༢༠༡༠ ཟླ་ ༡༠ ཚེས་ ༡༨ རེས་གཟའ་ཟླ་བ།
༅༅། །འདི་གར་དབྱིན་ཡུལ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༠ ཚེས་ ༡༣ ཉིན་ཨ་བྷར་ཌིན་དུ་རྟེན་གཞི་བྱས་པའི་གྷ་རམ་ཕི་ཡན་བོད་དོན་རྒྱབ་སྐྱོར་ཚོགས་པ་ (Tibet Support Group Grampian) དང་ཨ་བྷར་ཌིན་ཆབ་སྲིད་དང་རྒྱལ་སྤྱིིའི་འབྲེལ་ལམ་གྱི་གཙུག་ལག་སློབ་ཁང་ (University of Aberdeen Politics and International Relations Society) གཉིས་ཀྱིས་གོ་སྒྲིག་ཐོག་བྱང་ཡུ་རོབ་ཀྱི་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱིས་ཨ་བྷར་ཌིན་གཙུག་ལག་སློབ་ཁང་དུ་བོད་མིའི་རྩོད་རྙོག་སེལ་རྒྱུའི་ཐབས་ལམ། (Conflict Resolution:The Tibetan Solution) ཞེས་པའི་བརྗོད་གཞིའི་ཐོག་གསུང་བཤད་གནང་ཡོད། ཚོགས་འདུའི་སྐབས་ཁྱོན་མི་གྲངས་ ༡༠༠ བརྒལ་བ་མཉམ་ཞུགས་གནང་བའི་ནང་ཕལ་ཆེ་བ་སློབ་ཕྲུག་ཡིན་འདུག གཞན་ཡང་ཚོགས་འདུའི་སྐབས་ཚོགས་བཅར་བ་མང་པོས་བོད་ཀྱི་གནད་དོན་དེ་རྒྱལ་སྤྱིའི་ལྡིངས་ཆའི་ཐོག་བསླེབ་རྒྱུ་གལ་ཆེ་ཡིན་སྐོར་གྱི་བསམ་ཚུལ་བཏོན་འདུག ཕྱོགས་མཚུངས་སྐུ་ཚབ་དོན་གཅོད་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གཞུང་དང་གྲོས་མོལ་གྱི་ལམ་ནས་བོད་ཀྱི་གནད་དོན་སེལ་ཐབས་མཛད་བཞིན་པ་དང། བོད་ཀྱི་གནད་དོན་དེ་༸གོང་ས་༸སྐྱབས་མགོན་ཆེན་པོ་མཆོག་སྐུ་འཚོ་བཞུགས་ཐོག་གང་མྱུར་སེལ་ཐུབ་པ་བྱ་རྒྱུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་གྲུབ་བསྟུན་སྐུ་ཚབ་དོན་གཅོད་མཆོག་དང་གྷ་རམ་ཕི་ཡན་བོད་དོན་རྒྱབ་སྐྱོར་ཚོགས་པའི་ཚོགས་མིའི་དབར་བགྲོ་གླེང་ལྷུག་པོ་ཞིག་ཀྱང་གནང་ཡོད། ཚོགས་འདུའི་སྐབས་གཏམ་བཤད་གནང་རྒྱུའི་རྒྱབ་ལྗོང་གཙོ་བོ་དེ། བཙན་བྱོལ་བོད་གཞུང་གིས་བཏོན་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་སྐོར་ཡིན་འདུག བསམ་ཆར་གྱི་ཡིག་ཆ་དེའི་ནང་བོད་ཀྱི་དཀའ་རྙོག་དེ་དབུ་མའི་ལམ་གྱི་ཐབས་ལམ་ནས་སེལ་དགོས་པ་གསུངས་ཡོད། ཚོགས་འདུའི་སྐབས་དབུ་མའི་ལམ་གྱི་ཐབས་ལམ་དེས་འཛམ་གླིང་ནང་རྩོད་རྙོག་གཞན་མང་པོ་སེལ་རྒྱུའི་ཐབས་ལམ་བཟང་ཤོས་ཤིག་ཡིན་པར་བརྟེན། ཆབ་སྲིད་དང་རྒྱལ་སྤྱིའི་འབྲེལ་ལམ་སྐོར་གྱི་སློབ་ཚན་ལེན་མཁན་སློབ་ཕྲུག་ཚོར་འབྲེལ་བ་ཡོད་པ་མ་ཟད། དམིགས་བསལ་སི་ཀོཌ་ལེན་གྱི་གནས་སྟངས་ (Scottish Context) དང་ཧ་ཅང་འབྲེལ་བ་ཆགས་ཡོད། གང་ཡིན་ཟེར་ན་སི་ཀོཊ་ལེན་གྱི་རྒྱལ་ས་ཨེ་ཌིན་བྷར་ (Edinburgh) དུ་རྟེན་གཞི་བྱས་པའི་སི་ཀོཊ་ལེན་གྲོས་ཚོགས་ཀྱིས་དབྱིན་ཇིའི་འོག་ཚད་མཐོའི་རང་སྐྱོང་གི་དབང་ཆ་ལོངས་སུ་སྤྱོད་བཞིན་ཡོད་སྐོར་སོགས་གསལ་བཤད་བྱུང་ཡོད་པ་བཅས།།