༢༠༡༠ ཟླ་ ༡༠ ཚེས་ ༡༢ རེས་གཟའ་མིག་དམར།
༄༅། །འདི་གར་བོད་གཞུང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ཟླ་ ༡༠ ཚེས་ ༡ ཉིན་བོད་གཞུང་ཨ་རི་སྐུ་ཚབ་དོན་གཅོད་ཁང་ནས་ཨ་རིའི་གྲོང་ཁྱེེར་ནིའུ་ཡོཀ་ནང་ཡོད་པའི་བོད་པའི་ཚོགས་སྐྱིད་ཁག་ཉི་ཤུ་ལྷག་ཙམ་གྱི་ཚོགས་གཙོ་དང། དྲུང་ཆེ། ནིའུ་ཡོཀ་དང་ནིའུ་འཇར་སི་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་དོན་གཅོད་ལས་ཁུངས་སུ་གདན་འདྲེན་ཞུས་ཏེ་སྣེ་ལེན་གྱི་འདུ་འཛོམས་ཤིག་གནང་ཡོད། སྣེ་ལེན་འདུ་འཛོམས་ཀྱི་དགོས་པ་གཙོ་བོ་ནི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་དང་། ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་ས་ཁང་འགན་འཁུར་བས་སྤྱི་མཐུན་ཚོགས་པའི་སྤྱི་ཁང་ཉོ་རྒྱུའི་གནས་སྟངས་གསར་ཤོས་འགྲེལ་བརྗོད་བྱེད་རྒྱུ་དང་། དོན་གཅོད་མཆོག་ནས་རྒྱ་ནག་གཞུང་གིས་བཙན་བྱོལ་བོད་མིའི་ཆིག་སྒྲིལ་གྱི་ནུས་པ་མེད་པ་བཟོ་རྒྱུའི་བསམ་བློ་ཡོད་པའི་སྐོར་འགྲེལ་བརྗོད་དང་དྲན་སྐུལ་བྱེད་རྒྱུ། དེ་བཞིན་ཚོགས་སྐྱིད་ཁག་བརྒྱུད་དོན་ཁང་དང་། བྱང་ཨ་རིའི་བོད་མིའི་དབར་གྱི་འབྲེལ་བ་དང་ཕན་ཚུན་ཤེས་རྟོགས་ཟབ་ཏུ་གཏོང་རྒྱུ་དེ་ཡིན་འདུག དེ་འདྲའི་དམིགས་ཡུལ་གཞི་ལ་བཞག་ནས་སྐུ་ཚབ་དོན་གཅོད་མཆོག་གིས་འདུ་འཛོམས་ཐོག་གསུང་བཤད་གནང་སྐབས། ནིའུ་ཡོཀ་དང་ནིའུ་འཇར་སི་ས་ཁུལ་ནི་བྱང་ཨ་རིའི་ནང་བོད་མི་འདུས་སྡོད་མང་ཤོས་ཀྱི་ས་ཁུལ་ཞིག་ཡིན་ཡང་། ད་བར་རང་བདག་གི་སྤྱི་ཁང་མེད་རྐྱེན་ཕྱི་ལ་ཚོགས་ཁང་གཡར་རྒྱུར་འགྲོ་སོང་ཧ་ཅང་ཆེ་བ་སོགས་ཀྱི་དཀའ་ངལ་མང་དག་ཅིག་ཡོད་པ་ཚང་མས་མཁྱེན་གྱི་རེད། དེར་བརྟེན་ད་ཆ་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་ཨ་རིའི་སྒོར་མོ་ས་ཡ་བཞི་ལྷག་ཙམ་གྱི་སྤྱི་ཁང་ཞིག་ཉོ་རྒྱུར་ཁང་བདག་དང་སྐད་ཆ་བྱེད་བཞིན་ཡོད། སྤྱི་ཁང་ནི་མི་མང་གི་ཆེད་དུ་བེད་སྤྱོད་བྱེད་རྒྱུའི་སྤྱི་པའི་ཁང་པ་ཞིག་ཡིན་པས་མང་ཚོགས་རང་ངོས་ནས་སེམས་དང་བྱ་སྤྱོད་གཉིས་ཀའི་རྒྱབ་སྐྱོར་མེད་ན། སྤྱི་ཁང་གསར་ཉོ་བྱེད་རྒྱུ་ཟེར་བ་ནི་སྟོང་བཤད་ཙམ་རེད། དོན་གཅོད་ལས་ཁུངས་དང་བོད་རིགས་སྤྱི་མཐུན་ཚོགས་པས་ཁང་བདག་དང་སྐད་ཆ་བྱེད་བཞིན་པའི་སྤྱི་ཁང་གི་གནས་སྟངས་ཞིབ་ཕྲ་ད་ལྟ་བོད་རིགས་སྤྱི་མཐུན་ཚོགས་པའི་ཚོགས་གཙོས་ངོ་སྤྲོད་གནང་གི་རེད། དེ་རིང་འདིར་འདུས་པའི་ཚོགས་སྐྱིད་ཁག་བརྒྱུད་དེའི་ཐོག་ནུས་པ་ལྡན་པའི་ཤུགས་སྣོན་ཐེབས་ཐུབ་པ་ཞིག་གནང་ཐུབ་པའི་རེ་བ་ཡོད། ཞལ་འདེབས་བསྡུ་ཕྱོགས་དང་། བུ་ལོན་གཡར་ཕྱོགས། སྤྱི་ཁང་གང་འདྲ་བྱས་ནས་བེད་སྤྱོད་གཏོང་རྒྱུ་སོགས་ཡོང་རྒྱུའི་ཟླ་ཤས་ནང་རིམ་པས་ངོ་སྤྲོད་ཞུ་གི་ཡིན་ཞེས་གསུངས། ཡང་དོན་གཅོད་མཆོག་ནས་གསུང་དོན། ཉིན་ཤས་སྔོན་རྒྱ་ནག་གཞུང་གི་དྲ་རྒྱའི་ཐོག་སྤེལ་བའི་གནས་ཚུལ་ནང་། བཙན་བྱོལ་བོད་མིའི་སྤྱི་ཚོགས་ཀྱི་འགལ་བ་བེད་སྤྱོད་གཏོང་དགོས་པ་དང་། བཙན་བྱོལ་བོད་མིའི་ཁྲོད་ཀྱི་མི་རབས་གཉིས་པ་དང་མི་རབས་གསུམ་པའི་བློ་སེམས་འགུག་ཐབས་བྱེད་དགོས་པ། ཏཱ་ལའི་རུ་ཚོགས་དང་ཁ་གཏད་བྱེད་མཁན་གྱི་མི་སྣ་རྣམས་རྒྱ་ཕྱོགས་སུ་འགུག་ཐབས་བྱེད་དགོས་པ། ཀླད་རྙིང་མཁྲེགས་བཟུང་གི་སྒོ་ནས་ཏཱ་ལའི་རུ་ཚོགས་ཀྱི་རྗེས་སུ་འབྲངས་མཁན་དང་། ཏཱ་ལའི་ཉེ་འགྲམ་དུ་ལས་ཀ་བྱེད་མཁན་ཚོའི་འགུལ་སྐྱོད་ལ་མྱུལ་ཞིབ་སོ་ལྟ་བྱས་ནས་ཁོང་ཚོའི་ནུས་པ་རྩ་མེད་བཟོ་དགོས་པ། ཏཱ་ལའི་རུ་ཚོགས་ལ་མཐོང་ཚུལ་ཡོད་པའི་མི་རྣམས་ལ་མཐུན་རྐྱེན་སྦྱར་ནས་ཏཱ་ལའི་རུ་ཚོགས་ལ་ཁ་གཏད་བྱེད་མཁན་གྱི་ནུས་པ་ཆེ་རུ་གཏོང་དགོས་པ། ཟེར་བ་སོགས་ཀྱི་དོན་ཚན་བརྒྱད་ཅན་གྱི་གནས་ཚུལ་ཞིག་རྩོམ་ཡིག་གི་ལམ་ནས་དྲྭ་རྒྱའི་ནང་བཀོད་འདུག རྒྱ་ནག་གཞུང་གིས་བསམ་བློ་གཏོང་སྟངས་དེ་ཚོ་ང་ཚོས་དེ་རིང་གཞི་ནས་ཤེས་པ་ཞིག་མ་རེད། ཡིན་ན་ཡང་ད་ལམ་ཡོངས་གྲགས་རྩོམ་ཡིག་གི་ལམ་ནས་གནས་ཚུལ་སྤེལ་བ་དེ་ནི་ང་ཚོར་ཡིད་ཟབ་དགོས་པའི་དྲན་སྐུལ་བྱས་པ་དང་མཚུངས་པས། དེ་རིང་མང་ཚོགས་དང་ཐད་ཀར་འབྲེལ་བ་ཡོད་པའི་ཚོགས་སྐྱིད་ཁག་གི་ཚོགས་གཙོ་དྲུང་ཆེ་རྣམ་པ་བརྒྱུད་རྒྱ་ཆེའི་མང་ཚོགས་ཀྱིས་སྔར་ལས་ལྷག་པའི་དོ་སྣང་ཡིད་ཟབ་དགོས་ཀྱི་འདུག་ཅེས་དྲན་སྐུལ་ཞུ་འདོད་བྱུང་ཞེས་གསུངས། དེ་རྗེས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་བཟང་པོ་ལགས་དང་། སྤྱི་མཐུན་ཚོགས་པའི་ས་ཁང་ལས་དོན་གྱི་འགན་འཁུར་བའི་གྲས་འཇིགས་མེད་སྒོ་རབ་ལགས་ནས་ད་ལྟ་ཁང་བདག་དང་ཉོ་ཚོང་སྐད་ཆ་བྱེད་བཞིན་པའི་སྤྱི་ཁང་གི་བཟོ་དབྱིབས་དང་། ཁོར་ཡུག་གནང་སྟངས། སྤྱི་ཁང་ཉོ་ཐུབ་ན་དེ་ལ་དགེ་མཚན་དང་ཁྱད་ཆོས་ཇི་ཡོད། སྤྱི་ཁང་གི་གོང་ཚད། ད་དུང་འདུ་འགོད་ག་ཚོད་དགོས་པ། མ་འོངས་ཁེ་འབབ་ཇི་ཡོད་ཀྱི་ཚོད་རྩིས་བཅས་ས་ཁང་དང་འབྲེལ་བའི་ཞིབ་ཕྲའི་གནས་ཚུལ་རྣམས་བལྟས་ན་མཐོང་རྒྱུ་ཡོད་པའི་བརྙན་པར་གྱི་ལམ་ནས་རས་གཞིའི་ཐོག་ངོ་སྤྲོད་གནང་ཡོད་ཅིང་།འདི་ཚེས་ ༩ རེས་གཟའ་སྤེན་པའི་གུང་སེང་དང་སྟབས་བསྟུན་ནས་སྤྱི་མཐུན་ཚོགས་པའི་གོ་སྒྲིག་འོག་མང་ཚོགས་རྣམས་སྤྱི་ཁང་ཡོད་སར་དངོས་སུ་ལྟ་སྐོར་ལ་ཕེབས་རྒྱུའི་འཆར་གཞི་ཡོད་པ་རེད། སྐུ་ཚབ་དོན་གཅོད་ཁང་ནས་གོ་སྒྲིག་གནང་བའི་སྣེ་ལེན་གྱི་འདུ་འཛོམས་དེར་གཞོན་ནུ་ལྷན་ཚོགས་དང་། བུད་མེད་ཚོགས་པ། ཆུ་སྒང་ཚོགས་པ། སྐྱིད་གྲོང་སྐྱིད་སྡུག ཁྱུང་པོ་སྐྱིད་སྡུག ཏྲེ་ཧོར་སྐྱིད་སྡུག རི་བོ་ཆེ་སྐྱིད་སྡུག རི་དཀར་སོག་གསུམ་སྐྱིད་སྡུག ལི་ཐང་སྐྱིད་སྡུག སྒོར་གཞས་སྐྱིད་སྡུག སྡེ་དགེ་སྐྱིད་སྡུག བརྩེ་ཆེན་ས་སྐྱ་སྐྱིད་སྡུག ལྷ་ས་མཐུན་གྲོགས་སྐྱིད་སྡུག སྨར་ཁམས་སྐྱིད་སྡུག སྒ་པ་སྐྱིད་སྡུག ཨ་མདོ་སྐྱིད་སྡུག ནང་ཆེན་སྐྱིུད་སྡུག བྲག་གཡབ་སྐྱིད་སྡུག འབའ་པ་སྐྱིད་སྡུག བོད་རིགས་སྤྱི་མཐུན་ཚོགས་པའི་རྒྱུན་ལས་ཡོངས་རྫོགས་ཐོག་དོན་གཅོད་ཁང་གི་ལས་བྱེད་བསྡོམས་ཁྱོན་མི་གྲངས་དྲུག་ཅུ་ལྷག་ཙམ་མཉམ་ཞུགས་གནང་ཞིང་། སྣེ་ལེན་འདུ་འཛོམས་ཀྱི་འགྲོ་སོང་ཡོངས་རྫོགས་ནིའུ་ཡོཀ་དང་ནིའུ་འཇར་སི་ས་གནས་བོད་རིགས་སྤྱི་མཐུན་ཚོགས་པས་གནང་ཡོད་པ་བཅས།།