༢༠༡༠ ཟླ་ ༡༠ ཚེས་ ༡༥ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༣ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཁལ་ལི་ཕོར་ནི་ཡའི་མངའ་སྡེའི་ནང་རྟེན་གཞི་བྱས་པའི་སན་ཧོ་སི་ནས་རྒྱང་ཐག་སྐར་མ་ ༢༥ ཙམ་གྱི་སར་ཡོད་པའི་པཱ་ལོ་ཨལ་ཊོ་ (Palo Alto) གྲོང་ཚོའི་ཁ་སི་ཏཱ་ནོ་སློབ་གྲྭའི་ (Castano School) སློབ་མ་ ༣༠༠ ཙམ་ལ་མཇལ་ཁ་སྩལ་བ་མ་ཟད། སློབ་མ་ཚོས་དྲི་བར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་བཀའ་ལན་སྩལ་ཡོད།  དེ་ཡང་༸གོང་ས་མཆོག་གིས་ཏཱ་ལའི་བླ་མ་སྐུ་ཕྲེང་རིམ་བྱོན་གྱི་བྱུང་རབས་ལོ་རྒྱུས་དང་དེང་རབས་བོད་ཀྱི་རྒྱལ་རབས་གསལ་བཤད་མཛད་པ་དང་སྦྲགས། མགོན་པོ་གང་ཉིད་མཆོག་༸གོང་ས་སྐུ་ཕྲེང་ ༡༣ པ་ཆེན་པོ་མཆོག་ལས་དགུང་ལོ་གཉིས་ཙམ་ཆུང་སྐབས་བོད་མིའི་ཆོས་སྲིད་གཉིས་ཀྱི་དབུ་ཁྲིད་ཀྱི་འགན་དབང་བཞེས་ཚུལ་སྐོར་དང། མགོན་པོ་གང་ཉིད་མཆོག་གིས་ཕྱི་ལོ་ ༡༩༥༢ ཙམ་ནས་བོད་ནང་བཅོས་བསྒྱུར་གཏོང་ཐབས་མཛད་སྐོར་དེ་བཞིན་ཕྱི་ལོ་ ༢༠༠༡ ནས་བཙན་བྱོལ་བོད་མི་རྣམས་ཀྱིས་འོས་བསྡུའི་ལམ་ནས་བཀའ་ཁྲི་འདེམས་བསྐོ་བྱེད་རྒྱུ་འགོ་བཙུགས་པ་ནས་༸གོང་ས་མཆོག་ད་ཆ་ཕྱེད་རྒས་ཡོལ་གྱི་གནས་བབ་ཅིག་ཏུ་གྱུར་ཟིན་སྐོར་སོགས་བཀའ་སྩལ། ཕྱོགས་མཚུངས་སློབ་ཕྲུག་གཅིག་གིས་གཞོན་སྐྱེས་ཚོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་ཡོང་བ་ཞུས་པར། མགོན་པོ་གང་ཉིད་མཆོག་གིས་དུས་རབས་ ༢༠ དེ་འཛུགས་སྐྲུན་ཡར་རྒྱས་ཀྱི་དུས་རབས་ཤིག་ཡིན་ནའང་ཡར་རྒྱས་དེ་ཕྱི་དངོས་པོ་ཙམ་ཡིན་པ་དང། ད་ཆ་བྱམས་བརྩེ་དང་བརྩེ་སེམས་སོགས་ནང་བསམ་བློའི་གནས་སྟངས་ཡར་རྒྱས་གཏོང་དགོས་སྐོར་བཀའ་སློབ་ལམ་སྟོན་སྩལ་བ་མ་ཟད། ཀླད་པ་ཡར་རྒྱས་གཏོང་རྒྱུའི་ཤེས་ཡོན་དེ་གཅིག་པུས་འདང་གི་མེད་སྐོར་དང་། ཞི་བདེ་ཟེར་བ་དེ་ནང་གི་བསམ་བློ་ནས་ཡོང་དགོས་པ་དང་ནང་བསམ་བློའི་ཞི་བདེའི་ཐོག་ནས་སྤྱི་ཚོགས་ནང་འགྱུར་བ་གཏོང་ཐུབ་ཀྱི་ཡོད། མགོན་པོ་གང་ཉིད་མཆོག་དུས་རབས་ ༢༠ པའི་མི་ཞིག་ཡིན་པ་དང་སློབ་ཕྲུག་ཚོ་དུས་རབས་ ༢༡ གི་མི་རབས་ཆགས་ཡོད་པར་བརྟེན་སྤྱི་ཚོགས་བཟང་པོ་ཞིག་བསྐྲུན་རྒྱུའི་གོ་སྐབས་དང་འགན་དབང་ཡོད་སྐོར་བཀའ་སློབ་སྩལ་ཡོད།  དེ་རྗེས་སློབ་ཕྲུག་གཅིག་གིས་ཆོས་ལུགས་དང་མི་རིགས་དབྱེ་འབྱེད་ཐོག་༸གོང་ས་མཆོག་གི་དགོངས་ཚུལ་ཇི་ཡོད་ཀྱི་དྲི་བ་ཕུལ་བར། ༸གོང་ས་མཆོག་ཐོག་མར་སྐུ་ཉིད་བྱིས་པའི་གནས་སྐབས་ནས་རང་གི་ངོ་བོ་ཇི་ཡིན་ངོས་འཛིན་མཛད་རྒྱུའི་བསམ་བློ་ཇི་འདྲ་ཡིན་མིན་དང། དེ་ནས་འཚར་ལོང་སྐབས་སྐུ་ཉིད་ཀྱི་ངོ་བོ་གང་ཡིན་ངོས་འཛིན་ཚུལ་གྱི་བསམ་བློ་དེ་ཡང་ཡར་རྒྱས་ཇི་འདྲ་སོང་མིན་སྐོར་དང། བྱིས་པའི་སྐབས་གཞི་རྩའི་འགྲོ་བ་མི་ཞིག་ཡིན་པའི་ངོ་བོ་དེ་ཙམ་ངོས་འཛིན་ཐུབ་པ་ལས་ཆོས་ལུགས་གང་ཡིན་གྱི་ངོ་བོ་སོགས་ངོས་འཛིན་མཛད་མི་ཐུབ་ཚུལ་དང་། དེ་ནས་རིམ་པས་ནར་སོན་སྐབས་མགོན་པོ་གང་ཉིད་མཆོག་གིས་སྐུ་ཉིད་ནང་པ་ཞིག་ཡིན་དགོངས་པ་དང་ཏཱ་ལའི་བླ་མ་ཡིན་དགོངས་པ་དེ་གཉིས་ངོས་འཛིན་མཛད་རྒྱུའི་ཀུན་སློང་རྒྱུད་ལ་འཁྲུངས་ཚུལ་སོགས་གནས་སྐབས་སོ་སོར་བསམ་བློའི་གོ་རྟོགས་མི་འདྲ་བ་ཡོང་གི་ཡོད་སྐོར་བཀའ་སྩལ་བ་མ་ཟད། ཆོས་ལུགས་དང་མི་རིགས་སོགས་རིམ་པ་གཉིས་པའི་ངོ་བོ་དེ་དག་ངོས་འཛིན་གྱི་བསམ་བློ་དེར་ཞེན་ཆགས་ཆེ་དྲགས་པར་བརྟེན་སྤྱི་ཚོགས་ནང་དཀའ་ངལ་ཡོང་གི་ཡོད་པ་དང། མི་ཚོས་མཚམས་རེ་རིམ་པ་གཉིས་པའི་ངོ་བོའི་ཆེད་གཞི་རྩའི་འགྲོ་བ་མི་ཞིག་ཡིན་པའི་རིམ་པ་དང་པོའི་ངོ་བོ་དེ་གློད་གཏོང་བྱེད་ཀྱི་ཡོད་སྐོར་སོགས་བཀའ་སློབ་སྩལ། དེ་བཞིན་སློབ་ཕྲུག་གཅིག་གིས་འཛམ་གླིང་ཞི་བདེ་ཟེར་བ་ཞིག་ཡོང་སྲིད་མིན་གྱི་དྲི་བ་ཕུལ་བར། ༸གོང་ས་༸སྐྱབས་མགོན་ཆེན་པོ་མཆོག་གིས་གཞི་རྩའི་འགྲོ་བ་མིའི་རང་བཞིན་དེ་ཞི་འཇམ་ཞིག་ཡིན་པར་ངོས་འཛིན་མཛད་ཀྱི་ཡོད་པ་དང། ཆོས་ཁས་ལེན་མིན་ལ་མ་ལྟོས་པར་བྱམས་བརྩེ་གལ་ཆེན་པོ་ཡིན་པ་དེ་དངོས་གསལ་ཡིན་པ་མ་ཟད། མགོན་པོ་གང་ཉིད་མཆོག་གི་ཐུགས་ལ་བྱམས་བརྩེ་ལྡན་པའི་འཛམ་གླིང་ཞིག་ཡོང་སྲིད་པ་ཞིག་ཡིན་སྐོར་དང། སྐུ་ཚེ་ཧྲིལ་པོར་བྱམས་བརྩེ་གོང་སྤེལ་གཏོང་ཐབས་མཛད་སྐོར་བཀའ་ལན་སྩལ།
ཡང་སློབ་ཕྲུག་གཅིག་གིས་སེམས་སྡུག་ལས་གྲོལ་ཐབས་གང་ཡིན་གྱི་དྲི་བ་ཕུལ་བར། ༸གོང་ས་༸སྐྱབས་མགོན་ཆེན་པོ་མཆོག་གིས་ཕྱོགས་ཡོངས་ཀྱི་གནས་སྟངས་ཤེས་པའི་ཐོག་བསམ་བློ་གུ་ཡངས་པོ་གཏོང་དགོས་སྐོར་དང་། གནས་སྟངས་ཚང་མ་མི་མཐུན་པ་ཞིག་མིན་སྐོར་དང།  མི་སྡུག་པའི་གནས་ཚུལ་གཅིག་ལ་ལྟ་ཕྱོགས་གཞན་ནས་ལྟ་སྐབས་མཚམས་རེ་མཐུན་ཕྱོགས་ཀྱི་གནས་སྟངས་ཤིག་མཐོང་རྒྱུ་ཡོད་ཅེས་བཀའ་སྩལ། གཞན་ཡང་སློབ་ཕྲུག་གཅིག་གིས་༸གོང་ས་མཆོག་གིས་སྐུ་ཚེར་ཕྱིར་གཟིགས་མཛད་དེ་ཕྱག་ལས་གང་མཛད་སྐོར་གྱི་དྲི་བ་ཕུལ་བར། མགོན་པོ་གང་ཉིད་མཆོག་དགུང་གྲངས་ ༡༡ དང་ ༡༥ ཡིན་དུས་སུ་ཆབ་སྲིད་ཀྱི་ཐུགས་འགན་གང་ཡང་མེད་སྐོར་དང། སྐབས་དེར་བོད་དུ་རྒྱ་མི་བསླེབ་རྒྱུ་ཡིན་པ་དང། སྐབས་དེར་༸གོང་ས་མཆོག་ལ་དུས་ཚོད་བཟང་པོ་ཡོད་ནའང་ལྷོད་གཡེང་དབང་གིས་སློབ་སྦྱོང་ལ་ཤུགས་དེ་ཙམ་སྐྱོན་ཐུབ་མེད་ཚུལ་དང། ད་ཆ་ཕྱིན་ཟིན་པའི་དུས་ཚོད་བཟང་པོ་དེ་སླར་ཐོབ་རྒྱུ་མེད་སྐོར་བཀའ་སྩལ་བ་མ་ཟད། སློབ་ཕྲུག་རྣམས་ཀྱིས་སློབ་སྦྱོང་གལ་ཆེ་ཡིན་པ་ཤེས་པའི་ཐོག་ད་ལྟ་སློབ་སྦྱོང་བྱ་རྒྱུའི་དུས་སྐབས་བཟང་ཤོས་ཡིན་པ་ཤེས་དགོས་སྐོར་དང། རྩེད་མོ་དེ་ལུས་པོའི་འཕྲོད་བསྟེན་ཆེད་ཡག་པོ་ཡིན་ནའང་སློབ་སྦྱོང་ཐོག་ཧུར་བརྩོན་དགོས་པ་དེ་བས་གལ་ཆེ་བ་ཡིན་སྐོར་དང། སློབ་སྦྱོང་བྱེད་ཚུལ་དེར་རིམ་པ་གསུམ་ཡོད་པ་དང། དང་པོ་དེ་དགེ་རྒན་ལས་ཐོས་རྒྱུ་དང་རང་གིས་བཀླག་རྒྱུ་དེ་ཡིན། སྐབས་འདིར་རང་གི་དགེ་རྒན་ལས་གང་ཐོས་པ་དང་དཔེ་དེབ་ནས་གང་མཐོང་བ་དེ་དག་ལ་སློབ་མ་རང་གིས་རིག་པས་དཔྱད་པ་བྱ་མི་ཐུབ་པས་སློབ་སྦྱོང་ཚད་ལྡན་ཞིག་ཆགས་མེད་སྐོར་དང། དེ་རྗེས་རིམ་པ་དང་པོའི་སྐབས་གང་མཐོང་བ་དང་ཐོས་པ་དེ་དག་ལ་བསམ་བཞིན་རིག་པས་དཔྱད་པ་བྱ་རྒྱུ་དེ་རིམ་པ་གཉིས་པ་ཡིན། དེ་ནས་གང་ཤེས་པའི་དོན་དེར་གོམས་འདྲིས་བྱ་རྒྱུ་དེ་རིམ་པ་གསུམ་པ་ཡིན་ཞེས་སོགས་བཀའ་སྩལ། མཐར་སློབ་ཕྲུག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་རབ་བྱུང་ཞིག་ཡིན་པའི་ཆ་ནས་ཐུགས་སྤྲོ་ཤོས་ཡོང་རྒྱུའི་གནད་དོན་གང་ཡིན་ཞེས་པའི་དྲི་བར་བཀའ་ལན་སྩལ་དོན།  རབ་བྱུང་གི་མི་ཚེ་ནི་རང་གི་ནང་མིའི་ཐོག་སེམས་ཁྲལ་གང་ཡང་བྱེད་དགོས་ཀྱི་མེད། དེར་བརྟེན་དོན་དང་བྱ་བ་ཉུང་བའི་མི་ཚེ་སྟབས་བདེ་ཞིག་ཡིན་པས་རབ་བྱུང་ཚོར་དུས་ཚོད་བཟང་པོ་ཡོད། འོན་ཀྱང་ལྟ་ཚུལ་དེ་རབ་བྱུང་བ་ཞིག་གི་ལྟ་ཚུལ་ཡིན་པས་མི་གཞན་ནས་ལྟ་ཚུལ་གཞན་ཡང་ཡོད་སྲིད་ཅེས་སོགས་ཀྱི་བཀའ་ལན་བྱམས་བརྩེ་ལྡན་པའི་ངང་ནས་སྩལ་ཡོད་པ་བཅས།།