༢༠༡༠ ཟླ་ ༡༠ ཚེས་ ༡ རེས་གཟའ་པ་སངས།

༄༅། །ཕྱི་ལོ་ ༢༠༡༠ ཟླ་ ༩ ཚེས་ ༣༠ ཉིན་རྒྱབ་ཆུ་ཚོད་ ༡།༣༠ཐོག་རྡ་ས་བོད་ཀྱི་དཔེ་མཛོད་ཚོགས་ཁང་དུ་གཏན་ཉིན་སློབ་གྲྭ་ཁག་གི་མདུན་ལམ་སློབ་སྟོན་པའི་ཟབ་སྦྱོང་ཐེངས་གཉིས་པའི་མཇུག་བསྡོམས་ཐོག་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ང་ཚོ་བོད་པས་བསམ་བློ་གཏོང་སྟངས་ཀྱི་མདུན་ལམ་དང་དེང་སང་ནུབ་ཕྱོགས་ནས་གཡར་པའི་མདུན་ལམ་སློབ་སྟོན་པ་ཟེར་བའི་མདུན་ལམ་གཉིས་ཀྱི་དབར་ཁྱད་པར་ཡོད། སྔོན་ལ་ང་རང་ཚོ་མདུན་ལམ་ཟེར་རྒྱུ་དེ་གང་ཡིན་པ་ཕྱོགས་གཉིས་ཀའི་མོས་མཐུན་ཡོད་པའི་གོ་བསྡུར་ཞིག་མ་བྱུང་ན་ངས་ཞུ་རྒྱུ་དང་། ཁྱེད་རང་ཚོས་གསན་རྒྱུ་གཉིས་དབར་ཁྱད་པར་ཆེན་པོ་ཆགས་ཏེ་གོ་བརྡ་འཕྲོད་པ་ཞིག་ཡོང་གི་མ་རེད་བསམ་གྱི་འདུག ད་ལྟ་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་པ་གསུང་རྒྱུ་དེ་མང་ཆེ་བ་དབྱིན་སྐད་ཀྱི་ (Career Counselor) ཞེས་པ་ནས་བསྒྱུར་བ་ཞིག་མིན་ནམ་བསམ་གྱི་འདུག དབྱིན་ཇིའི་སྐད་ཡིག་ཐོག་ (Career) ཞེ་ན་མི་ཚེའི་འཚོ་ཐབས་ཤིག་ལ་གོ་དགོས། ཁོང་ཚོའི་བསམ་བློའི་ནང་མི་ཚེའི་དགོས་དོན་སྙིང་པོ་དེ་ལྟོ་གོས་གཏམ་གསུམ་བསྒྲུབ་རྒྱུ་དེ་ཡིན། ལྟོ་གོས་གཏམ་གསུམ་བསྒྲུབ་རྒྱུའི་དོན་དུ་མི་ཚེ་སྐྱེལ་དགོས་པ། མིའི་ཚེ་དེ་ཐེག་པ་ (Career ) མིན་པར། ཐེག་པ་དང་ (Career) གཉིས་རྣམ་པ་ཐ་དད་དགོས་པ་དང། ཐེག་པའི་སྒང་ལ་ཞོན་ཏེ་འགྲོ་རྒྱུ་མིན་པར་དེའི་ཆེད་དུ་མི་ཚེ་ཆ་ཚང་གཏོང་དགོས་པའི་བསམ་ཚུལ་ཡོད། དབྱིན་སྐད་ནང་ (Occupation) ཟེར་བ་བོད་སྐད་དུ་བསྒྱུར་ན་འཚོ་ཐབས་དང་། (Profession) ཟེར་དུས་འཚོ་ཐབས་ཀྱི་ལས་དོན་བྱེད་རྒྱུའི་སྦྱང་ཆ། ཡང་ན་འདུན་པ་ལ་གོ་དགོས། དེར་བརྟེན་མདུན་ལམ་སློབ་སྟོན་པ་ཚོས་རྒྱུན་གཏན་དང་ནུབ་ཕྱོགས་ཀྱི་མདུན་ལམ་སློབ་སྟོན་པ་ཚོས་གང་བྱེད་ཀྱི་ཡོད་བརྗོད་ན། སློབ་སྦྱོང་བྱེད་རྒྱུ་དེ་མིའི་མི་ཚེ་དང་མིའི་རྣམ་དཔྱོད་ཡར་རྒྱས་འགྲོ་ཆེད་མིན་པར་དེ་ཐབས་ཡག་པོ་ཞིག་རག་རྒྱུའི་ཆེད་དུ་ཡིན་པར་ཆ་འཇོག་བྱེད་ཀྱི་ཡོད། མདུན་ལམ་སློབ་སྟོན་པ་ཚོས་གང་སློབ་སྟོན་བྱེད་ཀྱི་ཡོད་བརྗོད་ན། སློབ་སྦྱོང་གང་འདྲ་ཞིག་བྱས་པ་ཡིན་ནའང་སློབ་སྦྱོང་མཐར་སོན་རྗེས་སོ་སོའི་འཚོ་བའི་མདུན་ལམ་འཚོལ་སྐབས་ཕོགས་ཆེ་ཤོས་གང་ནས་རག་མིན་དང། ཕོགས་མེད་ནའང་དངུལ་མང་ཤོས་དང། སྐད་གྲགས་ཆེ་ཤོས་གང་གི་ཐོག་ནས་ཡོང་གི་རེད། དེ་ཡང་དུས་ནས་དུས་སུ་ཁྲོམ་རྭའི་ནང་འགྱུར་འགྲོས་གང་ཡོད། དཔེར་ན། འདས་པའི་ལོ་ཉི་ཤུ་རྩ་གྲངས་རིང་ལ་ནུབ་ཕྱོགས་ཀྱི་ལུང་པ་དང་རྒྱལ་ཁབ་མང་པོ་ཞིག་ཡར་ཐོན་ཟིན་པ་དང་ཡར་རྒྱས་འགྲོ་བཞིན་པ་རྣམས་ལ་བལྟས་ན། ཁོང་ཚོའི་མདུན་ལམ་སློབ་སྟོན་པ་ཚོས་མདུན་ལམ་སློབ་སྟོན་བྱེད་སྟངས་ལ་ཁྱད་པར་ཞེ་དྲག་ཕྱིན་ཡོད། ད་ལྟ་ནས་བརྩིས་པའི་ལོ་ཉི་ཤུ་སུམ་ཅུ་སྔོན་ལ་མདུན་ལམ་སློབ་སྟོན་པ་ཚོས་ཁྱད་ལས་པ་དང་སྨན་པ་ཚོ་རྩ་ཆེན་པོ་བརྩིས་ཡོད། དེ་ནས་ཚོང་གི་འདུ་འགོད་བྱེད་མཁན་གྱི་སྡེ་ཚན་དེ་ལོ་བཞི་བཅུ་ཞེ་གྲངས་སྔོན་ལ་དེ་ཙམ་གྱི་རྒྱུག་པོ་མེད། ད་ལྟ་ཀམ་པུཊར་གྱི་ཚན་རིག་དང་། དེ་བཞིན་ཁྲོམ་དང་དཔལ་འབྱོར་འདུ་འགོད་བྱེད་མཁན། ཀམ་པུ་ཊར་ནང་ལས་གཞི་དང་ལས་རིམ་སྣ་ཚོགས་བཟོ་མཁན་དེ་ཚོ་རྒྱུག་ཆེ་བ་བརྩིས་ནས་ཁྲོམ་གྱི་ནང་ད་ལྟའི་གནས་སྐབས་ལ་རྒྱུག་ཆེ་ཤོས་གང་ཡོད་པ་དེའི་དོན་དུ་སློབ་སྦྱོང་གང་འདྲ་བྱེད་དགོས་རེད་ཅེས་སློབ་སྟོན་བྱེད་སྐབས། གང་ལྟར་མི་ཚེའི་མདུན་ལམ་གྱི་ལམ་སྟོན་བྱེད་རྒྱུའི་ཚབ་ལ་མདུན་ལམ་གྱི་ཆེད་དུ་མི་ཚེ་གང་འདྲ་སྐྱེལ་དགོས་རེད། མི་ཚེ་འདི་ཆ་ཚང་དངུལ་བཟོ་རྒྱུའི་གཡོག་པོའམ་དངུལ་བཟོ་རྒྱུ་མ་གཏོགས་དེ་ལས་གཞན་པའི་མི་ཚེའི་དམིགས་ཡུལ་གང་ཡང་མེད་པ་བཟོ་རྒྱུའི་ཐབས་ཤེས་ཤིག་ང་ཚོ་བོད་པའི་ནང་བསམ་ཚུལ་དེ་ཤུགས་ཆེན་པོ་འགོས་ཚར་ཡོད། བསམ་ཚུལ་དེ་འགོས་ནད་བཞིན་རེད། དེར་བརྟེན་ང་ཚོས་མདུན་ལམ་སློབ་སྟོན་པ་ཟེར་དུས་སློབ་ཕྲུག་ཚོས་སློབ་ཚན་གང་ལེན་དགོས་མིན་དང། སློབ་ཚན་གང་བླངས་པ་ཡིན་ན་སློབ་ཕྲུག་དེའི་མི་ཚེ་ཡར་རྒྱས་འགྲོ་ཐུབ་རྒྱུའི་ལམ་སྟོན་བྱས་པ་ཞིག་མིན་པར། སློབ་ཚན་གང་བླངས་པ་ཡིན་ན་དངུལ་མང་ཤོས་དང་སྟབས་བདེ་ཤོས་ཆགས་རྒྱུའི་མདུན་ལམ་སློབ་སྟོན་བྱེད་པ་ལྟ་བུ་ཆགས་ཡོད། ང་ཚོའི་ཤེས་ཡོན་སྲིད་བྱུས་ནང་བསྟན་པའི་མདུན་ལམ་དེ་དང་ཁྱེད་རང་ཚོས་སློབ་སྦྱོང་བྱེད་རྒྱུའི་མདུན་ལམ་དེ་མཉམ་དུ་འགྲོ་གི་མེད། གཅིག་ཤར་ཕྱོགས་དང་གཅིག་ནུབ་ཕྱོགས་ལ་འགྲོ་གི་རེད། ཤེས་ཡོན་སྲིད་བྱུས་ཀྱི་ཤེས་ཡོན་སློབ་སྦྱོང་བྱེད་རྒྱུ་དེས་མི་དེ་ཤེས་ཡོན་ལྡན་པ་ཞིག་དང་མི་དེའི་མི་ཚེ་ཡར་རྒྱས་འགྲོ་རྒྱུ། མི་ཚེ་ཡར་རྒྱས་ཕྱིན་པར་བརྟེན་ནས་སྤྱི་ཚོགས་ཡར་རྒྱས་འགྲོ་རྒྱུ་དང་། དེ་ལ་བརྟེན་ནས་འཚེ་བ་མེད་པའི་སྤྱི་ཚོགས་ཤིག་སྐྲུན་ཐུབ་རྒྱུའི་བསམ་བློ་གཏོང་གི་ཡོད། དེར་བརྟེན་ཤེས་རིག་ལས་ཁུངས་ཀྱིས་བཀོད་སྒྲིག་བྱས་པའི་མདུན་ལམ་སློབ་སྟོན་པ་དེ་ཚོ་དེང་རབས་མདུན་ལམ་སློབ་སྟོན་པའི་བསམ་བློའི་ནང་བག་ཆགས་མཐུག་པོ་ཡོད་པ་དེ་རང་འཇགས་བཞག་ཚེ་ང་ཚོའི་ཤེས་ཡོན་སྲིད་བྱུས་དང་རྒྱབ་འགལ་འགྲོ་རྒྱུ་རེད་ཅེས་སོགས་ཀྱི་གསུང་བཤད་ཟབ་རྒྱས་གནང་ཡོད།།