༢༠༡༠ ཟླ་ ༡༠ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༨ རེས་གཟའ་ཟླ་བའི་ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་མཱ་རི༞་ཡ་ཨོ་ཏེ་རོ་ (Maria Otero) མཆོག་ཨ་རིའི་རྒྱལ་ས་ཝ་ཤིང་ཊོན་ནས་ཆེད་མངགས་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་དུ་ཨ་རིའི་མངའ་སྡེ་ཇོར་ཇི་ཡའི་གྲོང་ཁྱེར་ཨེ་ཊ་ལེན་ཌར་མཁའ་ལམ་བརྒྱུད་ཕེབས་ཡོད། དེ་ཡང་གོང་ཚེས་ཉིན་༸གོང་ས་༸སྐྱབས་མགོན་ཆེན་པོ་མཆོག་དང་ལྕམ་སྐུ་མ་རི་ཡ་ཨོ་ཏེ་རོ། བཙན་བྱོལ་བོད་གཞུང་གི་བཀའ་བློན་ཁྲི་པ་སློབ་དཔོན་ཟམ་གདོང་རིན་པོ་ཆེ་མཆོག ༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་བཅས་ལྷན་འཛོམས་མཛད་ཡོད། སྐབས་དེར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་མཱ་རི༞་ཡ་ཨོ་ཏེ་རོ་མཆོག་གིས་བོད་ཀྱི་གནད་དོན་དེ་རྒྱ་ནག་དང་ལྷན་ཞི་བའི་ཐོག་ནས་སེལ་ཐབས་ཡོང་རྒྱུར་ཨ་རིའི་གཞུང་གིས་རྒྱབ་སྐྱོར་ཞུས་ཡོད། གཞན་ཡང་གནད་དོན་དེ་དང་འབྲེལ་ནས་ཨ་རིའི་ནང་སྲིད་ལས་ཁུངས་ཀྱི་ལས་བྱེད་པ་ཞིག་གིས་འགྲེལ་བརྗོད་གནང་དོན།  ཨ་རིའི་བོད་དོན་དམིགས་བསལ་འབྲེལ་མཐུད་པ་མཆོག་དང་༸གོང་ས་མཆོག་གི་མཇལ་འཕྲད་དེ་ཕྱོགས་གཉིས་ཀས་མོས་མཐུན་ཡོད་པའི་གནད་དོན་ཐོག་བགྲོ་གླེང་ཞུ་ཆེད་སྒེར་གྱི་མཇལ་འཕྲད་གནང་བ་ཞིག་རེད། ཕྱོགས་མཚུངས་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་ནས་མཇལ་འཕྲད་དེ་དང་འབྲེལ་བའི་སྐོར་གསུངས་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་འོག་ཏུ་འཚེ་བ་མེད་པའི་ལམ་ལ་རྟེན་པའི་དབུ་མའི་ལམ་གྱི་ཐབས་ལམ་བརྒྱུད་བོད་མི་ཚོར་ཐོབ་ཐང་ཡོང་ཐབས་འབད་བརྩོན་མཛད་བཞིན་ཡོད་སྐོར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་མཱ་རི༞་ཡ་ཨོ་ཏེ་རོ་མཆོག་ལ་ནན་བརྗོད་མཛད་ཡོད། སྐབས་དེར་ལྕམ་སྐུ་མཱ་རི༞་ཡ་ཨོ་ཏེ་རོ་མཆོག་གིས་ཨ་རིའི་སྲིད་འཛིན་ཨོ་བྷ་མའི་སྲིད་གཞུང་གིས་༸གོང་ས་མཆོག་གི་དབུ་མའི་ལམ་དེར་རྒྱབ་སྐྱོར་ཡོད་སྐོར་སྙན་སྒྲོན་ཞུས་པར་མགོན་པོ་གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་ཡོད་པ་སོགས་གསུངས་ཡོད།།