤྲོད་མཛད་དོན། ངོས་ཀྱིས་དུས་རྒྱུན་གཙོ་བོ་དོན་ཚན་གཉིས་ཀྱི་ཐོག་ལ་སྐད་ཆ་ཤོད་ཀྱི་ཡོད། དོན་ཚན་གཅིག་དེ་ང་ཚོ་ཚང་མ་མི་རེད། སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། སྡུག་བསྔལ་སེལ་རྒྱུ་དང་བདེ་བ་བསྒྲུབ་རྒྱུའི་ཐོབ་ཐང་ཡོད་པ་གཅིག་མཚུངས་ཡིན། དེ་འདྲ་ཡིན་དུས་འདོད་པའི་བདེ་སྐྱིད་ཟེར་རྒྱུ་དེ་ང་ཚོའི་མི་ཚེའི་སྙིང་དོན་ལྟ་བུ་ཡིན། འདོད་པའི་བདེ་སྐྱིད་ཟེར་རྒྱུ་དེ་ནི་ལུས་ཚོར་ལ་རྟེན་པ་གཅིག་ཡོད། ཡང་གཙོ་བོ་ཡིད་བློར་རྟེན་པ་གཅིག་ཡོད། དེ་ང་ཚོས་དབྱེ་བ་འབྱེད་རྒྱུ་གལ་ཆེན་པོ་ཆགས་ཡོད། ང་ཚོ་མང་པོ་ཞིག་གིས་ལུས་ཚོར་བདེ་བ་དེ་གཙོ་བོར་རྩིས་ཀྱི་ཡོད། ལུས་ཚོར་གྱི་སྡུག་བསྔལ་དང་བདེ་སྐྱིད་ཟེར་རྒྱུ་དེ་དུད་འགྲོས་ཀྱང་དོན་གཉེར་བྱེད་བཞིན་ཡོད་པ་གཅིག་མཚུངས་ཤིག་ཆགས་ཡོད། གཙོ་བོ་ལུས་ཚོར་ལ་རྟེན་པའི་སྡུག་བསྔལ་ཉུང་དུ་གཏོང་རྒྱུ་དང་བདེ་བ་མང་དུ་གཏོང་རྒྱུ་དེ་གཙོ་བོ་ཕྱི་དངོས་པོ་ཡར་རྒྱས་ལས་ཡོང་ཐུབ། དེར་བརྟེན་འཛམ་གླིང་ནང་མི་ཚོས་དངོས་པོ་ཡར་རྒྱས་ཁོ་ན་ལ་དམིགས་ཏེ་སྡོད་ཀྱི་ཡོད། ངོས་ཀྱིས་དུས་རྒྱུན་འདི་ཤོད་ཀྱི་ཡོད། དཔེར་ན། འཛམ་གླིང་འབྱོར་ལྡན་རྒྱལ་ཁབ་བརྒྱད་ཀྱི་མཐུན་ཚོགས་དང་འབྱོར་ལྡན་རྒྱལ་ཁབ་ཉི་ཤུའི་མཐུན་ཚོགས་ཟེར་རྒྱུ་དེ་ཚོ་དཔལ་འབྱོར་ཁོ་ནར་དམིགས་ཀྱི་ཡོད། དངོས་པོ་ཡར་རྒྱས་ཧ་ཅང་ཆེན་པོ་ཕྱིན་པའི་ཡུལ་གྲུ་ཚོའི་ནང་ཡོད་པའི་འབྱོར་ལྡན་ཚོར་སེམས་ནང་བདེ་སྐྱིད་མེད་པ་ཤེས་ཐུབ། ངོས་ཀྱི་གྲོགས་པོ་འབྱོར་ལྡན་ཨ་སྒོར་ཐེར་འབུམ་མང་པོའི་བདག་པོ་སེམས་ནང་བདེ་སྐྱིད་ཀྱིས་ཕོངས་པ་དེ་འདྲ་ཡོད། རྒྱུ་ཆེན་པོ་ཡོད་ཀྱང་སེམས་ནང་བདེ་སྐྱིད་མེད་པ་དེ་འདྲ་ཏན་ཏན་ཡོད། བཟོ་གྲྭ་ཆེན་པོའི་འགན་འཛིན་རྒྱུ་དངོས་ཧ་ཅང་ཆེན་པོ་ཡིན་མཁན་ལས་གྲོང་གསེབ་པ་ཉིན་རེ་ཉིན་རེའི་འཚོ་བའི་ནང་ལས་ཀ་བྱེད་མཁན་ཚོར་བསམ་བློའི་ནང་ཕོག་ཐུག་ཉུང་བ་ཡོད། ཁང་པ་མཐོ་པོའི་ནང་སྡོད་མཁན་བཟོ་གྲྭའི་སྦྱིན་བདག་དེ་ཚོ་ག་དུས་ཡིན་ནའང་སེམས་ནང་དངངས་སྐྲག་བྱས་ནས་ཕལ་ཆེར་སྡོད་ཀྱི་ཡོད། དངོས་པོ་ཡར་རྒྱས་ངེས་པར་དུ་དགོས་ཀྱི་ཡོད། འོན་ཀྱང་དེ་གཅིག་པུས་མ་སྒྲིག་པ་དེ་གསལ་པོ་ཞེ་དྲག་ཆགས་ཡོད། དེར་བརྟེན་ང་ཚོ་ཚང་མ་ཡིད་བློའི་སྟེང་ནས་བདེ་སྐྱིད་སྒྲུབ་རྒྱུ་དང་ཡིད་བློའི་སྟེང་ནས་སེམས་མ་སྐྱིད་པ་དེ་ཉུང་དུ་གཏོང་རྒྱུའི་ཐབས་ཤེས་བྱ་རྒྱུ་དེ་གལ་ཆེན་པོ་རེད། དེ་དུད་འགྲོ་གཞན་གྱིས་བྱེད་ཐུབ་ཀྱི་མ་རེད། མི་གཅིག་པུས་བྱེད་ཐུབ་ཀྱི་རེད། ཡིད་བློའི་སྟེང་ནས་བདེ་སྡུག་མང་པོ་ཡོང་རྒྱུ་དེ་མི་ལ་ཕལ་ཆེར་ཤུགས་ཆེ་བ་ཡོད། གང་ཡིན་བརྗོད་ན་མི་ལ་རྣམ་དཔྱོད་དང་དྲན་ཤེས་སྟོབས་ཤུགས་ཆེན་པོ་ཡོད། ཡིག་ཐོག་ནས་ལོ་བརྒྱ་ཕྲག་དང་སྟོང་ཕྲག་མང་པོའི་གནས་ཚུལ་ང་ཚོའི་སེམས་ནང་དྲན་རྒྱུ་དེ་འདྲ་ཡོང་གི་ཡོད། མ་འོངས་པར་ཆ་བཞག་པ་ཡིན་ནའང་འཆར་སྣང་གྱི་བསམ་བློ་དེ་མིས་ཤུགས་ཆེ་བ་གཏོང་ཐུབ་ཀྱི་ཡོད། དེ་འདྲ་ཡིན་དུས་དེ་དང་འབྲེལ་ནས་སེམས་ཀྱི་བདེ་སྡུག་དེ་དུད་འགྲོ་ལས་མི་ལ་ཤུགས་ཆེ་བ་ཡོད། ཡིད་བློའི་སྡུག་བསྔལ་ཉུང་དུ་གཏོང་རྒྱུ་དང་བདེ་བ་མང་དུ་གཏོང་རྒྱུ་དེ་དངུལ་གྱིས་བཟོ་ཐུབ་ཀྱི་མེད། དེར་བརྟེན་སེམས་ཀྱི་ཞི་བདེ་ཞེས་པ་དེ་སེམས་ཁོ་རང་གི་སྟེང་ནས་སྒྲུབ་རྒྱུ་རེད་མ་གཏོགས་སེམས་ལས་དེ་མིན་གཞན་ནས་བཟོ་མི་ཐུབ། ཟོ་གྲྭ་ནས་ཀྱང་བཟོ་མི་ཐུབ་ཅེས་སོགས་ཀྱི་བཀའ་སློབ་སྩལ།
ཕྱི་ཚེས་ ༡༢ ཉིན་༸གོང་ས་མཆོག་གིས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་རྒྱལ་སྤྱིའི་ལྷན་ཚོགས་ཐེངས་ ༡༡ པའི་དབུ་འབྱེད་ཀྱི་མཛད་སྒོར་བཀའ་སློབ་སྩལ་གནང་མཛད་རྒྱུ་ཡིན་འདུག ཐེངས་འདིའི་༸གོང་ས་མཆོག་གི་ཉི་ཧོང་གྲོང་ཁྱེར་ཧི་རོ་ཤི་མར་ཆིབས་སྒྱུར་དེ་བཞིན་ཐེངས་བཞི་པ་ཆགས་ཡོད་པ་བཅས།།
