༢༠༡༠ ཟླ་ ༡༠ ཚེས་ ༢༠ རེས་གཟའ་ལྷག་པ།

༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༧ ཉིན་རྒྱ་གར་མཧཱ་རཱ་ཤེ་ཊའི་མངའ་སྡེའི་གྲོང་ཁྱེར་ཝར་ཌའི་ནང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ལས་འགུལ་ཚོགས་པས་སྦག་སྦག་སྐོར་སྐྱོད་གོ་སྒྲིག་གནང་སྟེ་བོད་དོན་ལ་རྒྱབ་སྐྱོར་གྱི་རྣམ་པ་སྟོན་ཡོད། དེ་ཡང་སྦག་སྦག་སྐོར་སྐྱོད་ཐོག་ཁྱོན་མི་གྲངས་ ༡༠༠ ཙམ་གྱིས་མཉམ་ཞུགས་གནང་ཡོད་པ་མ་ཟད། སྦག་སྦག་སྐོར་སྐྱོད་དེ་མཧཱ་ར་ཤེ་ཊའི་གྲོང་ཁྱེར་ཝར་ཌ་ནས་ནཱག་པུར་བར་བསྐྱོད་ཡོད། སྐོར་སྐྱོད་ལས་འགུལ་དབུ་འཛུགས་སྐབས་ཝར་ཌ་ས་གནས་གྲོས་ཚོགས་ཀྱི་འཐུས་མི་སུ་རེ་སི་ཌེ་ཤི་མུཀ་ (Prof.Suresh Deshmukh) ལགས་ཀྱིས་དར་ཆ་ལྗང་ཁུ་གཡུག་སྟེ་ལས་འགུལ་འགོ་བཙུགས་ཡོད། ཐེངས་འདིའི་སྦག་སྦག་སྐོར་སྐྱོད་ཀྱི་དམིགས་ཡུལ་ནི། བོད་རང་དབང་། རྒྱ་གར་སྐྱོབ། (Free Tibet, Save India) ཅེས་བཞག་ཡོད། སྦག་སྦག་སྐོར་སྐྱོད་དེ་རྒྱ་གར་གྱི་རྡ་ཤེ་རའི་དུས་ཆེན་ (Dashera Festival) དང་སྟབས་འཁེལ་བ་དང། བྷ་བྷ་ས་ཧིབ་ཨམ་སྦེཌ་ཀར་ (Dr.Baba Sahib Ambedkar) གྱིས། ཆོས་འཁོར་ཉིན་མོ་ (Dharmachakra) ཞེས་པའི་དུས་ཆེན་དབུ་བཙུགས་ཏེ་མི་ལོ་ཧྲིལ་པོ་ ༥༤ འཁོར་བའི་དུས་དྲན་མཛད་སྒོ་དང་སྟབས་བསྟུན་པ་ཞིག་ཡིན་འདུག ཆོས་འཁོར་དུས་ཆེན་སྲུང་བརྩི་ཞུ་ཆེད་རྒྱ་གར་མཧཱ་རཱ་ཤེ་ཊའི་གྲོང་ཁྱེར་ནཱག་པུར་གྱི་སྡི་ཤ་བྷུ་མི་ཞེས་པའི་ཐང་ཆེན་དུ་རྒྱ་གར་རྒྱལ་ཡོངས་ནས་མི་གྲངས་འབུམ་ ༡༥ ཙམ་འདུ་འཛོམས་བྱུང་ཡོད། སྐབས་དེར་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ལས་འགུལ་ཚོགས་པ་དང་ས་གནས་གཞོན་ནུ་དང་བུད་མེད་ཚོགས་པ། བྷན་དྷ་ར་ནོར་རྒྱས་གླིང་གཞིས་ཆགས། གྲོང་ཁྱེར་ནཱག་པུར་གྱི་ཧིན་བོད་མཛའ་འབྲེལ་ཚོགས་པ། བྷན་དྷ་རའི་ཧིན་བོད་མཛའ་འབྲེལ་ཚོགས་པ་བཅས་ཀྱིས་ཐང་ཆེན་དེར་འདུ་འཛོམས་བྱུང་བའི་མི་མང་ཚོར་བོད་ཀྱི་གནད་དོན་སྐོར་བྲིས་པའི་ཤོག་བུ་དང་སྦྱར་ཡིག་གང་མང་ས་གནས་ཡུལ་སྐད་མ་ར་ཐི་དང་ཧིན་རྡི། དབྱིན་ཇི་སོགས་ཀྱི་ནང་བསྒྱུར་ཏེ་འགྲེམས་སྤེལ་བྱས་ཡོད། སྦག་སྦག་སྐོར་སྐྱོད་གནང་མཁན་རྣམས་ནཱག་པུར་དུ་འབྱོར་སྐབས་བྷན་དྷ་ར་ནོར་རྒྱས་གླིང་གཞིས་ཆགས་ཀྱི་ས་གནས་གཞོན་ནུ་དང་བུ་མེད་ལྷན་ཚོགས་ཀྱིས་ཁོང་རྣམས་ལ་ཁ་བཏགས་ཕུལ་ཏེ་ཕེབས་བསུ་གཟབ་རྒྱས་ཞུས་ཡོད། དེ་བཞིན་སྦག་སྦག་སྐོར་སྐྱོད་དེ་ཌི་ཤ་བྷུ་མིར་མཇུག་སྒྲིལ་གནང་ཡོད་པ་བཅས།